بيت النجار

الفصل الثاني

في فيلا الحاج سلامة أكبر تجار الموبيليا حيث الثراء والرفاهية..

ثريا: صباح الخير يا حج عامل اي النهاردة

الحاج سلامة: صباح الفل يا ثريا الحمد لله بخير قايم النهاردة رايق الحمد لله والصحة عال العال..

ثريا: يارب دايما يا حج.. اخلي حمدية تحضرلك الفطار ولا هتفطر برا كالعادة..

الحاج سلامة: لا لا ملهوش لزوم انا هروح ألف علي الورش كدا وبعدين اروح معرض الموبيليا افطر هناك.. ألا الواد سالم لسه منزلش الجامعه ولا اي؟!!

ثريا: لا يا حج لسه نايم فوق في اوضته قعدت اصحيه مرضاش يقوم أصله راجع امبارح متأخر..

سلامة: ألا كل يوم بيرجع متأخر مبيقولش رايح فين ولا جاي منين..

ثريا: ما هو طالع شبهك يا حاج جايبه من برا يعني أهو بيقول بيذاكر مع اصحابه الامتحانات علي الأبواب..

الحاج وهو ينزل علي السلم: خليه يتجدعن مش كل سنة الناس تكل وشي ده ابن خليل الكامل كل سنة بيطلع من الاوائل وهو بيشتغل عندي وابنك اللي عايش في العز بينجح بالعافية..مفيش غير البت سلمي دي اللي مطولة رقبتي هي فين صحيح؟

ثريا: نزلت من بدري يا حج راحت الجامعه ربنا معاها هي واللي زيها..

الحاج سلامة: طيب انا ماشي بئي او عوزتي حاجة اتصلي بيا في المعرض وخلي حمدية تصحي الواد ده بئي يشوف مصالحه..سلام عليكم..

ثريا: عليكم السلام ورحمة الله وبركاته يا حاج ربنا يفتحها في وشك ويد*ك علي اد نيتك..

خرج الحاج وطلعت ثريا تصحي سالم

ثريا: سالم يا سالم بيه اصحي يبني بئي..

سالم: حاضر يا ماما قايم اهو في ايه بس مصحياني بدري كدا ليه..

ثريا: بدري من عمرك يبني قوم الحق محاضراتك السنة دي آخر سنة هانت اهي..

سالم: حاضر يا ماما متقلقيش كدا كدا موصي سامح يحضر وانا هخد منه المحاضرات مانا بذاكر طول الليل يا ماما..

ثريا: بتذاكر اي يا ولا الكلمتين دول تضحك بيهم علي أي حد تاني غيري قوم يلا..

سالم: قومت أهو خلاص خلاص،

مامته سابته ونزلت وهو رجع ينام تاني..

ثريا نزلت المطبخ: حمدية بت يا حمدية..

حمدية: نعم يا ستي..

ثريا: تعملي حسابك إن جلال ومراته هيتغدو معانا النهاردة وكمان سميحة وجوزها والعيال تزودي في الاكل وخلي الطباخ يعملنا حلويات كمان عشان عيال سميحة عقبال ما ربنا يرزق جلال يارب..

حمدية: حاضر يا ستي بقولك ايه يا ستي أنا عندي ليكي الحل..

ثريا: حل لايه يا بت

حمدية: حل لسي جلال عشان يخلف..

ثريا مصغية لها وهي تكمل : انا قعدت تلات سنين مخلفش بردو وروحت للولية ام مندور عملتلي حجاب احطه تحت السرير مكان ما بننام بعدها معداش الشهر غير لما حملت وجيبت محمد..

ثريا: بلا ام مندور بلا تخاريف يا بت الكلام ده علي ايامكو أيام الجهل انما انا هوديهم لأكبر دكاترة بس هم يسمعو الكلام..يلا روحي شوفي اللي وراكي..

جلست ثريا علي الصالون الفاخر واضعه قدم علي قدم والفكرة تدور في رأسها وقد بدأت تعجبها ولكن ستجرب اقناعهم بالطبيب أولا..

في مكان أخر وصل الحاج سلامة ورشته الكبيرة في الحي بسيارته الفارهة التي التم عليها اطفال الحي البسطاء..

الحاج خليل الكامل: اوعي يا واد منك له من علي العربية منور يا حاج حمد لله ع سلامتك منور ورشتك ومنطقتك..

الحاج سلامة: ده نورك يا خليل اي الشغل عامل ايه وانا مش موجود.

خليل: الشغل زي الفل يا حاج اكنك موجود بالظبط طلبية الخشب وصلت والاستاذ جلال راح استلمها وشوناها في الورشه اهو زي ما انت شايف..اتفضل يا حاج خد القهوة السادة بتاعتك في دقيقة تكون جاهزة..

الحاج سلامة: الله ينور يا خليل هوصل بيت النجار بس اقضي مصلحة كدا وارجعلك علي طول..حضر القهوة عقبال ما اجي..

خليل: ماشي يا حاج بالسلامة..

الحاج سلامة مشي بالعربية وعادل جاي.

عادل: سلام عليكم يابا صحتك عامله اي النهاردة

خليل: الحمد لله يبني متأخر كدا ليه النهاردة ايه دلال مش راضية تنزلك الشغل ولا اي..

عادل وهو يضحك: اه والله يابا ماسكة فيا بايديها وسنانها قال اي عاوزاني افسحها..

خليل ضاحكا: وماله يبني خدلك يوم أجازة وفسحها هي والعيال..

عادل وهو يعمل : افسحهم منين يابا ما انت عارف اللي رايح علي اد اللي جاي هم هيتفسحو ببلاش يعني..

خليل: ايه يبني هو انت لازم تفسحهم بشئ وشويات مانا ياما اتفسحت مع أمك وفسحتكو نتمشو شوية علي النيل ونقزقز لب وترمس ايه المشكله..

عادل وهو يمسح عرقه: يابا الزمن دلوقتي غير زمان كل عيل بيبص لأصحابه في المدرسة عاوز يروح حته معينه يتفسح فيها وطول ما انت ماشي معاه هات وهات ويشبط في كل حاجة..

خليل: يبني احمد ربنا انه بيرزقنا بالحلال ربنا يباركلك في عيالك ويرزقك برزقهم قادر يا كريم..

عادل: يارب يابا ربنا يسمع منك..

وصل الحاج سلامة لبيته الكبير الذي أطلق عليه الناس بيت النجار لأنه بدأ حياته وجاء من قريته نجارا صغيرا يبحث عن فرصة عمل حتي وصل إلي هذا الحي وسكن ذلك البيت في غرفة صغيرة في الدور الأرضي وعمل نجارا في ورشة احدهم إلي ان اغتني فجأة واشتري الورشة والبيت وكل شئ ومازال اهل الحي محتارون في أمره ولكن لا يستطيع أحد أن يفتح فمه او أن ينطق بكلمه..

عندما دخل العمارة قابل سيد الذي كان يرش الماء في مدخل العمارة وهو يغني..

سيد متهللا: اهلا وسهلا يا حاج ألف حمد لله ع سلامتك مش كنت تقول عشان نفرشلك الأرض ورد يا اهلا يا اهلا..

الحاج سلامة: تشكر يا واد يا سيد انت الوحيد اللي سألت عليا وانا تعبان خد دول وخلي بالك من الأوضة اللي جوا دي..

سيد وعلي وجهه علامات التساؤل عن تلك الغرفة: واخد بالي منها كويس والله يا حاج محدش يستجري يفتحها وانت مش موجود..

سلامة : هي مفيهاش حاجة بس الواحد عشان أول ما بدأ حياته هنا عاش فيها عزيزه عليه شوية ومش عاوز حد يقربلها..

سيد: مفهوم مفهوم يا حاج ده احنا لازمنا ندبحو حاجة لله بئي عشان قومتلنا بالسلامة..

سلامة: ايوه طبعا هندبح اومال اي رمضان جاي اهو وهتكتر الدبايح خلي الغلابة يشبعو..

سيد وهو يدور في راسه شئ ما: ربنا يخليك لينا يا حاج يارب..أنا نفسي اطلب منك طلب يا حاج ويارب ما تردني.

سلامة: طيب يا سيد بعدين عشان مستعجل اوي النهاردة بعدين طلباتك كترت كدا.

سيد متجهما: ماشي ي حاج بعدين بعدين..

صعد الحاج سلامة السلم متوجها إلي شقة الست أم عيشه ودق الباب..

الست أم عيشه: مين علي الباب..براحة ياللي بتخبط استني شوية ولبست طرحتها وخرجت..

الست أم عيشه بقلق: أيوه يا حاج أهلا وسهلا

سلامة: ايه مفيش اتفضل يا حاج

ام عيشة: اتفضل بيتك ومطرحك..

دخل الحاج إلي الصالون القديم المهترئ وهو ينظر حوله كأنه يبحث عن شئ ما أو شخص حتي ظهرت سعاد فجعل يطالعها..

سعاد: مين اللي كان بيخبط يا ماما..حتي وقعت عيناها علي الحاج سلامة فقالت: أهلا وسهلا يا عم الحاج منورنا..

سلم عليها الحاج ومسك يدها فترة حتي قالت امها : اعملي قهوة لعمك الحاج وانا هجي اخدها..

ذهبت سعاد والحاج يتبعها بنظراته..

ام عيشة بامتعاض: خير يا حاج كنت جاي في حاجة..

الحاج: لا ابدا انا كنت تعبان الفترة اللي فاتت وملاقتش حد سأل قولت اسأل أنا فجيت اطمن عليكو..

ام عيشة: لا الف سلامة عليك يا حاج مكناش نعرف البركة في الست أم جلال بئي تخد بالها منك ربنا يخليهالك..

الحاج وقد فهم ما تعنيه: اه هي واخده بالها مني كويس بس الواحد يحب حبايبه يسألو عليه بردو وبعدين ده عيشة وسعاد أبوهم الله يرحمه وصاني عليهم قبل ما يموت..

سعاد دخلت بالقهوة: عملتلك احلي كوباية قهوة يا عم الحج..

ام عيشة: مش قولتلك نادي وانا هجي اخدها..

سعاد: ايه يا ماما عم الحج مش غريب ده زي ابويا..

عم الحاج محرجا: ابوكي اي بس انا لسه شباب..انتي عامله اي ف الثانوية العامة أنا مش عارف ليه انتي غاوية وجع قلب مسيرك لبيتك وجوزك..

ام عيشة: لا مسيرها تخد شهادتها وهي حرة بعدها..

سلامة: ماشي يا ام عيشة انا اتطمنت عليكو اهو مش عاوزين مني أي حاجة..

ام عيشة: لا يا حاج تشكر تاعبينك معانا...

مشي الحاج وسعاد قاعدة مش فاهمة مامتها بتكلمه كدا ليه..

سعاد: ايه يا ماما انتي بتكلمي عم الحاج كدا ليه

ام عيشة: عشان مينفعش ييجي عندنا كدا وابوكي مش موجود واحنا ولايا لوحدنا..بس يا بت انتي مش فاهمه حاجة روحي شوفي مذاكرتك..

رجع الحاج سلامة الورشة بعربيته وهو ماشي متباهي بنفسه..

خليل: ايه يا حاج ده القهوة بردت ثواني واخلي الصبي يعمل غيرها..

سلامة: لا يا خليل تعالي اقعد عاوزك في موضوع انا شربت قهوة من شوية..

خليل: عنيا ليك يا حاج خير انت لسه تعبان ولا اي..

سلامة: لا انا صحتي زي البومب الحمد لله بس زهقان من البيت والعيال وامهم ومحدش مريحني الواد جلال مش راضي يشوف نفسه عشان يخلف والبت سميحة وعيالها مش بشوفهم غير كل فين وفين زي ما يكون جوزها محرج عليها تجيلنا وسالم وسلمي مشغولين فى جامعتهم والحاجة مش فضيالي مشغوله شوية بالعيال شوية باصحابها وحبه بالكوافير وغيره..

خليل بضحك ويبدو أنه قد فهم ما يريد: ما هو كلو ليك يا حج هو الكوافير ده لمين يعني..بتلف وتدور علي ايه يا حج..

سلامة: بصراحة يا خليل أنا بفكر اتجوز..

خليل: ايوه كدا تعالي دوغري متعملش حجة العيال..هو الجواز حقك بس انت كدا هتخرب البيت أم جلال ست اصيله وفضلت معاك علي الحلوة والمرة من أيام ما جيت هنا الحي وكنا لسه صنايعيه صغيرين لحد ما ربنا فتحها عليك هتغدر بيها دلوقتي..

سلامة: ايه يا خليل هو انا بقولك عشان تشجعني ولا عشان تقلب عليا اللي فات وتطلعني قليل الأصل..

خليل: يا سيدي انت مش قليل الاصل ولا حاجة انا واثق انك لو قعدت لوحدك شوية وفكرت في الموضوع هتلاقيه مينفعش وهيصعب عليك الحاجة ام جلال والبيت والعيال..

سلامة: خلاص يا خليل سيبك من الموضوع ده عندنا طلبية موبيليا هنص*رها برا عاوزك تهتم بيها كدا طول ما انت هنا انا متطمن يا خليل..

خليل: من عنيا انا متابع كل حاجة في الشغل..

سلامة: ايه اومال عادل فين كدا مش باين..

خليل: وصل لحد الورشة التانيه يشوف الشغل كدا ..

سلامة: ألا بئي معاه عيال اي دلوقتي..

خليل: معاه كدا بالصلاة علي النبي محمد وزينب..عقبال ما تشوف عيال جلال كدا والاستاذ سالم..

سلامة: يسمع منك ربنا مش لو كان جلال خلف كان زمان معاه عيال في المدرسة دلوقتي..

خليل: كل واحد بيخد رزقه يا حاج ان شاء الله تفرح بعياله قريب ان شاء الله..

سلامة: يارب يا خليل انا هروح معرض الموبيليا بئي زمان الحاجة أم جلال هرياني تليفونات وفكراني اتجوزت عليها ومش بروح المعرض....

يتبع،،،