ألف باء العذاب

ألف_باء_العذاب1 بقلم:فلة على إقبال : قومي راقده لي 24ساعه لا شغل لا مشغله لا بتجدعي لا بتجيبي الحجار انا ما فاتحاها ليكي لوكنده هنا يا ماما تمام قومي يلا فتحته عيوني ببطء عاينته لي مرت عمي إقبال بأستغراب لأنو حسب الكلام الأنتو سمعتوهو حتقولو انو انا فعلآ قاعد ومترمتله في من سرير لي سرير لا شغل لا مشغله وهي القايمة بالشغل كلو طيب رائيكم شنو انو انا قومتة من النوم من 6:34ص غسلته بي يديني الاتنين بالرغم من وجود الغساله في البيا لانو ست إقبال قالت انو الغساله بتصرف مويه كتيرة وغسيل اليد فيهو توفير سواء للموية او الصابون ناسيه انو بتوفر عدم الراحة برضو. انا حضرة سيادتي وبلا فخر غسلته ليها هدومها وهدوم عيالها وعمي (راجلها) وبين الغسيل كنست الحوش وغسلت العدة وطبخت وبمجرد ما تميت الغسيل بديت كويت الملابس البدت تنشف وقت انتهيت كانت الساعه 3:34 م قمته اخدته لي غمضه هو الصاح ما غمضة الصاح نسميها غميضة لانو خمسة دقايق ما تميتها حرم عمي المصون جات تكورك في راسي و صحتني بالأسلوب القاسي خالي الحنية الشفتوهو أعلاه اعرفكم بنفسي عشان تكونو في الصورة انا اسمي آثار..آثار سعد يتيمه ام وآب ربنا يرحمهم ويتقبلهم وجعلهم من أصحاب اليمين.. عايزة اسوقكم معاي ورا شديد ارح نرجع ورا شويه حكايه بتاعت 7سنه كده مستعدين؟ ظلم الأقارب يا جماعة صعب جداً.. مؤلم اكتر من ضربة السيف على الجسد الأشخاص الغرباء احيانا بكونو احن لينا من القرايب . لمن تظلم زول كانك بتبدل النعمة بي نقمة لانو الظلم بجر لي سيدو الضنك وسوء المعيشة اكتر حاجة بتوجع البني آدم لمن يجيهو الضرر من زول قريب ليهو شديد.. لكن لازم نعرف كلنا انو مهما بلغ الظلم في الأخير لكل ظالم نهاية. #flash_back امي انا م شفتها الصراحه ولا بعرف اي شي عنها غير صورة واحدة باهتة كده ما بتوضح ملامحها حتى. اتوفت بعد ولدتني بي اسبوعين كان عندها سرطان حمانا الله واياكم .يعني كان عمري اسبوعين بس كده وبصراحه م بتذكر امي شكلها كان كيف يلا عندي اخوي أكبر مني أسمو آكرم هو زاتو اتوفي بعد امي بي فترة كدة كان عندو مشكله في القلب وبرضو م متذكراهو كويس. وبفقد امي واخوي ما كان عندي زول غير ابوي. ابوي الحنين العوضني عن حنان الأم الانا فقدتو ابوي رباني من وقت كنت في المهد صبيه وم كان مقصر معاي نهايئآ وهو كمان فقدتو ربنا يرحمو ويرحمهم جميعاً. الكويسة انو عاش معاي فترة من الزمن اتعودت عليهو شديد لاني من فتحت عيوني لقيتو وكان لي الاب والام والاخ والاخت.. كان صحبي كمان اتخيلو بس في مرة رجعته بدري من المدرسه لقيت باب بيتنا مقفول وانا متعوده انو كل م أجي بلقي ابوي راجيني برة بسوقني الدكان يشتري لي الحاجة الانا عاوزها وبشيلني في ضهرو لغاية البيت .بغديني ويحممني ويسرح لي شعري وبوديني عن ناس عمي وبمش الشغل وم برجع الا بعد المغرب بجي بسوقني يعشيني ويديني اللبن ويراجع لي ويغسل لي ملابسي.. يعني كنت انا ومشاغلي برنامجو اليومي البقوم بيهو.. رفض كل محاولات ناس عمي في انو يتزوج مرة عشان تراعيني كان بقول بخاف علي آثار من مرة الابو وظلم مرة الابو. الليلة وقت جيت البيت لقيت الباب مقفول وكان ابوي مافي برة فطوالي مشيت عن ناس عمي اصلآ كانو جيراننا حيطة بالحيطة لقيت مرتو اللهي اقبال سألتها ابوي وين قالت م جا عليهم الليله فطوالي قمت رجعته بيتنا و دقيت الباب بس رد ماف انا قلقته م عارفه ليي وبالرغم من صغر سني لكن كنت حاسه بخطر و قلبي ما اطمن نهائيرعندنا جارنا اسمو عبد الباقي كان جاي بيتو من السوق وابوي صحبو شديد طوالي المغربيه بشربو الجبنة سوا جمب باب الشارع قال لي مالك ي بتي قاعده برة ف الشمس دي قلت ليهو ابوي لقيتو ماف والباب مقفول وطوالي بديت ابكي قلت ليهو عايزه ابوي يا عمو عبد الباقي قام طلع حلاوة بقرة الصفراء د*ك وانا كنت بممممموت فيها قال لي تسكتي وله آكلها قمته سكته طوالي اصلا انا نفسي ضعيفه قدام الحلويات قام اداني ليها ومشي ع الباب وتاوق بالفتحه مسافه و.قال : نعلاتو برة غريبه والله.. تاني قال لزوم يطمن نفسو لكن بكووون نايم بس ودق الباب شديد بس ماف رد شال حجر فلق بفوق بس برضو ماف رد طوالي طلع نعلاتو وبدا يركب ف البوابه لغاية نطته بالاتجاه التاني ده كلو وانا كنت واقفه وباكل ف الحلاوة وبقشقش دموعي والله صحيي الجهل مصيبه بعد شويه عم عبدو فتح الباب وقال لي اجري نادي عمك قولي ليهو يجي بيتكم طبعآ ما كنت فاهمه شي بس جريت وناديت عمو حسن ولمن جينا لقينا في ركشه وعم عبدو ساند ابوي رميت شنطتي وصرخته ابوي ابوووي وجريت عليهم بس عم حسن مسكني ووشالني و وداني بيتو كان في ولدو الكبير عمار متزوج وساكن معاهم ف البيت عمي اداني ليهو وقال ليهو اوعك تخليها تطلع وهو زاتو طلع مستعجل انا بكيت بكا ف الدنيا دي ! مرتو شغاله تقول دي شنو كمان المصيبة دي الله يستر ما يتكل ويخليها لينا. اتخيلو بس انا وقت قال كده شلت حجر نوع الاملس داك فلقتها في كراعها طوالي جات كفتتني وجضمتني اما عمار الزفت حلف كن يخليني امش ولا محل وهو زاتو ودقاني وهرشني لغاية نومتة من مغصتي حلمت حلم كعب شديد كنا قاعدين انا وابوي ومعانا امي واكرم اخوي وملامحهم كانت هلامية كده هي مخيفه والله لكن عشان هم كانو اهلي ما خفت منهم كنا قاعدين بناكل يمكن عشان كدا وقت صحيت حسيت بجوع شويه كده امي قامت مشت ومشت ومشت وبعدت بعيد. وكان ابوي واكرم بعاينو ليهو وتاني بعد شويه أكرم قام مشي تبعها والاتنين بعدو بعيد فضلنا انا وابوي الكان بعاين ليهم وفجأة قام مشي عليهم انا حاولت اقوم امسك ابوي عشان م يمش لكن كأنو رجولي كنت ملصقه ف الارض وقدر ما قلت افك كراعي م قدرت ففتحت خشمي عشان اناديهو بس كان من خشمي بتطلع فقاعات زي حقات الصابون فقمت مخلوعه من الحلم. اليوم مر علي ثقيل جداً فبعد صحيت من النوم كنت جعانه شديد فماف زول اشتغل بي ولا ادوني لا اكل لا موية وانا ما قدرت اتكلم اقول ليهم انا جعانه خفت يدقوني تاني المساء عمو حسن جا قال لي قومي عشان نمشو لأبوك فرحته شديد ومرتو جابت لي فستان من فساتين علا بتها عمرها 11سنه اكبر مني بسنه عايزه تلبسني بس انا ابيت ارضي ليها تلبسني الا عمو حسن لبسني وسرحني لانو كنت متعوده على ابوي شديد هو الكان بقوم بالمهام دي. بعد خلصنا طلعنه مشينا المستشفي طول الطريق كنت مبسوطة شديد فكنا راكبين ركشة وانا زيي زي الشفع بحب اركب عربات وركشات ومواتر بحس بشعور جميل جداً وصلنا المستشفى فكانت كبيرة شديد انا قلت بيني بين نفسي لو بقيت دكتورة وجابوني اشتغل هنا حاروح أكيد ابوي من وقت شافني ابتسم ابتسامة حانية خلت قلبي ينتفض من مكانو. قربت منو وانا متفاجأة كان جسمو هزيل.. ولمن حضني عليهو جسمو كان سخننننن مولع نار عديل كده قلت ليهو يا ابوي جسمك حار انت مسخن ولا شنو قال لي ااي قلت ليهو خلاص افتح ليك التكييف ؟ او ارح احممك عشان جسمك يبرد زي ما بتعمل لي لمن يكون جسمي سخن قال لي لاللالاالا انا بردان ي بتي ما عايز قلت ليهو حاضر. البرد حلو صح ابتسم لي ابتسامه كده حلووة واتونست معاو ما شبعت منو زاتو عمو حسن قال لي ارح نمشو بكرة تاني حنزوروهو قلت ليهو انا ما ماشه عايزه اقعد مع ابوي بس ابوي قال لي الممرضة حقاره وكن جات تديهو الحقنه ما بتعرف النصيح من العيان وكلنا حتدينا حقن كلنا بي انا وعمو حسن.. طوالي **رت حنك القعده وودعتو ودموعي عشرة عشرة بالجد ابوي دا اغلي شي عندي هو بس الفضل لي من الدنيا دي وما ختيت في يوم من الايام اني اخسرو والموت يسرقو مني وما بين كل تجعيدة وتجعيدة من وش ابوي قصة نعيم انا كنت عايشاها بكل تفاصيلها حرفياً هو كان بطعمني وبقعد بالجوع كان بستخسر اي شيء عشاني انا .مش بقولو الأب نعمة ما حنعرفها الا لمن نفقدها؟ انازبقول انو الاب نعمة عشناها وعارفنها ونحن بنملكها بين ايدينا.. ولمن نفقدها حنعرف قدر شنو انها كانت نعمة مفترض نشكر عليها ربنا كل ثانيه والتانية . كونك تعيش في كنف ابوك وامانو دي احسن حاجة ممكن تتحصل عليها في طفولتك ربي أطل في عمر اباءكم . ربي حرم على قلب أبي حزن الحياة لانه لم يسمح للحزن ان يزر قلبي يوماً.. ربي ان أبي أكثر شخص كان حنيناً ورقيقاً ولطيفاً *** على حسب صغر سني ما كنت عارفه مرض ابوي شنو بالضبط كده. لكن الشي الفهمتو من كلام عمو حسن مع مرتو انو ابوي عندو ملاريا خبيثه ام تلاته صليب د*ك غايتو قعد زي 15 يوم ف المستشفي في فترة الخمستاشر يوم دي انا كان مسموح لي ازورو ف الفترة دي 3مرات بس. والله عانيت في الفترة دي أشد المعاناة يعني كونك تكون متعود على روتين حياة معينة وفجأة الروتين ده يتغير فصعب جداً بذات لطفله كانت في عمري. اضافه لذلك كنت بعاني من تصرفات ناس عمي يعني بهينوني والزهجان كلو بجي بفضي غضبو فيني ولو قلت ساي دايره ابوي الويل الويل وغايتو بس الحمد لله ابوي ما اتحسن نهائي من دخل المستشفى وكل مرة كانت حالتو بتسسوء انا كل يوم بنتظر يقولو انهم خرجوه من المستشفى بس عمي بجي براهو وتاني بزيد يوم على غيابو.. كنت بقول في نفسي ما مشكلة مدام حيجيني في النهايه لغاية جا اليوم المششؤم اليوم البتمني انو ما يجي نهائي.. اليوم البي سببو انا عشت باقي حياتي بترجع كاسات العذاب والويل والحرمان والظلم. اليوم المنو تاني انا ما شفت يوم سعيد ولا مفرح. اليوم البي سببو انا قلبي حرفياً مات.. ومحيرني ليي شغال عشان يعني اعاني زيادة؟ في يوم جيت من المدرسه وشفته ناس كتار جمب بيتنا. انا وقتها قلت ابوي جا وجريت مبسوطة وفرحانه وبنطط ساي فجيت الناس المتجمعين جمب بيتنا لكن الغريبه انهم كان بعاينو فيني بخلعه كده حيرتني زاتو ما اشتغلت بيهم لكن لمن شفت جزء منهم ببكي على حالي قلبي وقع ف الأرض وبديت أفج ف الناس وبكورك بكلمه واحده : ابوووي..! ابوووي! ابوو......قطعتها لمن شفت عمي حسن وعمو عبدو وكم راجل طالعين من البيت وهم ماسكين #عنقريب فيهو #جثمان ! اتخيلو بس! ابوي ليي ما كان شايل معاهم العنقريب مشي وين ابوي ي جماعه قلت لعم عبد الباقي ابوي وين يا عمو عبد الباقي. عمو عبد الباقي عاين لي بحزن وما عرف يرد يقول لي شنو ركعته ع رجولي وعيوني ف الأرض م قدرتة ارفعها خوفته ارفع عيوني واشوف حاجه اندم عليها طول عمري والله يا جماعه احساس صعب جداً على طفله كانت في عمري. حسيت بالان**ار وكانو الحيطة الكانت واقفه وراي وقعت وظهري بقى مكشوف لمصائب الدنيا وقسوتها. كانو السقف الكان بيقي ايتام من المطر الهواء شالو بعيد. كانو الغطاء الكان بيحمي متشرد اتشال منو وبقى معرض لزيفات البرد. انا حسيت بكده وهو فعلاً ده الحصل الجنازه مرت بي جمبي وانا جسمي كأنو تلج بس م رمشته ولا لحظة لغاية وقعته وم حسيت بي حاجه ويمكن من يومها وانا بقيت ما بحس لانو ماتت جميع الأحاسيس الكانت عندي. دا الحصل قبل 7سنه كان عمري 10 سنه وقتها .ال10 دي ولدوني فيها وفقدته امي فيها وفقدته اخوي فيها وفقدته ابوي فيها وفقدته روحي فيها عشرة سنه عمر صغير لاحداث كتيرة زي دي وصعبه زي ده لأنو من الزمن داك اتحكم علي اني أعيش مع ناس عمي في بيت الرعب والعذاب والمعاناة عشت معاهم طفولتي وياهو مرتو وهو وعيالو ضوقوني الويل وسواد الليل ايوا حتى عمي زاتو الكان شويه حنين شماني وكرهني من شكاوي مرتو وبتو علي وهي اصلا كلها كضب وافترا لكن منو البصدقني؟ ياخي انا شفته النجمه في عز الضهر ياخي! شايفني البطة السودا وبتاعت المشاكل واني مصيبة حقيقيه اتبالو بيها طق طق طق طقت لي بأصابعها وصحتني من سرحتي وهي بتشاكل : سرحتي وين ي استاذه ! انا هنا واقفه بتكلم معاك يعني نحن نتغدا بيشنو الليله وانتي ي نايمه ي سرحانه ي بتتكلمي جوه نفسك وتقطعي فينا وتدعي النهار كلو. بركة العرفت اني بتكلم فيهم وبدعي عليهم لكن اريتها كن تتعظ بس الله غالب قلت ليها بهدوء جراح قلب بريطاني : الملاح شنو عايزنو ؟ عدس فاصوليا رجلة ولا خدرة وعاينت ليها وغورت ليها عيوني ولا سليقه. بس حددي عايزاها بيضا ولا حمرا غضبت مني غضب وقالت لي يسلقوك بمويه حاره اصلك من يومك لئيمه ! وم محترمه ! ما بتحترمي الاكبر منك وم مقدرة انو نحن لميناك من التشرد والله لو ما نحن كنتي اسي من كوشة لكوشة تلقطي الاكياس والوسخ لانهم هم الشبهك يا بعيدة خليكم شاهدين ي جماعه ! اسي انا المرة دي غلطته فئ حقها لا سمح الله !؟ يعني كده ووب وكده ووبين حيرتني زاتو والله قلت ليهو العفووو ي خالتي اقبال م قصدي امسحيها لي في وشي الشين الكريه ده وشي الشوم المن شفتو ما شفتو المير في حياتكم.. حمرت لي كدااا وما عرفت ترد لي تقول شنو عشان كده ما لقت حل غير انو طلعت وهي بتقول : الله يلعن اليوم الخلاني اعرف حسن زاتو بسببو انا عايشه مع خلق زي دي ! الله ينعلك شومة فقريه قتلتي اهلك كلهم وعايزه تقبلي علي انا وعيالي طبعآ دي عادتها بتسفذني بالكلام عشان ارد ليها وهي تنزل فيني دق في النهايه. انا كنت زمان برد ليها لكن وقت عرفته انو هي خطتها كده بقيت م بشتغل بي كلامها وبالتالي جسمي زاتو ارتاح من الدق.. بقيت ما بديها ثغرة فيني نهائي وبختصرها لابعد حد فبالتالي بقت تشمني شم الجن مشيت المطبخ ظبته لي ملاح بطاطس يسوي كدي يغني عليه عبد الكريم الكابلي وريحتو تلبش والله يا جماعه نعترف انا يدي طاعمه في الاكل ودي حاجة هم زاتهم معترفين بيها جات علا بت عمي داخله المطبخ تجرجر عصيباتها. علا طبعاً نحيفه كده وجسمها قليلوني معصعصه من النوع النهائي م بسمنو لو بلعو آب نجمه زاتو وده بسبب لقتني بقرض في عيشه قامت قالت تحت تحت : العيشه براها بجنيه اسي نقصتو لينا الله ينقص عمرها الشوم وحمرت لي وشالت ليها عيشه هي زاتها وطلعت شكلو عيشتها ما بجنيه ي جماعه م تظلموها ساي ما رديت ليها طبعا م تقولو علي جبانه لالا انا م جبانه والله .لكن ي جماعه ما اي زول بيستاهل يردو ليهو صاح ولا لا. علا وامها ما يستاهلو يردو ليهم والله علا دايماً بتدخلني في دوامة ودايما كنت بنضرب بسببها. ياما ظلمتني وافترت علي زور والله يا جماعه وبسبب انو بصدقوها هي وبكذبوني انا حادخل في مشكله حتلاقينا قدام في قصتنا دي او الصح قصتي. ** بعد اسبوع كده نزلنا المدرسه انا وعلا امتحنه تامن وشالونا ف مدرسة واحده ماشاء الله جبته 260 وعلا 255 شالونا في مدرسة خيريه اسمها الحنين. صحيت الصباح او ممكن تقولو بعد صليت الصبح ما نمت تاني انوم عشان يدقوني من الصباح؟ لالا والله قعدت غسلته يجي دستين ملابس وختيت الشاي وفي باقي ملاح بايت سخنتو اكلتو لانو في المدرسة ما قاعده افطر. شربت الشاي وكان الساعه سبعه جات علا وامها صحو لقوني لمن كنست الحوش استحميت وجهزته للمدرسة هم كانو بشربو في الشاي سامعاها بتنق تحت تحت اني حأخلي ليها العدة بتها قالت ليها اوعم تغسليها خليها ليها لمن تجي بعدين اي اي عادي يا جماعه ما انا قاعده معاهم باكل وبشرب وكونوا اشتغل ليهم اخف قدراً من اني اقعد بدون ما اديهم قروش.. جهزت و طلعته خليت علا ما انتظرتها و ولا انتظرتة يدوني مصاريفي زاتو لانو ماف زول حيديني و لو قلت اقعد لي بكرة ماف زول حيعبرني. انا والله لو كان عندي الصلاحية انو ادي ابوي جزء من عمري ما كنت اترددت ولو لحظة. كنت عادي ممكن اقلع قلبي من ص*ري واقدمو لي ابوي بدون ما احس بندم ولو لمرة في حياتي ، ولكن للأسف انا ما عندي الصلاحية دي والبشر عموما ما عندهم الميزة دي والا ما كان في ام واب تحت التراب دي حاجة انا متأكده منها كويس. ابوي ضحّى بحياته عشاني.. عرفت من عمتي إقبال انو ابوي كان حاسس بالمرض من فترة طويلة بس كان بفضل يجيب لي ال**ب وحلويات بدل ما يمش يبذر القروش في المستشفى. حابه اقول ليهو انو غلط غلط كبير. اريتو لو حرمني من الأل**ب والحلويات وعالج نفسو. لانو وجودو معاي احسن من الأل**ب والحلويات قدر شنو انا فاقداهو. فاقده ضحكتو الغالية وصوتو الحنين ، لمن تفقد ابوك حتنجرح جرح ما عندو علاج ابداً . دايما بلاحقني شبح ابوي بقول لي اصبري يا آثار.. وما تزعلي مني انا ما خليتك براك انا خليتك آمانة عند ربنا. كيف تكوني بين يدين ربك وتزعلي يا آثار الفرح جاي ليك لكن عليك بانك تصبري بس فعلا كلامو ده كان بصبرني لانو لو ما صبرت كنت زمان خليت ليهم البيت لانو الشارع اهون على من زلهم ده.. بس دايماً كنت بسال ربنا الف*ج حيجيني متين ما كنت عارفه انو مكتوب لي اول اتمرمط واضوق الويل. وده كان اختبار من ربنا قدام عيوني شفت امها ادتها مصاريفها. واتجاهلتني تماما. ليي هي ما بتسأل روحها البت دي بتاكل من وين؟ يعني كيف البني آدم يكون بالقسوة دي يا جماعه؟ امي ما شفتها وما عارفه شي عن طيبتها لكن انا متأكدة انها لو في مكان خالتو إقبال ما كانت حتعامل علا معاملة كعبة ولا كانت حتفرزها مننا إذا كانت الأمومة هي الحنان، فالأبوة هي الأمان وابوي كمان ما كان حيفرز علا مننا ولا كان حيقصر معاها في حاجة لكن ده قدري ولازم ارضى بيهو. وهو انا عندي خيار غير اني ارضي بيهو؟ . أبوي الوحيد العلمني مَعنى الحياة هو الوحيد المسك يدي وقومني للطريق الصاح. كنت دايماً بلقاهو معاي في وقت الضيق حتى بعد موتو كنت بلقاهو معاي. كنت بلقاهو حواليني في فرحي وحزني و كنت بلقاهو لمن اغلط بوريني غلطي ونهائي ما كان بشاكلني عشان كده كنت دايماً بع** تربيتو من خلال ادبي. حتى بعد موتو الناس لمن تشوفني كانت بتشكر تربيتو. ده كان اقل شي ممكن اقدمو ليهو بعد موتو مشيت لي صحبتي مكارم ساكنه جمبنا مكارم كانت اكتر زول بحن علي هي بتو لعم عبد الباقي كن بتتذكروهو.. يلا ما كان مقصر معاي نهائي بالرغم من وضعهم الصعب جداً. ربنا يديه الصحة والعافية سلم علي وامها كبت لي شاي لبن. ههه سبحان الله اللبن ده ما كنت يشربو الا في بيت ناس مكارم ولو ما هم كنت حانسي طعمو والله. شاي خالتو محاسن.. خالتو محاسن كانت بتبيع شاي ولانو عم عبد الباقي كبر وصحتو متدهوره كانت هي الماسكة البيت. عندها تلاته اولاد رجال متزوجين ووضعهم المادي جيد لكن نهائي ما كانو بساعدو امهم وابوهم ولا قدمو ليهم حتى نص الامهم وابوهم قدمو ليهم. يعني امهم ربتهم وابوهم قراهم وما قصر منهم نهائي بس كانت دي جزاهو انا عارفه كويس انو ماف شي ممرضو اكتر من مغصة عيالو ديل لكن اي زول حيلقي نصيبو في الدنيا دي. وعيالهم حيشربوهم من نفس الكاس. نرجع للشاي حق ام مكارم كان ليهو طعم خاص بتغلي اللبن وتكشح فيهو شاي حب وبشوية جنزبيل لمن تشربو بتحس بيهو كأنو دوا كده وبخليك تحس انك سافرت مكان كده اللهم شعور عجيب وطعم الشاي ده ما بطلع من ذاكرتي كلو كلو وعندها زلابية كده مقرمشة وعجيبه انا والله كن على يومي امش اشرب الشاي عندهم لكن بخجل والله الكتير مسيخ بقولو. ونحن ماشات بنتونس ف الشارع ونهظر ساي ونتعاور ونقطع ساي في علا وامها واخوان مكارم الغياظين كن سمعنه لينا زول بصفرر ما استغلنا بي الموضوع كتير ولمن الصفير زاد عن حده التفتنا قلنا نشوف ده منو المزعج ده .