بيت النجار

الفصل الخامس

يبدأ الفصل بشادر كبير في وسط الحي القديم حيث الذبائح معلقة وثلاثة جزارين يقطعون اللحم وطوابير من اهل الحي القادرون علي شراء اللحم وغير القادرين أيضا..

الأنوار المعلقة تزين الحي وفانوس كبير زاهي الالوان يتوسط الشارع..

ومائدة كبيرة يجلس عليها الحاج سلامة النجار وبجواره ولده جلال وأيضا الحاج خليل الكامل وبعض صبيان الورشة يخدمون علي الناس..

الحاج خليل: دايما عامر بحسك يا حاج سلامة..كل سنة وانت طيب رمضان كريم عليك..

الحاج سلامة وهو يربت علي كتف خليل: وانت طيب يارب يا خليل وبالصحة والسلامة دايما كدا..أنا بخير طول ما انت جنبي..

خليل: ربنا يكرمك يا حاج ويديم المحبة..كل سنة وانت طيب يا جلال يا ابني والسنة الجاية ان شاء الله يكون معاك الولد اللي بتتمناه.

جلال بامتنان: وانت طيب يارب يا حاج اللهم ءامين..

سلامة:يسمع من بوقك ربنا يا خليل.. اومال فين الاستاذ سامح كدا يشرف علي الجزارين عشان يطلعو للناس حته لحمه حلوة..

خليل: معلش السنة دي بئي خليه يذاكر امتحانات البكالريوس بعد العيد ربنا يوفقه هو وسالم كدا..

سلامة : اه ربنا يعدي السنة دي علي خير ويتخرجو بئي عشان يشيلو معانا الشغل..

خليل: لا سامح ليه سكة تانيه خالص مش سكة النجارة ولا الحاجات دي أنا عاوزه يبئي موظف في وظيفة كويسة..

سلامة بتعجب: هو أنا يا راجل هقوله تعالي اشتغل نجار لا يا عم مش مقامه بعد التعليم والمرمطة دي كلها ..انا هقعده علي مكتب يتابع الشغل ويخلي باله من العمال..

خليل: علي العموم يا حج لما الامتحانات تعدي والنتيجة تبان يبئي يعمل اللي هو عاوزه..

سعيد واقفا عند الجزار: اقطع ليا حتة لحمة حلوة يا ولد بدال ما اشتكيك للحاج..

الجزار: ما هي حلوة اهي يا عم سعيد ولا هي عشان ببلاش هتقعد تعذب فيا انا ورايا شغل كتير..

سعيد: انت ازاي بتتكلم معايا كدا والله هشتكيك للحاج انت مش عارف بتكلم مين..

الحاج سلامة: ايه يا سعيد ايه الدوشة دي في ايه؟

سعيد: تعالي يا حاج شوف بقوله قطع حتة لحمة كويسة ميكونش فيها دهون بيقولي مش فاضيلك وورايا شغل كتير..

الجزار: يا حاج أنا مش فاضي وزي ما انت شايف وده واقف بقاله بتاع ربع ساعة يتكلم ويقولي متعرفش أنا مين..

سلامة: اهدي بس يا حاج سعيد متخدش علي كلامه..انت متعرفش ده مين يا ولد ده أبو حضرة الظابط محمود يعني تقطعله احسن حته لحمة وتديله حتة كبدة كمان يتسحر بيها..

سعيد بفرحة كبيرة: ربنا يخليك لينا يا حج يا كبير انت..شوفت الحاج قالك ايه ابئي أبو حضرة الظابط محمود..

الجزار: حاضر يا حج من عنيا..اتفضل يا سيدي.

سلامة: تعالي يا سعيد اقعد معانا شوية ولا سايب الكشك مفتوح..

سعيد: لا متخافش يا حاج نجات واقفة فيه متقلقش..

سلامة : طيب تعالي تعالي..

الحاج خليل: ازيك يا سعيد كل سنة وانت طيب والأسرة كلها بخير..

سعيد: وانت طيب يارب يا حاج والسنة الجاية ان شاء الله تشوف الاستاذ سامح موظف وعريس اد الدنيا ونعمة داخلة الكلية اللي نفسها فيها..

خليل: يارب يا عم سعيد..ايه حضرة الظابط محمود عامل اي في المذاكرة؟

سعيد: الحمد لله يا حاج قاعد يذاكر ليل ونهار انه مش بتسيبه إلا للشديد القوي..

سلامة: إلا العيال دي امتحاناتها امتي علي كدا؟

خليل: بعد العيد ان شاء الله علي طول هيقضو العيد مذاكرة بئي..

سعيد: عندنا محمود ونعمة ربنا يوفقهم..

سلامة بخبث: وسعاد بنت أم عيشه نسيتها ولا اي..

خليل: لا مش ناسينها يا حاج ربنا يرحم ابوها كان راجل طيب..

سلامة: ألا متعرفش اي المشاكل اللي بين عيشه والافندي اللي اسمه علي؟؟

خليل: لا يا حاج والله مش عارف هي مش بتحكي وانا محبتش اتدخل..

سلامة: ليه يا عم منتدخلش احنا لازم نصلح بينهم عشان العيل اللي جاي ده..قوم بينا نصلح بينهم كدا عشان دخلة الشهر الكريم ده حتي..

خليل: ماشي يا حاج يلا بينا..

سلامة: خد بالك من الجزارين يا جلال وخليهم يوصلو اللحمة للناس اللي مجتش في بيوتهم ومينساش حد..فين لحمة الست ام عيشة..

جلال: اهي يا بابا..

سلامة: لأ زودها شوية وحطلهم حته كبدة..

الجزار: حاضر يا حاج..

الاتنين طلعو لبيت الست ام عيشة وخبطو علي الباب..

ام عيشة ببسمة رقيقة: اهلا وسهلا يا حاج خليل اتفضل وعندما وجدت الحاج سلامة قالت عابسة: اتفضل يا حاج..

الحاج خليل استغرب جدا من فعلها بس محطش في باله ودخل..

ام عيشة بنفاذ صبر موجهة كلامها لسلامة: مكانش ليه لزوم ابدا يا حاج تتعب نفسك وتطلع لينا اللحمه بنفسك الصبيان كتير تحت او حتي كنت ابعتها مع سيد..

سلامة: ولا تعب ولا حاجة يا ست أم عيشه احنا جايين في موضوع خير ومتعشمين مت**فيناش..

ام عيشة بقلق: موضوع ايه يا حاج ده اللي في دخلة رمضان كدا..

خليل وقد احس بالحرج من حدة كلام ام عيشة: ايه يا ست أم عيشه انتي مش معتبراني ابو البنات ولا اي..انا اه مجيش حاجة جنب الحاج الله يرحمه بس يعلم ربنا انهم زي ولادي بالظبط..

ام عيشه ببشاشه: عارفه والله يا حاج خليل من غير ما تقول ده انت اللس مربيهم..

خليل: اقعدي يا عيشة يا بنتي..

سلامة مقاطعا وهو يبحث عن شئ ما: اومال فين الاستاذة سعاد تعملنا فنجان قهوة من ايديها الحلوة..

ام عيشة باستنكار: هي بتذاكر يا حاج انا هعملك اللي انت عاوزه..

سلامة: انتي اه ست الكل بس هي القهوة من ايدها حاجة تانيه خالص هو انا انسي بتاعة المرة اللي فاتت..طب ناديها حتي تدخل اللحمه دي المطبخ ده انا وصيتلها قصدي وصيتلكو الجزار علي حتة كبدة تستاهل بوقكو..

خليل متعجبا من حديثه: نسيبنا من اللحمه والقهوة يا حاج ونخلينا في الموضوع اللي جايين عشانه..وقال بحنان: تعالي يا عيشه يا بنتي احنا في أيام مفترجة وعاوزينك ترجعي بيتك عشان الطفل اللي جاي ده يتربي بين امه وابوه..

عيشه: ما انا في بيتي اهو يا عم الحاج هي ماما كانت اشتكت مني في حاجة..

ام عيشة: لا يا بنتي ده بيت ابوكي مفتوح ليكي علي طول بس الحاج خليل عاوز يتطمن عليكي..

خليل: طب ممكن اعرف ايه اللي مزعلك من استاذ علي ده راجل محترم محدش سمع عنه حاجة وحشة من ساعة ما سكن قصادنا..

عيشة باستهزاء في سرها: اه محترم اوي..

ام عيشة: والله يا حاج انا ريقي نشف من الكلام في الموضوع ده نفسي اعرف حتي سبب خناقهم المتواصل ده..

عيشة: مفيش حاجة يا ماما لو انتي زهقانة من قعدتي معاكي اشوف اي حته تانيه اروح فيها..

ام عيشة: لا حول ولا قوة إلا بالله خلاص يا بنتي اللي يريحك اعمليه..

عيشة: ايوه انا مرتاحة كدا بروح شغلي وبجي مفيش حاجة تعكنن عليا..

سلامة: يعني مفيش فايدة يا عيشة..يلا بينا يا حاج خليل..

خليل: ماشي يا عيشه انا هسيبك كمان شوية كدا تفكي عن نفسك وارجعلك تاني عشان الوضع ده مينفعش يا بنتي..

خليل نزل علي السلم وسبق سلامة..

سلامة عند الباب: سلميلي بئي علي سعاد ومتشديش عليها أوي في المذاكرة مش هنعمل حاجة بالشهادة مسيرها لبيتها وجوزها..

ام عيشة بغضب : الله يسلمك يا حاج احنا مش هنعمل حاجة بالشهادة بس هي هتعمل..

وقفلت الباب بعنف..

علي السلم قا**هم سيد وهو بيوزع اللحمه علي سكان البيت..

سلامة: ابئي عدي علي الدكتور فؤاد اديله نصيبه من اللحمه..

سيد: ما هو مش هيرضي يخدها زي كل سنة يا حاج..

سلامة: احنا بنعمل اللي علينا و خلاص عاوز الناس تكل وشنا..

سيد: حاضر يا حاج..

نزل الحاج سلامة وسيد طلع خبط علي دكتور فؤاد

فؤاد: اي يا سيد خير

سيد: الحاج باعتلك اللحمة دي..

فؤاد: ما انت عارف اني مش بخدها يا سيد بتغلب نفسك ليه يا ابني..

وقفل الباب..

سيد في نفسه: نفسي اعرف مش بيخدها ليه..

سيد متخفيا وقد اخذ لحمة دكتور فؤاد واخذ الورقة المكتوب عليها اسم الدكتور فؤاد واخفاها في جيبه ثم نزل ليدق جرس الست ام عيشة..

سعاد: مين علي الباب..

سيد متهللا: أنا سيد يا استاذه سعاد افتحي..

سعاد: تاني استاذة يا سيد مش قولتلك مفيش بيننا الكلام ده..

سيد محرجا: خدي اللحمة دي بتاعة الحاج سلامة..

ام عيشة خارجة من المطبخ: تعالي ادخل يا سيد يا ابني متقفش علي الباب كدا..

سيد: تسلمي يا ست أم عيشه..اتفضلي اللحمة..

ام عيشة: ما الحاج كان هنا يا ابني وجابلنا نصيبنا..

سيد باحراج: والله..طب خوديها بئي شيليها في التلاجة مش هتخسر هو شكله عمل حسابكم مرتين..

ام عيشة: ماشي يا سيد..حيث بئي ان اللحمه كتير تيجي تفطر معانا بكرة اول يوم رمضان كدا يا ابني متفطرش لوحدك..

ام عيشة اكملت بصوت خافت: هيكون هنا كمان علي عشان متتحرجش هقوله ييجي يفطر معانا ميفطرش لوحده هو كمان..

سعاد: والله فكرة حلوة يا ماما..

سيد بفرح شديد: ربنا يخليكي لينا يا ست ام عيشة..

واكمل وعينه على سعاد: هطلع انا بئي اللحمه لاستاذ خالد والاسطي منعم..عن اذنكو..

سعاد: متتأخرش علينا في الفطار بكرة بئي ان شاء الله..

ام عيشة: متنساش تجيبلنا الفول للسحور يا سيد يا ابني..

سيد: من عنيا يا ست أم سعاد..

وطلع سيد يكمل توزيع علي باقي السكان..

في الشارع دخلت سيارة مسرعة ووقفت قدام العمارة والشادر الكبير...

يتبع،،