Inalalayan siya ni Duncan makababa ng sasakyan kasunod si Lyke saka iginiya papasok sa loob ng mansion.
Alanganin siyang napatingin sa gawi ni Duncan nang bumungad sa kanila ang mga kasambahay na nakahanay mula sa pintuan. Tantya niya ay nasa sampu ang lahat ng mga iyon.
“Welcome back, Ma’am Alena!” sabay sabay na bati ng mga ito.
Isa-isa niyang tiningnan ang mga iyon na lahat ay nakangiti. Karamihan sa mga ito ay nakikilala niya. Mga datihan pang kasambahay na madalas rin niyang nakaka-kwentuhan noong nakatira pa siya roon.
Ngumiti siya at nagpasalamat sa mga ito. Lumapit siya sa mayordoma na isa sa naging malapit sa kanya noon.
Naluluhang kinusot nito ang mga mata saka humarap sa kanya at hinawakan siya sa magkabilang balikat.
“Masayang masaya ako na buhay ka at nagbalik na rito,”
