بيت النجار

الفصل الثامن

اما أول يوم رمضان في الحي الراقي اللي فيه فيلا الحاج سلامة مختلف تماما..لا زينة ولا فوانيس ولا حد يعرف حاجة عن جيرانه..

الحاج سلامة واولاده خلصو فطار وحمدية شالت الأكل..

سلامة: بت يا حمدية اعمليلنا دور شاي كدا وهاتيلنا الحلويات اللي جايبها من عندك...

حمدية: حاضر يا سيدي علي طول أهو..

سلامة : اتغذو يا ولاد زمان ابوكو مش بياكلكو الحاجات الحلوة دي..

مختار: بجيبلهم كل حاجة حلوة يا حاج الحمد لله..

سلامة: والله..طاب نسأل سميحة اللي علي طول بتشتكي منك..ايه يا سميحة بيجيب كل حاجة ولا مقصر معاكو؟

سميحة: لا يا بابا مش مقصر ولا حاجة بس اللي جاي علي قد اللي رايح..

سلامة: انا مبحبش الكلام المزوق ده..مينفعش يبئي ابوكي وأخواتك عايشين في العز ده وانتي لسه قاعدة في البيت القديم اللي سلالمه م**رة..انا ممكن اخدلك شقه في اي حته تشاوري عليها..

سميحة بفرح: ربنا يخليك لينا يا بابا..

مختار: لا يا عم الحاج احنا في نعمه الحمد لله والشقة بتاعتنا مكفيانا وعال العال ولا محتاجين ننقل ولا حاجة..

سلامة: انت غاوي فقر يا اخي..طب اشتغل معانا وانت هتبئي حاجة تانية خالص..

مختار: طب ما الحاج خليل شغال معاك ولسه قاعد علي السطوح بردو..

سلامة: عشان هو غاوي فقر زيك..فتح مخك معايا وهنقلك نقلة تانيه خالص..

سميحة بزهق: اسمع كلام بابا سا مختار خلينا نقب علي وش الدنيا بئي..

مختار: عاوز تقول ايه يا حاج..

سلامة: ايه رأيك اشاركك ونقلب الدكان بتاعك ده ورشة بس نوسعه طبعا..اي رأيك اشتريلك المحل اللي جنبه؟

مختار: وأنا هشتغل ايه ان شاء الله؟

سلامة: تشرف علي الصبيان في الورشة وهجيبلك شقة جديدة في احسن حته وعربية وكل شئ..

مختار بامتعاض: لا يا حاج أنا كدا اسمي مليش شغلانه عشان انا اصلا مبفهمش في شغل النجارة ومبعرفش غير الحلاقة اللي ابويا رباني عليها واتقدمت لبنتكو بيها..وكمان بحب اصرف علي ولادي من عرق جبيني وبحب مراتي تعيش علي قد ما جوزها يديها طالما شغال ومش ببخل عليها بحاجة يبئي اكون في عينها احسن واحد في الدنيا مش تحرجني قدام اهلها..

ثريا: انت احسن واحد في الدنيا طبعا يا مختار هو انت لو مكنتش احسن واحد كنا جوزناك سميحة بردو..

مختار: كنت احسن واحد أيام الفقر يا ام جلال انما دلوقتي انا مش قد المقام..

سميحة وقد احست بخطئها: ما عاش ولا كان اللي يقول عليك كدا يا مختار..انا بس كان نفسي..

مختار: ولا نفسك ولا منفسكيش انا رايح اشوف اكل عيشي وهحود اخدك انتي والعيال بالليل..سلام عليكم..

سلامة: عليكم السلام ورحمة الله وبركاته..ماله ده واخد الموضوع أوي علي ص*ره كدا؟

ثريا: ايه يا بت اللي بتقوليه علي جوزك ده ما احنا كنا زمان كدا وافقر من كدا..اختشي كدا ولما تروحي تصالحي جوزك وتتاسفيله..

سلامة: ولا تصالحه ولا تعبره..ولا عاوز يعيشها عيشة نضيفه هي والعيال ولا عاوز يشتغل شغلانه تجيبله فلوس ولا عاوزها تخد مني فلوس..دماغه متركبة غلط ده ولا ايه..

جلال: معلش يا بابا ما انت عارف طبع مختار..نفسه عزيزة وميقبلش حد يصرف عليه..

سلامة مستهزئا: مانا بقوله نتشارك اهو هو اللي عاملي فيه وزير..

سميحة : متزعلش نفسك يا بابا انا هزن عليه واخليه ييجي يشاركك غصب عنه..

سلامة: ماشي يا سميحة وانتي خدي دول ومتقوليلهوش انك بتخدي مني فلوس..

سميحة: ربنا يخليك لينا يارب يا حاج..

فريال: ربنا يهديهولك يارب يا سميحة ويصلح حالكم..

سلامة بضيق: ربنا يصلح حالكو انتي يختي وتجيبولنا حته عيل..شوفي يكون في علمك لو مجاش العيل منك هجوزه أنا صبرت عليكي كتير..

فريال عيطت وطلعت اوضتها..

جلال بلوم: ليه كدا يس يا بابا ايه لازمته الكلام ده..انت عارف ان انا بحب فريال ولو العيل مجاش منها ميلزمنيش عيل من أي واحدة تانيه..

سلامة: بس يلزمني انا يا حبيبي..مستكتر عليا حته عيل بعد ما ربيتك وكبرتك وجوزتك وبعدين احنا بقالنا ست سنين صابرين يعني مظلمتهاش لما بقولك اتجوز..ست سنين وانا بتحايل عليك تخدها لدكتور كويس..

جلال: حاضر يا بابا انا هوديها لدكتور كويس بس انت متفتحش الموضوع ده تاني قدامها عشان نفسيتها متتعبش..

سلامة: حاضر يا حنين..

سالم: هدي نفسك كدا يا حاج معصب نفسك ليه بس..ما كل واحد ادري بمصلحته..

سلامة: نقطنا بسكاتك والله يا اخويا انت كمان..قوم شوف مذاكرتك..اختك طلعت من بدري تذاكر وانت قاعد تسمع حواكينا..

سالم: لااا ده انا هروح اذاكر مع اصحابي برا في الهوا..

سلامة: مع سامح ابن عمك خليل؟

سالم: لا يا بابا مش هشوفه..أكمل بتريقه: أصله بيحب يذاكر علي السطوح..سلام عليكم..

سلامة: عليكم السلام يا اخويا والله ما انت نافع..

ثريا: هدي نفسك يا حاج انا عقوم اعملك فنجان القهوة المظبوط يروق لك دماغك..

دخلت ثريا المطبخ وهي لسه بتفكر في موضوع جلال اللي نفسها تشيل عياله وتفرح بيهم وبالرغم من قساوة الحاج بس بردو عنده حق..وفجأة خطر في بالها فكرة..

ثريا: بت يا حمدية..

حمدية: نعم يا ستي اؤمري..

ثريا: الوليه اللي كنتي قايلالي عليها عملتلك حجاب عشان تجيبي الواد دي اسمها اي

حمدية: ام مندور يا ستي..دي ولية بركة وسرها باتع..

ثريا: طب بيكون ايه طلباتها يعني عشان نعمل الحجاب

حمدية: لا يا ستي دي لازم تروحيلها بنفسك ومعاكي الست فريال وهي تقولك محتاجة ايه والست فريال عندها اي بالظبط اصل كل حاله وليها علاجها..

ثريا: هي قالتلك كدا؟ مش عارفة فريال هتطاوعني ولا لأ..

حمدية: هترضي ان شاء الله يا ستي ما هي اكيد نفسها في عيل هي كمان..

ثريا: طب ودي القهوة دي للحاج وسيبيني لوحدي شوية..

حمدية: حاضر يا ستي..

ثريا طلعت لفريال علي طول ودماغها عماله تفكر..

ثريا: افتحي يا فريال يا بنتي..

فريال بتعيط : حاضر يا ماما..اتفضلي..

ثريا: ايه يا بنتي كدا تخدي علي خاطرك من عم الحاج..ده بيحبك يا بنتي بيقول دايما ده فريال نسمة محدش بيسمعلها صوت في البيت..

فريال: لا يا ماما انا مش زعلانه ولا حاجة..

ثريا: اومال بتعيطي ليه بس..

فريال: افتكرت أبويا وامي الله يرحمهم كان نفسي يكونو جنبي..

ثريا: ما احنا جنبك اهو يا حبيبتي وكلنا بنحبك وعمك الحاج والله بيحبك وسلمي وسالم وسميحة زي اخواتك بالظبط..

فريال ببكاء: أنا كمان صعبان عليا جلال وعم الحاج ونفسي في عيل بردو وخايفة اروح لدكتور يطلع مفيش امل لا قدر الله..انا مفيش في ايديا حاجة اعملها يا ماما..

ثريا: لا يا بنتي انتي في ايدك كل حاجة..ولا تروحي لدكتور ولا حاجة..انسي موضوع الدكتور ده خالص..

فريال باندهاش: طب اعمل ايه يا ماما..اوعي تقولي إن جلال يتجوز ويسيبني..

ثريا: لا بردو..اديني فرصة اتكلم.

فريال مواصلة للعياط: اتفضلي يا ماما..

ثريا: انا عاوزاكي تهدي بس وتسمعيني ومتطلعيش الكلام ده بجد ولا حتي لجلال..

فريال بعدم فهم: بس أنا مش بخبي حاجة علي جلال يا ماما ..انتي عارفة..

ثريا: مش هتخبي عليه كتير يا بنتي..اول شوية بس لحد ما يتم المراد..واردفت قائله: انتي عارفه ان حمدية قعدت تلات سنين متخلفش وبعدين راحت لست اسمها أم مندور عملتلها حجاب عشان تخلف بتقولي تاني شهر كانت حامل وجابت محمد ايه رأيك بئي؟

فريال بدهشة: رأيي في ايه يا ماما؟ انتي عاوزاني اروح للست دي واعمل عندها حجاب..

ثريا: والله يا بنتي مش عارفه هتعملك حجاب ولا هتعملك ايه هي ادري بشغلها بئي..حمدية قالتلي ان كل حالة مختلفة عن التانية..

فريال: حالة اي بس يا ماما وحجاب ايه ده احنا في أيام مفترجة..الحاجات دي دجل وبيضحكو بيها علي الناس..

ثريا بعصبية: ايه الكلام الفارغ اللي بتقوليه ده..انا بقولك عشان خايفة علي مصلحتك قبل ما الحاج يضغط علي جلال ويخليه يتجوز عليكي ويرميكي..انا بقولك نروح نجرب مش هنخسر حاجة..

فريال بضيق: بس أنا مش مرتاحة للمشوار ده..

ثريا: مرتاحة بئي ولا مش مرتاحة..اعملي حسابك هبعت حمدية تخد لينا معاد وهتروحي معايا ورجلك فوق رقبتك..

ونزلت من اوضتها جري علي السلم وهي بتنادي علي حمدية بعصبية..

ثريا: حمدية انتي يا بت تعاليلي هنا..

حمدية: نعم يا ستي..

ثريا: تعالي ورايا المطبخ..

حمدية : خير يا ستي..

ثريا بصوت منخفض: بقولك ايه خدي الفلوس دي ليكي..الكلام اللي هقوله دلوقتي ميطلعش لحد ولا حتي بينك وبين نفسك..

حمدية: حاضر يا ستي..

ثريا: انتي تخدي نفسك كدا وتروحي عند الولية اللي اسمها ام مندور وتخدي لينا معاد انا وفريال واياك حد يعرف بالمشوار ده..

حمدية : اهو كدا الكلام يا ستي من عنيا..ولما يحصل المراد ليا الحلاوة بئي..

ثريا بشرود: هو يحصل بس..

يتبع،،،