DAIG ko pa ang natuklaw ng ahas dahil sa nasasaksihan ko ngayon. Natulos ako sa kinatatayuan at nanlalaki ang mga mata habang pinanonood ang babaeng hanggang sa mga sandaling iyon ay humahalik pa rin kay Reagan. Ang mga kamay nito ay tila may buhay na humahaplos pa sa buhok ng asawa ko habang ang mga mata'y nakapikit pa. Si Reagan naman ay parang nagulat din dahil patda rin ito at ni hindi magawang kumilos. O baka naman gusto at ninanamnam nito ang ginagawa ng babae? Maya-maya ay napabaling ang paningin ko sa sekretaryang si May na hindi maipinta ang mukha at nang mapadako ang mata sa akin ay awa ang nabasa ko sa mga mata niya. Kita ko rin nang mapalunok ito bago muling ibalik ang tingin sa naghahalikan.
"I missed you terribly," anang babae nang sa wakas ay tumigil ito sa ginagawa pero
