MAAGANG nagising si Anne. Magaan ang kanyang pakiramdam na bumangon sa kama. She felt fully recharged. Hindi sumasakit ang kanyang ulo kagaya ng nangyari nang mga nakaraang linggo, hindi nakakunot ang kanyang noo, at hindi maasim ang kanyang mukha. Nakita niyang maaliwalas ang kanyang mukha sa kanyang repleksiyon sa salamin sa banyo.
Nang nagdaang gabi, kahit alas-nuwebe pa lang ay tila malalim na ang gabi kaya naman nagpasyang magpahinga na ng lahat. Naisip ni Anne na magsulat, ngunit hindi rin niya itinuloy ang pagbubukas ng kanyang laptop. Nais niyang ipahinga nang husto ang isip at katawan.
Pagkatapos niyang gumamit ng banyo ay lumabas siya ng kanyang silid. Tumambad sa kanya ang magandang tanawin sa harap ng kanyang silid. The flowers were extremely lovely and fresh in the morning.
