تناقضات

15

( مره ثانيه لو نطرت الناس على الخط .. لاتنساهم )

وصل المسج لفارس .. ولما قراه حس بالذنب والفشيله لانه نساها على الخط .. اتصل لها يستسمح منها .. بس هي كانت تشوف رقمه وماترد .. طرش لها مسج اعتذار ..

( انا اسف .. وربي اني لهيت مع الشباب .. ارجوج ردي على التلفون )

مناف قرت المسج ولا ردت عليه .. وفارس تم يتصل وهي ماترد .. قامت وسكرت الجوال .. وفارس وايد زعل ولام نفسه .. كمل سوالفه مع الشباب .. لين وقت متأخر من الليل ..

الساعه 11 ونص بالليل في بيت بوفارس .. فارس قاعد مع فاطمه اخته يسولفون في موضوع لطيفه صديقتها ..

فارس: جزاج الله خير يا فطيم .. عقبال مانفرح فيج ..

فاطمه: فديت عمرك يا فارس .. ان شاء الله نفرح فيك انت .. كم عمرك الحين ؟

فارس يحك راسه: توني 22 سنه ..

فاطمه: ههههههههههه .. شوف انت و ولد عمك .. لاتسون اعماركم كتاكيت .. كل واحد يقول انا 18 ولا 22 .. اسمع عاد .. من بكره باشتغل لك خطابه .. بشوف لك ذيك المزيونه اللي على ذوقك ..

فارس: لا على كيفج يالخطابه فاطمه .. لا يبه انا باخذ وحده مافي مثلها ..

فاطمه: سلامي عليك .. ومن تكون هاذي الوحده؟؟

فارس: للحين ماعرف من تكون .. لما اقا**ها بقولج .. وطرت على باله مناف ..

فاطمه: انا على بالي وحده من اللي تعرفهم ..

فارس يدز راسها: شو بعد من اللي اعرفهم ..

فاطمه: ههههههههههههههه ..

فارس: اللي اقولج عنها للحين ماعرفها .. بس قلبي في يوم من الايام بيقول لي من تكون ..

فاطمه: اخوي وايد رومنسي ..

فارس: صج عاد .. تستخفين دمج ..

فاطمه: لا بس كلامك كله حب و رومنسيه ..

ودخل عليهم عبدالعزيز: منو الرومنسي ..؟

فاطمه: يا حيالله هالويه ..

فارس: عزوز .. لاتصدقها .. توها تقولي انت اكثر واحد احبه من بين اخواني ..

فاطمه: افا يا عزيزان .. تصدق كلام العذال ..

عبدالعزيز: انا اصدق قلبي ..

فاطمه وفارس: ياااااااااااا قلبك ..

الكل: ههههههههههههههههه

عبدالعزيز: بسألك فارس .. كم سعر المكينه من الوكاله ...؟؟

فارس: من الوكاله تجيك اغلى .. حول 3000 وشي .. بس مضمونه .. لو خذتها من شركات ثانيه ممكن تكون مغشوشه .. بس التجاري نص السعر ويخرب بسرعه ..

وتم عبدالعزيز يسأل وفارس يجاوب .. وفاطمه ضايعه بينهم ..

فاطمه: يلا يا جماعه تصبحون على خير ..

فارس: وين رايحه اختي ؟

فاطمه: خلكم مع السياير احسن ..

فارس وعبدالعزيز: ههههههههههه

راحت فاطمه غرفة امها .. ولقت خواتها قاعدين .. وتمت معاهم .. اما عبدالعزيز طلع يحوط فالشوارع مع يوسف .. وفارس تذكر مناف واتصل لها .. حصل جوالها مسكر ..

فارس" هالبنت اللي فيها مكفيها .. وانا ماكنت اقصد الطعها على الخط .. ياربي منها .. بحركاتها ودلعها بديت التعلق فيها .. وانا مابي هالشي يصير " .. طرش لها مسج ..

( مناف .. ارجوج لاتزعلين .. وربي ما كنت قاصد الحركه اللي صارت .. اتمنى تراجعين نفسج واول ماتقرين هالمسج اتصلي لي .. عشان خاطري اتصلي "

ترك جواله على الطاوله ونام وهو باله مشغول فيها .. كل ما غطت عينه قام متخرع يشيك على الجوال .. يخاف انها تكون اتصلت له .. ويرجع يتصل فيها بس ما يكون في رد .. لانها مبنده جوالها .. وتم على هالحاله لين اذن الفجر .. وقام للصلاه .. رجع من المسيد .. ولقى منها مس كول استانس اول ما شاف التلفون .. وقال " يعني لي خاطر عندها " .. اتصل فيها .. وردت على طول

مناف: هلا فارس

فارس بوناسه: هلا والله .. بالزعوله

مناف بحراج: اهلين ..

فارس: ليش سويتي جي ؟

مناف: يعني انت شايف الحركه حلوه

فارس: وربي ما كنت اقصد .. سلمنا على الشباب .. ونسيت التلفون

مناف: شهالشباب اللي نسوك التلفون ..

فارس لا شعوريا: يا قلبي .. خذتنا السوالف ..

مناف تغير السالفه من الاحراج: زين وش اللي مقعدك ؟

فارس: توني راجع من المسيد ..

مناف: اها .. تقبل الله

فارس: منا ومنكم ..

تموا فتره ساكتين .. وفارس يبي يراضي مناف ..

فارس: مناف ..

مناف: نعم ..

فارس: بل .. ليش معصبه ؟

مناف: مو معصبه ..

فارس يقلدها: مو معصبه ..

مناف: لاتعيب ..

فارس" دلوعه": ما قلد .. بسج عاد

مناف: شنو ؟؟

فارس: خلاص عاد .. قلت لج انشغلت وما كنت قاصد ..

مناف: زين انا ما قلت لك شي .. كيفك نشغل

فارس: دلوعه

مناف منصدمه: هاااا

فارس: زين عن الدلع خلي عنج الزعل

مناف: منو قال اني زعلانه ..

فارس: ما تكلميني عدل ..

مناف: زين انا لازم اروح الحين اقعد اخواني للمدرسه .. كانت تتهرب منه .. لانه وايد احرجها بكلامه ..

فارس: مو مسكر قبل ما اعرف انج مو زعلانه

مناف: مو زعلانه يلا مع السلامه ..

فارس بوناسه: مع السلامه

سكر منها وهو طاير من الفرحه .. " ايه على دلعها .. بتذ*حني بدلعها "

مناف" شسالفته يتغزل فيني ؟؟ "

اليوم هو اليوم الموعود .. جاسم خلاص بيطلع من المستشفى .. الوناسه عمت بيت بوفارس وبيت اخوه بومحمد .. طبعا كانوا مسوين مفاجأه لجاسم .. كانوا مسوين له حفله كبيره وعشى و عازمين ربعه وكل اهلهم ..

طبعا البنات تكشخوا والشباب نفس الشي .. كانوا الخوات مع بنت عمهم الريم .. رايحين الصالون يسون شعورهم ويضبطون انفسهم .. رجعوا البيت وكانت ام فارس معاها ام محمد يشيكون على البيت .. مجلس الريايل والحريم .. دخلوا عليهم البنات .. وام محمد استخفت على جمال ايمان ..

ام محمد: ماشاء الله .. ايمان كبرتي .. شو هالجمال والحلاوه ..

ايمان باحراج: من ذوقج مرت عمي .. ونزلت راسها وراحت فوق وهي مستحيه ..

البنات: وووووووووووووي .. ايمان تنحرج .. هههههههههههههههه

ام فارس: قعدوا عن بنتي ..

ام محمد: ماشاء الله عليها يا ام فارس .. وين ايمان اللي كانت كشتها تمشي قبلها ومن كم سنه ..

ام فارس: هههههههه .. الله يقطع سوالفج يا ام محمد .. اي والله وين ايمان ايام الكشه هههههههه

فاطمه: يلا بنات نروح نتلبس ..

البنات: يلا ..

راحوا البنات الغرفه ولقوا ايمان .. واستلموها .. وهي تحذف المخدات عليهم من القهر ..

فاطمه: ايمانوا .. خلاص خليني اتمكيج ..

ايمان: لا والله من زينج يالشيفه ..

فاطمه متخصره: نعم حبيبتي .. انا شيفه .. ضحكتيني ..

الريم: مشكله الثقه ..

فاطمه: شو السالفه .. قلبتوا علي ..

البنات: هههههههههههههههه

فاطمه كانت طالعه اجمل وحده من بينهم بالرغم انها اقل جمال من بينهم .. كانت فاتحه شعرها الحريري الاسود الناعم .. وكانت مسويه خصلتين باللون المارون مناسب المكياج واللبسه .. كانت لابسه تنوره مارون فاتح.. قصيره وفيها فتحتين على الجوانب .. وتوب حمالات ا** من ورا .. وظهرها باين .. شعرها الليلي غطى ظهرها .. وحطت شال على كتفها .. شافت نفسها في المرايه اخر مره وطلعت من الغرفه .. نزلت عند امها عشان تساعدها ..

ام فارس تشوف فاطمه بانبهار: يا علني اشوفج عروس قولي آمين ..

فاطمه باحراج: ماما .. لا تحرجيني ..

ام فارس: فديت بنتي اللي تستحي ..

فاطمه منزلها راسها من الخجل ..

فارس: يا ويل حالي على هالزين ..

ام فارس: شفت يا فارس ..

فارس: لو مو اختي كنت بذوب بجمالج والله

فاطمه بتموت من الاحراج: عاااااااد

ام فارس وام محمد: هههههههههههههه

فارس: الله يرزقج ياختي بولد الحلال اللي يستاهلج ..

فاطمه" اتمنى يكون يوسف ": ان شاء الله نفرح فيك يا فارس ..

فارس ابتسم وباس اخته على راسها .. ومشى عنهم من غير ما يعلق ..

فاطمه" بس لو اعرف شو اللي في بالك ياخوي "

ام فارس: فطامي .. ماما روحي نادي لي عزيز اخوج ..

فاطمه: ان شاء الله ماما ..

راحت عند الباب تنادي على عبدالعزيز ..

فاطمه: عزيز .. عزيز ..

عبدالعزيز كان واقف مع يوسف وفاضل .. وما سمع فاطمه .. بس اللي قلبه نبض بالحب .. يوسف

سمع صوتها بقلبه مو بأذنه .. نادت مره ثانيه .. كان يوسف بيقول لعبدالعزيز .. بس سكت عشان يسمع تغريد هالكناري .. تمت فاطمه تنادي .. ومحد يسمعها غير يوسف .. يأست فاطمه واتصلت في عبدالعزيز ..

فاطمه: عزوز ..

عبدالعزيز: هلا والله فطيم ..

فاطمه: وينك عيزت وانا اناد*ك ماتسمع

عبدالعزيز: ما سمعتج .. متى ناديتيني؟

فاطمه: راح صوتي الحلو .. وانا اناديك

عبدالعزيز: فديت صوتج الحلو انا .. آمريني

فاطمه: ما يامر عليك عدو .. تعال ماما تبيك ..

عبدالعزيز استأذن من الشباب وراح داخل .. اول ما شاف اخته تنتظره عند الباب انبهر بكشختها وجمالها ..

عبدالعزيز: لا لا لا .. شو هالزين شو هالزين .. لو مو اخوج تزوجتج ..

فاطمه" شو فيهم علي ": زين تعال ماما تبيك ..

راح عند امه .. وعطته المبخر والعود عشان يبخر ميلس الشباب .. طلع من عند امه .. ونست ام فارس تعطيه دهن العود عشان يتطيب فيه .. وطلبت من فاطمه تناديه .. وفاطمه اختصرت على عمرها واتصلت في اخوها .. عبدالعزيز كان مخلي تلفونه على الطاوله ودخل يبخر الميلس .. رن تلفونه ويوسف شاف الاسم كان عبدالعزيز مخزن اخته ( توأم روحي ) ورفع حاجب وبكل جرأه رد ..

فاطمه: عزوز .. تعال ماما تبيك

يوسف: مشكوره على العطر ريحته روعه .. وكفايه انه ذوقج ..

فاطمه بطلت عيونها: هااا

سكر التلفون وابتسم ..

فاطمه " يا قلبي .. صوته حلو .. يا ويل حالي عليه " وسرحت بعالم ثاني .. ما وعت الا بصوت ايمان المزعجه ..

ايمان: فطووووووووووم ..

فاطمه بخوف: ها .. خوفتيني .. شو فيج ..

مريم: فطوم وين سرحتي ها ؟

الريم: شوفوا ويها احمر .. ههااااي

البنات: ههههههههههههه

فاطمه: صج عاد .. يعني الحين خلصتوا من ايمان وجيتوا صوبي .. ومشت عنهم بدلع ..

ايمان: دلوعه فطوم

الريم بس دلعها يجنن

مريم" وين خالد فديته": وين الشباب ؟

ايمان والريم طالعوا بعض: مريووووووووووووووم

مريم بأحراج: لالالا لاتفهموني غلط .. اقصد ..

تقاطعها الريم بهمس: حددي من بالضبط ؟

مريم باحراج: ريموه .. بتصفقين عاد ..

ايمان: من تقصدين ريم ؟؟

ام فارس: شوفوا هالبنات اللي قاعدين ومخلينا احنا نعابل البيت بروحنا .. تعالوا اشوف ..

البنات: اوووووووكي ..

راحوا البنات يساعدون الحريم .. وبعدين استقبلوا الضيوف وقلطوهم ..

الساعه 6 ونص .. وصل جاسم البيت .. وكان بوفارس شايله وتفاجأ جاسم باللي شافه .. ام فارس ركضت عند ولدها وخذته من بوفارس .. وتمت تبوس فيه وتحضنه وتصيح ..

ام فارس:يا فديت هالطول انا .. حيالله هالشوف .. الحمدلله على سلامتك يالجسمي ..

جاسم حاضن امه: يمه وحشني البيت .. وباس راس امه .. نزلته على الكرسي تجمعوا حوله البنات

ودخل عليهم فارس والريم ما كانت متغطيه .. راحت بسرعه المطبخ .. ولمحها فارس ونزل راسه

تمت هي فالمطبخ .. وجاها فضول اطل .. وشافت فارس .. تمت تتفكر في ملامحه ..

الريم" ماشاء الله على فارس مزيون .. بس ليش للحين ماتزوج .. معقوله يحب .. ياحظها اللي يحبها .. بس لو يحب وحده .. ليش ما يتزوجها .. هو تقريبا وصل 30 وماتزوج ؟؟ غريب فارس"

كانت الريم مندمجه وهي اطل عليهم من المطبخ .. الا انتبهت لفارس وتم يطالعها .. استحت وانخشت ورا الباب .. كانت منحرجه من حركتها اللي لفتت انتباه فارس .. واستحت من نفسها .. طلع فارس وجات على باله الريم بنت عمه ..

فارس " ماشاء الله عليها الريم كبرت وصارت حلوه .. الله يرزقها بولد الحلال "

كمل دربه لميلس الشباب ..

اما الحريم .. لوعوا جبد جاسم وكل وحده تبوسه من كل صوب .. واللي تقرص خدوده واللي تلعب ب*عره .. وهو يطالعهم بنظرة ملل .. قرب من ايمان ..

جاسم: ايماني ..

ايمان: عيونها ..

جاسم: كلمي حد من الشباب .. لوعوا جبدي الحريم ..

ايمان ميته من الضحك عليه: هههههههههه .. زين بشوف فطيم ولا مريم ..

راحت عند البنات وقالت لهم سالفة جاسم .. وكلهم ماتوا عليه من الضحك ..

قامت فاطمه واتصلت على جوال فارس ولقت عنده انتظار ومارد عليها ..

فاطمه" لهدرجه هالمكالمه ضروريه يا فارس .. " كانت تبي تتصل بعبدالعزيز وترددت .. طلبت من مريم تتصل بفاضل ..

فاطمه: مرايم شوفي فاضل .. لان اتصل لاخواني ولاحد منهم يرد على جواله .. الظاهر مايسمعون تلفوناتهم ..

مريم: ان شاء الله .. واتصلت مريم .. ورد فاضل ..

فاضل: هلا والله ..

مريم: الفضلي .. وين اخواني ؟؟

فاضل: عبدالعزيز هني ..

مريم: ممكن اكلمه ..

فاضل: ولا يهمج .. فاضل عطى عبدالعزيز .. بوسعود مرايم تبيك على التلفون ..

عبدالعزيز: هلا مرايم ..

مريم: عزيز .. الجسمي يقول يبي حد منكم ينقذه ..

عبدالعزيز مبتسم: ليش ؟

مريم: يقول الحريم لوعوا جبده .. كلهم حوله صاير جنه شهريار ..

عبدالعزيز: هههههههههههههههه .. يحمد ربه وين اللي حصل هالوناسه ..

مريم: هههههههه عزوز الله يقطع سوالفك .. تعال اخذه انت او فارس ..

عبدالعزيز: انا انا باجي .. حل اتمقل فالحريم ..

مريم: يبيلك تصفق ما سمعتك امي ..

عبدالعزيز: هههههههه .. الحين جاي ..

فاضل: ها بشر ؟؟

عبدالعزيز: تجي معاي عند الحريم ..

فاضل: قدااااام ..

خالد بابتسامه مصطنعه: اقول اقعد انت وياه .. وخلوا عنكم السوالف البطاليه .. الحين بقول لعمي يروح له ..

عبدالعزيز وفاضل بإحباط : لا لا لا لا ..

راح خالد وقال لعمه ان جاسم يبي يجي الميلس عندهم .. طلع بوفارس وشاف فارس يتكلم بالتلفون .. وقف وتم يناظر فارس بشي من الغضب .. فارس كان مندمج في مكالمته ولا انتبه لابوه

كمل بوفارس دربه للصاله .. وشل الجسمي .. وسلموا عليه الحريم .. بس هو استخف على بنت اخوه الريم ..

الريم: شحالك عمي ..

بوفارس: طيب الله يسلمج فديتج ..

الريم: تستاهل سلامة جاسم ..

بوفارس: الله يسلمج الغاليه ..

شل جاسم .. وتم يسولف معاه وهو رايح الميلس ..

بوفارس: ها الجسمي .. لعوزوك الحريم ..

جاسم ويحك راسه: اي والله يبه .. كل وحده تبوسني من صوب واللي تلمني واللي تقول يا حرام المسكين صغيرون ..

بوفارس يضحك على كلام ولده: هههههههههه

ومر من جدام فارس اللي مازال مندمج بمكالمته .. ولا ماعطي اهتمام لأي حد يمر حوله ..

دخل ميلس الشباب والكل رحب بجاسم .. وجاسم كان مستانس ويسولف .. وكان سلطان قاعد عنده ومندمجين بالسوالف .. شوي الا فاضل وعبدالعزيز يسحبون سلطان ..

فاضل: قم قم قم ..

سلطان: شو فيك ياخي ..

عبدالعزيز: نبي جاسم في كلمة راس وخر مناك

سلطان راح عند خالد: شو فيهم هذول ؟؟

خالد اكتفى بابتسامه .. وكان شوي وينفجر من القهر .. لان مريم اتصلت لفاضل وكانت ماخذه راحتها معاه بالسوالف .. كان وده يدخل عليها وسط الحريم ويسحبها ويسطرها من القهر ..

اما فاضل وعبدالعزيز لعوزوا جاسم باسئله ..

فاضل: في بنات حلوات جسوم ..

جاسم: وين ؟

عبدالعزي ويض*به على راسه: لا تستعبط ياخي .. قول منو الحلوات اللي شفتهم ..

جاسم: شدراني ..

فاضل: انت ما منك فايده .. زين بقولك .. الحين قول انك تبيني اود*ك عند الحريم عشان اروح امتع عويناتي بالغراشيب اللي هناك ..

جاسم: لالالالالا لو تذ*حني ماروح .. لوعوا جبدي .. كل وحده من صوب ..

يوسف كان يضحك عليهم ..

عبدالعزيز: زين جسوم قولي صج .. من احلاهم .. قول ياخي انا اخوك ..

جاسم: احلى وحده فيهم فطيم .. تهبل ماشاء الله عليها ..

يوسف سمع كلام جاسم .. وتم يفكر في فاطمه ..

يوسف" ايه عليها .. طالعه احلاهم .. "

فضول: آخ .. ياليت تن**ر ريلي واقعد وسط الحريم جي ..

خالد: هي انتوا .. ماتستحون شو هالكلام .. جسوم اسكت ولاتجيب طاري الحريم سمعتني ..

جاسم ببرأه: ياخي هم لعوزوني وهم يسألون ..

خالد: لاترد عليهم ..

عبدالعزيز: بعدين بو وليد .. شو فيها لو سألنا .. تونا شباب .. عيش حياتك ياخي ..

خالد: اقول .. لو ماقمتوا عن الولد الحين .. بوريكم شلون تعيشون شباب صح ..

يوسف ميت من الضحك عليهم .. التفتوا عليه عبدالعزيز وفاضل ..

عبدالعزيز: اضحك يالعاقل ..

يوسف: هههههههه .. والله مب انا اللي بموت على الحريم .. هههههه الله يرجكم

عبدالعزيز: زين امشوا نشوف شصار على العشى وصل ولا لأ .. الوالد موصيني ..

فاضل: يلا توكلنا ..

عبدالعزيز: فضول اخوك خالد وايد جاد ذي ..

فاضل: ههههههههه هو طبعه جي ..

و طلعوا الثلاثه عشان يشيكون على العشى .. وكان فارس يتكلم في التلفون ومندمج ..

اشروا عليه .. وهو ابتسم لهم ..

فاضل: شو السالفه اليوم .. ماتحسون احنا شوي وبنستخف على الحريم ..

يوسف: كلن يتكلم عن نفسه ..

وضحك عبدالعزيز بصوت مسموع: ههاااااااااااااي

فاضل: الله يرجكم يا شباب ..

ضحكوا كلهم وكملوا دربهم ..

.......................

سلمان: كان قاعد مع محمد ومندمج معاه بالسوالف .. وبوفارس قاعد مع الشياب .. وجاسم سلطان وفهد واحمد قاعدين يلعبون بالجوال .. عند الحريم .. فاطمه كانت تسأل عن ساره مرت محمد ..

فاطمه: ارياموو ..

الريم: هلا

فاطمه: وين سويره مرت محمد ؟

الريم: مسكينه تعبانه ..

مريم: ماتشوف شر ..

فاطمه: والله مكانها مبين ناقصنا وجودها ..

مريم: الله يشفيها ان شاء الله

الريم: ان شاء الله " لو يدرون وين ساره بس"

مريت هالليله بوناسه .. لان جاسم رجع وسطهم .. جاسم طلب من سلطان وفهد يباتون عنده ..

اما فاطمه عاشت قصة حب مع يوسف واللي تأكدت من حبه لها .. المسكينه ريم .. عشمت نفسها بانجذابها لفارس .. خالد ومريم كل واحد ما شال الثاني من باله .. اما فارس فكان في عالم ثاني .. بدى يميل لمناف ..

الحين برجع معاكم شوي لورا .. لما بو فارس كان رايح يجيب جاسم من صوب الحريم .. كان فارس يتكلم في الجوال ومندمج ولا يدري باللي حوله .. كان يكلم مناف ومندمج معاها بالسوالف ..

كان قاعد بين الشباب فالميلس ورن جواله .. وكان حاط لمناف نغمه خاصه في الجوال .. وكانت النغمه ( عالي مستواه ) .. ابتسم لما سمع الرنه لانها مخصصه لمناف .. يعني يرد من غير ما يشوف الرقم

فارس: مراحب ..

مناف: السلام عليكم ..

فارس: عليكم السلام .. هلا والله

مناف: شخبارك فارس؟

فارس" ما احلا اسمي لي نطقته": الحمدلله .. وطلع برا يكمل مكالمته ..

مناف: مشغول ؟

فارس: افضى لج ..

مناف باحراج: ها ؟

فارس: احم .. اخوي طالع من المستشفى .. ومسوين له عشى ..

مناف سرحت " اخوه طالع من المستشفى ومسوين له عشى .. وانا اخوي مات "

فارس: مناف .. وين رحتي ؟

مناف: معاك .. معاك ..

فارس: زين اخبارج امج واخوانج ؟

مناف: والله على حطت يدك ..

فارس: ان شاء الله مو ناقصكم شي ..

مناف: الحمدلله وما قصرت يا فارس ..

فارس: ولا يهمج .. ان شاء الله على اخر الاسبوع اوديج مع فيصل الجمعيه تاخذون اللي تبونه ..

مناف: لا والله ماله داعي يا فارس .. باذن الله بتتدبر ..

فارس: شو قلت لج انا ..

مناف: اوه آسفه ..

فارس: زين قولي لي .. متى بداومين فالجامعه ؟

مناف: مادري يمكن الاسبوع الجاي ..

فارس: شدي حيلج

مناف: والله احاول ..

فارس: لا انتي قدها .. وباين عليج شطوره

مناف: منو يقول ؟

فارس: انا اقول

مناف بعفويه: شلون عرفت؟

فارس" يذ*حني دلعها": قلبي يقولي انج شطوره ..

مناف باحراج: قلبك ؟!!

فارس: اي يا مناف ..

مناف" قلبك .. فارس اخاف من اللي في قلبك واللي يقوله قلبك": .............

فارس: وين رحتي ..

مناف سكتت فتره: معاك ..

فارس: استغربتي من كلامي ..

مناف ما عرفت ترد: ها ؟!!

فارس يغير الموضوع: الساعه 9 ونص بجيب لكم من عشانا ..

مناف: لا يا فارس ماله داعي ..

فارس بحده: مناف ...

مناف بخوف: نعم ..

فارس: بتاكلين من عشانا .. 9 ونص انا بكون عند الباب ..

مناف: ان شاء الله

فارس يراضي مناف: بنت ..

مناف: نعم ..

فارس: يعني كل مره يتزعلين على كلامي ..

مناف: اي كلام ..

فارس: انتي تعرفين اي كلام .. وقلت لج انسي كلام جاراتكم .. لاني انا مو مثلهم ..

مناف" انت غير ": ولا تزعل نفسك يا فارس .. سو اللي تبيه .. ولا راح ازعل او اناقشك ..

فارس: تعجبيني والله ..

مناف تلطف الجو: زين انا انتظر .. تراني جوعانه ..

فارس: هههههههههه .. خلاص الحين انا فالطريق ..

مناف: لا لا لا لا ... خذ راحتك .. 9 ونص انتظرك

فارس" دلوووووووووعه": ولا يهمج انا على الوعد ..

مناف: يسلم راسك ..

فارس: زين قولي يا زعوله ..

مناف: لا والله .. انا زعوله ..

فارس بوناسه: اي انتي زعوله .. ودلوعه بعد

مناف ضحكت بدلع: هههههههه ..

فارس: اي ضحكي شو فيها الدنيا .. زين قولي لي شو تحبين تشربين ؟

مناف: ها ؟؟ شلون ؟

فارس" بريئه": تحبين كوكتيل .. او برتقال او فراوله ..

مناف بحيره: مممممممممم .. مادري !!

فارس: ولا يهمج انا بجيب لج على ذوقي .. شو رايج

مناف: انت كريم وانا استاهل ..

فارس: وربي انتي تستاهلين .. تستاهلين كل خير كل خير .. سكت وحس انه بالغ في كلامه .. انحرج وبسرعه انهى المكالمه ..

فارس: المهم انا لازم اروح عندهم .. وبكلمج وانا طالع ..

مناف: ولا يهمج .. مع السلامه

فارس انهى المكالمه ودخل عند الريايل .. شاف يوسف وفاضل ..

فاضل: بومحمد .. العشا جاهز .. متى انادي الريايل ..

فارس: بدري .. خلها علي ..

فاضل: صار ..

راح فارس عند محمد اللي كان مبين عليه الحزن رغم انه كان يحاول يخفيه ..

فارس: بو نايف .. عسى ماشر ؟

محمد: والله مادري شو اقولك يا فارس .. بس مو وقته الحين

فارس: الله يعينك .. زين وين الوالد ..

محمد: هناك مع سلمان وابوي .. شوفهم تقول يحلون لغز مثلث برمودا ..

فارس: ههههههههههه .. الله يرجك يا ريال ..

محمد: فروس ياخي شوفهم مندمجين وكل واحد منهم يأشر بيده تحسهم وايد متفاعلين بالسالفه

فارس: حمودي .. وانت ما تخلي عنك هاطبع .. تقطيع خلق الله ..

محمد: بس عمي .. وايد مستانس على سلمان ..

فارس: ابوي ؟

محمد: اي من اول ما وصل وعمي يعا**ه وكل ما جى عمد سلمان سحبه ابوك وراحوا عند ابوي وطقوها سالفه ..

فارس: هههههههه وحليلهم والله .. وسلمان ينحب ماشاء الله عليه ريال .. والزمن علمه الحياه صح

محمد يطالع سلمان بفخر: اي والله انه ريال ..

فارس: زين بقولك حمودي .. انا بروح اودي اكل لمناف .. تجي معاي ؟

محمد: مناف ؟؟

فارس: اي ..

محمد: متى عاد .؟

فارس: باشوف فطيم بعد شوي بخليها ترفع لها شوي قبل ما نتعشى .. وبروح اوديه لها وبرجع اتعشى .. ها شو قلت ..

محمد يطالع فارس بخبث: فرووووووس ..

فارس ببرأه: هلا والله

محمد: اسميك تولعت بالبنت؟

فارس بأحراج: ها ؟؟ لا شو تولعت .. بس انت ادرى ب*روفها ..

محمد: ممممممم بحاول اصدقك .. زين يعني مو متعشي مع الريايل ..

فارس: لا اول اودي لها لقمه وبعدين يصير خير ..

محمد" شكله تولع الود .. شو سالفتهم الشباب .. كلن قلب مشغول .. احمد بن راشد وخطب صديقت اختهم .. خلود اخوي هيمان بمرايم .. فروس وبدي يهيم بهالبنت .. وانا علقوني بفاطمه بنت عمي"

فارس: هييييييييييي .. حمودي .. وين رحت ؟

محمد: هااا .. خلاص قدام انا رايح معاك

فارس: حلو .. عيل خل اكلم فطيم عشان تجهزي الاكل .. مشى شوي بعيد عن ولد عمه عشان يكلم اخته ..

فارس: هلا والله بنجمة الحفل فطامي .. الكل يتغزل بجمالج يا فطيم ..

فاطمه باحراج: هلا والله فارس .. وبدلع ياخذ القلب .. عااااااااااد لا تحرجني فارس

فارس: يا ويل حالي على الدلع انا .. فطووم ما قدر استحمل هالدلع ..

فاطمه: فارس .. هات من الاخر .. ترا احرجتني ..

فارس: ايه عليج بس .. زين سمعي اختي .. ابيج ترفعين لي من العشا قبل ما تفتتحون البوفيه الله يرضى عليج ..

فاطمه باستغراب:ليش فارس؟ انت مو متعشي مع الريايل؟

فارس: ان شاء الله بتعشى .. بس ابي اودي هاللقمه حق واحد من الربع .. ويعز علي

فاطمه: زين ليش ما جى ؟!

فارس" فطوم اسئلتها ما تخلص": الريال تعبان وماقدر يجي .. بس عشان ما يزعلني قالي ارفع له من عشانا شوي ..

فاطمه او انه مشت عليها: اهااا .. ولا يهمك اخوي .. الحين اروح اشيك على البوفيه وارفع لك من كل صنف ..

فارس: بارك الله فيج فديتج .. اتصلي لي اول ما تجهزينه

فاطمه: من عيوني ..

فارس: فديت هالعيون الناعسه يا فطيم ..

فاطمه: فرووس يلا مع السلامه

فارس وهو يضحك عليها: ههههههههههههه .. سلااااااااااام

رجع فارس عند محمد .. وكان محمد سرحان لانه سمع فارس وهو يتغزل في اخته

محمد" صادني فضول ابي اشوف هالدلع والجمال اللي ذ*ح الكل واولهم فارس"

في هالاثناء .. فاطمه سحبت الخدامه وراها وراحت عند البوفيه عشان فارس اخوها .. كانت حاذفه الشال على كتوفها .. وهي تحط الاكل وتكلم الخدامه .. الا بذاك اللي يناظرها من زاويه .. وكان يوسف .. كان منبهر باللي شافه .. من جمالها وقف مكانه وماقدر يتحرك .. فاطمه اول ما انتبهت عليه من الربكه ركضت مو عارفه وين تروح .. لان حوشهم كبير والبوفيه كبير وهي ركضت صوب الملحق .. والخدامه ماتدري شو السالفه .. رجعت المطبخ .. وتمت فاطمه واقفه ورا عند الملحق ..

فاطمه" يا ويلي .. شافني جي .. لا عبايه ولا شيله .. التنوره قصيره وظهري باين .. الشال وايد خفيف .. ابيه .. يا ويلي .. بس هو ليش للحين واقف ؟!" هي ما انتبهت انه يوسف .. ويوسف كلمها

يوسف: السموحه منج والله .. تقدرين تمرين انا رايح الميلس ..

فاطمه بصدمه" هاي هوووو .. الي رد على التلفون .. هاي يوسف .. يا قلبي "

ومشى يوسف بسرعه ودخل الميلس .. بس وقف عند الدريشه يراقبها وهي رايحه داخل .. كانت تركض وباين عليها الخوف ..

يوسف مبتسم " يا ويل حال هالغزال اللي يتراكض هناك .. ياليتني هالشال اللي غطى كتوفج يا بنت الناس .. جمال ما شفت مثله .. جمالها رباني .. اشك انها ملاك نازل من السماء .. هاذي مو من الانس .. هالبنت ملاااك ملاااك " تن*د بصوت مسموع .. والتفت عليه عبدالعزيز ..

عبدالعزيز: بوسعود .. عسى ماشر ؟؟ بيعنا فالسوق..

يوسف: اشتريك الغالي .. والله اشتريك ..

عبدالعزيز مستغرب من يوسف: مصخن بوخليفه؟

يوسف ابتسم: لا .. الا في كامل صحتي والحمدلله ..

سكت عبدالعزيز عن يوسف اللي كان سرحان ..

اما فاطمه المسكينه .. فكانت مثل الطير الخايف .. ترجف وتتنفس بصعوبه .. تمت تذكر ربها وتهدي نفسها .. لما حست بشوية راحه .. اتصلت على فارس عشان يروح ياخذ الاكل من المطبخ

فاطمه: فارس .. تعال الاكل جاهز

فارس: وين انتي؟

فاطمه: فالمطبخ ..

فارس: زين .. لبسي عباتج .. لان محمد ولد عمي بيجي يشل معاي الاكل ..

فاطمه: ان شاء الله .. راحت لبست عبايتها .. وانتظرتهم ..

اول ما دخل محمد وشاف ويه فاطمه تم يطاعها بانبهار .. وقف مكانه وماتحرك .. لاحظ فارس ان محمد كان يطالع اخته ..

فارس: خلاص فطيم فديتج .. روحي انتي داخل انا ومحمد بناخذ الاغراض ..

فاطمه وهي طالعه: زين .. يلا مع السلامه .. مرت من جنب محمد وهو يطالعها بذهول واعجاب ركب السياره مع فارس .. وراحوا بيت مناف .. اتصل فارس في مناف قبل ما يوصل عند البيت

فارس: مناف ..

مناف: وعليكم السلام

فارس باحراج: سوري ..

مناف: مو مشكله ..

فارس: انا قريب البيت .. قولي لفيصل يطلع لي ..

مناف: فيصل محد .. راح مع امي بيت الجيران ..

فارس: زين انتي طلعي عيل ..

مناف بتوتر: ها .. انا !! ممممم ان شاء الله

وصل فارس وقف عند الباب ينتظرها .. طلعت مناف وهي لابسه عبايه وشيله ..

فارس ماقدر يمنع نفسه من شوفة ويها السمح الطفولي البريء ..

فارس مد يده: تفضلي .. وما شال عينه من عليها ..

مناف كانت ميته من الخوف وترجف: خذت من ايده الاكل ..

فارس وهو سرحان في جمالها: رجعي ياخذي الباقي ..

مناف ومنزله راسها: بعد في باقي ..

فارس: انتي تمونين ..

مناف خذت الاكل ورجعت تاخذ الباقي .. وفارس ينظر شوفتها بوله .. عطاها الباقي .. وطلب منها ترجع عشان يكلمها ..

ودت كل الاكل داخل .. ورجعت له عند الباب .. ولاول مره تطيح عينها بعين فارس .. اول ماتلاقت عيونهم .. صدت عنه بحيى واحمر ويها من الخجل ..

فارس مد يده لمناف وكان ماسك كيس صغير .. مناف شافت الكيس واستغربت ..

مناف: شنو هاي ؟؟

فارس: هاي هديه بسيطه مني .. لاني زعلتج ذاك اليوم ..

مناف منصدمه: ها !! .. لا ماله داعي يا فارس ..

فارس: عشان خاطري لاترديني ..

مناف: ما بينا شي عشان اقبلها .. شتقول انت !

فارس: وربي بزعل لو ماخذتيها ..

مناف: لا اسمح لي ..

فارس" عنيده": ارجوك اخذيها ارجوج ..

مناف: الله يسامحك والله ..

فارس بخوف: هااا ؟؟ ليش شو سويت الحين ؟

مناف: ماله داعي هالمجاملات ..

فارس مسك اعصابه: على العموم بالعافيه .. لو بغيتي شي اتصلي ..

ركب السياره .. ومناف تمت عند الباب منزله راسها .. فتح فارس الدريشه يكلمها

فارس: دخلي وسكري عليج الباب .. يلا اشوف ..

مناف بخوف .. دخلت وسكرت الباب .. وتمت واقفه ورا الباب وتذم نفسها على اللي سوته في فارس .. اما فارس المسكين .. ركب السياره من غير ما يتكلم .. ومحمد سكت عنه ..