بيت النجار

بيت كبير في احد احياء مصر القديمه يضم الكثير من العائلات لكل منهم حكاية.. ففي الطابق الأرضي يوجد كشك عم سعيد وزوجته نجات الذي يحلم أن يكون ابنه محمود ضابطا يسكن في نفس الطابق شاب يدعي سيد وهو بواب العمارة يتمتع بالذكاء والطيبة.. في الطابق الأول تسكن الست أم عيشة سيدة بسيطة توفي عنها زوجها وترك لها ابنتين عيشة مدرسة في مدرسة ابتدائية متزوجة من جارهم الاستاذ علي وسعاد طالبة في الثانوية العامة.. في الطابق الثاني يسكن الدكتور فؤاد وحيدا يطل عليه سيد من حين لآخر.. في نفس الطابق يسكن أيضا الأستاذ خالد موظف حكومي في مصلحة الضرائب وزوجته فريدة ولديه بنت وولد.. أما عن السطوح فتسكنه عائلة الكامل والاسطي منعم الميكانيكي وزوجته نعمات ولم يُرزقوا بالأولاد حتي الآن.. هذا البيت يمتلكه الحاج سلامة أشهر تجار الموبيليا في الحي... سعيد: اعمليلي كوباية شاي يا بت يا نجات تقيلة حبر زي ما انتي عارفة.. نجات: من عنيا يا أبو محمود.. هوا تكون عندك.. سعيد: استني عندك يا بت ايه أبو محمود دي أبو حضرة الظابط محمود.. نجات: يسمع من بوقك ربنا يلا هدخل اتطمن عليه بيذاكر ولا بيلعب.. سعيد: خليه يشد حيله وربنا معاه.. كانت عيشة نازله الوقت ده رايحة المدرسة ومش قادرة تخد نفسها.. سعيد: ربنا يقومك بالسلامة يا ست عيشة ميلزمش أي خدمه.. عيشة: ربنا يخليك ي عم سعيد هاتلي باكويين بسكوت افطر بيهم احسن مستعجلة.. عم سعيد عطاها اللي طلبته ومشت بسرعه.. نجات:عملتلك احلي كوباية شاي وحضرة الظابط بيسلم عليك وبيقولك ادعيله.. سعيد:ربنا يفتحها في وشك يبني يا حبيبي.. نجات: ألا مين كان واقف معاك دلوقت. سعيد: دي الست عيشة بس كانت مستعجلة أوي عشان تلحق المدرسة.. نجات: ااه ربنا يقويها وتقوم بالسلامة.. ياما نفسي اعرف بس جوزها الاستاذ علي ده بيشتغل اي ولا بيروح فين ولا بييجي منين.. سعيد: ملناش دعوة يا نجات مش عاوزين مشاكل مع حد خلينا نركز مع عيالنا.. في الوقت ده خرج سيد من باب البيت سيد: صباح الخير يا عم سعيد ازيك يا ست نجات.. نجات:صباح النور ي سيد كل ده نوم ايه مش هتجيبلنا العيش والخضار النهاردة ولا اي. سعيد: بالراحة عليه يا أم محمود يمكن تعبان ولا حاجة.. سيد: لا يا عم سعيد ولا تعبان ولا حاجة انا كنت عند دكتور فؤاد فوق بطل عليه يمكن يكون عاوز حاجة وخدنا الكلام..انا رايح اجيب العيش أهو علي طول.. سيد مشي ونجات مش عاجبها الحال بردو. نجات: ألا ي أخويا ده ما نعرفله أب ولا أم ولا ظهرله قريب.. سعيد:بس طيب وغلبان وعايش وسطنا اكنه واحد مننا من زمان هنيجي دلوقتي نسأله علي أهل.. سيد جاب العيش والخضار وعطاهم لست نجات وطلع يوزع باقي العيش علي سكان العمارة.. باب الست أم عيشة بيدق.. سعاد:ايوه حاضر جاية أهو.. سيد ببسمة عذبة: العيش والخضار يا ابلا سعاد.. سعاد: شكرا يا سيد كام مرة قولتلك ناديني سعاد بس انا لسه صغيرة.. سيد: أمرك يا ست الكل.. أم عيشه: ازيك يا سيد يبني عامل ايه. سيد وهو ينظر إلي سعاد: بخير طول ما انتو بخير يا ست أم عيشه. الست أم عيشه: يارب دايما يبني متنساش تعدي بعد الضهر بئي تخد طبق الخضار اللي بتحبه. سيد:ربنا ميحرمنيش منكم يا أم عيشه وربنا ينجح الاستاذة سعاد ويقوملك الست عيشه بالسلامة.. وبينما هو كذلك إذا بالأستاذ على يصعد السلم عائدا من الخارج.. علي: ازيك ي سيد ازيك ي حماتي مش هتعقلي بنتك بئي وتخليها ترجع بيت جوزها. ام عيشه:انت عامل اي يبني بكلمها والله يبني مش راضية تقولي انت مزعلها في ايه بس.. سيد: ربنا يهديلكو الحال يا استاذ علي مش عاوز مني حاجة عشان هطلع لدكتور فؤاد.. علي: لا متشكر ياخويا هعوز منك ايه يعني بس تبئي تحود عليا عشان عاوزك تشتريلي شوية حاجات.. عن اذنك ي حماتي. ودخل وقفل.. طلع سيد لدكتور فؤاد اللي رافض الجواز لحد دلوقتي ومتجوز الكتب والجامعة.. خبط سيد علي الباب كتير عقبال ما فتح دكتور فؤاد.. دكتور فؤاد: تعالي يا سيد ادخل بسرعه هتقطع حبل أفكاري.. سيد دخل وقعد يروق حوالين دكتور فؤاد ويحضرله كوباية قهوة مظبوطة زي ما بيحبها دايما.. قدم القهوة لدكتور فؤاد وشكره.. ومسك كتاب وسرح فيه.. دكتور فؤاد: ايه يا سيد عجبك الكتاب ولا ايه.. سيد: جدا يا دكتور انا اه مكملتش تعليمي بس بعرف اقرا واميز الكتب الحلوة والكلام النافع.. دكتور فؤاد: انا دايما بقول عليك ذكي وطموح يا سيد. ليه متحاولش تكمل تعليمك وانا بنفسي هساعدك وهوفرلك جو تذاكر فيه.. سيد: ومين يقضي طلبات العمارة بس. دكتور فؤاد: ملكش دعوة بالعمارة انا بتكلم في مستقبلك فكر كدا ومستني ردك.. سيد: ربنا يقدم اللي فيه الخير يا دكتور..عن اذنك بئي اشوف الأستاذ خالد محتاج حاجة ولا اي عشان الست فريدة خلقها ضيق اوي.. سيد بيخبط علي الاستاذ خالد وسامح الكامل نازل من فوق جري عشان متأخر علي الجامعة كالعادة.. سامح: ازيك يا سيد الحجة كانت عاوزاك فوق متتأخرش عليها بئي.. سيد: من عنيا يا أستاذ سامح ربنا يوفقك.. نزل سامح بسرعة عشان يلحق سلمى اللي كانت مستنية علي أول الشارع حبه من لما كانوا صغيرين بس مستني يخلص الجامعه عشان يتقدم لابوها الحاج سلامة.. الست فريدة: ايه يا سيد لسه فاكر تطلعلنا اليوم خلص.. سيد: معلش يا ست فريدة حقك عليا حضرتك كنتي محتاجة حاجة.. فريدة: ايه ست فريدة دي ميت مرة قولتلك مدام فريدة منه لله اللي سايبنا ساكنين في المنطقة المق*فة دي.. خالد: في اي يا فريدة كل يوم نفس الموال ده قولي للراجل طلباتك ومتعطليهوش. خالد وهو بيضحك وبيوجه كلامه لسيد : ابئي قولها مدام يبني عشان عندها حساسية من كلمة ست.. سيد: من عنيا يا استاذ خالد أوامر حضرتك.. خالد: الأمر لله يا سيد انت اخويا الصغير.. فريدة: هتقعدو تشكرو في بعض كتير كدا الحاجة اهي في الورقة وابئي حاسبه يكش تلاقي معاك فلوس تدفعله ما احنا ع طول معناش وقربنا نشحت.. خالد: معلش يبني هاتلها الحاجة دي خلينا نخلص.. سيد: حاضر يا استاذ خالد. نزل سيد وهو مشفق علي الراجل ده من كلام مراته اللي بتسمعهوله كل يوم.. خالد وهو بيقفل الباب: ايه يا فريدة كل يوم فضايح في العمارة علي طول مسمعة بينا الناس مفيش مرة أنزل شغلي وانا مبسوط انا مبقتش عاوز ارجع البيت من كتر النكد والغم. فريدة: ايوه ليك حق مترضاش ترجع المنطقة البيئة اللي عايشين فيها دي أصل انا اللي قاعده طول النهار في الق*ف ده لوحدي..عيالك طلباتهم كتير موظف زيك في مصلحة الضرايب عايش كدا بص لاصحابك كل واحد قاعد في بيت ملك في منطقة راقيه وانت معيشنا هنا.. خالد: انا غلطان يعني عشان مش بمد ايدي اخد رشاوي وعمولات من الناس عاوز اعيشكم من الحلال واربي ولادي علي اللقمة الحلال..أنا نازل الشغل علشان متاخرش مش عاوز كلام تاني في الموضوع ده.. طلع سيد السطوح حيث تسكن عائلة الكامل وهي عائلة بسيطة جدا تتكون من الحاج خليل الكامل يعمل لدي الحاج سلامة في محله وزوجته الست أم عادل سيدة بسيطة جدا وطيبة وعادل متزوج ويعيش قريبا منهم وهو أيضا يعمل في محلات بيع الموبيليا ولكنه غير متعلم وسامح طالب جامعي قارب علي التخرج واخيرا نعمة آخر العنقود.. سيد بيخبط علي الباب وفي نفس الوقت زوجة الاسطي منعم الميكانيكي واقفة بتنشر.. سيد: ازيك يا ست نعمات يلزمش أي خدمة.. نعمات: ازيك يا سيد تبقي عدي عليا لما تخلص عند الست أم عادل.. سيد: حاضر من عنيا..ازيك يا ست أم عادل كان سامح افندي قالي انك عاوزاني.. الست ام عادل: ايوه يبني ادخل كنت عاوزاك تصلح معايا سرير الواد سامح احسن نزل جري وسابني قولتله محدش هيساعدني غير سيد ما انت ابني بردو ومربياك. سيد: طبعا يا ست أم عادل هو أنا ليا بركة غيركو.. الست أم عادل وهم بيصلحو السرير: اي يا واد مش عاوز تشد حيلك كدا ونشوفلك عروسة عشان نشوف عيالك.. سيد: ونأكلهم منين بس يا ست أم عادل ونعيشهم فين ومين دي اللي ترضي بيا.. أم عادل: يا واد العيال بتيجي برزقها وعندك اوضتك تحت اتجوز فيها واملاها عيال وربنا يوسع عليك وعليهم وبعدين انت بس تشاور وألف مين تتمناك.. سيد سرح وقال في نفسه بس أنا عاوز واحدة بس من الدنيا دي كلها.. أم عادل: سرحت في ايه يا واد اعدل معايا السرير اعدل.. سيد: تمام كدا السرير عاوزة مني اي حاجة تانيه.. ام عادل: ايوه استني عاملة شوية رز بلبن يستاهلو بوقك.. سيد وهو بيخد الرز بلبن: من يد ما نعدمها يا ست أم عادل يا غالية.. ام عادل وهي بتضحك: بقيت كلامنجي يا واد يا سيد فاكر لما جيت صغير كدا ومكناش فاهمين منك حاجة كنت بتتكلم لغه تانيه ي ولا... سيد من كتر الضحك دمع وقالها: ايوه كنت بتكلم صعيدي من الصعيد الجواني محدش كان فاهم حاجة.. أنا هروح للست نعمات بئي عشان عاوزاني.. ومشي سيد وخبط علي الست نعمات.. سيد: يا ساتر.. نعمات: اي يا سيد اتأخرت عليا ده أنا قولت تلاقيه نزل ولا عبرني.. سيد: لا ازاي بس يا ست نعمات أنا ليا بركة غيرك أنتي والمعلم منعم ده الست أم عادل كان عندها سرير م**ور كنت بصلحه.. نعمات: ماشي ي بكاش ادخل خد الزبالة وانت نازل.. دخل سيد خد الزبالة وهو طالع من الباب.. نعمات: خد يا سيد دول وادعي لي ربنا يرزقني بالخلف الصالح انت طيب ودعوتك إن شاء الله مستجابة.. سيد: من يد ما نعدمها يا ست الكل ربنا يرزقك الخلف الصالح قريب إن شاء الله.. ونزل سيد عشان يلحق يجيب الحاجات اللي طلبتها الست فريدة عشان متسمعهوش كلام ملهوش لازمة..