حكايات نهى

مقدمة انا نهى رشدي.. ، شكلي متواضع _بالنسبالي_ شعري طويل اسود داكن.. عيني رصاصي و بشرتي بيضا طولي متوسط و رفيعة و عندي حكايات كتير حصلت في حياتي عايزة احكيهالكوا.. و اتعرضت لمواقف صعبة و غريبة كتير بردو عايزة احكيهالكوا.. و النهاردة هحكيلكوا حكاية كانت صعب استحملها.. و صعب احكيهالكوا عشان افتكرتها تاني.. خلوني احكيلكوا ..اسمعوا _________________________________________ الحكاية الأولى : اريد دليلًا الفصل:الأول "أنا زي أي واحدة اتجوزت اللي بحبه، اتخطبنا تلت شهور بس.. غريبة صح ؟.. لكن انا كنت زي كل البنات السذج اللي بيتعلقوا بأي شخص يقولهم " بحب عينيكي" أو " شكلك حلو النهاردة" أو " ماتقفيش مع شريف، أنا مابرتاحلهوش أو "البتاع دا قصير أوي" ..و إلخ " كان رأي والدتي لما اتقدملي انه شاب )زي الورد( و مفيهوش غلطة.. و دا كان رأي أمي بس لأن والدي - الله يرحمه - متوفي من سنة و نص ------------------------------------------------------------------------------- النهاردة اليوم اللي قبل فرحي واحدة من صاحباتي المقربات اتصلت بيا و قالت بفرحة _" ألو يا نهى عروستنا القمر انا جايالك انا و البنات عشان نهيص معاكي النهاردة " بعد المكالمة بنصف ساعة تقريبًا.. جم صحابي المقربين و بنات خالتي و سمر.. اكيد بتسألوا مين سمر؟.. سمر بنت جيراننا في الشقة اللي جنبينا و اقرب و أوفى اصدقائي، من ساعت ما فتحت عينيا على الدنيا.. بنت بسيطة و جدعة، بتساعدني في أي حاجة.. بنعد انا و هي ننم و نتكلم و نخططوا.. بنعمل مع بعض كل طقوس الصداقة.. بتسمعني و بتختار معايا هدومي ..بتحللي مشاكلي .. و الأهم انها بتحبني بصدق من غير أي مقابل .. بشرتها بيضا و شعرها بني فاتح قصير .. عينيها بني غامق تديها طابع العمق  دخلت أمي بصينية المشروبات و شوية أكل خفيف عشان تقدموا لصحابي و قالت بابتسامة و فرحة ظاهرة _"عايزاكوا بقى يا بنات تهيصوا على الآخر و تنبسطوا اوي بقا ها" قالت واحدة من البنات و هي بتضحك _" و حضرتك هتهيصي معانا يا طنط و هترقصي كمان " ضحكت ماما و قالت _" لا هيصوا انتوا أنا كبرت على الحاجات دي " و مشت و الانبساط مش بيفارق وشها ولا روحها و راحت قايلة صاحبتي بصوت عالي _يا بنااات.. شغلولنا حاجة ترقصنا كدا" و خلص اليوم بعد الرقص و الغنا و الانبساط. و اخيرا انهردة فرحي.. اتصل بيا ( علي ) ( اللي هيكون جوزي بعد ساعات ).. شعره اسود و عنده دقن مش طويلة.. بشرتة مش ناصعة البياض و عينه لونها اسود داكن يعني ملامحه شرقية جداً  قالي بحب _ " الو يا حبيبتي.. اصحي كدا و فوقي اخيرًا النهاردة هنكون لبعض ! " ___________________ الفرح خلص و بقيت حرم "علي عبد السلام" رسميًا.. أول شهور عدوا عليا و كنت ملكة متوجة، كلهم حب و رومانسية.. و كان علي فعلا الراجل اللي انا حبيته.. بس مع الوقت بدأ يبقي غريب و تصرفاته اتغيرت و طريقته ما بقتش هي هي .... بقي عصبي طول الوقت، و ما بيتكلمش كتير، كل ما يجيله تليفون ياخده و يمشي بعيد عني كأنه مش عايزني اسمعه، على طول قاعد في مكتبه.. و بيتأخر بره البيت لنص الليل. . . بصراحة انا بدأت أشك فيه.. و قلبي مبقاش مرتاح و اللي زاد شكي اكتر.. "علي" كان دايما يقولي و يأكد اوي "اوعي تدخلي مكتبي"، "محدش ينضفه دا شغل و مش عايز حد يلخبطهولي" .. " أنا عايزه مكركب مالكيش دعوة " لكن قررت ادخله عشان انضفه.. لما دخلت لقيت المنظر ب*ع! مش معقول في بني آدم يقدر يستحمل الكركبة دي و عدم النظام دة ! قولت في عقل بالي ان هو أكيد هيشكرني لما يلاقيه مترتب بدل المنظر دا! .. لميت الكوبايات و الاطباق، كنست الارض، رتبت الحاجات اللي على مكتبه و فتحت الشباك يهوي .. و فتحت الدرج عشان اروقه.. مسكت كل الملفات خرجتها براه و بدأت ارتبهم تاني جواه.. و انا بحطهم ببص عليهم في شيء من الفضول.. فايل حاجات خاصة بشغله مافهمش فيها، و شوية اوراق تانية.. و اخيرًا فاضل آخر حاجة.. لكن دي حاجة غريبة جدا لقيت تذكرة حجز لفندق اسمه " The blue " في الجونة.. الحجز بتاريخ قديم عن دلوقتي بشهرين لغرفة_ '' ١٨٠١ '' _ يا خبر! هو ازاي مقاليش انه سافر.. و أنا ازاي محستش إنه سافر؟!! دا من قريب يعني مش من بعيد قعدت على الكرسي في حيرة لا يرسى لها.. يا ترى كان بيعمل ايه في الفندق دا! أنا شكوكي بتتأكد أكتر! معقول! معقول يبقي فعلا بي**ني؟! دا الراجل اللي انا حبيته! يا رب خيب ظنوني.... قعدت على الكرسي سرحت و بدأت افتكر من شهرين _فلاش باك_ (كنا قاعدين بنفطر.. و علي قالي :"حبيبتي، بقولك ايه.. مش عايزة كدا تروحي تباتي عند والدتك أسبوعين" قولتله و انا ماسكة السندوتش و بشرب العصير و بضحك :"اسبوعين! دا انت مبتحبنيش أبات برة اصلا" قالي :"أصل انا عندي شغل كتير الأسبوعين الجايين و في أيام هبات في الشغل و أيام هاجي الصبح فعشان متكونيش زهقانة يعني " قولتله:" طب ما أخليني قاعدة في البيت ايه اللي فيها" قالي :"لا لا أكيد اختك وحشتك و اهو تغيري جو بدل خنقة البيت " قولتله بنفس الضحكة:" تصدق اقنعتني ") - - - - - - - - - - - - - - - - - - قطع شرودي صوت جرس الباب.. صورت التذكرة و رجعتها الدرج و قفلت الباب بتاع المكتب و روحت افتح.. فتحت و كان علي دخل طبعا كالمعتاد من غير كلام علي المكتب على طول. دخلت المطبخ عشان اعمل الغدا و انا سرحانة و مش حاسة بالدنيا و فجأة لقيته خرج باندفاع و هو بيزعق بطريقة مفزعة و قال :"مين اللي نضف المكتب! مش قولت مليون مرة محدش يقرب منه! جاوبت بدموعي و هزة صوتي زي الطفلة :" ايه اللي مش عايزني أعرفه يا علي " بصلي بصة غضب عمري ما انساها أبدا و صرخ :" انتي مالك؟ انتي مالك؟؟ اما اقول حاجة تنفذيها و انتي ساكتة!" و دخل المكتب و هبد على نفسه الباب لدرجة انه اتشقق من قوة الهبدة.. خبطت على الباب خبطات ورا بعض و قولت بعياط :"علي،كلمني يا علي.. انت اتغيرت ليه؟ ايه اللي جرالك! " البيت اتملى بال**ت و كأني وقعت في صحراء.. و مردش عليا. عملت الغدا و حطيتله و سابه زي ما هو... و كأن انا اللي زعقتله و اهانته مش هو اللي عمل كدة! قعدت في أوضة النوم و اترميت على السرير و هو ماجاش نام زي عادته بصيت للسقف و اعدت أفكر قبل النوم زي عادتي و كملت اني افتكر يوم ما قالي باتي عند والدتك _فلاش باك _ (و فعلا تاني يوم لميت هدومي و روحت عند مامتي و كنت كل يوم اتصل بيه و مبيردش، رصيدي خلص في الأسبوعين دول و معرفتش اتصل بيه كنت قاعدة مع سمر و احنا قاعدين سألتني :"ايه يا نونو اللي خلاكي تسيبي جوزك وتباتي هنا من اول اربع شهور كدا؟" قولت ببراءة _"أصل عنده شغل و هيبات في الشركة فهو عشان مبيحبنيش أزعل ولا أزهق قالي باتي عند مامتك الكام يوم دول عشان متتخنقيش " قالتلي بنظرتها الشكاكة :" متأكدة يا نونو ،ولا المرة الجية هتجيلنا و انتي معيطة؟؟ " _" مش فاهمة تقصدي ايه ؟ هو هيزعل مني عشان جيت يعني ما هو اللي قالي يا بنتي متقلقيش" قالتلي بضحكة مستفزة " يا بنتي انتي ساذجة جدا، اكيد مقصدش كدا بطلي البراءة دي و كبري معايا دماغك شوية " قولتلها بسخرية:" قوليلي يا جهبز يا علامة.. أنا سمعاكي" قالتلي :" دلوقتي ايه اللي هيخلي راجل يبقي مش عايز مراته في البيت، و هو اصلا مبيحبكيش تباتي برة ؟" _" ايه بردو مش فاهمة فين المشكلة؟ " قالتلي بعصبية :" يا بنتي افهمي ايه اللي هيخلي راجل مش عايز مراته في البيت غير انه.....!! " _" عايز ي**نها؟ " قالتلي :" ايوة الله ينور عليكي " قولت بضحكة عالية جدا " يا بنتي ضحكتيني... ي**نني ايه بس دا لو الرجالة كلها خانت مراتاتها علي عمره ما ي**ني ابدا.. انتي بتقولي ايه بس اسكتي اسكتي " قالتلي :" براحتك يا نونو بس بكرة تقولي سمر قالت " _____________________________ فوقت من ذكرياتي على صوت خبط الباب " ادخل " "دخل بنظرة كلها حب.. كت مفتقداها اوي من زمان و قعد جنبي و انا حسة اني هدمع مش عارفة ليه.. قالي :"نهي حبيبتي، متزعليش مني، انتي عارفة اني مقدرش ازعلك، و عارف اني جيت عليكي كتير الفترة اللي فاتت، بس غصبا عني صدقيني " صوتي اتخنق و حسيت اني هعيط او هنفجر دموع قولتله :"بس انا.. انا مش عارف..علي.. علي.. أأ.." قالي بحب:"اهدي يا حبيبتي مالك.. عاوزة تقولي ايه؟" قولتله:" قولي.. قول... بصر.. بصراحة.. هو انت بتخوني؟! " قالي :"انتي بتقولي ايه بس، مستحيل طبعا أنا الاقي قمر زيك فين اصلا! " _"بجد! " قالي _" طبعًا بجد.. استحالة حاجة زي كدا تحصل اصلًا " مسك ايدي و قالي:"يا حبيبتي مش معني ان حصل شوية خناقات إني بخونك.. دا بس ضغط الشغل " حاولت لحظتها اني اصدقه، لكن الشك مفارقنيش ولا ثانية.. شكلي فعلًا هقول ان سمر قالت! ______________________________________________ صحيت تاني يوم ((يوم الجمعة)) فتحت عيني ببطئ.. ببص جنبي.. مالقتش ( علي ) مكانه !... دخلت المطبخ و الحمام و مكتبه و الصالة و مالقيتهوش ممكن يكون نازل يعملي مفاجأة عشان يصالحني بيها.. حضرت الفطار و جهزت كل حاجة.. الساعة بقت تلاتة و هو لا حس ولا خبر! اتصلت بيه، مبيردش.. عيدت الاتصال اكتر من مرة لحد بعد مناهدات كتير رد قولت بعصبية_" آلو يا علي انت فين و مبتردش ليه؟ .. انت نزلت ليه فينك؟ .. ك..." رد بعصبية_" بقولك ايه.. أنا مش فاضيلك" قولتله باستغراب _"ايه اللي مش فاضيلي دا... انت بتكلمني كدا ليه؟ " _" يوووه متزهقنيش بقا_سلام" و قفل في وشي.. ليه بيكلمني كدا ؟ ،و الكلام المعسول بتاع امبارح كان ايه؟!! يتبع....