الفصل الثالث

1351 Words

الضمير الفصل الثالث بقلم : ريان عبد العزيز محمد ابراهيم بعد فتره نوال مواصله فى الشغل ..يوم سميه إتذكرت نوال مشت ليها العصر نوال سلمت عليها بطيبه وبشاشه وضيفتها وكلمتها بخصوص شغلها ...(بس للأسف سميه إتغاظت شديد بخصوص شغل سميه وقررت ما تخليها تتهنى بيو ) وإتونست معاها ونوال قالت ليها أظهرى علي فى الشركه ...سميه ردت بإنو حتجيها وتجيب معاها حنين ..وبعدها سميه طلعت على بيتهم وملانه مشاعر كره وحقد لى نوال ... _ فى جانب تانى ...رنا قاعده فى بيتهم وقررت تمش لى ماهر فى شركتو وتعتذر ليو وتحاول ترجع ليو لأنها إكتشفت إنها بتحبو شديد وماقادره تنساو نمش للشركه حقت ماهر ...شركه ماهر ماشه فى تطور ملحوظ وآخر التطورات الحصلت شركة ماهر وقعت مع شركة أدويه أمريكيه مشهوره وماهر قرر يعمل حفل كبير ويعزم كل الموظفين والاحتفال حا يكون مساء اليوم التانى وبكره الدوام ماف كل الناس إستعدت للإحتفال وكل موظفين الشركه كانو مبسوطين شديد بالنجاح الحاصل فى الشركه...ماهر كلم ناس بيتهم بالإحتفال وقررت تمش روان مع ماهر وروان إتصلت بي نوال روان قالت : الو نوال ردت : هلا ياقلبي ...كيفك روان قالت : تمام التمام ..كيف انتى وناس البيت كلهم خالتو وخالو نوال ردت : كويسين الحمد لله كلنا بخير والله روان قالت : اها بكره كيف وكيف مع الإحتفال نوال ردت : والله يا روان ما أظن أقدر أمش روان (بدهشه): أجى يابنات أمى كيف ما بتقدرى تمشى وإنتى موظفه فى الشركه ؟ نوال ردت : المشكله انو الإحتفال المساء وأنا أهلى ما بخلونى اطلع المساء براى وانا زاتى بخاف مابقدر أطلع براى روان قالت: ونحنا مشينا على فكره زعلتينى منك والله اصلا انا وماهر بس الحا نمش ...ماما وبابا اعتذرو من ماهر ما بقدرو يمشو بكره تمشى معانا مفهوم نوال ردت: والله ماف داعى أكلفكم ساى روان قالت : يابت تكلفة شنو إنتى ما معتبره الحاله واحده ودا غير نحن اصلآ ماشين ودا غير ماهر الحايزعل منك لأنك ما تنسي موظفه معاو نوال ردت :طيب ان شاء الله بمش معاكم روان قالت : بكره أنا بتصل عليك لما نكون عايزين نجهز بكلمك تجهزى نوال ردت : تمام ان شاء الله روان قالت : يلا باى لى بكره نوال ردت :بايات تصبحى على خير روان قالت : وإنتى من أهل الخير ان شاء الله وانتهت المكالمه على كدا ... فى نفس الليله دى نوال مشت كلمت أمها وأبوها واستأذنت منهم وافقو طوالى وما إعتراضو وقالو ليها مدام حا تمشى مع ناس روان نحن مطمنين ونوال مشت غرفتها وقررت تطلع احلى فستان عندها وتقشر أحلى قشر لانو حا يكون فى ضيوف مهمين شديد ...طلعت فستان لونو زيتى غامض راقى شديد خامتو شفون ساده فارى كلو قررت تطقمو بطرحه بالبيج وشنطة بيج وجزمه بيج وا**سورات باللون الدهبي وقررت تحجب الطرحه اصبح صباح بكره نوال صحت بدرى شديد صلت الصبح حاضر وقرت أذكار الصباح وقرت قرآن وعملت الشاى وناس امها وابوها واخوها صحو معاها ابوها وأخوها مشو المسجد صلو وامها صلت فى البيت ...المهم مر اليوم بخير ...بعد المغرب طوالى اتصلت بيها روان عشان تجهز ...طوالى جهزت ولبست سريع وعملت ميك خفيف شديد وحجبت طرحتها ولبست إ**سوراتها واتحصنت وانتظرت إتصال من روان ...شويه كدا روان إتصلت بيها عشان تطلع ...فتحت بابهم لقتهم منتظرنها جنب الباب قالت السلام عليكم ردو عليها الاتنين : وعليكم السلام ورحمة الله وبركاته وركبت بكل هدوء فى العربيه بي وراء وقالت ليهم :اعفو لى عذبتكم معاي روان قالت ليها : يابت انتى هبله وله حاجه انا بزعل منك تانى على فكره لو بتتحسسى من أى شئ ماهر قال ليها : عادى والله ما عذبتينا فى شئ وعلى فكره لو كان ما مشيتى كنت حأزعل انا نوال (خجلت ): وسكتت وماهر اول مره يركز على ملامح نوال واندهش شديد بجمالها وبقى بين كل لحظه والتانيه يسرق النظرات بي مراية العربيه وصلوو الحفله واى شئ كان مجهز على أكمل وجه واخوانا واخواتنا الصيادله قاشرين قشرات جد والضيوف وصلو واستقبلوهم أحسن إستقبال والإحتفال كان حلو شديد ومنظم بطريقه جميله شديد وبعدها خلص وأى زول فات على بيتو وماهر وروان وصلو نوال على بيتها وانتظروها لما دخلت بيهم وشكرتهم حتى هم مشو بيتهم وانتهى اليوم على كدا وصباح بكره حا يبدو دوام عادى ...مرت الايام وماهر بقى يثق فى نوال شديد لأنها ماشاء الله مجتهده شديد فى شغلها وحقانيه شديد وكل الموظفين بحترموها لانها تعاملو حلو شديد مع كل الناس....يوم من الايام ماهر كان قاعد فى مكتبو فجأه الباب دق قال إتفضل ..والفى الباب دخلت وطلعت رنا ( حبيبة ماهر القديمه) : وقالت السلام عليكم ماهر رفع راسو وعايز يرد السلام إتفاجأ بإنو دى رد ودمو فار شديد واتغاظ شديد وقال ليها :الجابك شنو هنا إنتى ردت عليو : رد السلام اول وتانى أسأل قال ليها : قلت ليك عايزه شنو تانى منى والذكرك بي شنو ياا مدام كلمة مدام دى وجعت رنا شديد وقعدت تبكى وقالت ليو : ماهر انا اسفه شديد وحقك علي وانا غلطت شديد فى حقك اعفى منى ماهر (صفق بي يدو كدا?? ) وقال ليها : يااسلام عليك ??????مفتكره إنو العملتى حاجه بسيطه وممكن أسامحك بكل بساطه ... فى جانب نوال كانو معاها حنين وسميه ضيفتهم واتونست معاهم وقعدو مسافه معاها وعرفتهم بالموظفين بعد شويه قالو ماشين بنجيك مره تانيه وطلعو من مكتبها بس ما طلعو من الشركه طوالى ...وفى الأثناء دى نوال عندها ملف بخص الحسابات ماشه توديو لى دكتور ماهر وصلت مكتبو دقت الباب بهدوء ماهر رد إتفضلى دخلت لقت ماهر عيونو لونها أحمر من الزعل ولقت معاهو بنت ظاهر عليها انها كانت بتبكى..ماهر قال ليها : اتفضلى اقعدى يانوال ويارنا اتفضلى اطلعى بره نوال استغربت كيف يطرد البنت دى قدامها ...ورنا طلعت طوالى وقعدت تبكى واتغاظت شديد من البنت الاتحرجت قدامها من قبل ماهر... وطلعت لقت مقعد قريب للاستقبال قعدت تبكى وقالت والله ما اخليكم ماهر والاسمها نوال أخليكم تندمو ...وفى نفس اللحظه دى كأنو حنين وسميه بي وراها وسمعو كلامها وطوالى مشو عليها ( فرصه وجات لحدى عندهم ) قعدو يهدو فيها ويقولو ليها ما تبكى الدموع ماشبهكك وبعد شويه هدت وساقوها وطلعو من الشركه حنين (بخباثه ) قالت ليها : قبيل سمعنا انك ماحاتخلى نوال وماهر رنا (اتخلعت وخافت يكونو موظفين فى الشركه ويودوها فى داهيه ): نكرت اى شئ سميه قالت ليها : على فكره نحن برضو عايزين ننتقم من نوال رنا قالت : وانتو منو ؟ حنين قالت : نحن صحبات نوال زاتها رنا قالت : ومالكم عايزين تنتقمو منها ؟ سميه قالت ليها: بطلى اسئله كتيره ...اها انتى عايزه تبقى معانا ؟ رنا( بتفكير ) قالت : أوك موافقه معاكم حنين قالت: اتفقنا خلاص وشالو رقمها واتوادعو وفى جانب نوال وماهر نوال مخلوعه فى تصرف ماهر مع البنت وحاساو غضبان شديد وهى بقت مافاهمه شئ نوال قالت : دكتور ماهر لو مافاضى هسه بجيك فى وقت تانى ماهر رد: لا لا فاضى ماعندى شئ نوال أدتو الملف وشرحت ليو الحسابات بس هو للاسف سرحان فى عالم براهو ولا جايب لى نوال خبر فى النهايه نوال قالت ليها بستأذن دكتور ماهر بس راجع الملف من جديد عايزه تتطلع ماهر وقفها وقال ليها : نوال دقايق عايزك فى موضوع نوال قالت ليو : جدآ ورجعت قعدت ماهر حكى لى نوال بي قصتو مع رنا المسبقآ هى عارفاها وقال ليها جات عشان اسامحها روان استمعت ليو كويس لانو حست بيها تايه فى أمرو ومشتت وقالت ليو كان تعفى ليها وما كان تطردها لكن ما ترجع ليها ونصحتو نصايح بطريقه جميله شديد وهو شعر بنفسو ارتاح شديد وندم على انو اتعصب بي سبب رنا وندم على انو فى يوم حب رنا وقرر يعفى ليها ويصفح عنها بس مستحيل يرجع ليها ومن اللحظه دى قلبو دق لى نوال ? وشعر بإحساس حلو تجاه نوال وشاف نوال دى مختلفه شديد عن باقى البنات وفيها صفات نادره شديد ... _ هل يااترى بنتصر ضمير حنين ورنا وسميه وله للاسف ضميرهم حا يكون مختفى وحا يستمرو فى غلطهم ...لو الإنسان بعد الشيطان منو ومامشى ورا الشيطان حايكون سعيد طول عمرو بس للأسف الشيطان بستحلل الحرام والغلط للانسان والزول بكون شايف نفسو صاح وما غلطان وبستمر فى اغلاطو دى لما فى نهاية الأمر يدمر ويفقد كل الحولو ويفوق ويندم بعد الفأس تقع فى الرأس ... فأسباب اتباع الشيطان هو الحقد وغياب الوازع الدينى من عبادات واستغفار وغيرو وعدم القرب من ربنا كل دا بموت الاحساس وبموت القلب والشخص للاسف بفقد منطق الضمير .. حانشوف الحايحصل شنو فى آخر فصل فى القصه دى وحانشوف الضمير بتغلب على سميه وحنين ورنا وله لا .. وبعتذر جدآ على الاخطاء وبساطة الفصل بس والله عيانه شديد حاولت بقدر الإمكان أكتب ليكم الفصل أحبائى القراء ونقيف لحدى هنا ونتلاقه?

Free reading for new users

Scan code to download app

App Store Google Play

Facebookexpand_more