نساء مخمليات

الفصل الاول فخرية وكاطع جانت ليلة الخميس حنة فخرية اللي توها صار عمرها اربطعش سنة ... التمو الجيران وانجمعوا من كل بيت بالدربونة... الدربونة بذاك الوكت جانت مغربية شويه ظلمة وهي حيل ضيكة صفت البيوت بابوابها الخشبية من الجانبين ومجان اكو مجال لاكثر من نفرين يمر بيها وكالعادة جان المجرى يقسم الدربونة يمنى ويسرى على الرغم من الشوارع والبيوت القديمة لكن نادرا ونادرا جدا تلكى كدام بيت وصاخة هاي اذا مو نظيف ويلمع همين ... طبع البيوت شويه نازلة عن الرصيف بطرمه يسموها المجاز ومتعلمين اهل بغداد يخلون بردة تماما بظهر الباب الخشب ابو الطلاكتين حتى من ينفتح لا تبين حرمهم نسوانهم يعني وهنه يفترن بالحوش... بيت ابو فخرية جانوا يسموهم بيت ابو جاسم ... بيتهم كلش قديم وعتيك وبابه مصبوغ سمائي على اخضر والصبغ نصه واكع.. ومن جوه نصه مهدوم ...ويادوبك مكفيهم بليلة الحنة يفرغ البيت من الزلم وينحصر الحضور بيه بس للنسوان ... .... وجوي النسوان والبنات الصغار والجهال التموا يشوفون فخرية يحطلوها حنة بايديها ورجليها ...طبعا يختارون اللي تحني كاكثر وحدة محظوظة ...والمحظوظة الي تتمتع بحب رجلها ودلاله واللي مايبخل عليها بالمصروف وطبعا يختارونها وحدة من الموجودات سواء كرايب او جيران ..والتزكية لازم تكون من الاغلبية ... ابو فخرية جان حمال هم بسوك الص*رية وقبل فترة جانت عنده عربانه يبيع بيها فواكه وخسر وكثروا ديانته انطى العربانه لابنه الجبير جاسم يدبر اموره بيها وهو رجع لشغلته الاولانية الحماله .. وجاسم اخذ العربانة وصار يوكف بساحة صغيرة براس الشارع ويبيع لاهل المحلة .. .يعني يروح يجيب شكو مسواك رخيص ويخلي عليهن جم فلس بلكت يطلع يومية ها ومرات جان حتى بالخسارة يبيع من تبدي تتلف بضاعته ... اغلب الناس بذاك الوكت جانوا بسطاء بماكلهم ومشربهم وحتى لبسهم الزنكين منهم عود اللي جان يكدر يبدل مرتين تلاثه بالاسبوع ... وغير جاسم، فخرية جان عدها تلاث اخوان واخت وحدة بدرية ...بذاك الوكت جان عمرها سبع سنين بنيتنه الحبابة فخرية اخذها ابن دربونتهم كاطع الي جان يكبرها سبع سنين ويشتغل بمحل بهارات بالشورجة ...يعني عايش على اليومية ومن كبر ونسوان المحلة بعد حجوا لامه لازم تزوجه ..ولانه جانت فخرية احلى بنية بالدربونة وبت صديقتها لام جاسم وتعرف عنها وعن اهلها كل صغيرة وجبيرة ...راسا راحت حجت ويه امها وخطبها وبساعتها تمت الموافقة ... وكل الخطوبة والحنة والعرس ماطول اكثر من شهر ،شهر ونص وصارت القسمة وجابولها نيشانها معضد وزوج تراجي... وحتى الزفة هم جانت بسيطة وعلى هاالكد ... يلبسون العروس بدله بيضة يروحون يداينونها من اخر وحدة اتزوجت لو وحدة تدبرلهيا من خانم عرف عدها هيجي بدلةعلى قياسها ... ويجي العريس يزفوه ولد المحلة يمشي بصف عروسته والهلاهل والموسيقى داير مدايرهم والنسوان وراهم شايلات جهازها ببقج على روسهن واهم شي اللحاف الابيض ابو وجه الستن الوردي والمخدات الستن الطويله جنها طابوكة ... همه بوكتها اتزوجوا بشهر تموز بعز الحر وكعدوا بكبة بالحوش اللي جان اهله هم كاعدين بيه امه وخواته الاثنين الصغيرات ...نورية وزهورة ...تقريبا عشر وثمن سنين اعمارهم جانت .. وجان اكو بكبة ثالثة الشايب والعجوز ...رجال هو ومرته كبار بالعمر هذوله المساكين جان عدهم بس ولد اثنين و من وهمه وصغار استشهدوا بحرب العثمانين ... وماصفالهم اي احد بعد المرة العجوز صارت سنة ورة سنة عقلها موشي ... ومكامت تسمع وتشوف والشايب هو اللي جان يداريها ومرات يجون يمها صديقاتها من ايام كبل لو الجوارين تعرفون يسوون هاي اللي يكدرون عليه ... وحتى الايجار جان مرات هو كاطع نفسه يطلع ويدفع بدل عنهم ... بوكتها جان بعده الحكم الملكي موجود ونور السعيد يحكم ... فخريةماتتذكر شوكت بيا سنة جتي للدنيا بس تكول اتزوجت قبل الثورة بسنة يعني تقريبا مواليدها اربعة واربعين ...وتكول جانت ضخمة وطويله من جانت بصف ثالث ابتدائي ابوها الحمال بطلها بعد من المدرسة كلها لامها بتج بينت تعاليم جسمها واستحي تمشيي الصبح كدام ولد المحلة تروح للمدرسة مع انه خطية جانت تلبس عباية بس لانه تلبس تنورة قصيرة وقميص زي مدرستها ... وظلت فخرية ايام وليالي تبجي على مدرستها لانه جانت شاطرة وتحب تصير معلمة من تكبر... الا ان بعد نستها وراحت هاي الاحلام وماتت ...ورة الزواج طبعا.... من اتزوجت هي كعدت اول اسبوع معززة ومدلله وتعرفون عروس قبل جان لازم ريوكها المتعارف عليه كيمر ومربى...وماتطلع من غرفتها عود عيب حتى لبيت اهلها ماتروح الا ورة اربعين يوم ويسموها فجة رجل ومن خلص الاسبوع بعد طلعت العروس من خدرها وكامت تكابل عمتها وحمواتها وتعاونهن بشغل البيت وجان كاطع طاير بيها من الفرح هو صح جان عمره بالعشرين بس اللي يشوفه يكول نهاية الثلاثينات جان مبين اكبر من عمره ...ويكزل من يمشي يعني عنده عرجه خفيفة ومشيته مشية عجايز ... بس ذاك الوكت محد يعيب ...اسمه رجال وكدر يتزوج ... هو جان معروف عنه خوش ولد ربى امه وخواته بعد ماغرك ابوه قبل خمس سنين ... وبدت عروستنا تشتغل ويه عمتها وحمواتها ينظفن ويغسلن الحوش والهدوم ...ويطبخن غدا وعشى وتعرفون شغل البيت ... ومن يجي رجلها تحضرله طشت مي و ملح تفركله رجليه ويغسل يتغدى وينام .. ومن يكعد يتعلل وياها بجاي وكعك لو ركي على السطوح ... قبل البيوت كلها بيها سطوح ينامون بيها الصيفية كلها وبنص البيت بيها خوش وحوض صغير وعلى كتر خالين طباخ صغير وسله مواعين وصواني الفافون الجبيرة ...وبصفها يحطوم كرويته يكعدون عليها وقريب على الباب جوة ضوة الشمس اللي يجي من السطح اكو مغسله الاصح شبه مغسله ومعلكين فوكاها جامة م**ور طرفها وملكعة زنجار وف*جة الحلاقة مال كاطع وصابونة ركي ... جان اذا مويومية فبين يوم ويوم يكعد الصبح ببجامته المقلمة وفانيلته البيضه يزين يله يطلع للشغل عود محسوب على الافندية .. ومن يرجع ورة مايكعد من نومة الظهرية يطلع يكابل ولدالمنطقة الي كلهم جوارين بعد ويلتمون ع على الكهوة ...منا وولورة نص الليل يله يرجع والنسوان بذلك الوكت ومن ضمنهن فخرية ومن جانت بنية واتزوجت هم وياهن يخلصن الليل كله يبدن يشتغلن يغزلن ويحوكن ليف وفجج ... الفجة مثل البساط او مدة صغيرة تنفرش بالكاع وينكعد عليها هم يرادله شغل وحياكة مثل الظفاير ومن يخلصن مجموعة ياخذنها لام غايب بالسوك تاخذ منهن وتبيعه للتجار لو اصحاب المحلات وتنطيهن هالمقسوم ومرات مياخذن الفلوس يشترن ابدالها زواكه واتكات لو كلش عباية والعبي جانن غاليات فهاي عاد الي تشتري تظل سنة يله تفك قسطها ... ومثل معظم الجناين والعمات تصير مشاكل ومناوشات منا ومنابنفس البيت انوبه حظ فخرية اول سنة مخلفت وكبت الدنيا عليها ومانزلت ومبقت جدة وملايه ماخذتها ام كاطع يمها ظلت تفرفر بيها عكة ومكة وماكو وهاي سنة ثانية هم مخلفت وبدت عمتها تنك على اذن ابنها اتزوج عليها هاي عاكر ماتخلف ... بس هو جان يحبها ويريد خاطرها لانه على كصتها اموره كلش تحسنت وكام بدال القرش قروش يجمع يوميه ...... والمسكينة ماخلت لاشيخ لاسيد لا دكتورة لاجدة مراحت عليها وبلا اي فايدة وجان رجلها كل جمعة يخليها تروح لاهلها والمسكينة تركض على امها تبجي وتشتكي من ظلمهم وظلايمهم وامها تصبر وتكلها حتى لو اتزوج عليج لاتفكرين ترجعين لبيت اهلج ابوج بعد مابيه يرجع يربيج من جديد يادوبك ملحك على العيشة ...وعلى اخوانج الصغار وهو اصلا حيله مهدود والوحيدة اللي جانت تشيل همها وحزنها جانت بدرية اختها الصغيرة ...اللي جانت تركضلها بالنذورة ...لو بالعمل ومن هالسوالف يم الملايات لانه صاحبتنا جانت تخاف واصلا ماتكدر تطلع بلا حس عمتها ورجلها ... وصارت الثورة سنة ٥٨ وسقط حكم الملكية وكام عبد الكريم قاسم يحكم ...شويه صار **اد اول ايام وبعدين رجعت امور الناس تنتعش وماكو سنتين من ورة الثورة مات ابو فخرية الحمال ... وهنا بدت مذلة البنية المسكينة من عمتها وحمواتها اللي كبرن بعد وكامن يعلمن حتى الجوارين يحجون بظهرها يم رجلها حتى يتزوج عليها ... بس كاطع جان يحبها و عنده امل بيها ومااجى من گلبه ي**ر خاطرها وهي اللي حانت الزوجة الفقيرة المطيعة اله واللي لحد هسه مكاسرتله كلمه وإداريه مثل المي اللي بالصينية. ..من يرجع لبيته يلكى كلشي حاضر من الغدا والعشا ويه جولة الي عليها الكتلي وفوكاه قوري الجاي لو السماور طبعا بس الي حالتهم زينة عنده وهو جا**ها واحد من سوريا جابهليا مخصوص تاجر من صدقانة والله واتحسنت احوال كاطع ... يعني مامقصرة وياه ابد ومن ايده هاي لايده ذيج وشماعملت امه وياها جانت صابرة ومتحمله ... جانت دومها مزوكة ومحمرة وتلبس وين ماكو نفنوف ضيك واسوي شعرها ظفاير لو تهدها على جتافها لو تلفهن طوبه ... ورة وفاة ابوها الله يرحمه كامت امها تشتكي وتبجي من العوز والاحتياج صح اخوانها يشتغلون بس بعدهم صغار يادوبك لو يطلعون لو مايطلعون الايجار فشتسوي شطلع من بيعة الليف تقسمه بالنص الها ولامها ادزها بيت اختها الصغيرة من تمر عليها ...منو عرف بيها اخت رجلها الجبيرة نورية كومي روحي ف*ني لامج ... كامت عمتها كلما بدرية اختها تجي وتروح تفتشها يله تطلع ... ضاكت بامها الحال ومالكت غير دز صاحبتها سهيلة واللي هم تصير جيران بيت ابو كاطع بحجة تمر عليهم تاخذ الفلوس وتطلع توديه الها... وهم بنوبها صارت صديقة صاحبتنا فخرية ... وبسنة واحد وستين ...بالشتوية كعدوا اهل الحوش على صوت الشايب يبجي وينوح بلاب الكبة المسكين .. اتاريها العجوز متوفية من غبشتها كوم ياكاطع انت والشايب روحوا جيبوا تابوت ومن ديحضرون الجنازة ثاني يوم وجان الشايب يلحكها هو هم المسكين مات والتموا رياجيل وولد المحلة واخذوهم ودفونهم كيف انهم ماعدهم احد لاعرف ولاكرايب يسالون عنهم ... ومن زراها كاطع وشويه تحسنت اموره قرر يشيل ويطلع من الحو ويشيل المنكقة اسمها الثعالبة اجر بيت هناك صح صغير وقديم بس ها احسن من ذيج الخنكة ... بس شنو صديقتها سهيلة ظلت تمر على صاحبتنا وتسال عليها كودا ماعدها بس هاي صاحبتها ... وسهيله هذه جانت ارملة وعدها بس اثنين بنات صغار كامت تشتغل تغسل هدوم الزكورتية اللي جايين من غير ولايات لبغداد وكاعدين بالفنادق ياللشغل ياللدراسة ياتعيين يعني هاي الفنادق العادية .. وماكو شهرين جتي فخرية تلهث لمحل رجلها بالشورجة ...هذا من شافها عصب عليها ولج شعندج هنا يامكموعة شجابج كلتله ابشرك يابعد روحي مو آنه حامل ... عاد والله ربكم سهل على البنية المسكينة وحبلت اخيرا ...هذا الحجي بالواحد وستين بعدهم ... جانت الدنيا بدت تتغير بيها هواية اشياء ...واتجددت مناطق وطلعت مناطق جديدة وانبنت بيوت جديدة ...بس هم الوضع ببغداد جان بعده يغلي وممستقر... ووبدت احوال اهلها المسكينة بالزايد تسوء كام اخوها جاسم يشرب وويدخن ومصدق شقوات المنطقة كلها ... ويوميه هاي تتكرضم وشيجيب اليوم اللي تروح تشوف بيها اهلها انوبه رجلها من سمع بهاي السوالف مصار مثل قبل يوديها كل يوم مطلعله حجى ... ولو هو هواية اتغير من صارت حامل وكام يدللها اكثر ويطلعها برة ياخذها ويروحون يوم للكاظم يوم لابو نؤاس يوم للكورنيش ...هيجي يعني ... وحتى صار يخليها تطلع وحدها مرات للسوك من تكله اروح اشتري جم شغلة للجاهل قبل جان المتعارف عليه اهل البنية يجهزون اول جاهل ...من كلشي من الكاروك والهدوم والحضاين وغيرها وتكعد الاماية تخيط وما تلحك فهاي جانت شتسوي من بوكة تروح تشتري قماشات ودزهم بيد سهيله لامها حتى تخيطهم وتاخذ من رجلها وادزهم حتى تشتريلها كاروك ختى تخلص من تعيارة عمتها وحمواتها .. في يوم جانت طالعة للسوك ...وجانت تشوف معلمتها اللي جانت تدرسها بالابتدائية على الرغم من انه صاحبتنا حامل وبطنها متر وعمرها يجي ثمنطعش سنة ... ركضت ختلت ورة الجنابر والعرباين وتعاين على معلمتها من بعيد وهي واكفه يم البزاز تشتري قماش لبتها وصاحتلها رحاب رحاب تحبين هذا المقلم لو المنقط! ذاك الوكت المعلم جان اله هيبته والطلاب من يشوفون معلمهم صدفة بالشارع ينهزمون ويختلون خجل واحترام خوما مثل هسه ! هي هم ضحكت بسرها وكالت ويه روحها حلو اسم رحاب جنه مدني ومال مثقفين محد مسمي منه من كرابتي ولا صاحباتي ورجعت فرخانه تسولف لرجلها هذا من يمه زمخ بيها وانت ليش تتفاولين ببنية ليش مو ولد ونسميه مسعود سعدون سعيد ... يفتحها الله بوجهنا ويكون وجه السعد علينا! وماكو بين يوم يوم جانت فخرية تلح على رجلها ياخذها لباب الشيخ اتنست على الشوربة مالتهم يوزوعها هناك للناس الكاعدة الي يمر ياخذ ماعون ياكل ويرجعه ... وهذا مايقبل وهي تلح عاد عمتها كامت واخذتها خافت لايطلع شي بالجاهل وهي كل املها تخلف فخرية ولد ويسموه سعدون واثناء ماهي حامل وبداية سنة ثنين ستين اخو سهيلة صاحبتهم خطب حماتها نورية الجبيرة ...جان هم توها سطعش سنة ... وبيوم من شهر الثاني مطر والطيانة واصلة للركب وباردة برد ذاك اللي يسموه برد العجوز ... بدت فخرية تطلك. ..وماكو واحد من الجيران نعرف بطلوكتها ...وراحت لجدة مهجة .. مرة عجوز وكبيرة بالعمر اكبر جدة واقدمهن وافضلهن على الاطلاق ها وكل هذا الجدة جانت عمية ... وظلت ليله بيومها تطلك البنية وماكو ولادة الى ان ثاني يوم يله ولدت .. وولدت بنية ومثل مرادت سمتها رحاب ... بس خطية المسكينة مالحكت تتهنا بولادتها ... صار اللي لا على الخاطر ولا على البال