Halos kanina pa si Francis naglalakad, ngunit parang wala siyang patutunguhan. Bumabalik lamang siya kung saan siya nagsimula.
Napakamot siya tuloy sa kanyang ulo. "Mukhang na-Engkanto yata ako," sabi niya, at bahagyang sinulyapan ang paligid. "Pero mukhang hindi naman."
Napaupo siya sa may lupa, at tinangkang magpahinga ngunit biglang may isang babae na nahagip ng kanyang balintataw.
"Mama?" halos pabulong at patanong niyang wika. Kinurap-kurap niya ang kanyang mata para matiyak kung pinaglalaruan lang ba siya ng kanyang paningin. Ngunit maliwanag niya pa rin na nakikita ang kanyang ina.
Biglang napatayo ang mga buhok ni Francis sa kanyang batok. "Hindi ito maari!" saad ng isip niya. Subalit maliwanag pa sa sikat ng araw, na ang babaeng nakatayo sa 'di kalayuan ay ang kanyang mahal na
