KABADO si Cathellya habang nakaharap sila ni Seth kay Lola Ancia. Hawak ni Seth ang kamay niya. Sinamahan nila itong bumisita sa puntod ni Lolo Andoy. Masigla itong nagising at magana itong kumain ng agahan. Nais sana ni Seth na gumamit ito ng wheelchair patungo roon, ngunit tumanggi ang matanda. Kaya raw nito at kailangan nito ng ehersisyo.
Pinaupo na lang ni Seth ang lola nito at sila na ang naglinis ng mausoleum. Hindi naman gaanong marumi doon dahil hindi iyon pinababayaan ng mga apo ng matanda. Nang matapos ay tahimik silang umupo at paminsan-minsan ay kinakausap si Lolo Andoy.
Kinakabahan siya dahil hindi niya sigurado kung mapaninindigan niya ang usapan nila ni Seth. Hindi niya sigurado kung kaya niyang magkunwari sa harap nito. Paano kung mahalata nito na palabas lang ang lahat s
