بيت النجار

الفصل الرابع

يبدأ الفصل بمشهد في الحي القديم حيث تقابل الاسطي منعم والاستاذ خالد امام الورشة التي يعمل بها الاسطي منعم..

استاذ خالد: السلام عليكم ورحمة الله وبركاته..ازيك يا اسطي منعم عامل اي؟

الاسطي منعم: مين الاستاذ خالد ازيك يا استاذ انا تمام الحمد لله انت عامل اي فينك يا راجل مش بنشوفك؟

خالد: اه والله يا اسطي ساكنين في نفس البيت ومش بنشوف بعض ربنا يعيننا جميعا علي المعيشة الصعبه..

منعم: اللهم ءامين وانت عيالك عاملين اي وصحتك كدا؟؟

خالد: تمام والله يا اسطي..أنا كنت عاوزك في موضوع كدا بس لما تخلص ابئي اعدي عليك..

منعم: خير ان شاء الله انا خلصت خلاص ثواني هغير هدومي ونروح سوا..

خالد: لا يا راجل انا مش عاوز اعطلك عن اكل عيشك خليك براحتك وانا ابئي اجيلك وقت تاني..

منعم: والله ما يحصل اتفضل اقعد علي الكرسي ده دقيقة وأكون جاي..

خالد: حاضر يا سيدي..

الاسطي منعم غير هدومه وطلعو من الورشة سوا..

منعم: خير يا استاذ خالد أوامرك..

خالد: الأمر لله يا اسطي..أنا كنت عاوز أسألك عن شغلانتك دي مرتاح فيها يعني وقرشها كويس؟

منعم: والله يا استاذ خالد اهي الشغلانة اللي اتربيت عليها بئي من وانا عيل وقرشها بئي نحمد الله عليه اد*ك شايف ساكنين السطوح..

خالد: يعني مش بتجيب فلوس كويسة؟

منعم: يعني اللي رايح علي قد اللي جاي ومقضينها كشوفات عند الدكاترة بردو عشان تأخر الخلفة وربنا كريم..انت بس عاوز اي ريحني؟

خالد: والله يا اسطي انا كنت عاوزك تتوسطلي عند صاحب الورشة بتاعتك يعلمني الشغلانة وانت تساعد معايا احسن الوظيفة مش جايبه همها..

منعم بدهشة: الأستاذ خالد احسن واحد في المنطقة عاوز يشتغل ميكانيكي والله أبدا ما تحصل..هي مصلحة الضرايب ازاي مبتجيبش فلوس ده كل اللي شغالين فيها اللهم صلي على النبي حاجة أبهة!!

خالد: يعني مينفعش اتعلم الميكانيكا يسطي..

منعم: والله يا أستاذ خالد ينفع بس دي عاوزة حد فاضي من صباحية ربنا وانا مشغول في الوظيفة..انصحك لله شوفلك حاجة بسيطة بعد الضهر كدا زي سوبر ماركت أو مكتبة عشان متتبهدلش بردو..

خالد: عندك حق يا اسطي منعم أنا هدور ان شاء الله..

وهنا كانو طلعو السلم ووقفو عند باب الأستاذ خالد..

خالد: اتفضل معانا يا اسطي منعم اشرب شاي ولا اتغدي معانا حتي..

منعم: ربنا يخليك يا استاذ خالد ربنا يقدملك اللي فيه الخير هطلع انا عشان اتغدي مع نعمات..سلام عليكم.

خالد: عليكم السلام ورحمة الله وبركاته..

فريدة: حمد لله علي سلامتك يا خالد..

خالد: الله يسلمك يا فريدة عامله اي النهاردة والعيال عملو اي في المدرسة؟؟

فريدة بعصبية: كويسين الحمد لله بس كانو عاوزين قسط المدرسة واشتراك الباص عشان المدرس احرجهم قدام اصحابهم وقالهم انتو متأخرين في القسط وكلام ملهوش لازمة والباص مرضاش يخدهم النهاردة وروحت وديتهم وجيبتهم..

خالد: حاضر يا فريدة اتغدي بس الأول ونتكلم في الموضوع ده بعدين..

فريدة: لا نتكلم دلوقتي عشان نخلص من الموال بتاع كل يوم ده.

خالد: طيب أنا جاي تعبان وعلي فكرة أنا بدور علي شغل تاني عشان نكفي المصاريف اللي انتي حطيتينا فيها دي..

فريدة: مصاريف اي اللي انا حطيتك فيها دي هو المدرسة والباص دي مصاريف شوف الناس عايشه ازاي..

خالد: ايوه فيها اي لو كنا دخلنا العيال مدارس حكومي قريبة هنا..لازم مدارس خاصة لغات وبعيد عننا عشان يبئي موت وخراب ديار عشان محدش يقول علينا كلمة ونبئي زي الناس..الناس اللي بتتكلمي عليهم دول يا اما مرتباتهم بالالوفات يا اما حرامية مش تعبانين في الفلوس..وبعدين حرام عليكي كل يوم نفس الاسطوانة بتشتغل سممتي عيشتنا يا شيخة..

فريدة: حرام انت عليك شغال في الضرايب ومش عارف تعيشنا في مستوي احسن من كدا..الاكل عندك علي البوتاجاز كل لوحدك أنا مليش نفس عيشة تقرف..

وسابته ودخلت اوضتها والعيال كانو واقفين يتف*جو بشفقه علي ابوهم بس مش قادرين يتكلمو..

خالد: لا حول ولا قوة إلا بالله..تعالو يا ولاد نتغدي زمانكو جعانين..

عند الاسطي منعم فوق قابلته نعمات بضحكة بريئة كالأطفال..

نعمات: حمد لله علي سلامتك يا اسطي الاسطوات كلهم..

منعم: الله يسلمك يا نعمات..اي عملتي اي النهاردة في يومك؟

نعمات وهي بتشيل الهدوم وراه: زي كل يوم مفيش جديد يعني..

منعم بحب: ايوه مانا بحب أسمع اللي بيحصل كل يوم ومش بزهق منه..

نعمات: يوه يا راجل كل شوية تسكتني بكلامك الحلو ده..

منعم: احنا ملناش غير بعض يا نعناعه لازم ادلعك وتدلعيني كدا..

نعمات بعتاب: عشان كدا قولتلك هاتلي حاجة حلوة معاك ونسيت تجيب..هو ده الدلع بتاعك..

منعم: والله منستش بس الأستاذ خالد عدي عليا وجيت معاه وكان شكله مستعجل فات**فت احود علي عم سعيد واوقفه في الشارع..بس دلوقتي هنزل هوا اجيبلك..

نعمات بدلع: لا خلاص انت تعبان متنزلش تاني بس أخر النهار تنزل تفسحني.

منعم: من عيوني يا قمر..يلا حطلنا الغدا بئي احسن ميت من الجوع..

في الوقت ده سامح كان مروح من الجامعه وطالع السلم...وسعاد كانت بتطلع صندوق القمامة قدام الباب..

سامح وهو بيجري بسرعة خبط في سعاد.

سامح: أنا اسف يا سعاد معلش كنت مستعجل..

سعاد ب**وف: ولا يهمك يا استاذ سامح أنا اللي غلطانه..

سامح: ايه يا سعاد الثانوية العامة عامله معاكي ايه؟

سعاد: الحمد لله ماشية مظبوط اتفضل يا استاذ سامح..

سامح: اتفضل فين لا مش هينفع أصلي كنت رايح لدكتور فؤاد اسأله علي حاجة بعد اذنك..

سعاد وهي بتقفل الباب ب**وف : اتفضل..

سامح بيخبط علي دكتور فؤاد: يا دكتور يا دكتووور

دكتور فؤاد: افتح يا سيد ده تلاقيه سامح دخله ع طول..

سيد: حاضر يا دكتور..

سيد وهو بيفتح الباب: اتفضل يا استاذ سامح ..

سامح: ازيك يا سيد الدكتور كان قايلي احود عليه بعد الجامعة..

سيد: هو مستنيك جوا..

دكتور فؤاد: تعالي يا سامح يا ابني..اعمله قهوة بسرعة يا سيد عشان يركز معايا..

سيد: من عنيا يا دكتور هوا..

سامح: خير يا دكتور حضرتك كنت عاوزني في ايه؟

دكتور فؤاد: خير ان شاء الله يا ابني..انا بصراحة شديدة عاوزك تطول معانا شوية في الكلية.

سامح ببلاهة: نعم يا دكتور..

دكتور فؤاد: ايه يا ابني تنحت ليه الدكاترة في الكلية معجبين بجدك واجتهادك وانا عاوزك بصراحة تكمل الماجستير والدكتوراه..

سامح بدهشة: بس يا دكتور انا مصدقت اني قربت اخلص الكلية عشان اعتمد على نفسي واشوف حالي..ثم اني محتاج كتب ومراجع وفلوس كتيرة جدا عشان أخلص ماجستير ودكتوراة وانا اكتفيت تعليم وعاوز اشوف وظيفة أساعد بيها الحاج خليل الله يبارك فيه..كفاية عليه كدا..

دكتور فؤاد: بص يا ابني متهيألى اني ادري بحالك..

فؤاد مستدركا بتأثر: أنا يا ابني قضيت عمري بين الكتب والابحاث والمراجع ونسيت أو تناسيت اتجوز واخلف عشان كدا معتبرك ابني اللي مخلفتوش وعاوز استثمر فيك تعب وش*ي السنين كلها..

سامح وقد بدي عليه الفهم: أنا تحت أمرك يا دكتور بس المصاريف هتبئي كتير علي الحاج أبو عادل خليني اشوره الأول..

فؤاد: أولا انت كنت كدا كدا رايح الجيش اعتبر نفسك في الجيش ثانيا الكتب والمراجع كلها انا هوفرهالك وانا كمان هشرف عليك وهساعدك ثالثا بئي مظنش الحاج خليل العاقل يرفض حاجة زي دي لاني عارفه كويس..

سامح: طب ليه يا دكتور حضرتك مخترتش حد غيري مثلا كنت اخترت سالم ابن الحاج سلامة أهو حتي امكانياته تسمح يكمل تعليم..

فؤاد: لا يا ابني مينفعش انت اكتر واحد عارف انه مينفعش بس بتقاوح لأنه ببساطة مش مهتم بالتعليم وبيعدي السنة بالعافية..روح يا ابني وفكر كدا بالراحة الله يهديك...كمل السنة دي بس علي خير وحافظ علي تقديراتك..

سامح: حاضر يا دكتور اللي فيه الخير يقدمه ربنا ان شاء الله..

وهنا كان سيد يجلس بجوار مكتبة الدكتور فؤاد يطالع بعض الكتب..

الدكتور: أنا عاوزك كدا تفكر بردو وترد عليا قدامك لحد ما الامتحانات تخلص بس اوعي مخدش منك رد..قالها وهو بيبص لسيد..

سامح: ان شاء الله يا دكتور شكل سيد مزعلك اوي..

سيد بخجل : ابدا والله يا استاذ سامح..

دكتور فؤاد: لا مش مزعلني ولا حاجة بس مش راضي يسمع الكلام..عاوز انقله من جنب المكتبة للمدرسة يكمل دراسته..

سامح: طب والله فكرة جميله يا سيد انت ما شاء الله عليك ذكي فيها ايه لو تكمل تعليمك..

حضر لي انت بس ملفك وانا هروح اقدملك في المدرسة اللي هنا..ومتشيلش هم الكتب والمذاكرة انا هساعدك..

سيد سارحا: حاضر يا استاذ سامح هحضره ان شاء الله..

سامح: ماشي مستنيك أنا هستأذن بئي يا دكتور..

فؤاد: ماشي يا سامح اتفضل..سلملي علي الحاج أبو عادل..

سيد بحزن: أنا كمان هنزل اوضتي يا دكتور..حضرتك عاوز مني حاجة تانيه..

فؤاد متعجبا: لا يا سيد شكرا انزل انت..

نزل سيد ودخل اوضته وفتح صندوق صغير مكتوب عليه صندوق الذكريات وقعد يتف*ج علي الصور اللي فيه وهو بيدمع...

يتبع،،،،