بارت 12

2501 Words

العزومة اللي سواها كاطع لما اجى ابنه للدنيا جانت لية خميس على جمعة ... ثاني الصبح الكل كعدت من الغبشة ...وبدن البنات يلمن الدواشك ونورية تسوي ريوك وتساعدها زهوري ... وريحة الريوك والكاهي والكيمر والجاي المهيل جانت تنشم لسابع جار... عمة فخرية ام كاطع جانت لازمة ميلاد بحضنها كاعدة من النوم متنحسة ... والولد طلعوا للحديقة يلعبون ويكمزون وكعد كاطع من الصبح عادي گالب خلقته... وطالب لازم ابنه الصغير ويلعب وياه. .. البارحة من رجعوا ظل كاطع يسب ويلعن باهل فخرية والاخيرة ساكتة كلمة محجت ...انوب ابنها للصبح منايم غازات ابطنه ...يشربوه مي غريب ومديفيد وياه ...اخذته رحاب وقفلت الباب على امها تتنام شوية صبوا الريوك واتريكوا وراحت زهوري ورحاب يغسلهن الهدوم والحضاين ويشرنها بالحديقة وعلى السطح ونورية بالمطبخ تحضر غدا . . كاطع اخذ رجل زهوري طالب وراحوا لسوك الغزل واخذوا سامي ونزار وياهم .. ماكو شي ساعة اندك الباب وجانت سهيلة جارة بيدها نرجس وحفيدها... دخلت ووجها مكلوب كعدت بالصالة لاحس ولانفس ... ركضت رحاب باست سهيلة ومرة خالها اخذت سمير ابنها حتى يلعب وية ميلاد ... دخلت عليهن نورية وعمتها على سلمن عليهن وكعدن وظلت زهوري واكفة بالباب ... فظلت العيون تتداور بين النسوان ...عاد نورية كالت خيرج خيه سهيلة ... واندارت على امها جنج جاية على شغلة وشكلها عركة دادة... هي هم حسبت كالت اخاف هذه جاية تعاتبنا علمود نسيبها شالت سهيلة عبايتها ورجليها واتربعت كعدت على القنفة وصوتها مبحوح ووجها مصفر... فجاوبت نورية كالتلها خية مو يمجن السالفة انه جاية على فخرية بودي احاجيها انريد نفتهم هالطركاعة امل شنو وشوكت وكعت علينا .. عاد زهوري ركضت صاحت رحاب تبقى يم سعودي بالغرفة وتصيح امها وهي دتسوي الجاي... ظلن النسوان ساكتات وام كاطع تعاين عليهن وحدة وحدة وتلعب بظفاير ميلاد اللي عافت اللعب وجتي تكعد بحضن بيبيتها ... ماكو شوية ودخلت فخرية تسندها رحاب شوية شوية كوة تتحرك جنها هالمرة مابيها حيل حتى تمشي خطية جانت نايمة وكعدوها ومن عرفت سهيلة تريدها كامت ترجف من خوفها جنها هي اللي مزوجة علاء...امل على نرجس طبت خجلانه ومدنكه وابتسامة كوة على شفتها .. راحت على سهيله وباست راسها وسهيله حاطة اصابع ايديها على حلكها وزامه شفايفها وعينها بعين فخرية... عاد بصوت مرتعش سالتها ...شلونج يمه سهيلة شلونج داده نرجس... الحمد لله عيني فخرية وكرة عينج على سعودة يتربى بعزكم... الله يطول عمرج وان شاء الله تزفيه على ايدج .... ههه ظلت تباوع يمنى ويسرة فخرية وضامة ايديها الص*رها ولافة شعرها ضفاير وفارتها على راسها... فعاد بلشت سهيلة تحجي .... _ليش هيجي ليش يطلع منكم ولد ام جاسم شقصرنا وياكم هاي اني سهيلة اتربيتوا بحضني وبايدي وكلتكم هيجي تسوون بينا عاد راسا عاطت فخرية وقاطعت كلامها ... _والحسين والعباس ابو فاضل يكون انعمي اذا جنت اعرف واشرت على نورية والله لما نورية البارحة تحجيلي... نورية كامت تمتمت _اي عيني احنى هم منين نعرف لما گاطع يحجيها السالفة البارحة مو بله فخرية! اي والله دادة صخام لصخمه على هاي الدكة منين جانتلنا ... جاوبتهن سهيله وهي تغمز بعينها اليسرة ...عاد اي والله الله يصخم وجهه دنيا واخره الله لاينطيه ويحرك گلبه مثل ماحرك گلب بتي ... فام كاطع جاوبت سهيلة وحجت عليها انه مايجوز هيجي تدعي على ابن العالم كون هو هم نسيبها لاصار بيه شي هم يرجع عليها ... _شيصير بعد ام كاطع شيصير هاي تاليتها العشرة والجيرة صارلنا زمن سوى شقصرنا وياكم شقصرت بتي ويه اخوجن ! فخورة تعالي احجيلي شعايزها شناقصها جمال لو شهادة لو تربية ؟! شو شايلته البيت ومداريته بعيونها واول ماخلفت ذبتله الولد بحضنه وناس صارلهم عشرين سنة يتحسرون على الولد نورية قاطعتها من حست الحجاية تعيارة لفخرية واخوها عيني سهيلة...الجهال قسمة ونصيب والبنات رزق من الله الله يخلي بناتج ويحفظهن ... اكيد مايلكى مثل نرجس وهو لوما يعرفها ويعرف اصلها وفصلها مايتزوجها ويكتب البيت باسمها صح لو انه غلطانه نرجس كامت تبجي ودموعها تكت ...عيونها الزرك الذبلانت وشعرها اللي نايم على وجهها **ر خاطرهن كلهن ... جابت زهوري الجاي وسهيلة طلبت منها فد حباية مال وجع راس هم وياها وفردجكارتين من ملات كاطع ... عاد ام كاطع صاحت يله صلن على النبي وشربن جايجن لج زهورة جيس الكليجة فوك الكاونتر جيبيه ...هههه اني ضامته من ايد الجهال وين مانخليه يطلعوه وياكلوه خطية البنات هاي صار مرتين يسوون ... ودفعت ميلاد عنها دوخري مجلبة بيه خليني اشرب الجاي روحي اخذي كليجة وروحي يم عهود عهود تعالي اخذي خيتج منا ... وراها ورثت جكارتها سهيلة وعين فخرية عليها وابتسامة خجلانه كوة على وجهها عيني فخورة البارحة اخوج بايت يم مرته الثانية تخابريه وتجيبيه نتفاهم الحق ماينزعل منه احنى بتنا ماتقبل عليها ضرة فجاوبت نرجس اي فخرية اني اريد اطلك امها اندارت عليها وكالتلها ووجع انجبي انت احنى ماعدنا بنات يطلكن ذيج ام السحورة هي اللي تطلك زين عيني احنى نريد حق بتنا واذا غلطانه بشي يجي يوكف بوجهي ويعاتبني لا يكول ماعدها اهل ماعجبه الوضع عاد ذيج الساعة النه غير كلام وياه _لاحشاكم ام جوري شلون ناعها اهل احنى اهلها هو منو ربانا غيرج يمعودة كولي غيرها جاوبت فخرية بصوت ناسي وهي كوة تبتسم _فنورية ضاجت من هالحجي وجاوبت سهيلة كلتلها داده ليش تسوون من الموضوع مشكلة وعركة ...وين تجبيه لهنا انت ناشفت شلون صارت عركة بينه وبين كاطع اخوية عيني نرجس علاء مقصر وياج بشي؟! من مصروف لو دكتور عليج على الجاهل؟!! لانه حسب ما اني اعرف اذا مو كل شهر فبين شهر وشهر هوة جايبلج صوغة ذهب واللبس كله من الاورزدي صح لو لا!؟ _ليش هي العيشة بس اكل وشرب نوري افندي! ردتها ام نرجس وهي تطفي الجكارة حيل بالنفاضة ... _لا موبس اكل وشرب بس خلي نشوف خلي تحجيلنا ...هو بارد وياج يعني مابيها شي احنى نسوان ووحدنا مقصر وياج بالفراش! دنكت نرجس وظلت تمسح خشمها لا هو مامقصر باي شي بس بياته بره البيت _عاد سهيلة اندارت على نورية ماعرفناج نوري افندي شو جنج ادافعين عن علاء وزواجته مافهمناج ؟! ام جوري ...الله شاهد وملاايكة الولد على اجتافي والواحد يحجي الحك .. من يوم مااتزوجت زهير وهو وعلاء صدقان مافي يوم سمعت عنه كلمة موزينة بالع** الولد محترم ويخاف الله بالصغيرة والجبيرة ... مااظن تطلع منه العيبة وهو شرعا ربج حلل اربعة ليش تخربون بيته اذا هو مامقصر وياها ليش اطلعين بتج من گلبه فكري زين سهيله بتج ام الولد والجهال ويحبها ويحترمها ومقدرها ياهي اللي بينا رجلها كاتبلها بيت باسمها؟! تعالي كوليلي... انت هم لاتخربين عليها عيشتها انت ماتعرفين شنو غرضه من زواجه منها وهي اصلا عاكر يعني مرجعه الاول والاخير لام جهاله _شوفي عيني نوري هذا الحجي تحجي على غيري اني بتي ماتعيش ويه ضره وقبل ماتكمل قاطعتها نورية سهيله كعدي راحة لا تهجمين بيت بتج ... مدامه ماشي عدل وياه لاتعوجوه وتگلبوه عليها بله شتسوين لو عند وركب راسه وماقبل يطلك امل؟! شتسوين سهيله اطلكين نرجس ووين تروح هي وبتها انوب تصير جوة ايد مرة قاسم تلعب بيها لعب ... ستري على بتج كومي نرجس يله كومي غسلي وجهج واني ارجعج لبيتج اذا سهيلة ماتقبل توديج لاتنسين احنى تربينا سوى وفي يوم هم جنت جنتكم ... وفخرية هم كامت وياهن اي دادة كومي يله روحي غسلي وجهج ورجعي لرجلج مايفيد عرك ومشاكل ليش تطلعين من گلبه والله يحبج ويريد خاطرج لاتخسرينه عيوني انت _اي اسمعي ظلي عزيزة وعاتبيه ولوميه اتعززي عليه بس مو تسوين مشاكل انت بشطارتج جريه عليج ترة هاي بت المحامي يعني عاد افتهمن هو ليش ماخذها غير لمصحلتجن ... طفت سهيلة جكارتها الثانية وشالت حفيدها سمير وطلعت ونرجس وراها بوستها فخرية وظلت تبسبس وياها لما وصلوا باب الكراج .. عاد ام كاطع عاطت على نورية لج ليش مابقيتيهن للغدا سودة بوجج شيكلن علينه اكو واحد يطلع خطاره من بيتهم بلايه غدا ؟!! يمه دخيل العباس... لا اجى كاطع وشافهن يحجن بموضوع علاء يدير البنزين فوك النار واحنى مانريد نخش بخطية احد ضحكت فخرية وجانت تكول لنورية ولج نوري افندي منين وشوكت اتعلمتي هالحجي كله هههه لو تكعدين سنة تحفظيني مااعرف احجيهن ... _من العشرة فخرية ...من العشرة جنت اباوع على حلك عمتي وين ماتروح اروح وياها جانت صاحبة مجلس ههه _فام كاطع هزت بيدها وجانت تكللها انجبي يالخايبة واشبيها امج لعد؟! مو ثاني يوم الثالث فخرية خابرت بدرية وبشرتها على ولادتها لسعود بس بدرية صوتها جان حزين حتى من حجتلها على علاء ومرته مااهتمت اصلا طلعت هي تعرف من زمان مخابرها علاء قبل فترة وحاجيلها زعلت فخرية وظلت تعاتب ببدرية وتلومها شلون ماتكوللها وهي اختهم الجبيرة ! بس بدرية جانت بعالم ثاني ... جانت مقهورة انه مديصير عدها حمل وهم مثل اختها مابقت دكتور ولا علاج مسوته واخر شي قرروا طفل انابيب ... بس المشكلة انه عم اياد متوفي وهو مصر ينزل يشوف ابوه لانه حالته كلش تعبانة وهو لحد الان مكايللهم متزوج بدرية يريد يعوفها وينزل !؟ وهاي صارلهم اسبوعين ميتحاجون تبجي ليل ونهار تريد ترجع لبغداد _فخرية كلش مشتاقة للعراق ...مشتاقة لبغداد ...بشوارع بغداد ولدربونته ولبيت اهلي ...مشتاقة اشم ريحة اشجار القلم طوز بالليل من جنا نطلع نفتر والجاي المهيل لج عيني حموت من الوحدة هنا .... وسدت التلفون فخرية ورجعت صفنت وشافت كل واحد اله همه ودرده .. وماكو شي اسبوعين واندكت الباب ساعة عشرة بالليل ... البيت جان فارغ بعد كلمن رجعت لبيتها ...وبقت فخرية وعمتها وبناتها وابنها وكاطع بعد مراجع ركضت عهود تصيح منو منو على الصبة ... فسمعت صوت مرية تحجي على كيفها لج رحاب فتحي اني خالتج بدرية ... فركضت عهود تفتح الباب ومن دخلت كالت يا مشفتج بالظلمة عبالي هاي رحاب ماشا الله شكد كبرانه انت ! وظلت تبوس بيها وتحضنها وتجر جنطتين كبار حمر وراها ... من دخلت ماصدكت فخرية تشوف اختها بعد تلاث سنين فراك متدري ساعة تبجي ساعة تهلهل ... رجعت بدرية كلش غير شكل صابغة شعرها اشكر ...ولابسة نفنوف وردي خرط من الص*ر وبيه شريط ينلف على الركبة وكعب عريض وتراجي دويرة كبار... ظلن يبوسن وحدة ويه اللخ ... جانت توها راجعة رجلها اخذلها ت**ي وراح ركض لبيت اهله كون ابوه بالمستشفى وهو يخاف يكوللهم اني متزوج اخاف ينقهر ويتاذى بالزايد ... التمو البنات على بدرية يفتحون الجنط ...وكلما بدرية تطلع قطعة هدوم يضحكون عليها الوانها غريبة وكلها صلوخ ودلعتها جبيرة ...فخرية ضحكت كالت بدور انت شجايبة هاي وين كاطع يقبل يلبسن هشكل ههههه شسوي فخرية والله كل هدومهم الصيفية هشكل بس شوفي مالت الجهال حلوات هههه...وبقن ليما ورة نص الليل عاد فرشن وكل وحدة على دوشكها ... ...عينها منامت بدرية بذيج الليله ظلت معلكه بالسكف ... تفكر بزوجها واهله الى متى حيضم عليهم قابل هي شمسوية ماخذته بالحرام لو بالسر لو شنو! ظلت الليل كله تتكلب على فراشها وفخرية كل شوية كاعدة ترضع ابنها وترجع تنام عود مرات يسولفن جم حجاية وينامن ثاني يوم الضحى اندكت الباب وجانت كرم جايبة بتها فرح وجاية كلش فرحت من شافت بدرية وشالت كم قطعة انطته لبتها ... فرح نفس كصة ميلاد اصغر منها بتلاث شهور بس كلش حلوة بيضة ومربرة وعيونها سود وشعرها اسود فاحم جانت ملبستها مدالية قران ثكيلة ... فام كاطع عجبها تاخذ واحد لسعود مو للبنات فسالتها لكرم ابيش هذا القرعان كرومه ضحكت كرم وكالتها خالة بعيوني اصوغ واحد واجيبه الكم هدية ... وظلت تلح وام كاطع تحلفها ماتقبل ... ومن صارت الظهرية بدرية طبخت باكلا بالدهن جانت نازلة بالسوك وهي عجبها راحت تسوكتها وجتي على السريع ... ورة الغدة ومن ديشربن جاي اندكت الباب ...جانت عهود ولد البيت هي الوحيدة تروح تركض تفتحه... جتي مخروعة على امها ماما ماما هذا خالو علاء بالباب يريد خالة بدرية تطلعه بره ... فزت بدرية وظلت قلقلة ...سترك ياربي خيره علاء جاي بهالظهرية كون الله يستر ومايجينا كاطع... ركضت بدرية على اخوها شبكته وبوسته ...صارلها تلاث سنين مشايفته ...وابتسامة عريضة على وجهها الي راسا اختفت من شافت ارتباك علاء ... جرها وكعدها بالسيارة ووكف براس الفرع ... كلها عذريني بس مااريد يجي كاطع ويشوفني بالباب اسمعي بدرية مااعرف منو مبلغ على رجلج وهسه هو بالحجز بالتوقيف ديحققون وياه ... بدرية شهكت وصاحت عزة لعزاني ليش علاء شمسوي اياد _والله مااعرف شنو التهمة بس دزوا عليه وشفته وحجيت وياه نبه عليه مااكول لاهله يكول ابويه مريض وعدهم فاتحة هيجي شي _اي صحيح ، صحيح وتالي فدوة لعينك علاء لاتعوفه _لايظل بالج هو دزني حتى اكلج لايظل بالج وتروحين تسالين عليه يم اهله واني هسه ماخذ زهير ورايحله ... انت المن كايله راجعة لبغداد ! _والله العظيم مفاتحة حلكي حتى فخرية اتفاجاءت من شاف*ني وهسه كرم صديقتها توها طبت علينا ...يعني قابل منو! بس عيني فدوة هو بشنو متهم ... بدرية رجلج حسب مافتهمت عنده نشاط شيوعي ويمكن متهمي بهيجي قضية _يارب استر علينا وشلون علاء ابوس ايدك لاتعوفه ... _باعي هسه اني اوصلح وارجع اخذ زهير واروح عليه هذا عنده هواية عرف بلكت منا مناك اطلعه كفاله اخذيه وروحيه ...رجعي بدرية لايصيرلكم مشكلة ظلت بدرية ساكتة ودماغها صفر من التفكير ماتعرف شتسوي ووين تروح ... رجعت تدك وتلطم على حظها وبختها.... كعدت بالكاع وانتجت على القنفة وفخرية تباوع عليها وصينية الجاي بردت محد شربها ... اترخصت كرم واخذت فرح وطلعت فخرية تودعها للباب ... ومن رجعت شافت بدرية دموعها تنزل... وجانت تحجي مخنوكة _فخرية اني ليش ماعندي حظ ؟! ليش الدنيا هيجي ويايه!؟ غمضت عينها وتجت راسها على حافة القنفة ... تذكرين من جنت صغيرة ...من ابوية مات شصار بينا؟! وانوبه من انسجن جاسم ...ايباااه الله لايرجعها ايام ... جنت اتمنى اكعد من النوم الصبح الكى شي اكله ...اتريك مثل العالم عود وين لما ترجع امي جايبتلي **ونة لو خبزة تدرين جنت اشم ريحة الاكل واكول لو بس ماعون مركة اغمسه بيها لو ماعون روبة تلين هال**ونة اليابسة ... جان من يندك الباب ويوزعولنا خبز العباس جنت احس گلبي يدك من الفرح وادعي الله ينطي مراد العالم حتى يظلون يجيبولنا ... ومن رحت للمدرسة ...البرد جان يجمد رجليه والله تكولين بسامير امشي عليها ...اوووف شذكر... الله ينطيها سهيلة علمتني خياطة والله حرام على علاء هيجي يسوي بيها ... رفعت عينها ...على رحاب كلتلها روحي جيبي جنطتي وتعالي على ميز الدواشك شامرتها وجيبيلي نفاضة... اتذكر مرة فخرية اجاني اياد للكلية وجعب حذائي م**ور على النص امشي ويقتر بيه ...هلك كثر ما وديته للركاع ...انوب ظليت مثل البسمار واكفة مااكدر اتحرك ليما راح اياد ...وامشي واعرج والحذاء اتفات من جوة وتعالي صعدي امانة ونزلي امانه ..والله شكد بجيت الله وحده يعرف شكد بجيت وكل يوم جنت اكول الحمد لله على الاقل اكوم الصبح اسوي جاي وانكع الجبن بمي حار.... ههههه ورثت جكارتها تدرين اول شي اشتريته من خرجيتي رحت جبت دبة دبس وراشي ونص ربع جبن ... سودة عليه امي مجانت تاكل اي شي ...عايشة على الجاي والخبز.... الله يرحمج يمه اشفتي من حياتج ؟!! كون الله يعوضج بالاخرة ... وكلها بجفة واياد بجفة يستحي يكول لاهلها ماخذها _لج لا عيني بدرية شيستحي ...غير يخاف على ابوه لانه مايقبل يزوجج اله ...لاتحجين هيجي.. ورثت جكارتها بدرية وصفنت ...اريد اعرف شوكت تف*ج بعد ... والله لو احجيلكم عن مصايبي يرادلي دفترين تلاثة رحاب جانت تسمع وصافنة عليها ...وتتخيل كل المواقف والصور تمر كبالها دمعت عينها من اتذكرت بيبيتها وشعرها الابيض طالع من الفوطة ودومها لابسة اسود ومن تضحك سن ذهب يلمع صفح ... اما زوج بدرية فعلاء بلغها انه اخذ زهير وراحوا يدوورله عرف يطلعهم مع انه زهير رفض هذا الشي لانه يكرهه كره ا***ى ويكره كل الشيوعين ... والمسكينة ماتهنت بزيارتها ...ورة ماطلع باقل من اسبوع حجزت طيارتها ورجعت .... فخرية جانت تنتظر يطلع الاربعين مال ابنها الصغير بفارغ الصبر ...طكت روحها من كعدة البيت ... انوب قهر بدرية زود همها فوك علاء ومرته امل ... وواول جمعة ورة الاربعينية ...كعدوا كلهم من الغبشة ... كاطع جان ناذر ياخذ خروف للامام العباس عليه السلام نذر بس كون الله يرزقه بولد... وهمه اتحضروا من الليل للزيارة ومتفق جان وية شريكة ابو غازي يتشافون هناك ... بالحضرة فرشت العائلتين سوى وابو غازي جان جايب مرته وبته حنان وابنه الصغير عبد الكريم ... حنان جانت مخطوبة ومنيشنيها ... بس المرة ظلت طول الكعدة تبجي وتندعي ... وام كاطع كل شويه تسال فخرية شبيها المرة هيج كاتله روحها ! شجرالها فتت جبدنا ؟!

Free reading for new users

Scan code to download app

App Store Google Play

Facebookexpand_more