نساء مخمليات

بارت 11

طول فترة حمل فخرية بطفلها الرابع جانت متنحسة وضايجة ...

هاي اضافة انه هي فكرت فعلا و حاولت اجهاضه بس خافت على روحها تموت وتترك تلاث بنات تحت رحمة ابوهم وبيبيتهم ...

جانت مهمومة وتعبانة كل ظنها الجنين بنية والله العالم شراح تكون ردة فعل زوجها...

حتى من اجاها الطلق جانت تكتمه وتحبس بنفسها ...

حضرت نفسها وطلعت ظهرية اخذت عهود وعافت رحاب يم اختها الصغيرة ميلاد ...

الي جانت على طول مريضة بسبب الاهمال اللي صار الها من امها مع انه جانت رحاب هي اللي تداريها وتربيها ...حتى مرات تصيحلها ماما

اول ماوصلت فخرية للمستشفى

اجاها الطلق وركضوا بيها السسترات لغرفة الولادة...

وظلوا تقريب فوك التلاث ساعات يحاولون يولودوها ماكو ...

الا ان دزوا على دكتورة قديمة ...

اول مشافت فخرية تبجي ...

ابتسمت وظلت تشاقيها ...

سالتها عن اطفالها فجاوبت فخرية عدها تلاث بنات ...

وتبجي لانه تعرف هاي بنية ...

الدكتورة ...لزمت ايدها وظلت تفرك بيها بينما السسترات يحجن عليها كلام موحلو

وكل وحدة تذبلها قنبلة وتروح

وهي تخزرلنهن اخر شي

طلعتهن من الغرفة ...

كالتلها فخرية انت حتكتلين الطفل ...

شوفي انت مااتطلقين عندج برود والجاهل حيموت ابطنج ...

لانه كل ظنج بنية

بس بهاي تصرفتج تاذين نفسج والجنين

يله ماما صيري سباعية ودفعي

...

لازم تطلعين هاي الفكرة من بالج يله امي ضغطي ...دفعي

بس فخرية تتخيل رجلها وعمتها شحيكولون عليها ...وتبرد ماتدفع الا ان التفت عليها الطبيبة وهي تفرك بطنها ...جانت تصيح عليها فخرية بيج ولد دفعي الولد حيمووووت ...

فخرية كامت تبجي وتصارخ ممصدكة ...

تجذبون عليه مو ولد والدكتورة صاحت السستر بصفها ....

وبدت تسويلها توليد ...

وهي تشجع فخرية انه بيها ولد حتى بس تدفع

الاان رجعت صاحبتنا الى وضعها الطبيعي

بعد ماحست الطبيبة دتحجي صدك وانه الجنين ولد !

وفعلا ولدت بعد مشقة وعناء

ووية طلعان الطفل الا شوية وتطلع روحها

صدك شافت الموت بعينها ..

الا ان الولد جان ضعيف ....

ومن سمعت السستر تكللها لج دفعي هذا ولد ...اتخربطت فخرية وفقدت الوعي من رفعوا الطفل وشافته ولد ...

كوه وعوها ...وشفتها ترجف خلوني اشوفه بعيني ....

مبروووك عليج ...جبتيلنا ولد ههههه...

ظلت تبوس بيد الدكتورة والدكتورة متدري تضحك لو تبجي على حال هالنسوان الي ينظلمن بسبب خلفتهن

اطمنت على صحتها وطلعت ...

فخرية مجانت بوعيها ولا تعرف شتسوي ....

ظلت تحمد الله وتشكره وكل شويه تريد ترجع للبيت والمستشفى ماتقبل يطلعوها ....حتى شدولها مي مغذي ...

دخلت عليها بتها عهود تبجي وترجف من الخوف

الطفلة عمرها تسع سنين وسمعت صراخ امها وتبجي اريد امي عفية دكتورة اريد اخاف هاي ماتت

جانت كلش خايفو لا امها تموت ....

صاحت فخرية على عهود ...

ورة مخلو الولد بحضنها مغسليه ومنظفيه ولافيه بحضين ابيض نظيف ...

تعالي يمه تعالي سودة بوجهي ليش هيجي مسوية بروحج ...

تعالي شوفي اخوج ...

ولج عهود على گصة ميلاد اجاجن اخو ...

صدك لو كالو اللي براسها فرتين يعني اللي وراها ولد ...

شوفي اخوج شكد حلو

كعدت الطفلة على حافة السدية تمسح دموعة ولافة يدة الجنطة مال امها على ايدها بعدها ممستوعبة شنو الموضوع ...

صافنة على امها شلون حاضنه الولد

و تبوس بيه و ترضعه ...

فهي سالت امها ورة مشافتها فرحانة بهالطفل ...

شراح تسميه ماما؟!

هههههه والله مااعرف يمه اريد اسميه...ف*ج ...الله ف*جها عليه....

لا ماما شنو ف*ج مو حلو هذا الاسم صار قديم...

نزول عليج عهود ههههه وانت شمعرفج بالهسوالف هذا قديمي لو جديد

...لعد نسميه سعدون مثل مجان ابوج رايد يسميج لو جنت ولد !

يمه سعدون ؟! مثل سعدون ابو الروبة !

لا ماما سميه فرات على اسم حما نورية كلش حلو الاسم وهو حباب دائما من يجون يلعب ويايه ويحيبلي جكليت...

ههههه نزول عليج شذكرج بفرات ؟!

هاي العايزتني علمود ابوج ياخذها بغير سالفة والله ضحكتيتي عهود هاي الناقصة اسميه على حمه نورية ...

لا عيني حسميه سعد مانعرف احد اسمه سعد ...

وابوج جان رايد هذا الاسم حيكون علينا وجه السعد ان شاء الله...

من فرحتها ياهي تجيها للغرفة تحضنها وتبوسها

على ساعة ثمانية بالليل لمت فخرية نفسها واخذت جهالها ورجعت للبيت

وهالمرة من دكت الباب ...دكته قوي ...

جانوا كاعدين كلهم بالصالة ومسوين عشى

البنات وعمتها يتعشون وكاطع اصلا طالع بعده مراجع للبيت ...

ولا فكر اصلا يروح يسال على مرته بالمستشفى...

صاحت فخرية اول مافاتت

عمه ابشرج عمه جبتلكم الولد يا عمه ...

عمتها ماصدكت ...

ظلت مصدومة تعاين عليها وكامت تبجي من الفرح ...

حطت فخرية سعد بحضن بيبيته وراحت بدلت هدومها وحضرت نفسها تبشر رجلها.....

من رجع كاطع للبيت كعادته رجع يطوطح سكران وتفاجا الكل كاعدين ديشربون جاي وينتظروه ...

حتى رحاب مراح تروح للمدرسة باجر تبقى يم امها ...

من عرف كاطع فخرية جابتله الولد ...كام يبجي مثل النسوان يحضنه ويشمه وكل شويه يسألها لج فخرية اخاف هذوله مبدليه ببنتج !

كثر مجان مصدك ...

اول تالي كاطع يصير عندك ولد بعد عشرين سنة زواج !

وثاني يوم من الغبشة راح ذ*ح تلاث خرفان ...

ماذ*ح خروف للبنات بس لرحاب من جتي كونها البجر ...

وسوى ذيج العزيمة الجبيرة

ووزع صينتين بقلاوة وزلابية للمحلات والحمالين اللي يم محله ...

وجتي الكل تباركله ...

ساعتها الدنيا مجانت سايعة فخرية ...يمكن لاول مرة ومن سنين تحس نفسها الها قيمة بهذا البيت ...

البيت الي انترس كرايب من كل مكان واول الزوار جانت نورية ...وجهالها

كاطع شال فلوس وانطاها تجيبلها ست سوارت ذهب لو ملووين لفخرية ...علمود تف*جها الخطار والي يزورزنم يباركون

حب يكشخ بمرته جايبة ولد ...

وزركت نورية من الصبح مارجعت الا نص الظهر شايله الصوغة وجاية ...

جانت سهيلة دتطبخ هي وزهوري ونرجس...

جوري كاعدة شايله ابنها وحامل روحها صاعدة بخشمها ورجلها سنان كاعد وية علاء اخو فخرية ...

ولد نورية وزهوري غسلو الصبة من دم الخرفان وكعدوا يضيفون العزايم ...

جوي اصدقاء كاطع وية شريكة بالمحل هم فد وجبة ...

وانملى البيت هوسة وضحك وشقى ...

واتغدوا الكل وبدى البيت يفرغ شوية شوية من الاصدقاء...وصفت على الكرابة ...

سنان اخذ جوري حانت تعبانة وجانوا اصلا متعاركين ...

اول الناس رجعوا للبيت ...

ولما ديطلع علاء وية رجل زهوري طالب ...مكام كاطع يسلم عليهم بسرعة ظل بالصالة وهمه منتظرية بالكراج وديسولفون لما اجى ...

جاي شايل خشمه عليهم ...

العلاقة من قبل متوترة بين علاء وكاطع من ورة عركة فخرية من **ر سنونها

وظلت فخرية بوكتها تجذب عليه لحتى لاتصير مشاكل ...

وكاطع هم طبعه يستهزأ بطالب لانه فقير وفطير بس الاخير جان ميدير بال ...

الهم هو جان فرحان ضارب خوش غده ويجرجر بعلاء خلي يطلعون بلا مشاكل

..لما كاطع سلم على طالب بالاول ورد من ورة خشمه سلم على علاء...

علاء شاله بگلبه ...

وماكو ورة ما شاف كاطع عاقج شكله لزمه علاء من ركبته وجره عليه ...

علاء جان طويل وضخم وشاب قوي ومرتب

بيومها جان لابس قاط لونه حليبي ...

بينما كاطع جان لابس بنطلون قماش وقميص ماوي واكصر هواية من علاء...

فراسا صار جوه باطه ...

علاء صرخ عليه كله لك اني علاء اخو جاسم اخاف نسيتنا اذكرك ...جاسم تتذكره مو!

هذا الشك اللي براسك جاسم اخوي تركه اثر الك ...

تمشي عدل لو اتركلك الثانية ...

هنا كاطع خلص نفسه وكام يغلط ويفشر على علاء كله لك انت واهلك مو شرفاء

انت هيجي وهيجي لو بيك بخير ما ت......د على مرتك امل!!!

عاطن ا النسوان...وصارت هوسة والكل ادخل

يفاككون بيناتهم ودفعوا علاء بنهاية الحديقة وكاطع ظل قريب على باب الكراج فمن سمع كلمة امل ...

جيت عليه بعد مادفعهم كلهم ودعبله بالكاع وجلاقين بنص وجهه والثالثة **رتله سن ...

كله اخاف عبالك مااعرف شلون ان**رت سنون فخرية هاي مرجعها الك

عاد هنا ...من انترس حلك كاطع دم زاد صياح وعياط النسوان جروا علاء لسيارته ....

وكعدت سهيلة تصيح وتلطم ...ونرجس شالت ابنها وركضت جوة ...

ظلت سهيلة تدعي يعني صدك علاء طلعت متزوجها ...

الله لاينطيك لييش ...

وظلت تدعي عليه وتصيح وتعيط جرها بالكوة طالب وصعدها بسيارته وراحت زهوري جابت نرجس ودزتها بسيارة رجلها يوصلهم ...وانتهت العزومة بصخام ولطام ...

وفخرية بغرفتها تسمع وتبجي حتى مالحكت تفرح بالصوغة ...

حست نفسها كبرت على الخلفة وحتى ماتكدر تكوم تشوف شكو بس عهود تروح وتجي تنقللها الحجي والعركات ...

هاي وين جانتلنا ...

ابو فرح رجل كرم شال كاطع هو وابو غازي ودوه للمستشفى ومن دياخذوه صاح عليه علاء من تحطلك طقم سنون اشتري لفخرية واحد وياك ياعار ...

بقت الوجوه مگلبة لاساعة ولاساعتين والنسوان ختمن العركة كل وحدة بسطت جهالها ذيج البسطة وكعدت حتى تخف الهوسة ...

لموا الصغار كلهم بالصالة وقفلوا الباب عليهم يباوعون تلفزيون ورحاب يمهم ...نورية جان عدها اسمهان صغيرة وزهوري عدها ماشا الله اربع ولد واحد فوك الثاني اكبرهم ست سنين ...

وعهود وميلاد...

دخلن البنات يم فخرية يسكتنها موزين على الجاهل هالقهر والبجي شبيج

عركة وفضت

بس وام كاطع ظلت تنوح وتلولي وتدعي على علاء

وصاحبتنا ماتكدر تفتح حلكها ..لابيها تدافع عن اخوها ولا بيها تحجي عليه ...

وتقريب ساعة دعش بالليل صبن النسوان جاي ونيمن الجهال وفخرية تلوب تريد تعرف شنو الخبر...

عاطت على عهود الي اجتي تفرك بعيونها

ها ماما شتردين ..

فسالتها امها

لج ادبسز من كال لخالج علاء

ابوج هو اللي م**ر سنوني!

انصدمت الطفلة وكامت ترجف ...

فخرية رادت تبين لحمواتها مو هي اللي مشتكية لعلاء على رجلها ...

الصغيرة كامت تبجي ومن حصرتها نورية حجت انه هي كايله لخالها ورة ماقشمرها ومشتريلها مصاصات وحلويات ...

نورية لزمت عهود من ظفايرها الثخان وفرت بيها الغرفة وزهوري كوة تطلعها من ايدها

لج ادبسز لج هيجي وهيجي انت ام المشاكل شفتي اسويتي ركضت رحاب على اختها اخذتها وراحت لغرفة بيبيتها ينامون هناك ...ورة ما انكطع نفس الصغيرة

شفت الجهال شلون يسوون عركة ويخربون اكبر بيت هاي السودة التفسة ام ل**ن والله بالنعال هاي ...

ظلت تدردم نورية على عهود ...وفخرية ترضع ابنها وعاصة شفايفها شلون اتحلفت لعهود على هاي الشغلة بس زهوري ظلت تضحك مثل عادتها ...

هاي شبيكم يمعودات هي طفلة شفهمها شتحجي فرحانه هي مسوية انجاز ههههه...

واندارت على فخرية الا صدك فخورة شنو قصة امل هاي !

وشبيها سهيلة ظلت تلطم ...

والله مااعرف زهوري حالي حالج اني ماسمعت شي بس هاي الملعونة جت تكلي بابا يعير خالو علاء بوحده اسمها امل يكله تك...د عليها !

ظلت نورية ساكتة وهي تفراش الفراش بالكاع ...

نورية بقت على حطتها...شكد ماعايرت سهيله بالمسلولة صارت مثلها عودة تتحرك ...

عدها انزلاق وماتكعد دقيقة ...

دعوفي الفراش نور تعالي فهمينا شنو السالفة والله شلعتن گلبي...

سفطت نورية المخدات وانتظرت زهوري تطلع كعدت بصف فخرية وعدلتلها المخدة شوية ختى ترضع عدل ...

جان تكللهاا

عيني فخورة اخوج مزوج على نرجس !

ويا يمه ...لطمت فخرية على ص*رها لطمة قوية غص الجاهل وكام يبجي ويعيط فسمعن عمتها تصيح ولج شبيه الولد ليش هيجي يصارخ!

ماكو شي يمه فار الحليب بحلكه جاوبتها نورية وراحت سدت الباب على النص وفخرية فاتحة حلكها ومندهشة

ولج نورية عدلي بدلي منيلج هالحجي

_اي داده اخوج متزوج هاي المرة هي نفسها يكول عليها گاطع اسمها امل!

_وهاي منين عرفها سودة بوجه ....

_يووو صارلها سنتين ونص متزوجها

_صخام لصخمني واني اكول هاي البنية مصفرة وحزينة ودومها تشكي منها

_لا عاد خيه واحد يحجي الصدك الولد مامقصر وياها بشي والكل شاهد ..حتى البيت كتبه باسمها

_صدك تحجين نورية علاء اخوية كاتب بيته باسم نرجس!

_اي داده واني متاكدة ، خلي اكوم احمي الجاي شو راسي ديفتر...

بس تردين الصدك عالعركه صوجه لكاطع واحد يحجي الحق ...

اني شفتهم ...اخوي هم عنده سوالف موحلوة ...

هاي صارله سنين زهير مصاحب علاء دومه يمدح بيه ويكول الكل تسويله حساب جيف خوش ولد ادمي ويشتغل عدل...

واحد يحجي العدلة ها اها ومدت ايدها ومشت

وصارت سكته جان بوسطها صوت الخاشوكة تض*ب بالاستكان وحدها تنسمع بالغرفة

كامت فخرية تصفن وتتصفن ...هاي هي وين جانت نايمة!

اله اكلج نورية انت شمدريج صدك اخوية متزوج؟!

_ههههه يعني شمدريني ياام سعودي ههههه

غير زهير يكلي قابل ضاربة ثريد ويه علاء ههههه

بس حسج عيني يطلع منج ترة والله زهير محلفني اذا احد عرف يطلكني وهاي هياتني صارلي سنتين اعرف مافتحت حلكي!

_سنتين تعرفين وماتحجيلي ! وانت طابة طالعة ؟! ليش هيجي ليش نورية وتعالي هنا شو رجلج مااجى ؟!

_والله اليوم عنده واجب...

_سودة عليه نرجس شعايزها شناقصها علاء هيجي يسوي بيها بله هذا الفقير مالتنه تطلع من هالسوالف ...الا رجلج منو كله ...

_شبيج فخرية مو دااكلج صحبان هو وزهير وكلشي يحجيله ...

_وهاي البنية منين وشوكت عرفها وشوكت لحك يمل من زوجته هو مصارله تلاث سنوات من متزوج ياحظي ...

شكد عيب من سهيلة !؟

المرة ما مقصرة ويانه هيجي نجازيها

تعالي ام جاسم شوفي ابنج شلون يرد الزينية

_داده هاي البنية قصتها قصة خلي اتمدد واسولفلج ...

هاي اسمها امل اتصير بت المحامي اللي جان يشتغل يمه علاء...تذكرين من مرة كال اني عيني على بت المحامي بس وكتها مكال اسمها ولا جنه نعرفها

_اي اتذكر جان قبل عرس جوري بكم يوم ...وابوها رفضه ...

_اي عفية ..

_زين وتالي !

تالي هي مطلقة

_عزة !

مطلقة وياخذها على نرجس خايبة شنهالحجي؟!

_اي مو دااكلج سالفتها سالفة

_وج عيني شو هاي مداخله بعقلي!

همه جانوا واحد يعشك الثاني من اول ماتعين علاء يم ابوها وعاد من ابوها رفضه هو اتزوج المكرودة نرجس ...بس ظل على علاقته بيها!

_سودة عليه نرجس بعدج صغيرة على هالضيم والهضيم ...هاي وين جانت النا! ، وتالي

_تالي، اتزوجها بالبداية بالسر حسب ماهو كايل لزهير هي مامتحمله يتزوج غيرها قا**ه ياخذها على مرته وزهير يكول اصلا مو كلش حلوة بس مثقفة مبين اهلها زناكين ...

_

زين اهلها ماحجوا امها مكالت شلون تقبل بتها تزوج بالسر؟!

عاد اسمعي قصة اهلها!

_يا شنو هذه هم بيها قصة ؟!

_اهل امها يهود ماقابلين يسفرون مسوين نفسهم مسيح وهاي كلها ابو امل مسويها الهم وماخذ بتهم !

يمه عاد هي يهودية ؟

لا لا هي ابوها عراقي مسلم بس امها يهودية مسيحية والله شمدريني شابجة السالفة عندي هذا اللي فهمته من زهير جانوا يهود مسوين نفسهم مسيح حتى مايسفروهم ....ومتزوج بتهم اللي هي ام امل ومخلفة منه ثنين بنات وحده مسافرة برة مزوجه يهودي وماخذه امها وياها ...

وعلى اساس ابوهم متبري منهم

وهاي جانت متزوجة مسلم طلكها لانه ماتخلف عاكر وعلى اساس هم تسافر يم امها بس ابوها مجان يخليها ...

يايمه عزة لعزاك علاء شجاك تاخذ مطلكة وعاكر!

لا وفوك الصخام هم يهودية !

لج عيني هاي اليهودية مسويتله سحورة

جانت رحاب توها جاية وميلاد بحضنها ماتقبل تنام الا يم امها

كاعدة تسمع وصافنة على سوالف خالها ومقهورة على نرجس

جانت تحبها وعلاقتهم زينه ...

بس من سمعت امها تكول على امل هذا الحجي ضاجت وكالت بصوت ناصي ناعم

ماما مايصير هيجي تحجين ...خطية ...

فجاوبتها عمتها نورية ...سكتي شكد فطيرة جنج زهورة ...

_الا صدك نورية فكرج كاطع اخوج منين عرف اخبار علاء ...سالتها فخرية وبالها يودي ويجيب ...

فردتها نورية اكيد جان يشمشم اخباره وهيجي شغلة ماتنضم ....

وماكو دقايق جتي زهوري تحضر فراش زوجها هو وكاطع توهم راجعين من الكهوة ورة ماطالعين من المستشفى...فخرية حست بنفسها كبرت بعد مو خلفة وجيبوبة

وين جانت قبل ووين هسه

قبل ...ورة ماتولد بكم ساعة تركض تحط الطشت وتغسل الهدوم بنص الحوش...

شجاني وهالكبرت يله كمت احبل واجيب ولا وانوبة ولد هههه!

اوف شيجبه باجر !

جانت اتاني شوكت يجي باجر وتخابر بدرية تحجيلها كلشي ....

والله العالم شمنتظر بدرية ..نفسها