بيت النجار

الفصل السادس

دخلت عربة مسرعه الحي ووقفت بجنون أمام الشادر الكبير ويبدو أنه يقودها شاب طائش..

نزل سالم من العربة متجها نحو العمارة القديمة..

سلامة مناديا عليه: اي يا واد ما تدخل فينا احسن..

سالم: معلش يا بابا أصل أنا مستعجل..

سلامة: مستعجل علي ايه يا واد ايه اللي جابك؟

سالم: الاستاذ سامح اتصلت بيه عشان ييجي يذاكر معايا ويفهمني شوية حاجات قالي تعالي خودني..

خليل: طيب مش اللي ييجي ده الاول يسلم علي اهل منطقته ويقولهم كل سنة وانتو طيبين..

وهنا انتبه سالم إلي الموجودين وحك رأسه قائلا: معلش يا عم خليل عندي دي أنا مخدتش بالي...كل سنة وانتو طيبين والسنة الجاية نكون جميعا عند سيدنا النبي عليه الصلاة والسلام..

خليل: وانت طيب يارب يا ابني اللهم ءامين..اطلع لصاحبك وذاكرو فوق بدال الشحططة..

طلع سالم لسامح وهو طالع لمح حد واقف علي السطوح بيراقب سامح من بعيد..

سالم: السلام عليكم ورحمة الله وبركاته..ممكن نتعرف يا انسه؟؟

سعاد باحراج من وقفتها: عليكم السلام.أنا سعاد ..ازيك يا استاذ سالم..

سالم: ايه ده انتي عارفاني..اهلا يا سعاد.انتي ساكنه هنا ولا جاية تزوري حد..

سعاد: انا ساكنه هنا انا سعاد بنت الست ام عيشة..

سالم بذهول: ما شاء الله كبرتي يا سعاد ده انا مشوفتكيش من زمان علي كدا.

سعاد بعتاب: أيوه ما انت مش بتيجي هنا من ساعة ما نقلتو الفيلا الجديدة نسيتنا بئي..

سالم بضحك: الكلية واخداني بئي..انتي عامله اي والست ام عيشة وعيشة واستاذ علي؟

سعاد: كلنا كويسين الحمد لله..انا السنة دي ثانوية عامة وكنت طالعه لأستاذ سامح يشرحلي حاجة كدا..

سالم بلؤم: ااه ما هو باين كدا..يا سامح يا سامح..

سامح خرج من شقتهم: اي ده سالم باشا بجلالة قدره بيزورنا علي السطوح..تعالي بالحضن يا بيه..

وهنا انتبه إلي وجود سعاد..

سامح بحرج: ازيك يا سعاد..خير في حاجة؟

سعاد شاردة: لا أبدا كنت طالعه اشم هوا وقولت اخليك تشرحلي حاجة بس مش وقته بئي عن اذنكم..

سامح: مش وقته ايه بس تعالي اقعدي وريني كدا..

سعاد أعطت له الكتاب..

سامح: اقعد انت يا سالم هنا دقيقتين عقبال ما نخلص..

سالم بخبث: ماشي يا عم براحتك الله يسهل لك..

سامح وسعاد قعدو جنب بعض وهي مشالتش عينها من عليه..وسالم بيراقب كل ده من بعيد..

سامح: اي يا سعاد في حاجة تانيه مش فاهماها..

سعاد: لا انا كدا تمام..هنزل بئي عن اذنك..

سامح: اتفضلي شدي حيلك في المذاكرة بئي.ربنا يوفقك..

سعاد بامتنان: اللهم ءامين..

سالم بضحك: ايه يا دنجوان مش خايف أقول لسلمي علي القعدة الرومانسية دي..

سامح مقهقها: رومانسية ايه يا ابني ما انا كنت بشرحلها قدامك أهو..

سالم: اه بتشرحلها و هي مبحلقة فيك..

سامح: خلي ضميرك نضيف بئي دي كانت مركزة في الشرح بس..

سالم: بس ما شاء الله البت سعاد كبرت وبقت عروسة فجأة..

سامح: لا مش فجأة يا حبيبي انت اللي مقاطع الحي من زمان ومش بتيجي..

سالم: يا عم انت هتقول زيها انا لا مقاطع ولا حاجة..الشوارع هنا ضيقه والعربية بتمشي فيها بالعافية..

سامح: معلش بئي شوارعنا علي قدها..انت صحيح اي اللي جابك..غريبة يعني؟؟

سالم: يا عم أنا غلطان يعني..صعبت عليا من قعدتك طول النهار في الحي وقولت اجي افكك شوية ونخرج نتفسح..بس بقولك ايه انا قايلهم تحت اننا هنروح نذاكر سوا..

سامح: يا عم أنا ولا عاوز اتفسح ولا حاجة..خلينا قاعدين هنا في الهوا نذاكر والحاجة ام عادل هتعملنا كوبايتين شاي حلوين والسحور كمان..

سالم: يا عم انت هتعمل زي ابوك بيقولي ذاكرو هنا بدال الشحططه..نذاكر فين يا جدع..بقول نتفسح مش نذاكر..يلا يا سامح ادخل البس هنتمشي شوية وارجعك يا عم..

سامح: طيب يا سالم اما اشوف اخرتها معاك..

سامح لبس ونزلو سوا..

سامح: عن اذنك يا حاج هروح مع سالم شوية كدا..

خليل: هتروحو فين يا ابني..

سالم: هنروح الفيلا نذاكر سوا شوية يا حاج..

خليل: طيب يا ابني اوعي تتاخر علي السحور ده أول يوم رمضان ولازم تتسحر كويس..

سالم: متقلقش يا حاج هو هيتسحر معايا..

سامح: لا يا بابا انا هجي قبل السحور ان شاء الله متقلقش..سلام عليكم..

خليل بقلق: وعليكم السلام ورحمة الله وبركاته..

سلامة: ايه يا خليل انت قلقان كدا ليه..خليهم يشمو نفسهم شوية يا جدع ويفكو عن نفسهم..

خليل: ايوه يا حاج بس الامتحانات علي الأبواب..

سلامة: ما هو قالك رايحين يذاكرو يا عم..

خليل: ربنا ينجحهم ويبعد عنهم الحرام..

في العربية..سامح: مودينا فين يا عم..

سالم: هنروح الفيلا يا جدع اخد دش كدا والبس حاجة حلوة..

سامح: انت مش قولت هنتمشو شوية وترجعني علي طول..وبعدين ما انت لابس حلو اهو.

سالم: يا عم أنا كنت عاوز انزلك بس..احنا هنروح البيت اغير هدومي وبعد كدا هخدك نروح حته كافيه عشان عندي معاد..

سامح بعدم فهم: معاد مع مين..وبعدين انت عندك معاد أنا مالي..

سالم بنفاذ صبر: عندي معاد مع واحدة اتعرفت عليها في الجامعه بس هي هتجيب صاحبتها فقولتلها أنا كمان هجيب صاحبي عشان الاحراج يعني..

سامح بضحك: والله بجد..طب انا مش رايح وروحني دلوقتي..

سالم: طب انا قولت لسلمي بئي..

سامح بخوف: قولتلها علي ايه يا سالم..

سالم: شوف وشك راح منه الدم ازاي..متخافش يا عم..انا قولتلها اني رايح اجيبك وهي مستنية تشوفك..

سامح براحة: ماشي انا هروح معاك البيت بس عشان انت قولت لسلمي اني جاي مش عاوزك تطلع عيل قدامها بس بعد كدا هروح..

سالم: يا راجل عشان انا مطلعش عيل ماشي ماشي..

لما وصلو الفيلا سامح وقف برا واستني في الجنينه..

سالم: ما تدخل يا عم هو انت غريب..

سامح: لا انا هقعد هنا في الهوا عقبال ما تخلص..اعملي بس كوباية شاي خليك كريم..

سالم بضحك: ماشي يا عم اوعي تلعب في الورد..

سالم دخل الفيلا ولقي سلمي نازله تجري علي السلم..

سلمي: ايه يا سالم اتأخرت كدا ليه..الا هو فين سامح مجاش معاك ولا ايه..

سالم: جه يا ستي بس مش عاوز يدخل..واقف برا في الجنينة..قولي لحمدية تعمله شاي وتطلعهوله..

سلمي بحب: لا هعمله انا واطلعه..

سالم: بت اتعدلي كدا شوية..احنا كدا كدا ماشيين علي طول يا دوب هخد دش..

سلمي: طيب يلا روح..اتأخر علي اد ما تقدر..

سلمي عملت الشاي وخدته وطلعت..لاقت سامح ماسك وردة حمرا جميلة اوي..

سلمي: ايه استاذ سامح سرحان في ايه..

سامح: سلمي..اي اخبارك مش عارف اشوفك اليومين دول..

سلمي: الحمد لله انا كويسة انت وحشتني بس

سامح: انتي كمان وحشتيني اوي هانت اهي الامتحانات تخلص بس..

سلمي: وتيجي تتقدملي.صح؟

سامح بارتباك: مش عارف ايه يا سلمي انا لسه مكلمتش بابا في الموضوع ده..كمان في موضوع جديد كنت عاوز اخد رأيك فيه..شوفي نسيتيني ازاي اتفضلي احلي وردة في الجنينة..

سلمي: احلي مني؟

سامح: مفيش احلي منك في الدنيا دي كلها..

سلمي بارتباك وبتحاول تغير الموضوع:اتفضل الشاي.. قولي بئي موضوع ايه اللي عاوز تخد رأيي فيه..

سامح:تسلم ايدك يا لوما.. دكتور فؤاد يا ستي عاوزني أكمل دراسة في الجامعه اخد الماجستير والدكتوراة طبعا ده هياخر الجيش شوية ومش هيخليني اشتغل بردو عشان اعرف اتقدملك،انتي ايه رأيك مش عارف اعمل اي هو بيلح عليا في الموضوع ده جدا..

سلمي: انت مرتاح لايه طيب وخدت رأي باباك ولا لسه؟

سامح: لسه مخدتش رأيه بصراحة انا عاوز اركز في الامتحانات ولما تخلص ابئي اتكلم في الموضوع ده..دكتور فؤاد كمان مستني ردي..

سلمي: علي العموم أنا معاك في أي قرار تخده المهم ركز في المذاكرة دلوقتي.

سامح: ان شاء الله..هو سالم اتأخر كدا ليه؟؟

سلمي بغضب: اي لحقت زهقت مني؟ وبعدين انتو رايحين فين اصلا؟؟

سالم: انا اهو يا عم دي هتفتحلك محضر..احنا رايحين نسهر شوية قبل السحور..

سامح: لا يا عم أنا مروح مش هسهر معاك ورايا مذاكرة كتير..

سلمي: طاب ما تخليك قاعد معانا شوية واتسحر معانا..

سامح: مش هينفع يا سلمي بابا مستنيني لازم اتسحر معاهم أول يوم رمضان..

سلمي: ماشي سلملي عليهم وكل سنة وهم طيبين..

سامح بحب: يوصل سلامك ان شاء الله..وانتي طيبة.

سالم بتريقة:اجيب اتنين لمون ولا اي..

سامح مقهقها: لا شكرا لسه شارب شاي..

سالم: طيب يلا بينا عشان المعاد هيضيع..يا دوب الحق اروحك ملكش في الطيب نصيب..

سامح: سلام يا لوما..

سلمي: خد بالك من نفسك..

سامح وسالم ركبو العربية وسالم روح سامح البيت وراح هو معاده..

يتبع،،،