أصبحتِ هدفي

خارجة مالحمام نزرب بش نروح.. كان يروح سعيد ويلقاني موش فالدار يعملي حالة .. سفساري في يدي كابسة عليه و في يدي الاخرة قفة فيها دبشي .. خطواتي خفيفة و مزروبة .. وصلت قدام الباب نلهث .. حليتو و نرا في صباطو مطيش كل فردة في جيهة .. الفاست ملوحة عالقاعة و الشبابك مسكرة و الدار ظلمة .. انا: س.. سعيد نت جيت ؟ خرجلي مالكوجينة في خلعة و سروال.. كرشو دازة و في يدو كعبة موز.. سعيد: وين كنت لتو؟ شنوا للا صالحة ساقيك تعودو بالهملة منجموش يبقو شهر كامل في الدار مغير خروج؟ - كنت في الحمام.. العرايس الكل يمشو للحمام الا نا حقرني و مشا قعد عالكانابي - فما ماتش منحبش صوت - باهي .. شتحب فطور - طيب اي حاجة .. والا خلي تو ناكل عند امي و سمك كولو وحدك.. من شهر هكا.. نسمع وسخ وذني و نهبط راسي و نمشي .. مشيت للبيت بش نفرغ القفة و نسمع فيه يعيط - ايجا لم لهناا.. الوسخ قريب يعمل الدود .. هاااي نحكي معاك - هاني جاية لحضة.. بالشوي الجيران يسمع صوتو وطى اما كيف درت نلقاه ورايا - كيفاش مالا ! الجيران يسمعو ؟ اي و هوما متعودين يسمعوك تبكي و تعيط .. مشيت وريتهم بدنك الازرق و جيت ؟ تبكيت و تشكيت مني خاتر نض*ب فيك ؟ هذي هدرتو متع كل مايحب يض*بني .. سلمت امري لربي و بدني ليه .. ______ في بلجيكا: خارجة مالفاك نجري بش نوصل للستاد الي موش بعيد .. نشالله نلقا بلاصة و نجم نتف*ج في الماتش .. موش كان في تونس يفصعو بش يتف*جو فالماتش .. كنت فرحانة بعملتي .. اصلا انا منيش متع قراية .. نحب نولي ممثلة .. امي و بابا نشالله يجي نهار و يقتنعو .. اما في الحالات الكل .. بش نولي ممثلة ..انا ألينا الي ما يعرفني كان ربي و عايلتي و جماعة الفاك.. يجي نهار و الناس يشدو الصف بش يصورو معايا .. وصلت وين حبيت.. الصف طويييل و الماتش مزاللو درج .. امبوسيبل نفوت البداية .. بلعت ريقي و بديت نتمشى جيهة الباب .. وين الحراس يشوفو فالتيكيات و يفتشو .. قربت لواحد منهم عالاخر و حطيتلو 30€ في جيبو .. غزرلي و للحضة مشى فيبالي سلكت اوموري اما تصدمت كيف درني لتالي.. غزرت للاخر الي موش فاهم شي .. عمزتو و وجهت نظري للصطوش الي في يدي .. طلع اذكى منو و خلاني ندخل.. طلعت المدرجات الي كانو مليانين و امييونس محلاها.. وانا من الناس الي نحب الجو و الغنا والحفلات .. موش لازم نقعد اصلا بش نعديه ماتش كامل صياح و تنgيز .. خرجو الجوارات وانا بديت نصور في ستوري.. كل واحد ينسيك في الاخر .. كيف ريت ماما تطلب سكرت التليفون و بقيت مركزة مع الماتش الي بدا .. …. في تونس.. في حومة شعبية.. عند صالحة.. كانت قاعدة عالكانابي بعد ما خذات قسطها مالذل و الضرب..فجأة جات لقطة خلاتها ترجع عمر لتالي.. - انا بش نوصل نحقق حلمي نهار .. وانتي ابقى تبع في التقاليد و العيب و الحرام .. ربي يوجهك خير يا بنت الناس .. هز روحو و مشا .. و من وقتها ماعادش ريتو .. قالو سافر البرا و بدا يلعب في فريق اجنبي .. فقت على روحي و على المذيع الي يعلق على المباراة .. تو و بعد سنين .. نرا فيه في التلفزة .. ما تبدلش برشا .. سمن او بالاحرى خدم بدنو .. زاد زيان .. غمازاتو باقين زايدين فيه الشطر .. تلفت لراجلي الي يقشر في القلوب و يتف*ج .. انا ماغلطتش كيف عرست و شفت حياتي بعدو .. الكل قالولي غزلو و اقهرو و عرس.. اما هو موش عاطيني حتى اهمية .. فجعني صوت راجلي الي باحح من كثرة الدخان .. - قوم اعمللنا تاي ولا قهوة،، مادة ساقيك معندكش ماعون ولا صابون ؟ - الله يبارك - تحررك،، هالعيشة الكلبة .. قمت كيما عادتي .. هذا نهاري كيفاه يتعدى .. قوم، اقعد، طيب، سخن، جيب، هز، اغسل.. انا جبتها لروحي .. خلي نتحمل .. في جيهة اخرى .. في دولة الاسود .. الدولة الاولى عالميا في كرة القدم .. بلجيكا .. في ملعب في قلب مدينة bruges .. واقف في بلاصتو .. المدافع المحبوب.. الجمهور يشجع .. و هو كيما ديما قاري قرآنو و حاطط في قلبو الانتصار .. الاربيتر زفر و ماترا كان الرجال تجري و الكورة بيناتهم .. 90 دقيقة قرحة.. 90 دقيقة تعب اما بعدهم فرحة الربح .. و قداش من مرة تجرح ولا تض*ب في اول المباراة اما كمل يلعب .. الجمهور معمل عليه و على ربي .. الوجيعة تو تداوى مبعد .. 120 دقيقة تعب ما مشاوش خسارة .. تصفيق الجماهير هو الي يحسسك الي نت سبب فرحتهم .. و هوما يشجعوك تواصل.. خرج مالملعب و يديه يلوح بيها للناس الي وثقت فيه .. و داخل للفيستيار .. … كمل الماتش.. و راجلي خرج .. كيما العادة .. و بش يروح كان فالليل .. وانا مانلقى ما نعمل كان نضف و نشمع .. و كان يلقى وسخة تشوام ليلتي .. .. يتبع.. في الفيستيار.. الاولاد مشنعينها بالغنا و الشطيح .. الكلو فرحة .. الكلو في حب الفريق .. بعد ما بدلت دبشي شربت دبوزة البروتيين متاعي و سلمت عالاولاد .. هزيت ساكي ماشي للباركينغ .. في المدرجات: ألينا: عندي جمعتين نستنى في المانش و في الاخر .. ربحناا كيما العادة .. خرجت مع الناس و تمشيت للدار.. الدار بعيدة قريب ساعة بالترونسبور اما اكيد موش بش نمشي طريق كامل على ساقيا .. تمشيت لين تعبت و بعد خذيت bus بش نكمل طريقي .. وصل محمد قدام البرطمان.. ملقاش بلاصة للكرهبة بقى يدور لين لقالها في النهج التيلاني .. محمد: ساكي على كتفي .. الدنيا بدات تظلام .. الهدوء مالي الدنيا .. ملس كنت نكور حفيان في الشارع و ما نروح كان ماناكل كف.. وليت نكور عالمياا و نمشي لابس صبادري.. مالي كنت نرقد جيعان و نقوم جيعان وليت نختار ماكلتي قبل بنهار.. وين كنت و وين صبحت.. اما غدوة وين بش نكون !.. طلعت الدرجات قبل ما نحل الباب و تعرضني ريحة البخور و المزود و صوت الضحك و التوشويش.. و شكون غير عويشة بش تكون مولات العملة .. شكون بش يفهمها الي الماتش موش مهم لدرجة احتفال .. جاتني بهاك الضحكة و الغمازات الي ورثتهم منها .. - يا بابا مرحباا بيك.. نورتنا و رفعتلنا راسناا .. - عيشوشة ياحبي حطيتها عندي و كبست عليها .. بستها و بعدتها عليا شوي و عليت في صوتي بش تسمعني.. - شنوا لزوم هذا الكل ؟ - اسكت علياا و ايجاا سلم عا****عة.. و اك الطفلة مالصباح تبكي توحشتك برا سكتهاا - موش حفيدتك هيا علاه متسكتهاش نتي - لا يزي نطيبلك في ماكلتك وحدك و ماكلتها وحدها و ماكلتنا وحدنا و قضية الدار - باهي باهي كهو هاني ماشي ههه كان تراوها كيفاش كيف تبدى تخرنن ماتسكتش و تتقرمش من كثر ما تحسها بيبي صغير قاعد ينgنg عليك .. مشيت للصالة الي ملمومين فيها الجيران .. مديت يدي سلمت عليهم و تقبلت التهاني .. هذا سيناريو كل ماتش .. و مشيت للبيت بش نشوف صغرونتي ..