بيت النجار

الفصل الثالث

في الجامعة تقابل سالم مع صديقه المقرب سامح..

سالم: صباح الخير يا سامح..

سامح: ايه يا عم صباح الخير ايه بس قول مساء الخير لسه فاكر تيجي ده احنا اخر اليوم ومتبقاش غير محاضرة واحدة..

سالم: البركة فيك بئي يا عم سامح وفي محاضراتك اللي بتسجلها..

سامح: ايه يبني مش تشد حيلك كدا ده السنة دي آخر سنة هانت اهي..

سالم: مانا زعلان عشان هي أخر سنة ومش عاوز الكلية تخلص..

سامح : يا عم متفولش خليها تعدي الواحد مستني الكلية تخلص بفارغ الصبر عشان يشوف حاله..

سالم: يا عم خليني في الكلية حد يلاقي الدلع وميتدلعش أبويا ولا بيسالني رايح فين ولا جاي منين عارف اني في الكلية وبيديني فلوس علي طول عشان الكورسات اللي أنا مش بحضرها اصلا..عاوزني بئي اخلص الكلية واتحرم من كل ده..

سامح بضحك: لا يا عم حقك اقعد في الكلية كام سنة كمان..

سالم بدهاء: وبعدين اي حالك اللي عاوز تشوفه ده..

سامح مقهقها: لا فكرك ميروحش لبعيد أنا عاوز اشتغل يا عم عشان اساعد مع الحاج خليل شوية كتر ألف خيره كدا رباني وعلمني مقدرش اقعد في الكلية اكتر من كدا واتقل عليه..

سالم: يعني مش عاوز تتقدم لسلمي مثلا..أنا مش عارف عجباك في ايه البت دي ما البنات مالية الكلية اهو حد يسيب القمرات دول ويبص لسلمي..

سامح بهيام: سيبتلك يا عم القمرات كلهم أنا مش عاوز غير واحدة بس..يلا يا عم المحاضرة هتبدأ..

سالم: لا يا صاحبي معطلكش سجل لي المحاضرة بئي...سلاااام.

في مكان أخر حيث مصلحة الضرائب التي يعمل بها الأستاذ خالد..

والأستاذ خالد يعمل علي مكتبه ومعه زميل يجلس علي مكتب مقابل له إذ جاء إليه عميل يريد أن ينهي اجراءات ورقية..

العميل: الأستاذ خالد موجود لو سمحتو يا حضرات..

الأستاذ خالد: أيوه أنا يا افندم..اتفضل حضرتك ارتاح..

جلس العميل وهو يقول: لو سمحت عاوز أخلص الضرايب المتكومة علي الدكان دي وعاوزك تراعيني فيها وليك الحلاوة..

خالد بلهجة حادة: حضرتك أنا بعمل شغلي من غير رشوة ومش بعدي أي حاجة غلط تحصل قصاد عيني..

العميل: رشوة ايه بس لا سمح الله دي حلاوة ما حضرتك تلملنا الدنيا كدا وتراعينا شوية في الضرايب..

خالد: الحكاية دي مش في ايدي والله ده حق الدولة وأنا بحصله ، علي العموم حضرتك تسيبلي الورق ده هراجعه تعدي عليا كمان يومين..

العميل: تمام يا أستاذ خالد..شكرا لحضرتك، هعدي عليك كمان يومين إن شاء الله..

كل هذا كان يحدث أمام زميله في العمل عماد وهو يتابع رد فعل خالد غير مستغرب فقد اعتاد منه علي ذلك..

عماد: ايه يا خالد هتفضل كدا علي طول بيتك وولادك مش أولي بالفلوس اللي عمال تطيرها دي.

خالد: ايه بس يا عماد حصل ايه..

عماد: بتسأل حصل ايه انت هتفرسني التاجر اللي كان قاعد ده تقيل وكان هيظبطك بمبلغ محترم هو انت فاكر الموظفين اللي بيعدي عليهم قبلك وبعدك يعني مش بيخدو..مش عيالك أولي بالفلوس دي احسن ما انت معيشهم في الحي القديم اللي لسه ساكن فيه ده..

خالد: اكنك بتتكلم زي فريدة بالظبط هو أنا مكتوب عليا أسمع الكلام ده في البيت وفي الشغل وفي كل حته اروحها، ميت مرة قولتلك أنا عاوز اربي العيال من الحلال عشان ربنا يبارك فيهم..

عماد: ومين قال ان الفلوس دي حرام بس، ده حقنا انت شايف مرتباتنا عامله ازاي هنعيش ازاي بس..وبعدين كل الناس بتمد ايديها اشمعنا احنا..

خالد: لا مش كل الناس بتاخد اكتر من حقها بدليل إن انا مش بعمل كدا، أنا بفكر اليومين دول أنزل شغل أخر النهار حتي مرجعش البيت عشان النكد والغم اللي فيه، بس مش عارف اشتغل اي..

عماد: انت غاوي مرمطة وبهدلة وأنا مش هتعب نفسي في الكلام معاك تاني..

خالد: ايوه احسن منتكلمش في الموضوع ده تاني خلينا اصحاب وحبايب احسن..

عماد وهو قايم: يلا سلام أنا هقوم اروح بئي عشان الحق اتغدي مع العيال..

خالد: ماشي يا عم سلملي عليهم وبوسهوملي..

خالد في نفسه مش عاوز يقوم ولا يروح البيت وبيتمني ينام في الشغل أحسن بس في نفس الوقت العيال وحشوه..

انتهت المحاضرات وتقابلت سلمي مع سامح في الجامعة فقد كان سامح يدرس في كلية الأداب في السنة الرابعة وسلمي في كلية التجارة السنة الثالثة..

سامح: ايه يا سوسو اتأخرت عليكي..

سلمي: سوسو ايه بئي ده سوسو ساحت من الحر..انت لازم تقفل باب الجامعه وراك يعني وتطمن ان كلو روح..

سامح بقهقهة: يا بت الايه يا سوسو دمك شربات..يلا بينا عشان متقوليش عطلتني..

سلمي بهيام: لا عطلني براحتك يا سيدي، تحب نروح فين بئي..

سامح: أحب اروحك واروح علي طول عشان زمان الحاج خليل والست أم عادل مستنيني عشان الغدا ،ده عادل ودلال هيتغدو معانا كمان النهاردة..

سلمي: ياااه فكرتني ده سميحة جاية تتغدي معانا النهاردة..

سامح: شوفتي بئي اتأخرنا عليهم..

سلمي: ده انا كنت ناوية نروح نتغدي سوا في اي كافيه..

سامح: ايوه منين بئي ده انا مصروفي خلص وبكح تراب..

سلمي وهي بتسوق عربيتها: ما هو أنا اللي كنت هدفع يا سيدي متحبكهاش..

سامح: يا سلام يختي هتصرفي علي البيت من دلوقتي مش أنا راجل البيت ولا ايه..يلا بسرعه عشان الحق اروحك واروح أنا علي طول..

سلمي: طب ما اوصلك أنا وارجع لوحدي اي المشكله ،انت غاوي بهدلة مواصلات يعني..

سامح: ماشي يا ستي النهاردة بس عشان خاطرك ، بس بعد كدا خلينا علي نظامنا مش عاوز حد يتكلم عليكي كلمة وحشة خلاص هانت اهي يا دوب السنة دي تخلص ان شاء الله وادور علي شغل واجي اتقدملك...

سلمي: حضرتك نسيت الجيش؟

سامح وهو نازل وبيقفل باب العربية: لا يا حبيبتي منستش بس مش هروح الجيش الا والدبلة في ايدك ان شاء الله..سلام بئي خدي بالك وانتي مروحة..

سلمي بهيام: سلام يا سامح..

طلع سامح السلم وأول ما دخل السطوح قابلوه ولاد أخوه محمد وزينب وحضنوه..

دلال: حمد لله علي سلامتك يا سامح..

سامح: الله يسلمك يا ام العيال عامله ايه مع عادل اللي مش بيبان ده..

عادل وهو طالع من المطبخ: أنا اهو يا عم الاستاذ تعالي في حضن اخوك..

سامح: ايه يا عم فينك..

عادل: أنا يا عم مش بجي إلا اما ام عادل تعزمني علي ملوخيتها الحلوة..

نعمة: الله الله وأنا فين في الاحضان الحلوة دي سايبني بذاكر ومحدش معبرني..

سامح: انتي ثانوية عامة ملكيش دعوة غير بالمذاكرة وتطلعي علي الأكل علي طول لما ننادي عليكي..

عادل بضحك: او متكليش عشان راسك متتقلش وتعوزي تنامي..

نعمة وعلي وجهها الاندهاش: ما تربطوني في رجل السرير احسن عشان متحركش من جنب الكتاب..

خليل وهو جاي من الورشة:ايه يا ولاد صوتكو عالي كدا ليه انتو بتتخانقو ولا اي كفي الله الشر..

دلال: لا يا ابا الحاج دول بيغلسو علي نعمة عشان المذاكرة يعني...

خليل: لا بقولكو اي محدش يزعل نعمة كلو إلا هي..

عادل : أيوه يا حاج طول عمرك مدلعها اكتر مننا..

خليل: ايوه يبني دي الوحدانية حتة السكر اللي في البيت..

نعمة وهي تجري إلي احضانه: ربنا يخليك ليا يا بابا انت الوحيد اللي بتدافع عني..

دلال: وانا يا بابا مش بنتك ولا ايه..

خليل: لا بئي ده انتي بنتي الكبيرة كفاية انك جبتيلي محمد وزينب يملو علينا الدنيا.. إلا فين امكو يا ولاد..

سامح بضحك: محشورة في المطبخ كالعادة..

يا أم عادل يا ام سامح الحاج جه وميت من الجوع..

ام عادل وهي تحمل المغرفة وتجري ورائه: ابوك اللي جعان بردو ولا انت يا مفجوع.

انفجر الجميع في الضحك وقالت امهم: يلا تعالو حطو الاكل..

الحاج خليل: خد يا سامح يا ابني الصنية دي نزلها لسيد يتغدي هو كمان...

سامح: حاضر يا حاج هوا اوعو تكلو منابي.

خليل: يا ولاد يا محمد يا زينب تعالو اتغدو يا ولاد وبعدين كملو لعب..

وجلس الجميع حول الطبلية في هدوء يحاوطهم الحب والحنان ..

علي الجانب الآخر في فيلا الحاج سلامة حيث السفرة الواسعه اجتمعت العائلة حول المائدة..

الحاج سلامة: اي يا سميحة عامله اي مع جوزك يبنتي

سميحة منزعجة: الحمد لله يا بابا كويسين..

سلامة: مالك يا بت اومال مجاش معاكي ليه انتي مقولتيلهوش اني عازمه علي الغدا..

سميحة: قولتله يا بابا بس هو قالي روحي انتي أنا عندي شغل كتير..

سلامة: أحسن وفر كلي يا بت واكلي عيالك اتغذو زمانه حارمكو من كل حاجة وانتي ماشية كمان خدي اللي يكفيكي انتي وعيالك ومتشيليش هم حاجة طول مانا علي وش الدنيا..

سميحة بفرحة: ربنا يخليك لينا يا بابا وميحرمناش منك أبدا..

سلامة: عامله اي في الكلية يا سلمي يا بنتي؟

سلمي: الحمد لله يا بابا ماشية كويس الحمد لله..

سلامة: عاوزك ترفعي راسي زي كل سنة وتطلعي من الاوائل..

سلمي: اطمن يا بابا..

سلامة متوجها بكلامه إلي جلال: اي يبني مش بتكل ليه كل واكل مراتك..

جلال: احنا بنكل يا بابا متقلقش كلي يا فريال يا حبيبتي..

سلامة بتهكم: كلي يا فريال واتغذي يمكن ربنا يرزقكو بحته عيل اتباهي بيه بدال ما يتقطع ذكري من الدنيا بعد ما اموت..

جلال مشفقا علي فريال من كلام والده: ليه بس السيرة دي يا حاج ربنا يد*ك الصحة وطولة العمر وتشوف عيالنا ان شاء الله وسالم يتجوز وتشوف ولاده وبعدين عيال سميحة ماليين علينا الدنيا اهو.

سلامة بضجر: لا عيال سميحة دول عيال مختار المزين مش من صلبي ولا علي اسمي..وبعدين أبوهم مش بيسيبهم ييجو هنا إلا كل فين وفين مش عارف قالب علينا ليه من ساعة ما اغتنينا..

سميحة: معلش يا بابا حقك عليا أنا ..انا هخليه ييجي يتاسفلك ويبوس راسك كمان بس انت متعصبش نفسك..

سلامة : أنا ولا عاوزه ييجي ولا اشوف وشه..

ثريا: معلش يا حاج طول بالك عليه يمكن مشغول في شغله..

سلامة: شغله اي ده محسسني انه شغال وزير وهو حيالله حلاق..وفين الأستاذ سالم اومال مستكبر ييجي يتغدي معانا دي بقت عيشة تقرف..

وترك الغدا وقام ولحقته زوجته لتطيب خاطره..

سميحة: ايه يا فريال مش ناوية تروحي لدكتور عشان تفرحي ابويا بحتة الواد اللي بيترجاه من الدنيا..

فريال: اللي عاوزه ربنا هيكون ان شاء الله يا سميحة..

جلال: هنروح ان شاء الله يا سميحة كملي غداكي انتي والولاد..

سميحة: أكمل ايه بئي نفسي اتسدت..يلا يا ولاد قومو خلينا نروح قبل ما ابوكو يفتحلنا محضر..

وهنا دخل سالم..

سالم: السلام عليكم يا جماعه..ايه الحاج والحجة فين..

سميحة: اسأل اخوك انا ماشية سلام عليكم..

سميحة قامت مشت هي والعيال..

سالم: هو في اي يا جلال ،في اي يا فريال..

جلال وفريال قامو طلعو اوضتهم..

سالم بتعجب: هو في اي يا سلمي؟

سلمي: لسه فاكر تيجي مش ماما قالتلك هنتغدي كلنا سوا النهاردة..بابا كان متعصب النهاردة وسأل عليك وطاح في الكل..

سالم: ربنا يستر لما يشوفني الحق اطلع اوضتي انا كمان..

سلمي تنادي: حمدية يا حمدية شيلي الاكل ده..

واعمليلي فنجان قهوة مظبوط وهاتيهولي اوضتي..

يتبع،،