بارت 10

3016 Words

عهود كانت طفلة ع** اختها رحاب تماما ...حركة جريئة وعنيدة .. وماتخاف لا من عقوبة ولاتهديد ... و***بها جان كله وية الولد الصغار اكثر من البنات تركض تتسابق وياهم وتلعب دعبل ...ومصراع وسبع سيفونات وختيلان كلشي جانت تلعب وياهن وتغلبهم هم ! وعلى الرغم من صغر سنها كانت تلعب دور مهم ...في جعل الحياة اصعب على فخرية ... بيبيتها مجانت تقبل على تصرفاتها بس ماكو حل شكد انبسطت من امها وانكتلت من ابوها مايفيد الي براسهاىراسها وشكد امها منعتها من صعدحتى لاتنجبح من على سياجه مفاد ... كل مرة تغافلهم وتصعد الا ان وكعت ذاك اليوم وان**رت ايديها ورجليها ... وظلت سهيلة يمها تداريها رغم كره عمة فخرية ورجلها الها...بس گلبها طيب وحنينة معافت فخرية ابد يومية تمر عليها تساعدها وتروح ... مر كم شهر يله كدرت ترجع للمدرسة ... ورة هاي الحادثة بعد مجان بيها مجال ام كاطع دكت رجل الا تطلع من هذا البيت وظلت تزن براس ابنها ياخذلهم بيت بنفس منطقة كرم صاحبة فخرية بحي الجامعة ... واحتار كاطع شيسوي ...من جهة شاف البيوت و عجبته المنطقة ، شافها نظيفة وجديدة وكلش راقية ...ومن جهة فلوسه ماتكفي ... وكلما يلحون عليه ...يكلهم شجابنا على بيت الصايغ ذاك صايغ واني خلك واحد عنده محل بالشورجة وياه شريك ... ومنا ومناك ابو غازي شريكه داينه نص فلوس البيت وكله روح اخذه ولادوخ راسك ... وجان احلى يوم لفخرية من ضبت الغراض وبدت تشيل وهالحجي جان بشهر الثالث راحت كعدت يم صاحبتها كرومه ... وهي دتعزل التوالي داخت ووكعت من طولها كل ظنها من التعب وقلة الاكل لانه جانت مجانت تكعد ابد ...تكوم من غبشة النهار تودي البنات كلمن المدرستها وتركض تلم الغراض علما يدز كاطع سيارة الحمل تحطهن بالسيارة وتاخذي ت**ي ورة سيارة الحمل للبيت الجديد تكعد تنزل الغراض و تصفطهن وتلمهن ... وهاي باليوم دربين تلاثة عدا منظفت البيت وغسلته بهالبرد ... وعادي جان زوجها ما له علاقة ..باي شي من كل اللي ديصير... لكن وكعتها هاي مجانت لا تعب ولاجوع جانت حمل جديد لا على البال ولا على الخاطر... تهلل وجه ام كاطع بهذا الخبر...وحست البيت عتبة خير عليهم ... وحتى كاطع نفسه ماصدك اول تالي فخرية تصير حامل مرة لخ! وهاي صارلها سبع سنين من ولدت عهود .. اول ايام جان كلش فرحان بيها بس يوم ورة يوم صار يخاف لايكون الحمل بنية ثالثة ... من جهة لخ الدنيا مجانت سايعة فخرية ...راحت وزعت حلال مشاكل بالكاظم ع...وبدربونة اهلها القديمة كون يدعولها يطلع ولد ... ورة شهرين جوري بت سهيلة ولدت ولد وسمته رامي ...جان نسخة من امه الشكار والجمال...والكل تهلل بيه ... اولهم بيبيته سهيلة جانت طايرة من الفرح وحست تعب سنين شبابها الي ضاع على بناتها مراح حرامات ... ومن جتي فخرية تزورها ظلت لازمة ايده ... ا وتدعي يارب كون من عندك ولد وتفرحني وتفرح گلب كاطع ويرجع اليه ... وظلت صافنة تقارن زوجها بسنان زوج جوري تعاين عليه شلون فرحان بالولد ... وشافت شكد فرق بينهم ...وضحكت على نفسها من حانت تسمع جوري تشتكي من زوجها و طباعه الحدية ويحاسبها على الصغيرة والجبيرة...وغيرته الزايدة... جوري تحجي وهي صافنة لافة عبايتها وتهز راسها وتبتسم ...حيل يافخرية انت هم حسبالج متزوجة وعندج رجال! وهذا رجلها يكوم ويكعد يكلهم هاي حبيبتي .... شوكت اخر مرة بله سمعتيها من خمسطعش سنة راحت !!!... ومنها عرفت انه سنان كان شيوعي معروف وبارز ونشاطه مو بس محلي لا دولي هم ... هي تسمع بس ماتفهم شنو يعني ..شلون يعني ينطوه تعليمات من بره ! منو هذولة والله هذا بطران دركض على لكمتك وجهالك مو احسن ...حلوة هيجي يوميه جارينك للتحقيق! كعدت تحجي وية جوري تهدييها وتصبر على زوجها ولايومية زعلانه بيت خالها...هم مو حلوة ... بس هنه النسوان اصلا مجان يخلن اعتبار لحجيها ويعتبرهن فاشلة بحياتها ... فمينطها اذن من تحاول تنصح وتحجي وهي اكيد حست بهذا الشي رجعت فخرية وگلبها مقهور ...الله يسامحك كاطع لا مقدرني ببيتك ولا لي قدر بين الناس كلها من سوالفك... راحت فلانه وجتي علانة ...ادري شوكت تعقل ... شوكت تجوز شرب وكلنا ميخالف انوبة سالفة النسوان الي ماتخلص ...شسوي ياربي؟! واللي شوية ها جان يهون عليها انه هي مرتاحة بالبيت الجديد والمنطقة جديدة ... جانت كاع انطوها لضابط وبناها جديد وسلم المفاتيح الهم وهمه اول ناس دشنوها ...وعلى ايد فخرية صارت بيها حديقة صغيرة كبال البيت ...وراحت باعت سوار ذهب واشترت مرجوحة حديد بيضة وست كراسي وجم حاجة منا ومناك ... وصارت كل عصرية تغسل الطرمة وتفرش الحديقة جودليه وتجيب جاي وكعك لو كليجة والبنات يلعبن داير مدايرها...وام كاطع كاعدة على كرسي صفح تعاين عليهن وكل شويه تصارخ روحن ليغاد من الزرع تونا حطيناه ...لاتوكعن عليه وت**رنه ... وهنه يضحكن بيبي بعد لاتحجين هيجي يضحكون علينا... وترجع تردهن يضحكن على صخام وجهجن يالسودات يالعبدات ...هم صاير بيجن حط وتراددن ! ويكعد كاطع من النوم يشرب جاية ويطلع وامه تسال فخرية جا شبيه رجلج دومه متضايك وگالب خلقته! ...يكوم ويكعد معصب ومتنرفز علينا! والله عمه مااعرف كلما اساله يكول ورطتونيي بدين جبير حتى تتونسن ... هزت ايدها امه وماحجت ...ماعجبها حاله جنه جان حاط سياج وحاجز جبير بينه وبين عائلته حتى صاروا يغتمون من يشوفوه كاعد بالبيت يصيح ويعيط على هاي وذيج ... و كل سنة تمر يصير مزاجه حاد اكثر وكرشه تكبر وعرجته تبين اكثر...يمكن هو جان يخجل من منظره....اللي جان مانع بينه وبين ان يتزوج اي وحده تعجبه ويمكن بسبب الشرب ...اللي قبل جان بس بالليل لا هسه وحتى بالنهار هم ... فخرية جانت تلوم نفسه حسبالها هي سبب ضوجة كاطع خصوصا من تتذكر شلون يعايرها بشكلها وخلفتها واهلها ... بينما الحقيقة هي وبناتها اخر هم كاطع ...اصلا ولايفكر بيهن... انطى المصرف الصبح لامه وطلع ...بعد مسواك مدرسة لو دكتور كلها تقوم بيها زوجته وهو لا يمه لاحس ولاخبر... المتضرر الأكبر من التحويلة للبيت الجديد ... جانت رحاب من امها نقلتها من مدرستها القديمة للجديدة ...بنص السنة حست بفرق جبير بيناتهم البنات جانوا يضحكون عليها وحتى المدرسات بسبب لكنتها ونطقها للاحرف والكلمات يقللون من شانها كونها جاية من بيئة غير بيئتهم ... مع انه شكد حاولت امها تغير منها لكن ل**نهم اخذ على هذا الشي ... وطبعت المسكينة كلش اتاذت من هذا الشي وخلاها تكره المدرسة وتقوقع على روحها... ع** عهود اللي جانت ايدها والطابوكة براس اي احد يضوجها ...وهاي يومية يدزون على فخرية تعالي شوفي بتج مجلوبة ... وهاي تتراكض منا ومناك ...بس بينها وبين نفس جانت تفرح على بتها تاخذ حقها مو مثل اختها جبانة وتخاف وكد ماشبعت بسط وكتل وماتعرف ادافع عن نفسها ... ومرات من جانت تجي كرم صديقة امها ...تظل تحجي وية رحاب وتعلمها شلون تتصرف وتدرسها ...وتشجعها تدخل كلية مثلها وتحجيلة عن الكلية وشكد حلوة...هي معدلها مخلاها تدخل غير ادارة واقتصاد مع انه كان عاجبها كلية التربية وتصير مدرسة ... وظلت تقرا باذن رحاب ماكو احلى من الوحدة تتعين مدرسة حتى ترتاح بالعطلة وراتبها ماشي ومو كلش تعب هههه.... وبشهر حزيران من ذيج .. وبعد معاناة خمس سنين وبعد علاج متعب لكرم صارت حامل ... بس حملها جان متعب كلش ...وكل يوم متخربطة وعيالها حكموا عليها تعوف البيت وترجع تكعد يمهم حتى يداروها ومجان الها تكولهم لا ... رجلها كلش جان يحبها بس حجاية اهلي لازم تمشي وهو هم عصبي ميتفاهم ... فاضطرت ترجع يم عيالها وبهالفترة صارت بعيدة عن فخرية..... اللي ثگل حملها ...ومحد جان يمر عليها حتى سهيلة مو مثل قبل التهت ببناتها وحفيدها ... عود مرات تجيهم نورية كل خميس ومرات زهوري كلش شهر مرتين تلاثة ... ... وبليلة راس السنة ...بدت فخرية تطلك ... وظلت تتوسل بكاطع ياخذها للمستشفى وهو يكلها من ارجع من الكهوة يمعود على بختك داموت اني من صدكك تحجي ياكهوة !؟ _لادوخوني من ارجع كتلج وانت شكلج اطولين ليش مااعرفج؟! وتاليها الخلفة بنية ظلت ساعة وساعتين تلوب بحديقة البيت تروح وتجي ...وتندعي يكون يرجع بسرعة. .. عمتها اخذت عهود جوة تنومها حتى لاتخبص امها...ورحاب واكفة تبجي تباوع على امها تلوب كدامها وبس تفرك بايدها ... فدوة اروحلج يوم اصبري وفخرية تنوح وتعيط هذا شلون حظ ياااربي اتاخر الوقت ومن صارت بالعشرة يله عود اجى واخذها ت**ي للمستشفى اوف لو اكو هسه جدة ! بس وين اكو بهيجي منطقة ؟! سنطة تذب الابرة تسمع حسها ... وعلما وصلت للمستشفى ...ماعت روحها ... بس طلوكة فخرية جانت صعبة ...وظلت ساعتين تصيح وتعيط ماكو ... وطبعا هو ماله خلك هاي ساعتين تكعد تطلك وهو كاعد بالصالة ينتظر! عافها ورجع للبيت ...بقى رحاب يمها ! ظلت تقريبا اربع ساعات هي تعاني الى ان ولدت ...ورادت تموت من عرفت المولودة بنية ...كامت تبجي بجي الفاقدين والدكتورة تحجي عليها وترزلها ...والسستر تفركلها ازركت حيل من الهبطة لازمه فوطتها وحاطتها بحلكها وتعض عليها وتبجي ...وشوية فقدت الوعي وكوة وعوها ... جانت فعلا صدمة الها ! بيا وجه حتكول لكاطع ولدت بنية ! ... حتى اسم مسمتها الدكتورة الي جيبتها اختارتلها اسم ميلاد ....لانه ولدت اول ساعتين من السنة الجديدة ... وميلاد جانت تخبل ع** خواتها السمر جانت بيضة وصلعة .... رجعت فخرية لبيتها وجه الفجر ...ماقبلت تبقى اكثر بالمستشفى كالت ماله داعي ... ورجعت وعيونها تعاين للسما ليش ياربي ليش هيجي تفشلني حاشاك تفشل عبد بس انت تعرف خالي ووصعي ودموعها تكت تكت ... ولما وصلت للبيت رجليها كوة شالتها وتمشي بيها ... بالبيت جان كاطع توه كاعد من النوم ...وصوت عهود خبصت الدنيا تبجي تريد امها ...وهو كل شوية كافخها ... ركضت رحاب دمت الباب اول مافتحلهم شافها مدنكة ولافة البنية بحضنها والدنيا باردة ثلج وهنه منا كوة لكن ت**ي ... كالها من ورة خشمه ها بشري ولد ! ضحكت رحاب وكالت لا بابا بنية ...وبعدها ممكملة حجايتها تفل بنص وجه امها ...وسد الباب ورجع لغرفته يشتمها ويشتم اهلها ... دفعت رحاب الباب ودخلت امها الي جانت تشهك وعمتها واكفة تسكت عهود ...ظلت تحجي على ابنها مايجوز وحرام هيجي يسوي هي كلها نعمة ... المرة الجبيرة هم انقهرت على جنتها ...ماكو مرة تتحمل هيجي حالة اول ماتولد رجلها يتفل عليها هاي وين صايرة ابني هم حرام عليك مو هاي نفسه ودعوتها هي والسما ... بينما فخرية ظلت تلطم وتبجي بالغرفة ورحاب تبجي بصفها وعهود بحضنها .... حلف كاطع الا يطلكها لو يتزوج عليها بس امه وكفت بوجهه ترزله وتحجي عليه ... المرة اتذكرت حالها ...صاير بيها نفس الموقف وية ابو كاطع كالت سبحان الله ...نفس اخلاق ابوه ... صدك اللي كال الي خلف مامات ...وشوف ربك اخذ ولده واحد ورة اللخ وبقى بس هو ...كون يحمد الله على نعمته ...كل جاهل يجي ...يجي رزقه وياه ... ورة تلاث شهور من نفس السنة ولدت كرم بنية ومن فرحة ابوها سماها فرح ... يكوم ويكعد يكلها فروحة هذه فرحة عمري هذه ... ولبسها من فوك ليجوة ذهب وعيالها منصدكين اخيرا ابنهم صارت عنده طفلة احتاروا شيسوون الها وشلون يدللوها فرح هم كانت بيضة وعيونها سود وكبار وشعرها اسود وثخين وشويه تشبه امها ... ياهو اللي يشوفها يستعجب على جمالها ... بس بوكتها مكدرت فخرية تروح تزور صديقتها ببيت عيالها وظلت گلبها عليها ... وشكد اتعذرت منها من شافتها ...بس البنية جانت فرحانة وفرحتها نستها العتب واللوم للكرايب والغريب.... فخرية ورة ولادة ميلاد ان**رت حيل.... حتى رضاعة زينة مجانت ترضع الصغيرة ...ويومية راكضة بيها مستشفيات ومن يوم اللي ولدت البنية ...كاطع مثل اللي عاداها ...ومصار يطيقلها كلمة ... فصاروا مثل المشاحنة بيناتهم وهو حان يدورلها زلة ختى يرزلها ويحجي عليها وتوه بده الصيف ...جانت عصرية خميس ...وفخرية فرشت الحديقة مثل عادتها... ريحة الورد مطكطك...والجو حلو ..... وبناتها يمها ... عمتها كاعدة على كرسي وتشرب جايها ورحاب كاعدة على المرجوحة وعهود تلعب وية بت نورية جانت جاية الظهرية على الغدا وفخرية جايبة علاكة ام الخمس كيلوات من هاي البامية التازة وطابخة جدر شكبرة ... وكاعدين يسولفن ويقرمن البامية يبسنها ... وميلاد توها تگلب وتكعد شوية... فنورية بدت تسال فخرية على اهلها واخبار سهيلة ... -فكالتها علاء زين بظى يشتغل بالمحكام و زوجته نرجس توها حامل خطية كلش فرحانة هي هسه صف ثاني خلصت وماشا الله نجحت ... _كالت اي هنه بنات سهيلة على امهن شاطرات حتى بالدراسة ولو نرجس جنها فطيرة ذبة زهوري ! _الا صدك نورية شخبارها زهوري شو ماتبين صارلها شهرين ماجاية ... _لاتخافين هسه تجينا هي ولدها ...يمه شلون ولد تكولين مو جهال شياطين ... وكل شوية عمتها تقاطع حجيهم لج فخرية غيطي على هاي السودة عهود راح تمرد الجاهلة _ وجوري مسافرة وية سنان رايحين هنكاريه كالت مناك تمر بلكت على بدرية ... _صدك بدرية مصار عدها شي _لا والله نورية سودة بوجي طالعة عليه مايصير عدها حمل وهسه يكولون اكو عملية جديدة نازله اسمها انابيب يفكرون يسووها بغير دولة اي والله ...گلبي نار عليها مخابرة علاء تبجي تكول تعبانة من الغربة ... صدك نورية كون تقنعين اخوج يجرلنا خط ... يكولون ديوزعون تلفونات بالمنكقة بلكت نحصلنا واحد ! _اي والله ليش لا اني هم كلت لزهير يجرلنا خط ... ماشاء الله فخرية رحاب كبرانه وصايرة حليوه كلش متغيرة _اي والله ههههه حتى البيت عليها ...هواية تساعدني احسن من ذيج رعنة ماتتصخر... شوفيها عود تستحي من سامي ...هههه سامي طلع الكامرة طكلنا صور...زهير جابلنا كامرة جديدة...تعال طكلنا واحنى كاعدين على المرجوحة ... وبدوا ياخذون الصور ووحدة منهن كمز سامي كعد بصف رحاب والاخيرة ذابت بمكانها من خجلها... _لج رحاب لاتستحين من ابن عمتج هذا خطيبج... ضحك سامي ضحكة عريضة على حجاية امه وهو يباوع على رحاب من جوة ليجوة ... مع انه رحاب اكبر منه بس هو جان يفرح من يكولوله رحاب خطيبتك... بس فخرية كطعت ضحكته وفرحته ...من جاوبت نورية لا عيني مازوجها يمه لا لسامي ولا غيره اريدها تكمل مثل خالتها جامعة وتتوظف عود تتزوج ... _يا وهي وين تلكه مثل سامي والله حنين وفقير وفطير نفس ذبتها ...ع** نزار عينا بنتج التفسه ...لج عهود روحي ليغاد لاتركضين يم الصغيرة ... مادري هاي عليمن هيجي طالعة سودة وقردة هههه... كومي عهود من سمعت حجي عمتها شيلي حجارة وبنص ظهر اسمهان بتها الصغيرة كطعي نفسها ..... كمزت نورية تصيح وتعيط وتركض ورة عهود ان**رت ايدج ان شاء الله بعد مرة لخ ... ياتفسة ياقردة ... شلون هيجي تض*بيها البنية رادت تموت ... اللهةلاينطيج ان شاء الله ... ووسط الركض والصياح والعياط وبجي اسمهان وعهود دتنهزم من عمتها وكعت بايد ابوها اللي كاعد من النوم عيونه حمر ومعصب من صياحهم وعياطهم وهوستهم ... ويدكها كتل لحد ماصدك رادت تفقد الوعي ...ونورية وفخرية مجلبات بايده يتوسلن يعوف الصغيرة بحالها ... وامه تصيح لك جهال بيناتهم عوفها ... لما فخرية جرتها من ايده والبنية كوة تتنفس وانمردت جوة ايده مرد .. وجانت اتصيح الله لاينطيك كاطع ...البنية راح تروح مني ... شو هذا مثل المخبل جيت على فخرية ودك بو**ات ودفرات ادعبلت فخرية بالكاع واخر جلاق اجى بنص وجهها **ر سنونها الامامية وانشكت لثتها ... امه كامت تدك وتلطم ...لك اتخبلت .. شبيك ... وغرك وجه فخرية بالدم اخذتها نورية هي وعبايتها وبدشداشة البيت ركض للمستشفى خيطولها الشك ...وشلعوا سنونها الم**رة ...رجعت بليلتها فخرية عيونها مورمة من البجي ومن الض*ب وكلما تباوع على حلكها ادك وتلطم ... الدكتور كللها خلي يشفى الجرح ويسوولها عود عملية زرع سنون ...بس وين وشوكت وهواية تكلف ... ظلت تدك وتلط وتخرمش بوجهها والبنات يلزمونها ...اني هذا حالي ويه هذا... الكحاب يبوس رجليهن وانه هذا حالي ...تصيح وتعيط ونورية تلزمها كوة وتسكتها لييرجع غفل ويسمعها انوب يكوم يبسطها مرة لخ ... ظلت فخرية ليلتها تدعي على رجلها هاي صارلها يجي تسطعش سنة متزوجة وشوفها حر نار جهنم مجان تندعي عليه بس هالليلة طلعت حيف وظلم هالسنين كلها تكوم وتكعد يكون ربي يطلع حوبتي بيه .... وتقريب شهر كامل مايتحاجون ... وكل واحد ينام بغرفة...وهي جانت تنام بغرفة البنات ... تحطهن بالفراش وتظل تسولفلهن سوالف ايام قبل ...على ابوها شلون جان حمال يتعب ويشكى وعمره مابسطها ... وعلى امها شلون ماتت من حسرتها على اخوها جاسم اللي جان اسبع واحد بالمنطقة حتى ابوجن بسطه ...جانن البنات يضحكن من امهن تسولفلهن على سوالف خالهن وشلون بسط ابوهن ...كثر ماشايفات ضيم منه ... رحاب جانت سامعة هذا الحجي اكثر من مرة بس جانت بكل مرة تحس نفسها تسمع امها لاول مرة تتمدد على الجودلية وتجي راسا على ايدها ...وتعاين امها تنوم ميلاد ...وتحجيلهم شلون جانت شاطرةاشطر من بدرية وشلون جانت امها تحوكلها جنطة من الكونية مال الشكر وتحطلها قوبجة خشب وعدها احلى جنطة بالدنيا .... ويمكن لو ابوها مخليها تكمل دراسة جانت صارت مهندسة واتزوجت مهندس لو محامي مثل رجل كرم ...وهسه يكون حنين عليهن ... وتنبهن لازم يكملن دراسه ويصير عدهن فلوس وراتب يعيشن نفسهن يله يتزوجن ابد مايعتمدن على رجال ... وبشهر تموز والدنيا حارة توها طبت فخرية للمطبخ ورة ماغسلت الطرمة وشرت العدوم ورشت الحديقة والشمس تصكع بيها شو هاي داخت وافترت بيها الدنيا ... كالت سترك ربي يكون اني حامل مرة لخ منينلي عود هاي ! هي مرة وحدة تجامعنا ! جان كاطع قبل جم يوم ساحبلهم تلفون ...ومن يدك الكل تتراكض عليه .. فتوة جان يدك شالته رحاب وصاحت امها ماما هي نرجس مرة خالو علاء... هي كامت تشيل التلفون ...وكعت على القنفة بصفها عرفت نفسها حامل بس ماحجت لاحد ولا كالت ... نرجس بذاك اليوم جانت مخابراتها تشكيلها من اخوها كام يبات نص الاسبوع برة البيت وهي وحامها قوي من حهة تخاف على نفسها لا تتخربط ومن جهة تخاف تكول لامها لاتتعارك وية رجلها ... سهيلة جريئة ومتخاف ول**نها طويل على الكل...ونرجس مو حمل انوبه مشاكبدل بين امها ورجلها , هداتها فخرية ووعدتها تحجي ويه اخوها تشوف شنو حاله بس ولا خابرته ولاسالته ... جانت بحال بس الله يعلمه ...البنات ومسؤوليتهن والبيت كله عليها انوب عمتها اتمرضت وكامت تتراكض وياها بالمستشفيات صاير عدها ضعف بالقلب ... وبتعب هالدنيا وهوستها فخرية حامل اربع شهور ومدايرة بال ولاحجت لاحد بالع** جان تدوس على نفسها بالشغل بلكت يوكع الجنين ...اكيد بنية وهم زايد على همها...... حتى من كبرت بطنها وبينت محد فرح بيها كل حجاية ويكوللها وشنو تسطرين درزن بنات.... فخرية عاشت عمرها صدك وحدها اذا قبل جانت سهيلة تسال عليها هسه ومن ورة علاء اخوها وعركاته وية نرجس حتى سهيلة كامت ماتجي يمها ... ..هاي مرات جانت بدرية بين فترة وفترة ...تخابرها وتسال عليها... واخر مرة خابرتها جان صوتها حزين ومقهورة... _ليش يمه شبيج بس تبجين لعد لو حالج مثل حالي جان شسويتي ... يااختي الله وحده عالم بحالي ...اياد ليل ونهار مشغول لو بالدراسة لو وية اصدقائه انوب من جتي جوري وسنان راح بدرب سنان وحزبيات وهالسوالف واني مالي خلكهن مالي خلك المشاكل.... شفت شلون حجزوه اول مارجع بغداد وتحقيقات ! اني بله اول تالي اكعد اطلع اياد من حجز لو من السجون غير اهله ياكلون وجهي هسه يذبون الصوج كله عليه ...انوب هسه هو كاتل روحه عليهم كتل ... _شوفي داده كلمن حاير بدرده وكلمن اله هم ...خلي رجلج براحته وعوفي يسوي اللي يريده لاتلحين عليه ليش هو صغير اذا حان يمشي بدرب سنان ولا غير درب على الاقل مهاملج .... _اكلج صدك شلون صارت عمتج ... _لاتخافين عليها عمرها عمر النسر ههههه وبشهر الثالث من سنة سبعة وسبعين ...لمت فخرية جنطتها مع اول الم الطلق ..واخذت عهود وياها وعافت رحاب ادير بالها على البيت وعلى اختها ميلاد ...وراحت من سكوت حتى عمتها متدري ...ركبت ت**ي وطلعت للمستشفى ولانه هي متاكدة بنية ...رحاب اختارتلها اسم لميس عجبها وحلو وجديد .... وجانت ناوية بعد تسوي مانع حمل ...هو هم حظ عود اخلف على كبري... مكافيني يصيحولي ام البنات! واول ماحطت رجلها بالمستشفى اجاها الطلق.....

Free reading for new users

Scan code to download app

App Store Google Play

Facebookexpand_more