رواية غلطة أخي

الحلقه الثالثة عشر

الحلقه الثالثة عشر من رواية

غلطة أخي

بقلمي : عبير سليم

❤️❤️❤️❤️❤️❤️❤️

في صباح يوم جديد

أحمد : صباح الفل يا ماما

كوثر : يسعد صباحك يا حبيبي يا رب و ربنا يجعله يوم نادي عليك يا رب

عندك كليه النهارده يا احمد

أحمد : ايوة يا ماما ان شاء الله

كوثر : تروح و ترجع بألف سلامة يا حبيبي

يلاقوا أيمن خارج ليهم و هو بيتاوب : صباح الخير يا احمد صباح الخير يا امي الغاليه

يردوا عليه و هما بيضحكوا على شكله : صباح النور

أيمن : بص يا أحمد انا حروح افتح الورشه و اظبطلك الحسابات و اقعد مع الولاد و هما بيشتغلوا لحد ما تيجي

أحمد : و مذاكرتك يا أيمن

أيمن : متقلقش حبقى أروح اخر اليوم اذاكر مع مصطفى

و بعدين انا مش ناوي اتعين في الجامعه هو بكالوريوس و اللا اكتر

كوثر : براحتك يا فالح بس المهم تنجح

أيمن : انتي بتشكي في قدرات ابنك يا امي

كوثر : بصراحه اه انا اصلا مش بشوفك بتفتح كتاب

أيمن : يا أمي يا حبيبتي المذاكرة في الرأس مش في الكراس يا غاليه

كوثر : يا خوفي لت**فنا وسط الشارع

أيمن : بصي يا ست الحبايب انا عاوزك تطمني خالص و تحطي فبطنك بطيخه صيفي

كوثر : بطيخه مرة واحده مش وسعت منك دي طب قول برتقانه حتى

أيمن : برتقانه مسكرة يا مسكر انت

كوثر : اتلم يا ولا يخرببيتك

أيمن : أعمل إيه ما نت عسل يا قمر انتي

أحمد و هو بيحضنها : ماما دي العسل كله

تأخذهم كوثر في حضنها : يا حبايبي يا ولادي انتوا العسل كله ربنا يحميكم ويحفظكم من كل شر و يخليكم لية و ميحرمكمش من بعض يا رب

يروح أحمد الجامعه و أيمن يشتغل في الورشه لحد ما أحمد ييجي و يمشي هو

أحمد و هو بيشتغل أدام الورشه يلاقي تقى جايه ناحيته هي و فرح

تقى : ازيك يا ابيه أحمد

أحمد : الحمد لله يا مشمش انتي عامله ايه

تقى : الحمد لله و الله يا ابيه

أحمد : و انتي يا فروحه ايه اخبارك

فرح : كويسه و الله يا أبيه

أحمد : اتجدعنوا بقى يا بنات امتحانكم اخر الشهر

تقى : اهوه احنا بنذاكر و الله و ربنا يستر بقى

أحمد : طب يا للا اتفضلوا امشوا و على الدرس على طول

تقى و فرح : حاضر يا أبيه

البنات يمشوا و هو عينه عليها لحد ما عدوا من شارع تاني

اتن*د أحمد تنهيده حارة طالعه من قلب عاشق بيحاول يكبح مشاعره و يداري احساسه لحد ما ييجي الوقت المناسب

فرح : أمور اوي ابيه أحمد ده يا تقى

تقى : طبعاً يا بنتي أبيه أحمد ده أجمل واحد في الشارع كله

فرح : هو لسه بيقولك مشمش لحد دلوقتي

تقى : أيوة هو قاللي حيفضل يقوللي مشمش طول العمر

??

بعد مرور عدة أيام كانت تقى و فرح بيذاكروا مع بعض

شريفه : حمدي وطي صوت التليفزيون شويه خللي البنات يعرفوا يذاكروا امتحانهم بكرة

حمدي : ربنا معاهم يا رب بس مش كانوا متعودين ليلة الامتحان يذاكروا عند فرح و فريده كانت بتراجع معاهم

شريفه : على حظهم فريال جوزها ضاربها علقه و قاعده عندهم و الواد ابنها ده زنان و حيق*فهم و مش حيعرفوا يذاكروا منه و اهو مصطفى موجود يبقى يراجع معاهم

حمدي : يا سلام على أساس انه فاضي ما هو كمان عنده امتحانات و اللا ناسيه

شريفه : خلاص يذاكروا هما بقى مع نفسهم ما هما بياخدوا دروس

انا حدخل اعملهم شوية سندويتشات و ادخلها لهم

حمدي : طب اتصلي على مها خليها تيجي بقى الدنيا حتليل

شريفه : مصطفى حيروح يجيبها كمان شويه عشان في حاجات كوثر عاوزاها حبعتها معاه بالمرة

حمدي : ماشي يا ستي المهم بقولك ايه حامد اخويا جاي بعد اسبوعين

شريفه : حامد أخوك ياااه عاش من شافه ده انا بقالي سنين مشوفتوش

حمدي : اد*كي حتشوفيه اهوه

شريفه : و ده إيه اللي فكره بينا دلوقتى

حمدي : و الله علمي علمك هو قالي انه جاي حقولله متجيش

شريفه : و ده جاي لوحده و اللا حد من ولاده معاه

حمدي : بيقوللي جاي و جايب معاه ابنه عبد الوهاب

شريفه : ماشي يشرفوا و ينوروا

يجدون من يطرق على الباب فتذهب لتفتح فتجد أحمد أمامها

أحمد تعالى يا حبيبي ادخل

أحمد : السلام عليكم

حمدي : و عليكم السلام و رحمة الله و بركاته تعالى يا أحمد ايه يا بطل فينك وحشتنا أوي كده بردو تغيب عننا الغيبه الطويله دي

أحمد : غصب عني و الله يا عمي الكليه و الشغل واخدين كل وقتي

حمدي : الله يعينك يا حبيبي و يقويك يا رب و على العموم خلاص كلها شهر و ترتاح من الكليه و المذاكرة و تفوق لحالك

أحمد : اه ان شاء الله

امال فين مشمش

شريفه : بتذاكر جوة هي و فرح

أحمد : طب تمام انا جاي عشان اراجع معاها و كويس ان فرح هنا عشان اراجع معاهم هما الاتنين بالمرة

حمدي : طب و ليه تتعب نفسك يا أحمد ما نت كمان عندك امتحانات و مش فاضي

أحمد : لا معلش كفايه انها من يوم ما دخلت اولى اعدادي و انا سايبها و بكرة امتحان الاعداديه يبقى على الاقل أراجع معاها شوية

شريفه : و هي الست تقى اتكبت عليك يعني يا احمد و بعدين مش كفايه عليك اللي كنت فيه ده انت كنت في دنيا غير الدنيا يا حبيبي و كمان أيمن مسابهاش و الله و فضل معاها و كان هنا امبارح و راجع معاها شويه

و الله ده انتوا ضوفركم برقبة مصطفى الجذمه

أحمد : معلش يا طنط حضرتك عارفه ان مصطفى ملوش في الشرح

المهم ناديهم يا للا خليني ألحق اراجع معاهم شويه

شريفه : حاضر يا حبيبي ربنا يخليك يا رب

تدخل شريفه و تبلغ تقى و فرح ان أحمد حيراجع معاهم فيطلعوا جري

تقى : ابيه أحمد انت حتراجعلنا يااه انا كده ضمنت درجه حلوة في العربي

احمد : ماشي يا بكاشه طب اتفضلوا اقعدوا عشان اراجع معاكم النحو عارفكم مستواكم ضعيف في النحو

فرح : هو ضعيف بس ده زفت و هباب و بصراحه بكرهه

احمد : هههه طب بس احسن عبير تسمعكم و تزعل منكم و تقلب عليكم و انتوا عارفينها بتموت في النكد

?طب انا من أول الروايه و انا محترمه نفسي و قلت مليش دعوة بحد و خليني فحالي يقوم هو اللي يجر شكلي و يقول علية بموت في النكد طب انكد عليك دلوقتى عشان يبقى كلامك على حق

ال نكديه ال طب و ربنا ابدا ده انا حتى بحب الفرفشه و اموت في الهجس و حاجه كده اخر مسخرة بس اعمل ايه كل افكاري السوده بتكون نكد

بس انا بردو مؤدبه و مش حدخل دلوقتى مليش مزاج الصراحه

تقى : و هي عبير ايه اللي يزعلها فكده

احمد : يا مشمش عبير مدرسة لغه عربيه و طبعا تلاقيها بتموت في النحو فتقوم تسمعكم تروح مطينه الدنيا على دماغكم

تقى: لا لا خلاص ده احنا اصلا منعرفش لسه ايه اللي مخبياه المهم بص بقى يا ابيه عاوزاك تفهمني ازاي احط اسم الزمان و اسم المكان في جمله

احمد : حاضر من عينيه

يشرحلهم احمد كل اللي هما عاوزينه و يحل معاهم امتحانات كتير

و ييجي الدور على فرح : هاتي اسم الزمان واسم المكان من الفعل التقى و ضعيهم في جملتين من عندك

فرح : المساء ملتقى العشاق اسم زمان

و تحت الشجرة ملتقى العشاق اسم مكان

تقى : عشاق مين يا فرح هو انتي تفكيرك على طول كده شمال اكتبي كده في الامتحان خليهم يدوكي صفر

احمد : ههههههه و ربنا انتوا الاتنين عسل هي الجمله نحويا صح بس يعني اشمعنى تحت الشجرة على أساس انهم عايشين في الارياف مثلا

فرح : لاء اصله كان بيفسحها في حديقة الحيوانات

احمد : شكلك كده نفسك انتي اللي عايزه تروحي حديقة الحيوان

فرح : اه و الله نفسي اتفسح اوي يا أبيه

أحمد : خلاص يا ستي ليكم علية تخلصوا الامتحانات و تنجحوا و حعملكم حتة فسحه و ناخد معانا الناس الغلابه دول و نقضي يوم كامل برة البيت

تقى : بجد يا ابيه

احمد : بجد يا مشمش

تقى و فرح : هيييييه

ما أجمل مرحلة الصغر و حداثة العمر التي لا يشغل بالنا فيها سوى اللعب و الجري و اللهو

دون التفكير في اي شئ قد يعكر صفو حياتنا

راجع احمد معاهم كتير و مصطفى رجع و هو موجود و قعدوا مع بعض شويه

و مشى احمد و هو فرحان انه اطمن على تقى

و تقوم الصبح تقى و تروح لفرح و ياخدوا بعضهم و يروحوا الامتحان و يقابلوا ايمن في الشارع و يسلم عليهم و يأكد عليهم انه حيراجع معاهم الرياضه و تقى تفرح جدا و تعدي ايام الامتحانات على خير وتظهر النتيجه

شريفه : لووولي لووولي

يااااه أخيراً يا تقى يا بنتي داخله ثانوي

مصطفى : اللي يسمعك و انتي بتزغردي كده يقول إنها طلعت من الأوائل

شريفه : مش حتدخل ثانويه عامه يبقى خلاص بقولك إيه ما تضيعش فرحتي

و طبعا كا لعاده يروحلهم الجيران ويباركوا لهم?

و وصل حامد القاهرة بعد ما عرف ان تقى خلاص نجحت و اخدت الاعداديه

أهلا يا اخويا مصر كلها نورت و وحشتني اوي و الله

حامد : منورة بصحابها يا حمدي

و بعدين لو اتوحشتك كيف ما بتجول كنت جيبت ولادك وجيتوا عالجليله يعرفوا بلدهم

حمدي : مانت عارف الولاد بقى يا اخويا

حامد : و احنا من ميته بنسيب عيالنا يتحكموا فينا يا اخوي و يمشوا كلمتهم علينا

حمدي : طب بقولك إيه سيبك من الكلام ده دلوقتي و يا للا ناكل الأول و بعدين نتكلم براحتنا

مصطفى يا مصطفى تعالى انت و عبد الوهاب يا للا

حامد : طب مش نشوف الاستاذه تقى اللي نجحت و اللا انت مش حتخليها تسلم على عمها

ينادي حمدي على تقى

تقى : ازي حضرتك يا عمي

حامد : بسم الله ما شاء الله سبحان الله الخالج الناطج أمك

شبه أمك الله يرحمها بالظبط يا حمدي نفس عينيها و وشها المدور حاسس كأني شايفها جدامي

ربنا يحميكي يا بتي

تقى : شكرآ يا عمي

ياكلوا و يتكلموا في مواضيع كتيرة و عبد الوهاب برغم ان تقى عجبته لكن موضوع جوازه منها كان بالنسبه له عادي و نام مع مصطفى في اوضته

و شريفه سابت حمدي ينام مع اخوه و هي راحت نامت مع البنات

في اليوم التالي

حامد : بص بجى يا حمدي بجى خير في سلامه و سلامه في خير

حمدي :خير يا حامد يا اخويا

حامد : كل خير ان شاء الله اني عايز بتك تقى لابني عبد الوهاب

حمدي : ايه الكلام ده يا حامد مين اللي عاوزه لعبد الوهاب مش فاهم

حامد : مش فاهم كيف بتكلم بالهندي إياك بجولك عايز بتك تقى لابني عبد االوهاب ايه ما سمعش زين و اللا الكلام مش عاجبك اياك

و اللا يكونش عبد الوهاب هو اللي مش عاجبك اياك

حمدي : حامد انت مستوعب للي بتقوله ده انت عارف تقى بنتي عندها كام سنه تقى لسه مكملتش خمستاشر سنه

حامد : طب و دي فيها ايه عاد على اساس ان امك لما اتجوزها ابوك مكنش عنديها اتناشر سنه و اناي متجوز الحاجه و هي عندها تلتاشر سنه

و انت نفسيك مش متجوز مرتك و هي مكملتش تمنتاشر سنه

يبجى ف*جت ايه بتك عنيهم

حمدي : الزمان غير الزمان يا حامد يا اخويا

و انا بنتي تقى صغيرة و لسه مكملتش تعليمها اصلا دي يا دوب لسه واخده الاعداديه و لسه قدامها المشوار طويل

حامد : علام ايه و كلام فارغ ايه بجولك عاوزها لولدي تجولي علام

مصطفى : عمي بعد اذن حضرتك احنا يشرفنا ا ن عبد الوهاب

الوهاب يتجوز تقى لكن انا اخواتي حيكملوا تعليمهم و ياخدوا شهادتهم و بعد كده نبقى نشوف موضوع الجواز ده

حامد : على أساس انك حتمنع العرسان يتجدمولها إياك

مصطفى : أيوة حمنعهم يا عمي و انا مش حوافق ان اي عريس يتقدم لتقى او مها طول ما هما لسه في دراستهم

حامد : طب و لو حصل و اتخطبت و هي لساتها فالعلام

مصطفى :يبقى وقتها حقك تزعل يا عمي لكن انا قلت كلمتي اختي محدش فيهم حيتخطب غير لما يخلصوا خالص

حامد : إيه الكلام الفارغ اللي ولدك بيجوله ده

حمدي : أخوها و لازم يكونله رأي

حامد : تمام يبجى سيبها بجى تدخل و تخرج على كيفها و حد واد حرام يلف عليها و تجيبلنا العار سترة البنيه حلوة يا اخوي

مصطفى : عمي من فضلك انا اخواتي متربين أحسن تربيه و محدش فيهم ممكن يعمل حاجه غلط فملوش داعي الكلام ده

حامد : اني مفهمش مين اللي بيكلمني فيكم و اسمعوا بجى اني ماجيتش اخد رأيكم عشان تجولولي اه و اللا لاء اني اخوك الكبير و عمك انت التاني و كلمتي سيف على رجابكم كلياتكم انا جلت كلمه و مفيش غيرها اني حجوز تقى لولدي وحتيجي تعيش معانا في الصعيد و حتتعود على عاداتنا و تجاليدنا

اللي انتوا نسيتوها

حمدي : صعيد ايه يا حامد انا بنتي مش حتتجوز في الصعيد

حامد : ليه أن شاء الله مش بلدك دي و اللا حتستعر من اصلك يا اخوي

حمدي : حامد من فضلك قفل كلام في الموضوع ده عشان مش حيحصل

حامد يقوم يقف : تمام أجده و تنسى خالص ان ليك اخ يا للا يا عبد الوهاب جدامي

حمدي : يا للا على فين يا حامد معاد القطر لسه بدري عليه

حامد : ملكش صالح بية

عبد الوهاب : مينفعش الكلام بالطريجه دي يا ابوي هما ليهم وجهة نظر زي ما حضرتك ليك وجهة نظرك

حامد : انت تخرس خالص

عبد الوهاب : كيف عايزني اخرس و الموضوع اصلا يخصني و بعدبن بجى عايز تخسر اخوك عشان حاجه زي دي ده حتى المثل بيجول كل شيج بالخلاف الا الجواز بالاتفاج

حامد : سلام عليكم

يمشي حامد من غير ما يدي فرصه لحد يتكلم او يقنعه بوجهة نظره و مشى و هو على موقفه

يا للا فداهيه

و طبعا شريفه مكنتش طايقاه و لا طايقه كلامه اللي قاله دلوقتى لانه فكرها باللي قاله زمان يوم ما اتولدت تقى

و فضلت تزعق و تقول : دلوقتى تقى بقت حلوه و عليها سكر و عاوز ياخدها لابنه مش دي الي مهنش عليه يقولك مب**ك و لا قال ربنا يخليهالك دلوقتى عاوز يخطبها لا ده على جثتي ده بعينه ده لما يبقى يشوف حلمة ودنه و الله اللي يتهزله السبع سماوات ما حتشوف ضوفر حد من ولادي يا حامد

حمدي : طب اهدي بس يا شريفه هو انتي شفتيني وافقت يعني

شريفه : لا و لا عرفت ترد عليه رد جامد هو ابني حبيبي اللي مسكتلوش تسلم و تعيش يا حبيب امك و يخليك لاخواتك يا رب

مصطفى : مش كت تسمع كلام اخوك يا بوي

وعلى راي المثل

كلام اخوك الكبير لازم يصير يا حسنين

شريفه : ليه يا ابوي

مصطفى : عشان اخوك الكبير يا ولدي

وتضحك شريفه و مصطفى و تقى و مها على كلامهم

لكن حمدي مضايق من الموقف و ان اخوه يمشي من بيته و هو زعلان كده

???????