بنات ٣٠ البارت التاسع ( الأبواب الملعونه)

3453 Words

استيقظت لمياء من النوم وشعرت بسعاده كبيره لانها اليوم اجازه ... و اخيرااا بعد اسبوعها الاول في العمل والذي كان ملىء بالأحداث والقصص والاحزان....... عرضت عليها والدتها ان يذهبا سويا للتنزه داخل النادي ولكن لمياء رفضلت ولكن عندما شعت ان والدتها تحتاج للخروج من المنزل وانا تريد تقضية اليوم معها طلبت مها لمياء ان يذهبا الي النادي بعد غروب الشمس حتى لا يتعرضون للحراره العاليه لاشعه الشمس الصارخ ففرخت والدتها ودخلت لمياء غرفتها لترتاح قليلا ولكن أفكارها تتصارع حيث أن جميع الحكايات والقصص التي سمعتها طوال الاسبوع أثرت في لمياء تأثير كبير و أصبحت لا تفكر سوي فيهن وتفكر كيف يمكنها ان تساعدهن ..... بعد تناول وجبه الغداء ذهبت لمياء و والدتها الي النادي بالفعل .... ولحسن حظ لمياء وجدت هناك زميله والدتها في العمل فجلستا سويا .... واخرجت لمياء إحدى قصص مروه لتقرئها ... فلقد وعدت مروه ان تقرأ قصصها وتقول رأيها فيها بكل صراحة .... وكانت القصه بعنوان الأبواب الملعونه ...... زي كل بدايه صيف بنروح انا واصحابي رحله جديده في مكان مختلف وقررنا الصيف ده نروح نعمل كامب في صحراء الوادي الجديد ودي كانت فكرة باسم اما أنا وعماد كنا خايفين من فكره الصحرا في الصيف..... واتفقنا حنطلع يوم الجمعه وحنتجمع قدام بيتي الساعه ١٠ بليل وقبل الميعاد بساعه لقيت عماد بيتصل بيا : _ ايوه يا احمد ظبطت الدنيا ولا لسه _ على وشك اهو يا عمده _ طب معلش انا مفروض باسم قالي اجيب انا المعلبات بس شكلي كده مش هلحق ممكن تجبها انت من السوبر ماركت اللي عندك _ماشي يا سيدي بس كله بحسابه _ ههههههه قفلت مع عماد وقلت أمري لله هنزل اجيب المعلبات انا..... وادي قومه نزلت بالترنج بسرعه علشان الحق ارجع اخلص الحاجات البسيطه اللي نقصاني خصوصا ان السوبر ماركت في اخر الشارع وانا في نص الشارع كده لقيت ست عجوزه قاعده على الرصيف، عطتها الفلوس الفكه اللي كانت معايا وبعد ما خدتها بصلتي بصه غريبه وقالتلي كلمه واحده _ بلاش _ بلاش ايه يا حجه مردتش عليا وبصت في الأرض؛ استغربت ومشيت و بعد كام خطوه بصيت ورايا مالقتهاش _ وبعدين بقى.... هي الست دي انس ولا جن ولا ايه.... كملت بخطوات اسرع وكأني بهرب من حد، وصلت السوبر ماركت وجبت الحاجات الناقصه كلها وانا راجع البيت قعدت ادور على الست العجوزة في الشارع لكن كأنها تبخرت وبعد نص ساعه لقيت عماد وباسم بيكلموني من تحت البيت ونزلت بالشنط وحطينا كل الشنط في عربيتي لانها عربيه دفع رباعي وهي اللي حنسافر بيها الطريق هياخد تقريبا ١٠ ساعات من القاهره للوادي الجديد يعني المفروض نوصل على الساعه ٧ الصبح ونقابل هنالك عم أيوب اللي هيكون الدليل بتاعنا طول رحله التخييم وبعد ما وصلنا محافظه الوادي الجديد حصلت حاجه غريبه خلتني اتشائم من الرحله كلها....... قبل المكان اللي كنا مفروض نقابل فيه عم أيوب عدينا على مكان اسري كده وعرفت من باسم انه مقابر واسمه مقابر البجوات اسم غريب مش كده للأسف في أماكن كتير في مصر احنا كلنا منعرفهاش وقعد باسم يحكلنا ان الرسومات اللي على الجدران دي بتحكي قصه خروج بني إسرائيل من مصر انا مهتمتش الصراحه بالتفاصيل بس قلتلهم يالا الشمس صعبه اوي هنا ويالا علشان منتاخرش على عم أيوب وجيت اسوق العربيه لقتها غرزت في الرمل _ ايه ده بقى ازاي كده _ طب استني يا احمد حنزل انا وعماد نحاول نزقها وانت دور حاولنا كتير لكن العربيه ولا راضيه تتحرك قعدنا كده تقريبا لحد ما الشمس قربت تغيب وفجأه قلت اجرب تاني الدنيا حتليل علينا ومش حنعرف نتصرف وخصوصا ان الموبايلات مفهاش شبكه خالص _ هو يوم باين من أوله ورحله شكلها عنب يا سي باسم _ بس يا احمد الله يهد*ك متفقرش فيها حتتحل بإذن الله والغريب اني اول ما دورت العربيه مشيت ولا كان في حاجه واحنا ماشيين في الصحرا عجله العربيه فرقعت _ انا قلت هي رحله مش معديه انزلوا بقى يا بهوات انتم الاتنين لما نشوف المصيبه دي ونحاول نغير العجله وقعدت ادور على الكوريك لكن ملقتش شنطه العده كلها الظاهر اني نزلتها وانا بفضي مكان للشنط ونسيت احطتها تاني _ دور كويس يا احمد _ لا مش هنا.....دورت في كل شبر اهو بالكشاف _ طب وبعدين حنعمل ايه دلوقتي ولسه شبكه الموبايل مش شغاله _ مش عارف بس اكيد في حد قريب هنا تعالوا نقفل العربيه كويس وندور على اي حد قريب ناخد منه عده نغير بيها العجله او نلاقي تليفون نتصل بحد ينجدنا _ طب يالا يا عماد حط الحاجات اللي في ايد*ك في العربيه وانت يا باسم انزل من العربيه ويالا بينا مشينا في الظلمه واحنا مش شايفين الا امتداد نور الكشافات قدامنا لحد ما فجأه لقينا بيت كبير قدامنا وكأنه طلع من تحت الارض قعدنا نخبط على الباب ولكن محدش رد والباب اتفتح لوحده _ استني انت وهو انتم رايحين فين _ يالا يا احمد ندخل عندك حل تاني _ لا انا مش مطمن يالا نرجع للعربيه ونبات فيها للصبح والنهار ليه عنين برده _ هههههه يا ابو حميد انت مالك خايف كده ماتسترجل وتنشف شويه _ والله انا قلبي مقبوض من ساعه ما شفت الست العجوزه _ ست مين يا ابني _ متخدوش في بالكم _ طيب يالا ندخل بقى قال الكلام ده وهو بيحط رجله جوه البيت دخلت انا وعماد وراه باسم ما احنا مشين وراه من الاول لحد ما غرقنا وأول ما دخلنا البيت........ الباب اتقفل لوحده _ عاجبك كده يا عم ما انا قلتلك بلاش _ انا ابتديت أصدق كلامك يا احمد _ ما تسكتوا انتم الاتنين لما نشوف ايه اللي حصل ومسك باسم اكرة الباب وحاول يفتحه بكل قوه ومعرفش يحركها حتى انا خلاص اتأكدت ساعتها ان اللي بيحصل ده مش طبيعي واننا حنواجه كوارث في البيت ده لقيت نفسي بجمع قوتي وقلت لباسم وعماد تعالوا كده بقى ندور سوا على اي باب ولا شباك في البيت ده نخرج منه ما اهو اكيد في مخرج ومشينا احنا التلاته وفي ادينا الكشافات اللي كنا بنلفها في كل اتجاهات البيت علشان ندور على اي مخرج لحد ما لقينا طرقه طويله دخلت الطرقه وورايا عماد وبعدين باسم وكنت سامع صوت ضربات قلبي وانا ماشي واحنا التلاته ماشين بحزر ومحدش فينا بيقول ولا كلمه وفجأه سمعنا صوت صرخه قويه من باسم لفيت بسرعه انا وعماد وملقناش باسم ورانا.... نديته وانا برجع انا وعماد الخطوات اللي مشيناها في الطرقه لحد ما لقينا باسم مرمى في الأرض قعدنا نفوقه بكل الطرق لحد ما فاق وقالنا حاجه خلتنا كلنا حنموت من الخوف _ _ باسم...... مش حتصدقوا في حاجه وقفتني وشدتني لورا وضربتني على دماغي _ حاجه...... ولا شخص ولا ايه _ ليكون البيت مسكون ياجماعه _ طب بصوا ماتخافوش، الخوف حيضعف قوتنا وحيشل تفكرنا _ منخفش ايه يا احمد انت مسمعتش بيقولك ايه _ بس بقى خلونا ندور تاني يمكن نلاقي مخرج ومشينا وفي المره دي سامع صوت ركبنا احنا التلاته وهي بتخبط في بعض في نهايه الطرقة لقينا مكان واسع مافهوش اي شبابيك بس فيه تلات أبواب وكانت المفاجأه كل باب مكتوب عليه حرف في الاول محدش خد باله بس انا لاحظت وقلتلهم: _ الأبواب دي مكتوب عليهم حروف اسامينا باب عليه أ والتاني ب والتالت ع _ اسامينا ايه و ليه متقولش الحروف الأبجديه عادي اهو أ وب ولا انت غاوي ترعبنا _ لا يا عماد احمد عنده حق هي الحروف أ ب وبعدين ع _ طب حتعملوا ايه يعني انتم الاتنين اوعوا تقولولي كل واحد يدخل من الباب اللي عليه حرفه ويواجهه مصيره _ لا يا عماد احنا حندخل احنا التلاته باب باب لحد ما نشوف في ايه.... وفجأه سمعنا صوت غريب وحاجه طارت فوقينا التلاته _ اه ه ه ه ه ه ه _ايه ده.... _ ياساتر يارب....... استنوا كده ده خفاش يا جماعه قلت كده وانا بنهج من كتر الخوف والخضه _ ما انتم عارفين البيوت المهجوره بتبقي فيها خفافيش وتلاقيه هو اللي خبطك يا باسم في الاول وقلت بسم الله وفتحنا الباب اللي عليه حرف ب دخلنا احنا التلاته الاوضه والظاهر ان كل الأبواب اللي في البيت ده بتتقفل اول لما بندخل فيها والاوضه كانت فاضيه مكنش فيها غير صندوق صغير حديد جريت علشان افتحه معرفتش وكان عليه حرف ب برده معرفش ايه اللي خلاني اقول لباسم تعال افتح الصندوق انت يمكن لاني اقتنعت ان الحروف دي بتشير لينا احنا التلاته، والغريب ان الصندوق فتح مع باسم وحصل اللي ما توقعتهوش فجأه باسم شهق شاهقه كبيره وفتح بقه وعنيه برقت وقعد يدور ويلف حولين نفسه ويقول مش عارف مش عارف وكأنه بيكلم حد انا وعماد من الصدمه اتسمرنا في مكانا وفجأه باسم قال ذنب... ذنب خلاص حقول... خلاص حعترف واترمي على الأرض _ انا... انا... اصصصل الحكايه، انا انا شششفت حاجه غريبه انتم مشفتوهاش ولا سمعتوها ها ها _ لا _ لا... شفت ايه وسمعت ايه _ ست عجوزه شكلها وحش وعنيها بلون الدم وشعرها كأنه حمم من النار قالتلي : عمرك ما حتطلع من هنا الا لو اعترفت وتبت عن ذنب كبير انت عملته او ينجيك خير كبير انت عملته وووووراحت........ وقعد باسم يعيط _ انا كنت حاسس والله _ استني يا احمد انت كمان , كمل يا باسم انا حموت من الخوف وراحت ايه بقي.... كمل باسم كلامه وهو منهار من العياط _ مبرقه عنيها جامد و شفت فيها نفسي وانا بتعذب ووووو قالتلي ها...... ذنب ولا خير _ علشان كده قعدت تقول ذنب ذنب _ احمد بطل تفسر الأحداث احنا مرعوبين خلقه وانت يا باسم ذنب ايه بقي ما تعترف بيه ونخلص يمكن نطلع من البيت ده بقى انا بجد حاسس اني حموت هنا لقيت باسم قام من الأرض وقعد يلف في الاوضه ويقول انا عملت ذنب كبير لازم اعترف بيه ولازم انت يا احمد تسامحني _ انا.......مهما كان انا طبعا مسامحك بس تقصد ايه _ استني بس مش تعرف انا عملت فيك ايه، انا يا احمد اللي بوظت مشروع التخرج بتاعك علشان متطلعش الاول على الدفعه وانا برده اللي فرقت بينك وبين سها علشان كنت غيران منك مكنتش عاوز اشوفك احسن مني...... بس والله ده كان زمان كان طيش شباب وغيره ملهاش مبرر كفايه اللي انت عملته معايا بعد كده في ازمه تعب بابا و....... _ انا مصدوم من اللي بسمعه بس يا باسم انا مسامحك؛ يمكن لو كنت اتعينت في الجامعه مكنتش وصلت للي انا فيه دلوقتي بشتغل في شركه كبيره ده غير شغلي في ناسا انا مسامحك يا باسم وموضوع سها ده نصيب اولا واخيرا... انا مسامحك يا باسم _ طب انت عملت فيه ذنب وانت مسامحه انا بقى مالي بيكم انا لسه متعرف عليكم من كام سنه ومعملتش لحد فيكم حاجه اتوحل معاكم الوحله دي ليه _ بطل يا عماد شغل العيال ده وانت يا باسم قوم افتح الباب يمكن يفتح المره دي وفعلا الباب اتفتح مع باسم وأول لما طلعنا لقيت عماد بيقولنا _ انا مش هفتح ولا هدخل أبواب واللي يحصل يحصل _ ما ينفعش يا عماد احنا التلاته مصرنا مرتبط ببعض أجمد كده وتعالى ندخل الاوضه بتاعتك ونشوف ايه _ والله.... هي خلاص بقت الاوضه بتاعتي يا احمد _ ايوه يا عماد احمد عنده حق ما انت شفت اللي حصل معايا يالا بقى وخلينا نخلص ارجوك دخلنا الاوضه التانيه مرحبا المره دي لقينا مرايا طويله عليها برواز من النحاس _ شفتوا يا جماعه انا مرايه... ما انا قلتلكم انا معملتش حاجه لحد.... اهو مرايه حلوه وجميله اهي وقرب عماد من المرايا..... وحصلت مصيبه اتمدت ايد ومسكت عماد من ايده وشدته للمرايا بسرعه البرق _ عمااااااااد _ ايه ده يا احمد ايه اللي حصل،..... _ مش عارف يا باسم يا ترى ايه اللي حصل وعماد راح فين _ طب ما تيجي ن**ر المرايا دي _ لا طبعا ن**رها ايه وعماد حيطلع ازاي _ يطلع وهو حيطلع تاني ده شكله عامل مصيبه سوده احنا منعرفهاش مش عا رف ليه قمت انا اجري على باب الاوضه لقيته فتح معايا وباسم عمال يقولي _ احمد.... استني انت رايح فين وانا مكمل وفتحت باب الاوضه التالت ما انا خلاص فاض بيا ولازم احط حد للمهزله دي ولما دخلت الاوضه وورايا عماد ملقتش فيها غير كتاب فتحته كان فاضي كله الا ورقه واحد بس مكتوب فيها.... صنائع المعروف تقي مصارع السوء _ في ايه مكتوب في الكتاب ده يا احمد _ الحمد لله... الحمد لله الذي هدنا الي هذا وما َكنا لنهتدي به لولا أن هدانا الله وبعد ما خلصت الجمله دي لقيني الدنيا بتلف بينا وكأنه زلزال ودخلنا في دوامه وفجأه لقينا نفسنا على الرمل في الصحرا _ الحمد لله..... الحمد لله _ ايوه يا احمد الحمد لله وانا مش مصدق نفسي اننا عايشين يالا بينا نحاول نرجع للعربيه ونروح بقى _ نرجع ايه يا باسم وعماد _ عماد مين بس واحنا هنلاقيه فين ده ماهو احنا في وسط الصحرا...... و ايه ده مين الي جاي هناك ده بص بصيت ورايا لقيت عماد جاي من بعيد وشكله كأنه كان في خناقه وأول لما وصل قال.. _ احمد ....انت السبب ان ربنا نجانا _ايه يا عماد اللي حصل وازاى جيت هنا حقولكم كل اللي حصل انا فى ايد شدتنى وودتنى حته غريبه الارض عباره عن شوك وفي شجر مافهوش ولا ورقه وعليه غراب صوته كان حيخرم ودانى وشفتها ...... شفت الست العجوزه وقالتلى انى استاهل اللي انا فيه لانى كنت بكدب على بابا وباخد فلوس منه واصرفها علي البنات ودى كانت فلوس علاجه وعنيكم ما تشوف الا النور ...... لقيت الشجر قعد يلطش فيا يمين وشمال ....لحد ما طلعتنى تانى وقالتلى ان انت يااحمد عمرك ما بطلت تعمل خير ودايما كنت بتتصدق وامبارح بليل قبل الرحله تصدقت بنيه ان ربنا يحفظنا وعلشان كده ربنا نجانا _ المهم... الحمد لله اللي نجانا من اللي احنا كنا فيه يالا يا جماعه نرجع للعربيه وسبحان الله لقينا العربيه سليمه ولا كان فيها حاجه ورجعنا القاهره وكل واحد فينا اتعلم درس عمره ما حينساه وخدنا كلنا قرار.... اننا عمرنا ما هنطلع رحلات في الصحرا تاني انتهت القصه وبدأت لمياء في قراءه قصه جديدة انا اسمي هايدي وعندي ٢٥ سنه حكايتي بدأت لما كان عندي ١٤ سنه كنت ساكنة في بلد ارياف لكن الوضع فيها مكنش مريح خالص ... كان في فالمكان الي ساكنة فيه شيخ كبير ومشهور جدا كل يوم ألاقيه مجمع مجموعه من البنات وبيقرأ عليهم بعض من آيات القرآن والبنات دي كان رد فعلهم غريب جدا كانوا يقعدوا يصوتوا وصوتهم يتغير .... مكنتش فاهمة ساعتها هما ليه بيعملوا كده كنت فكراهم مجانين او مرضي نفسيين ... اهلي كنت كل اما اسألهم هما ليه بيعملوا كده ميردوش يجاوبوني... وفيوم كنت معديه من جمبهم فضولي خلاني اقف واشوف ايه الي بيحصل لقيتهم بنات طبيعيه جدا ولما يبدأ الشيخ يقرأ عليهم صوتهم بيتغير وحالهم بيتقلب ولقيت واحدة فيهم بتبصلي جامد قلبي اتقبض وخفت جدا وجريت عالبيت وقلت مش هحكي لحد الي حصل عدا تلت سنين وكانت الامور ماشية طبيعيه هي بس شوية كوابيس بتجيلي بليل.... لحد ما قابلت محمد كان معجب بيا كنت ساعتها ١٧ سنه وبالفعل جه وكلم اهلي وعملنا خطوبة.... واتفقنا ان الفرح هيبقي كمان سنتين.... كنت مبسوطه اوي كنت صغيرة ساعتها ومش عارفه يعني ايه جواز ومسؤليه... عدت السنتين بسرعه اوي لحد ما جه يوم الفرح .... صحيت من النوم قلبي مقبوض اوي.. مش عارفه ايه السبب ... رحت الكوافير ولبست الفستان والفرح خلص وروحت عالبيت انا ومحمد... دخل ياخد دش وانا بدأت افك دبابيس الطرحه بتاعتي كنت واقفه قدام المرايا وبشيل الدبابيس احطهم فالدرج وابص فالمرايه تاني ... بس ايه دا في حاجه غريبه بتحصل جوة المرايا... محمد إلحقني..!!!!!!!!!!!!!! في ايه يا هايدي مالك ... _ بص كده فالمرايا.... _ مالها مفيهاش حاجه _ انا كنت واقفه افك دبابيس الطرحه ورحت احطها عالكومودينوا لقيت صورتي ما مشيتش معايا اهي والله انا واقفه لسه فالمرايا وببصلنا وبضحك .... فجأه اغمي عليا ومحمد اتصل ب والدته وماما جم يجروا....وطلبوا الدكتوور..... _ الظاهر ان هي اعصابها تعبانه من حاجه او عندها صدمه عصبيه انا كتبتلها علي شويه مهدئات عشان تروق _ ماما انا عاوزه اروح معاكي البيت ده انا مش مرتاحه فيه.... _ يابنتي مينفعش الناس تقول ايه وحماتك وجوزك هيدايقوا النهاردة ليلة فرحك.... مشيوا وسابوني وانا مرعوبة نمت من كتر الخوف بس فيه حاجه صاحتني مش عارفه هي ايه كان الوقت متأخر جدا وكان محمد كمان نايم مرضتش اصحيه قمت عشان ادخل الحمام وفتحت الباب لقيت نفس البنت الي شبهي الي كانت فالمرايا قاعدة جوة الحمام وبتبصلي وقايمه عليا تجري محستش بنفسي غير وانا بفتح باب الشقه وبصوط وبجري فالشارع ب هدوم البيت والناس كانوا نايمين وصحيوا علي صوتي وكله بيتف*ج عليا... لحد ما وقعت فالشارع الناس خدوني ودوني علي امي... _ يادي الفضايح انتي اتجننتي تجري فالشارع بالمنظر ده _ انا مكنتش حاسه بنفسي يا ماما انا شفت حاجات غريبه وواحدة كانت بتجري عليا _ تلاقيكي بس خايفه من الجواز وبيتهيألك حاجات _ انا متأكده والله ياماما انا مش بكدب... _ طب يلا علي بيت جوزك مش ناقصيين كلام وفضايح.. خدتني ودتني علي بيت جوزي لقيناه قاعد وطبعا الي حصل وصلوا ووصل ل مامته وكان مدايق جدا ... _ انتي ازاي تخرجي من البيت بالهدوم دي _ غصب عني والله اصل فتحت باب الحمام وووو _ خلاص مش عاوز اعرف كفايه الفضيحه الي عملتهالنا مشيت امي ولقيت بعدها حماتي جت... _ ايه الي حصل البلد كلها بتتكلم علي مراتك ... _ خلاص يا ماما الي حصل حصل... _ يعني ايه الي حصل حصل احنا اتفضحنا فالبلد ... ولقيتها عمالة تزعقلي جامد رحت دخلت الاوضه وقفلت علي نفسي واعدت اعيط ب حرقه .... لقيت نفس البنت جيالي وكان شكلها حزين وبتقرب مني مرضتش اقوم من مكاني وانا بعيط... اعدت تقرب تقرب وفجأه..... فجأه لقيتها جت نامت علي رجلي واعدت تعيط كأنها بتواسيني .... والموضوع بقي يتكرر معايا كتير كل مايحصل حاجه او حماتي تزعقلي الاقيها جيه عليا وتعد تعيط وتحضني... وفيوم كنت نايمه علي سريري لوحدي في حاجه خلتني اصحي بصيت ناحيه الباب لقيت ست كبيرة بس شكلها بشع اتفزعت اول ماشفتها... لقيتها بتقرب مني مش عارفه ليه جسمي اتشل مقدرتش اتحرك من مكاني ..... قربت عليا ورسمت علي قورتي علامه صليب مش بتتمسح ولا بتختفي خالص... كأنها وشم دائم مش بيتشال من مكانه... جوزي بدأ يخاف مني واهلي كانوا خايفيين عليا ... كنت بمشي فالشارع كل الناس تعد تبص علي شكلي والعلامه وكانوا بيبعدوا عني وبحس انهم خايفيين مني لكن انا كنت حاسه نفسي قويه اقوي واحده فالدنيا العلامه دي ادتني ثقه فنفسي وعمري ما حسيت امي ضعيفه او حد اقوي مني... كنت بروح الاماكن الي الناس بتتعالج فيها من المس والسحر كنت بشوف اي انسان ممسوس الاقي حد واقف جمبه لونه اسود وملوش ملامح كنت بشوف اي بيت فيه حاجه ليها علاقه بالسحر والجن بشوف بيحصل فيها ايه كنت مختلفه عن اي حد ... عدا سنه ونص وانا علي نفس الحال وبقيت اكتر من الاول وابتدي جوزي يزهق مني لاننا في المدةدي مكناش لسه اتجوزنا ومامته بدأت تتكلم وفي يوم كانت جيه عماله تزعق ومتعصبه من الوضع بتاعي انا وابنها لقيتها بتخبط عالباب جامد فتحتلها... _ هو في ايه يا هايدي احنا هنفضل فلوضع دا كتير _ انا ذنبي ايه انا واحدة مريضه مش بإيدي.. لقيتها بدأت تتعصب وتعلي صوتها.... فجأه لقينا حيطان البيت اعدت تتشقق وتنزف في دم من كل مكان حماتي وجوزي اترعبوا من المنظر وخافوا وسابوني فالبيت لوحدي .... بعد ما مشيوا الدم راح لكن الحيطان فضلت متشققه زي ماهي... وبعدها ظهرتلي البنت الي شبهي تاني اعدت تبصلي وتبتسم كأنها بتقولي انا هنتقم من اي حد يزعلك... اعدت تبصلي شويه وبعدها لقيتها ماشيه مش عارفه ليه جالي جرأه اني انده ع انده عليها واكلمها ... _ استني انتي مين .... لقيتها بتبرقلي جامد وعنيها بدأت تنزل دم ومردتش عليا واختفت.... اعدت لوحدي اعيط واكلم نفسي ... هو انا ليه بيحصلي كل دا واشمعنا انا... فجأه لقيت باب الشقه بيخبط اتخضيت جدآ لأن جوزي معاه مفتاح ... رحت افتح الباب وشفت منظر مش هنساه رحت افتح باب الشقه وشوفت منظر مش هنساه شوفت جدتي واقفه ومعاها واحدة تاني نفس شكلها بظبط ... جدتي دي ست كبيرة مش بتتحرك من مكانها مش بتروح في حته .. انا من صدمتي سيبت باب الشقه مفتوح لقيتهم دخلو قعدوا عالانتريه ... بصيت ليهم وقولت .... _ تيتا انتي شايفه حد جمبك فيه واحدة شبهك بظبط... لقيتهم هما الاتنين بدأ شكلهم يتغير واتحولوا ل خيال دخلوا جوة الانتريه واختفوا.... نزلت جري عند حماتي اسألها انتي شوفتي تيتا حد جه وطلعلي... قالتلي مفيش اي حد جه البيت ولا باب البيت اتفتح... _ انتي اعصابك تعبانه وشكلك هتجنيني معاكي انتي لازم تتعالجي عشان احنا تعبنا... طلعت فوق ارتاح شويه سمعت صوت حاجه بتحصل في شقتي.... لقيت الخيال الي دخل الانتريه خرج... وبدأ يتحول في شكل ناس اعرفها لمدة خمس دقايق... وفالاخر اتحول ل شكل البنت الي اعرفها بصتلي وضحكت وبعدها اختفت.... كل حاجه بتت**ر تلاجتي والبوتجاز والغساله .... كل الاجهزه الي فالبيت ات**رت ... حماتي طلعت علي صورت الت**ير واعدت تخبط ... _ في ايه ياهايدي مين الي عمل فالبيت كده.... _ معرفش انا كنت نايمه.. _ كنتي نايمه ازاي يعني امال مين الي **ر الحاجات دي.. وبدأ صوتها يعلي وتزعقلي جامد بدأت اتعصب عليها... وفجأه خرج من كف ايدي تعبان كبير نط عالارض واختفي فالشقه.... حماتي اترعبت ونزلت تجري تحت.... وكلمت جوزي عشان تقوله.... _ انت لازم تسيبها دي مش هيجيلنا من وراها غير المشاكل.... وبالفعل سمع كلامها واتطلقت بعد سنه ونص جواز من غير ما اتجوز.... رجعت بيت اهلي وكنت فاكرة ان خلاص الكابوس انتهي .... لكن انا زي مانا كل حاجه كانت بتحصل في بيتي حصلت في بيت اهلي.... فالوقت دا كلمت برنامج تليفزيوني بيجيب شيوخ يعالجوا الناس قلت خلاص الكابوس دة هينتهي... لكن رحت ومفيش اي فايدة.... مفيش اي حد قدر يعالجني .... لحد ما قابلت شخص كان عارف كل حاجه عني .... وصمم انه يفضل معايا لحد ما اتعالج .... رحت عند شيوخ كتير وهو كان بيدعمني ويساعدني... لكن لحد الآن مفيش اي فايدة.... بس بقيت احسن شوية اخر حاجه حصلتلي وانا نايمه البنت دي ظهرتلي وحطت ايديها علي العلامه وقالتلي متخافيش طول ما العلامه دي عندك انا جمبك وبساعدك وبحميكي من اي حد....

Free reading for new users

Scan code to download app

App Store Google Play

Facebookexpand_more