رواية غلطة أخي

الحلقه التاسعه و الثلاثون

الحلقه التاسعه و الثلاثون من رواية

غلطة أخي

???????

كل يوم كان بيمر علية و انا عايشه هنا و انت في حضني كان مخليني فرحانه و مطمنه عليك و على امانتها اللي امنتني عليها و بقول يا رب طول في عمري بس عشان خاطر أحمد

يصحى عبد الله من نومه عند اذان الفجر يلاقي كوثر ماسكه صورة هناء في ايدها و بتكلمها : هناء يا حبيبتي صباح الخير وحشتيني اوي يا أغلى الناس

أنا قلت لازم افرحك احمد بقى بيحبي يا هناء و طلعلتله سنتين يا خلاثي على جمالهم هو بس سخن شويه و انا اخدته انا و عبد الله و روحنا بيه للدكتور و طمنا و قاللنا ده عادي عشان بيسنن و هو الحمد لله بقى زي الفل

بقى امور اوي يا هناء فيه شبه كبير منك اوي يا حبيبيتي ضحكته و عنيه عارفه يا نوءة لما ببصله بحس اني شايفاكي انتي ادامي بحس انك معايا

انا بحبه أوي يا هناء بموت فيه هو روحي و قلبي و عنيه و كل دنيتي

اطمني على أحمد يا حبيبتي هو بخير و زي الفل على فكرة انا يوم الجمعه ان شاء الله حجيبه و حنجيلك عشان اناي وحشتيني اوي

تحط الصورة في الدرج و تنهمر في البكاء فتلاقي اللي بطبطب عليها : هوني على نفسك يا كوثر هناء راحت للي احن من الكل

كوثر و هي بتعيط : وحشتني أوي يا عبد الله

عبد الله : وحشتنا كلنا و الله بس حنعمل ايه دي حكمة ربنا

كوثر : عمري ما جه في بالي يوم اننا ممكن نتفرق عن بعض

عبد الله : كل من عليها فان و اللي بييجي معاده بيمشي و يا عالم الدور الجاي على مين

كوثر انا عاوز اقولك حاجه

كوثر : اتفضل يا عبد الله قول اللي انت عاوزه خير

عبد الله : دلوقتى الموت مبقاش بالمرض و لا بالسن و ممكن فجاة و الواحد بيتكلم يجيله اجله وصيتك احمد يا كوثر لو حصللي حاجه احمد امانه عندك يا كوثر هو خلاص بقى ابنك خليه في حضنك العمر كله

كوثر : ألف بعد الشر عليك يا عبد الله ربنا يطول في عمرك و بخليك ليه و محدش يربيه غيرك يا رب

عبد الله : و بخليكي لينا يا كوثر انا و الله ما عارف من غير وجودك معانا انا و الغلبان ده كان حيحصلنا ايه

كوثر : لا يا عبد الله متقولش على أحمد غلبان ده ابني حبيبي و بكرة حيكبر و يبقى سيد الناس كلها

اوعدك يا عبد الله انك ان شاء الله حتتباهى يه في كل مكان و حخللي الناس كلها تقول عبد الله مخلف راجل حخليه يرفع راسك في وسط العالم كله

عبد الله : و انا متأكد من كده ما دمتي انتي معانا

بقولك ايه بقى النهارده الخميس و انا الصراحه مليش مزاج اروح الورشه و الجو جميل ايه رايك ناخد احمد و نروح نفسحه و نغير له جو البيت

كوثر : بجد يا ريت و الله

عبد الله : طيب يا للا ادخلي نامي جمبه شويه و انا حصحيكم و نروح نقضي اليوم كله بره

ياخد عبد الله كوثر و يقضوا يوم جميل برة البيت و يشتروا لأحمد لبس كتير و لعب و يعدوا على مامة هناء و والدها عشان يطمنوا على أحمد

روح : يا حبيبي يا احمد. عارفه يا كوثر كل ما بشوفه بحس اني شايفه هناء ادامي

كوثر : اللي خلف مماتش يا ماما روح

يقعدوا معاهم شويه و ياخدوه و يروحوا

و على اد حزن ابو هناء و امها على موت بنتهم الا انهم بيحمدوا ربنا انه رزقه بأم تعوضه

???????

أحمد : و بعدين يا ماما

كوثر : و عدت و مرت الأيام و الشهور لحد ما جه يوم عيد ميلادك كان نفسي اعملك عيد ميلاد بس مرضتش اعمله في نفس اليوم عشان مفتكرش هناء لكن بعديها باسبوع خليت أبوك عملك تورتايه مخصوص كبيرة و عملتلك حاجات حلوة كتير و عزمت ماما و بابا و جدك و جدتك يحضروا و كنت فرحانه بيك اوي خصوصا انك في اليوم ده اتسندت و خطيت أول خطوة برجلك

و لقيت جدتك بتقولي بعشم :

عقبال ما تخاويه يا كوثر

كوثر : اخاويه انتي بتقولي ايه يا ماما

روح : امال يعني عاوزة أحمد يعيش وحيد لا يا حبيبتي اتجدعني كده و هاتيله اخ او اخت يلعب معاهم و يتونس بيهم

كوثر : اه طيب ان شاء الله

روح : كوثر هو في حاجه انتي مخبياها عني

كوثر : ليه بتقولي كده يا ماما روح

روح : مش عارفه احساسي قاللي كده كلامك مش مريحني قوليلي يا حبيبتي انا زي امك متخبيش عني حاجه

كوثر : مش حينفع يا ماما كلهم دلوقتى موجودين

روح : خلاص بكرة نقعد نتكلم كده كده انا بايته معاكم النهارده بكرة بعد ما عبد الله ينزل الشغل تحكيلي ايه اللي مضايقك

كوثر : ماشي يا ماما

قضوا ليله جميله و هما بيحتفلوا بعيد ميلاد أحمد

عبد الله كان فرحان اوي و هو شايف ابنه بيكبر ادام عينيه و شايف كوثر اد ايه بتحبه و متعلقه بيه و الكل كان مرتاح من ناحية الطفل اليتيم اللي ربنا عوضه عن امه اللي ماتت بأم تانيه حقيقيه

♥️♥️♥️♥️♥️♥️♥️

في اليوم التالي يصحى عبد الله و كوثر تحضرله الفطار و ينزل يروح شغله و تقعد روح معاها عشان يتكلموا و تعرف كوثر مالها و فيها ايه

تتفاجئ بكلام كوثر اللي قالتهولها : يا لهوي ايه الكلام اللي انتي بتقوليه ده يا كوثر يعني انتوا عايشين زي الاخوات من يوم ما اتجوزتوا يعني انتي لسه بنت لحد دلوقتي

حرام عليكي يا بنتي انتي كده تشيلي ذنب كبير اوي ليه بس كده يا كوثر

كوثر : ايوة بس عبد الله ما طلبش حاجه يا ماما من يوم ما اتجوزنا

و مغصبنيش على حاجه

روح : لا إله إلا الله مش انتي اللي قلتيله يا كوثر و هو مرضاش يجبرك على حاجه عشان عبد الله راجل محترم و فهم الوضع كويس و قدر موقفك

لكن انتي طولتي في الموضوع اوي و ده حرام حرام يا كوثر

ده راجل يا بنتي راجل و ليه احتياجاته

كوثر : غصب عني يا ماما مش بايدي مقدرتش اخد مكانها مقدرتش انام في حضن جوزها مقدرتش

روح : مبقتش مراته خلاص انتي اللي بقيتي دلوقتي مراته مش هناء

و الحي ابقى من الميت يا حبيبتي

كوثر : انتي اللي بتقولي كده يا ماما

روح : أيوة انا اللي بقولك كده مستغربه ليه

كوثر : مستغربه لأن انا فكرت لما تعرفي حاجه زي دي حتفرحي

روح : عاوزاني افرح في الظلم يا كوثر لا يا حبيبتي انا مرضاش بالظلم و اللي بتعمليه ده ظلم ليكي و لجوزك و ميرضيش ربنا حرام عليكي تمنعي شرع ربنا ليه انتي كده بتاخدي ذنب و انتي مش حسه

كوثر : ذنب طب ليه انا محستش انه عاوز حاجه مني طول الفترة دي كلها محستش اني ظلماه بالع** هو طول الوقت بيتكلم معايا عادي و بيدخل البيت و هو بيضحك و وشه بشوش على طول لو كان حاسس اني ظلماه اكيد كانت معاملته معايا حتتغير

روح : لا حول و لا قوة الا بالله العلي العظيم اقولها إيه دي بس يا ربي و افهمها ازاي

بصي يا كوثر انا عارفه و مقدرة اللي انتي فيه و يعز علية اني اشوف واحده تانيه مكان بنتي انا جوايا نار ربنا وحده العالم بيها نار مش حتنطفى غير لما احصلها عشان ارتاح

كوثر : ألف بعد الشر عنك يا ماما

روح : غصب عني يا بنتي مش بأيدي الضنا غالي غالي اوي انا لولا اني مؤمنه كنت اتجننت

اسمعيني يا بنتي هناء راحت للي أحسن من الكل راحت للي خالقها و ان شاء الله ربنا حيعوضها في الجنه بأمر الله

لكن احنا دلوقتي بنتكلم في الحياة اللي احنا لسه عايشينها الراجل ليه احتباجاته يا بنتي و لو حتى كان مش مبين قدامك حاجه و ان هو عادي و طبيعي الله هو العالم باللي جواه ده واحد مراته ميته من سنه و قبلها كانت حامل و تعبانه و العالم بيها ربنا يعني عنده احتياجاته ايه نسيبه بقى يروح يدور عليها برة و نرجع نقول يا ريت اللي جرا ما كان

لا يا بنتي انتي لازم تعفي جوزك

و تخلي عينه مليانه عشان ميبصش برة راضيه يا كوثر ربنا يرضى عنك

عيشي عيشه طبيعيه و افرحي و عيشي حياتك و جيبي اخوات لأحمد يفرح بيهم و يفرحوا بيه و ازرعي جواهم الحب لبعض وعبد الله طيب و ابن حلال متخسريهوش يا كوثر

كوثر : مش عارفه اقولك ايه و الله يا ماما

روح : متقوليش انتي حاجه انا اللي حقول يا كوثر

ممكن و ملكيش دعوة انتي خالص

تقعد روح مع عبد الله بعد ما جه من الشغل : بقولك ايه يا عبد الله انت من يوم ما اتجوزت كوثر و انتوا لا رحتوا و لا جيتوا في حته بقولك إيه ما تاخد كوثر كده و تروحو لكم اسبوع في اي مكان اسكندريه مطروح اي حته يا بني

تفكوا عن نفسكم شويه الواحد برضو لازم يفك عن نفسه عشان يقدر يستحمل الحياة و مشاكلها

عبد الله : و الله انا معنديش مشكله يا امي لكن كوثر مش حتوافق عشان أحمد

روح : اذا كان على أحمد ملكمش دعوة بيه سيبوهولي لحد ما ترجعوا بالسلامة خدها يا بني فك عنها و عن نفسك و ربنا يهدي سركم يا رب

يبوس عبد الله ايدها و يفهم من مغزى كلامها انها عارفه طبيعة الوضع اللي بينه هو و كوثر

و خدني ابوك و رحنا مطروح و دي كانت أول مرة اروحها

اتكلم معايا كتير اوي انا اه كنت عارفاه وقت ما كان متجوز امك لكن و هو بيتكلم معايا حسيت اني مكنتش اعرفه قبل كده

لقيت نفسي ببدأ معاه حياة جديده و اشتريت كتب دينيه بتتكلم عن علاقة الزوج و الزوجه و الحمد لله العلاقه بيننا بقت زى الفل

و بعديها خدناك و رحنا عملنا عمرة و انا عملتلها عمرة و ابوك كمان عملها

و لما طلبت منه اروح لدكتورة عشان مجبش ولاد لحد ما تشد حيلك قاللي سيبيها على ربنا و فعلا ربنا كرمني بايمن و انت عندك اربع سنين و بعديها جبت امنيه و من يومها لحد ما ابوك قابل رب كريم عمر ابوك مزعلني و كان شايلني في حباب عنيه

و انا كنت مبسوطه اوي معاه و مبسوطه بحنيته علية و عليك و على اخواتك عاش و مات و هو احسن راجل في الدنيا الله يرحمك يا عبد الله و يجعلك من أهل الجنة يا رب

و لما جدتك الله يرحمها تعبت اخدتك و رحنا قعدنا معاها

و طبعا فضلت توصيني عليك

روح : كوثر يا حبيبتي انا عارفه انك مش محتاجه حد يوصيكي على أحمد و عارفه انه ابنك بس انا عاوزة برضو اامنك عليه عشان اموت و انا قلبي مستريح

كوثر : يا حبيبتي يا امي ربنا يخليكي لينا يا رب ان شاء الله شده و تزول

روح : ريحيني ربنا يريح قلبك يا رب

كوثر : اطمني يا ماما اطمني احمد ابني ضنايا حبيبي و اول فرحتي و حيفضل ابني البكري طول العمر

فضلت معاها لحد ما قابلت وجه كريم

و بعديها جدك هو كمان اتوفى و مبقالناش غير بعض يا حبيبي

كل يوم كان بيعدي و انت بتكبر ادام عينيه فرحتي بيك ملهاش حدود دايما شايفاها ادام عينيه حسه روحها محاوطانا حسه بينا في مل فرحه فرحناها و في كل حزن حزناه كانت معانا

عمرها ما غابت عن بالي لحظه في كل وقت فاكراها و بدعيلها امك وحشتني اوي يا أحمد هناء وحشتني أوي

و اهوه ابوك عبد الله راحلها عقبالي انا كمان لنا احصلهم

أحمد : يا حبيبتي يا امي ربنا يخليكي لينا يا رب و يطول في عمرك يا ست الحبايب

كوثر : و هي دي حكايتي انا و امك يا احمد

يمسح أحمد دموعه و يمسح لكوثر دموعها اللي غرقت وشها

احمد : يا حبيبتي يا ماما كل ده في قلبك السنين دي كلها و انا مش حاسس بيه

كوثر : انا اللي في قلبي محدش ممكن يحس بيه و انت و امك في قلبي يا احمد

عارف يا أحمد انا بشوفها بتضحك لما تكون كويس و بشوفها حزينة لما تكون تعبان

دايما معايا في احلامي مبتسيبنيش

احمد : انا عاوز ازورها يا ماما عاوز، اقرا لها الفاتحه و اقولها اني نجحت و بقيت مهندس زي ما كانت بتحلم

و بابا كمان يا ماما وحشني اوي

كوثر : انا اصلا بروحلها على طول يا حبيبي كل ما بحس نفسي مخنوقه و اللا متضايقه بروحلها على طول بقعد ادام قبرها و احكيلها و اكلمها و احس انها سامعاني وفاهماني

بقولك ايه احنا بكرة ان شاء الله نروح نزورها هي و ابوك وحشوني اوي يا احمد الدنيا من غير وجودهم فيها وحشه اوي

أحمد : بحبك اوي يا ماما انا عاوز اقولك اني عمري ما حسيت اني يتيم الام

عمري ما حنسى لما كنتي بتشيلي أيمن على دراع و ماسكاني من ايدي بالايد التانيه عشان توديني المدرسه و الدروس

و تقوليلي اخاف عليك من طريق العربيات

و عمري ما حنسى اهتمامك بية و سؤالك للمدرسين علية

ده الولاد كلهم كانوا بيقولولي يا بختك بمامتك

و اما كنت بتعب و تفضلي طول الليل واخداني في حضنك

أنا بحبك اوي يا ماما ربنا يخليكي ليا يا رب و ربنا يقدرني و اكون عند حسن ظنك فية

كوثر : يا حبيبي يا أحمد انت اللي ابني حبيبي اللي رافع راسي دايما و مخللي كل الناس تقوللي عرفتي تربي يا كوثر تسلم تربييتك

انا عشت معاك فرحة اول كل حاجه اول طفل عيني شافته انت

و اول كلمة ماما اسمعها كانت منك انت اتعلمت معاك إزاي اكون ام انت اول كل حاجه يا احمد انت ابني حبيبي يا احمد

أحمد : و انتي كل حاجه يا ست الكل انتي امي و حبيبتي و نور عينيه ربنا يخليكي لينا يا ست الحبايب