PAG-IBIG SA LIKOD NG MASKARA

“Andrew, babe!” isang malambing na tawag ng isang babae na pumasok sa penthouse ni Andrew. Nagtuloy-tuloy ito patungo sa silid ng lalaki. Hindi na nito ipinaalam sa lalaki ang kaniyang pagdating mula kanyang business trip dahil gusto nitong sorpresahin ang nobyo. Sabik na sabik na siya dahil dalawang buwan na lang ay ikakasal na sila ni Andrew. “Babe!” pinihit nito ang seradura. Laking gulat nito nang makita si Andrew na natutulog pa sa kama at may kasama itong babae. “Mga walanghiya kayo!” agad na sambit ni Hailey na dali-daling pumasok ng silid at hinablot ang kumot na nakabalot sa dalawa. Napabalikwas nang bangon si Andrew sa sobrang pagkagulat. Agad itong napatingin sa katabi. “Wait…what happened?” usal nito na napahawak pa sa kaniyang sumasakit na ulo. Bigla namang napatakip ng kumot si Isabelle sa hubad na katawan nito. Dumilim ang mukha ni Hailey na nagpalipat-lipat nang tingin sa dalawa. “What happened, huh? Nagmamang-maangan pa kayo! Ipaliwanag mo ang lahat ng ‘to, Andrew!” umiiyak sa galit na sabi ni Hailey. “H-hailey, babe, I can explain—” pero bago pa maituloy ni Andrew ang kanyang sasabihin ay dumapo na sa kanyang pisngi ang sampal ni Hailey. “Babe…” Nakatingin lang siya sa nobya at hindi rin alam kung ano ang ipaliliwanag niya gayong kahit siya ay hindi alam kung bakit katabi niya si Isabelle. Pilit niyang inaalala ang mga nangyari kagabi. “Hindi ko akalain na magagawa mo ‘to, Andrew! Buong pagtitiwala ang binigay ko sa’yo pero niloloko mo lang pala ako! And you!” bumaling ito kay Isabelle na nakayuko lamang at tila hindi makatingin sa hiya, “I trusted you and treated you as my sister, pero ito pa ang ginawa mo?! Walanghiya ka!” Hindi nito napigil ang sarili at hinablot nito si Isabelle na noon ay nakaupo pa sa kama at binigyan ito ni Hailey ng dalawang magkasunod na sampal. Hindi nakaimik si Isabelle, napayuko lamang ito at umiiyak. “Hailey, hindi ko alam ang mga nangyari kagabi, please pakinggan mo muna ako—” “Liar!” dinuro nito si Andrew. Akmang hahawakan nito si Hailey sa balikat ngunit mabilis na tumalikod ito at tinungo ang palabas na pintuan. Nagmadaling nagsuot ng damit si Andrew at hinabol nito si Hailey na nakalabas na ng pintuan. “Hailey!” tawag nito. Tumakbo si Hailey at pumasok sa pasarang elevator. Hindi na ito naabutan ni Andrew. Kung kaya’t lumabas siya sa hallway ng condominium at sumakay sa hiwalay na elevator. Wala sa kanyang hinuha na lokohin ang nobya, mahal na mahal niya ito. Unti-unti na niyang naalala ang nangyari kagabi. Nag-inuman sila sa bar kasama sina Isabelle at ang iba pang kaibigan. Hinatid siya ng isang kaibigan dahil hindi na niya magawang mag-drive pa. Pagdating niya sa penthouse, mayamaya lang ay dumating na rin si Isabelle. Naalala niyang may nangyari nga sa kanila. Lalaki lamang siya at natutukso rin. Maganda si Isabelle at hindi lingid sa kanyang kaalaman na matagal na itong may gusto sa kanya. Humahangos siya nang lumabas sa elevator pagdating nito sa lobby. Nakita niya si Hailey na mabilis na naglalakad patawid ng kalsada tila wala ito sa sarili at hindi ito tumitingin kung may paparating na sasakyan. Agad niya itong hinabol at tinawag. “Hailey!” Napatingin siya sa mabilis na papalapit na sasakyan na tila hindi napansin ng babae. “Look out, Hailey!” sigaw niya sa nobya. Ngunit huli na nang mapansin ng babae ang sasakyan. Tumilapon ito sa gilid ng kalsada. Nakita ni Andrew ang malakas na pagkabundol dito ng sasakyan kaya agad siyang tumakbo sa kinaroroonan nito. “Hailey!” Umiiyak na dinaluhan niya ang duguang nobya. Kitang-kita niya ang pagtulo ng mga luha nito. “Don’t worry dadalhin kita sa hospital!” tarantang sabi niya na hindi mapigil ang panginginig ng kanyang katawan sa sobrang takot sa nangyari sa babae. “A-andrew…please save our b-baby…” nahihirapang sabi nito habang hawak-hawak ang tiyan. “What?” hindi makapaniwala si Andrew sa narinig kung anong baby ang sinasabi ni Hailey. “Please…Andrew…ang baby natin…” ulit na sabi nito na hirap na hirap na sa paghinga. “No, please ‘wag ka na muna magsalita tatawag ako ng ambulansiya.” “A-andrew…I’m…” hindi na nito naituloy ang pagsasalita dahil lumabas na ang dugo sa bibig nito. “No!!!” Hindi niya alam kung ano’ng gagawin. Wala siyang magawa habang tinitingnan lamang ang nobya na nahihirapang huminga. “Save our …b-baby…” “Hindi ka mamamatay, magpapakasal pa tayo, ‘di ba?” Umiiyak na siya at takot na takot. Noon lang niya napagtanto at naunawaan na ang tinutukoy ng nobya ay buntis ito. Lalo siyang natakot, hindi niya akalain na nagdadalantao ang kanyang fiancee. “Okay, okay, don’t worry ‘wag ka nang magsalita, dadalhin kita sa hospital. I’m so sorry, babe...I’m so sorry…makakaligtas kayo ni baby, okay?” dinala niya ang kamay nito sa kaniyang labi at hinagkan habang hindi niya mapigil ang paglandas ng kaniyang mga luha. Mayamaya pa ay agad namang dumating ang ambulasiya na siyang rumisponde agad. Agad na isinakay sa ambulansiya si Hailey at sumama si Andrew sa hospital. Pagdating sa hospital ay hindi mapakali si Andrew. Iyak ito ng iyak at wala itong ibang naalalang tawagan kundi ang kanyang kaibigang si Brent na agad namang pumunta sa hospital. “What happened, bro?” nagmamadaling lumapit si Brent sa kaibigan na noon ay panay na ang iyak. Umiling si Andrew, “She’s dead.” Kanina lang ay nagwawala siya at muntik na niyang suntukin ang doktor dahil hindi siya makapaniwal na sinabi nitong dead on arrival ang nobya. Namutla si Brent sa narinig. Kahapon lang ay nagkuwentuhan pa sila tungkol sa nalalapit na kasal pero sadyang mapagbiro ang tadhana. Hindi halos maikuwento ni Andrew ang nangyari. Hindi umaalis si Andrew sa tabi ni Hailey habang nakaburol ito. Tila gumuho ang kanyang mundo dahil wala na si Hailey, wala na rin ang kanyang anak. Muling lumandas ang kanyang mga luha. “Magpahinga ka muna, hijo, wala ka pang tulog at hindi ka na rin kumakain,” anang ina ni Hailey na tinapik siya sa balikat. “No, Tita, this is all my fault. Naging pabaya ako sa kanya…” “Don’t blame yourself, hijo, wala namang may gusto sa aksidente,” anang ina ni Hailey na napaiyak na rin. Subalit mas lalo lamang nadudurog ang kanyang puso dahil alam niyang siya ang dahilan kung bakit namatay si Hailey. Hindi lang niya masabi sa pamilya nito ang totoong nangyari.