KUMURAP-KURAP si Aloha para siguraduhing totoong si Atty. Del Fierro ba talaga ang nakikita niya at baka dinadaya lang siya ng paningin niya. Nakatitig lamang siya sa seryoso at madilim na mukha ni Atty. Del Fierro. He is wearing a black three-piece formal suit, itim na coat, walang necktie at hinayaan lang nitong nakabukas ang dalawang butones roon. Itim din ang panloob at itim na slacks, hindi na siya magtataka kung itim din ang sapatos nito. Nang maramdaman niya ang malakas na pagtahip ng kaniyang dibdib ay nakasisiguro siyang si Atty. Del Fierro nga. Kabisado na niya ang t***k ng puso niya at ganito ito ka-wild kung kaharap niya ang lalaking itinatangi ng kaniyang puso. Hindi na tuloy niya alam kung ano ang dapat gawin. Sigurado siyang narinig nito ang lahat ng mga sinasabi niya.