Nang matapos kaming kumain ay nagdesisyon pa kaming kumuha ng ilang bunga ng papaya at manghuli muli ng isda at lutuin upang may makain kami kung sakali mang wala kaming makitang pwedeng kainin sa paglalakbay namin.
Sa kasalukuyan ay binabagtas namin ang mabatong bahagi ng ilog. Balak naming sundan ang ruta ng ilog paitaas at tingnan kung may makita man kami roon. Liban sa batuhang paligid, isa sa nagpapahirap sa amin ay ang init mula sa tirik na tirik na araw. Ramdam ko ang pagtagaktak ng bawat butil ng pawis ko mula sa aking noo.
Nang lingunin ko ang mga kasama ko sa likuran ay halos hindi na maipinta ang mga mukha nila dahil sa init ng araw. Gamit ang mga kamay nila ay pinapaypay nila ang kanilang sarili upang malabanan ang init.
“Hindi ba pwedeng dumaan na lang tayo sa gubat at nan
