TAONG 2000
"Angeli, huwag kang masyadong malikot at baka masugatan ka," paalala ni Sister Ana sa apat na taong gulang na si Angeli. Maliksi itong tumatakbo sa bakuran ng ampunan. Bakas na ang kagandahang taglay nito. May hugis-pusong mukha, mapupungay na mga mata, matangos na ilong at makipot na mga labi. Makinis ang mala-sutlang kutis nito na animo'y anak-mayaman, kaya ito ang alagang-alaga ng mga madre sa ampunan, lalo na ni Sister Ana. Anak na ang turing nito kay Angeli.
"Opo, Sister Ana," matatas na sagot ni Angeli, pero tumakbo pa rin ito patungo sa mga kalaro na sina Jane, Ivan at ang kambal na sina Reign at Rei. Magkakaedad silang lima at halos magkakasunod lamang na pinaampon sa Bahay Ampunan ng mga Anghel. "Tingnan ninyo ang napitas ko. Ang ganda, hindi ba?" Hawak nito ang bulak
