رشفة عشق

البارت الاول

السلامُ عليكم

رَشفة_عشق

الـعـباديــه

البارت

رجعت لمكاني وهوَ بقى واگف گعدت بمكاني كأنما ممسويه شي ..

بس تفاجئت بمكاني الأكل مفروش والريحه تعط تخلخلت بأنفاسي صارلي شگد ماماكله

سرفنت رداناتي وگعدت أريد آكل لفيت اللگمه الاولى وهو إجه وگف على راسي رفعت راسي شفته واگف ومكتف إيديه لظهره وعيونه صايره سود من الغضب رمقني بنظرة غضب وعدم رضا وگعد مقابيلي على أطراف رجليه وتكى إيديه على ركبه ويحچي والشرر يتطاير من حلگه .

- اني مو گتلچ ماتتحركين

اني ألـوچ بلگمتي واحچي وياه ببرود وسويت نفسي بريئه واني اسوي مصغر للكلمات .

- شسويت قابل ..رحت اشتريت دعيبيلات واجيت اركض.

امممح (بلعت لگمتي) وبعدين انته شعليك

آني سويت هيچ وهوَ تخبل .

شال الماعون مال الاكل كله وبعصبيه گلبّه بحظني طفرت بسرعه متفاجئه وخايفه من تصرفه

عطت بيه لان ملابسي تّلفت

- لك انته شبيك هاي نعمت الله هيَ لعب ؟

جاوب وعيونه ناررر من العصبيه

- حتى بعد من اگلچ على كلمه تاخذين حچايتي وماتعاندين

اجه الشرطي يركض لان المكان تتلف من وگفت وگع الاكل بالگاع

الشرطي

- شنو هاي نعمة الله بالگاع والمكان متلف هـٰذا مكان حكومي شلون تسوي هيج . ؟

خزرني بعصبيه عود إنتي السبب وباوع للشرطي ..

جاوبه هو ويصبر بنفسه ويضغط بقبضة إيده حييل ..

- خويه ماصار شيء هسه ألمّه بس طشرته لان طفر بريعصي بالاكل اضطريت اطلعه وتطشر

- يلا لموّه

بقى يلم بالاكل من الگاع ويحط بالعلاگه وعيونه تخزر بيه ويتوعدلي بنظراته كل مايشيل شي من الگاع يحطه بقوه بالماعون السفري

لميت شفتي وعصرتههه بقوه من الغضب

صحت على أمي

- يلا خل نروح

تقدمت خطوتين

وصاح وراي بصوت عالي يرج

- ووووووووووين ؟

عصرت عيوني اهدأ بنفسي

- ننتظركم يم هـٰذا الشباك علما حضرتك تكمل لّم الاكل ..شددت على آخر كلمتين وهوَ افتهم القصد ..

اجوا وإتجهنا لشارع مااعرفه شنو اصلاً بقينه نمشي مسافه هواي واني استحي منه اگول خل نگعد هالمره كلش قيدنا السجّان .

حطيت إيدي على سحر وغمضت عيوني گتلهه من تلاگينه حفره گليلي هاي الحركه دائماً نسويها ..

بقيت أمشي واني مغمضه عيوني كلش نحلانه وتعبانه

سمعت صوته بنبرة قلق وخوف ( شبيج ؟ )

فتحت عيوني . شفته واگف مقابيلي وينظرلي بخوف .

- مابيه شي بس تعبانه

- تعالي اصعدچ بذني العرباين

(عربانه صغيره من خشب تنقل الزائرين)

- لا والله خاف متقبل هو اني ستوته گوه صعدت مو الا ذوله النحيفين يدفعونّي . لك شوف شلون لحمه مابيهم ويدفعون بالناس والله خطيه هضيمه والله

- بس شكلج تعبان حيل

- ميخالف أمشي ولااگطع نفس هالمگاريد

إلتفت على أُمي

- خاله إذا نعسانين اشوفلكم فندق ناموا بي وارتاحوا

وبعدين نكمل مشي (يباوع بيه عود انتي )

گتله

- لا عيني ماكو داعي

اني احچي وياه بنتر وهوَ ولاعبالك مسوي شي !

إستمرينا نمشي بتعب وثقل ..

شويه ووگف يمي طول بطول باوعتله مستغربه حط بإيدي چيس باوعتله لفتين كباب !!

دفعت إيده ..

وگتله بنتر (مااريد)

جاوب بحنيه ولهفه

- لچ إكلي شوف وجهج شصار بيه

بنتر

- غير إنته ماتريدني أكل وطشرت الاكل وهسه مااريد أكل ..

(خليت الچيس على ميز يسون عليه شاي للزوار )

هو سحب الچيس واجه وراي غاضب

- تاكلين لو اطلع وجهي الثاني ؟

بقيت اضغط على مخرج الحروف وهاي الحركه تعلمتهه منه

- ماااارييدد

باوعلي بخزر وتوعد

- رايح لاامج اگلهه راح تتخربط علينه ونحتار بيهه لج وين نوديج هنا

گلت بعناد وإصرار

- مااااارررريد

صفن بوجهي وگال

- إاذا تحبين الـحُسين (ع) وقبل شويه چنتي تزورين اكلي

آني سويت نفسي كلش متدينه وع الاساس ماچنت اريد وهوَ اني ميته جوع

- ماتعرف الا تحلّف ؟

- عنادج ماخلىٰ غير طريقه

اخذت اللفات منه واني اصلاً ميته جوع اكلتهم بنهم يلا رجعتلي روحي

صعدنه بالكوستر لگراج سيد جوده وبقينه ننتقل من سياره لسياره علمود نوصل للگراج

وگفنه ابو الكوستر صفاء گاللي

- اصعدي

صعدت يم الشباك وهـوَ صعد يمي والمسواگ كله هوَ شاله خطيه ههههه بس يستاهل

تقرب يمي وهمس بإذني

- أگلچ جوعان

رديت عليه بنتر

- چـا شاسويلك ؟

إستغرب ورد

- اآه ؟

نزل إيده يدور بالغراض وطلع علاگة الشاميه وبقى ياكل ويتذوق بالأكل عود يريدني اطلب منه اني اموت ع الشاميه ماشاء الله ماكو شي مااحبه ..

آني من شفته يتذوق مقابيلي وريحتهه فاحت إشتهيتهه لگفتهه منه

- مـا .. جيب شاميتنه لاتاكل

اخذهه مني وضحك على تصرفي الطفولي

- ههههه خاف متقبلين

- والله شاميتنه اريدهه

فتح العلاگه بحضنه وسحب إيدي خلاها بالعلاگه

- اكلي اكلي بس كون محد يدري بس تدري خالتي تشنقنا .

ضحكت بصوت عالي

- ههههههه

- فضحتينا عود گتلج محد يدري

- يلا راح اكل واسكت

بقينه نباوع ع الشوارع وناكل كل مااحط ايدي احسه يتلمسهه بحنيه مثل اليريد يحفظ شي بس آني اسحبهه بسرعه واخزره وهوَ يطلّع حجّه يض*بني على إيدي يگلي اخذي عدل مو تتلمسين چنچ اعمى

بس اني مو غ*يه مااعرف شبيه اليوم !

اجت حوراء يمنه وشافت العلاگه مال الشاميه فارغه راحت لاأمي (ماما تعالي شوفي صفاء وإيڤان خلصوا الشاميه )

سمعت صيحة أُمي (ولچ شناكل بالسياره اذا من هسه خلصتوهه )

غطيت راسي جوه العبايه سويت نفسي فقيره ومسكينه ..

گاللهه صفاء (خاله هسه شويه واشتريلكم نكرز بيهه بالسياره هاي خلصت. تره خلصتهه إيڤان)

اني شهگت وضيگت عيني عليه

(هييييء منو الجوعان وفتحها ؟ أيـا خاين )

ضحك بصوت عالي وبعدين صفن وكال

- وداعتچ مااخون ابقى وفي لما أموت

حسيته غّير الموضوع وديحچي عن غير شي !

بس غلست

بقينه نحشش اني وياه ونضحك كالعاده

ماحسينه بالطريق

وگفت السياره ووصلنه لگراج سيد جوده وبلشت مسيرتنه ندور سياره للناصريه !

افترينه الگراج كله ماكو بس بصره اي واحد نسأله گال بصره وجذابه تخبلنه الكراج من البدايه للنهايه البصره وجذابه

(ناس تسميهه جزابه وناس گزابه واني عبالي شو ياهي الچذابه وگلت لاامي منيَ هاي مچذبه عليهم ويصيحون السوّاق چذابه .ضحكوا عليه وگالولي هاي منطقه بالبصره يمكن هيچ أسمهه .تفاجئت ماسامعه بيهه)

صفاء عصب حيل وعيونه صعدت بگصته اني إبتعدت عنه لايشمر حرگته بيه من يعصب ميعرف نفسه منو .. لان تعبنا حيل وماكو سيارات بس نمشي وأحنه رجلينه م**ره .

لگينه سياره يروح للشطره والناس كلهه من الناصريه تجمعوا عليه بقينه نتوسل بيه ياخذنه للناصريه ماقبل لما صفاء عصب عليه

- شلقضيه هيه الشطره عن الناصريه نص ساعه وصلنه للناصريه واطلع للشطره ليش تصير خبيث احنه زوار وتشوف الكراج ولا سياره للناصريه يعني نبقى هنا واحنه تعبانين ؟ خافوا الله بينه

وهم مريه چبيره بالعمر مبين عليهه الوقار والتعب صاحت بيه

(شبيهه الناصريه ييمه بيهه عرابيد (ثعبان) وماتروحولهه هيه محافظه حالهه حال المحافظات وأصلاً قريبه من كربلاء والنجف واقربلك من الشطره هم )

هو صفن وگال إصعدوا بس النفر 17 أُمي شهگت وگالت (يـاا شدعوه مااصعد بويه هاي نهيبه يرادلي 200 بس الرجعه )

صفاء گاللهه متذمر

- ياخاله دصعدي اني ادفعهن رحمه لوالديج اصعدي

صعدت أُمي وگعدنه بالسياره ننتظر نفرين ونطلع للناصريه

السايق بره يصيح (طالع ناصريه طالع) علمود يجيب النفرين واجاه سايق ثاني بقوا يتبسبسون وشويه اجه السايق گال انزلوا بطلت مااروح كلنه انصدمنه وگبت العيطه كلهه تعاركت وياه وصفاء ض*به بو** ولحگوا عليه السوّاق لزموا

نزلنه ورجعنه ندور

هذا صفاء شصار بيه إنگلب گلّاب وبس يعيط ووجهه احمرر من العصبيه .. كلش خفت منه كل مره من يمشي اوكف بصفه ونمشي بالمقدمه سويه هسه خاتله وره ظهر أُمي منه !!

يمشي گدامنه ولگه واحد عنده سياره ستار** گاللـه وين توصل؟ السايق گاللـه (بصرى)

- لازم (....كفّر ...) هناك بالبصره

اني شهگت ولطمت على وجهي

- هيييء أستغفر الله.. عزا بعينك صفاء شلون تكفر ؟

إلتفت عليه وعيونه تتطاير منهه شرار الغضب

- ماتشوفيهم شون طلعوا روحي

- وتكفر. ؟

أستغفر الله أستغفر الله

استحى مني كلش وجهه صار أحمر ونزل راسه يلعب بأصابع إيديه لأن هيه چانت زلة لسـان بس نسى اني موجوده

كلش ضوجني من نطقهه

عبست وجهي عليه گام يحاچيني مااحچي وياه حتى بعد مايعيدها خاف اله نيه ويعيدها

راح سأل الشرطي على سيارات الناصريه گاللـه بذيچ الجهه اركبوا سياره وتوصلكم لسيارات الناصريه لان مسوين الناصريه سياراتهم وحدهم تفاجئنه مانعرف بهذا الشي اول مره يسون هيج !

وگّف رف وصعدنه كل مره يگلي اصعدي اصعد يم الشباك ويصعد يمي هالمره گال إصعدي گتله

- إنته إصعد

التفت عليه مستغرب وطبگ أسنانه ويحچي بغضب ..

- إصعدي ماكو مجال ماتشوفيهه صايره لحم كلهه ولد يعني وين تريدين تصعدين ؟

خزرته بعدم رضا وصعدت

صعدت بالمكان اليصير وره السايق يحطون بيه العلاليگ مو كرسي .. حشرت نفسي گوه

هوَ إجه وگعد بالكرسي المقابيلي

اني نزلت راسي على إيديه وسويت نفسي نايمه عن لا اشوفه وألمحه ولايشوفني هوَ هم ..

مشت السياره بينه شويه حسيت على إيده

گعدني بأيده على راسي

- إيڤان إيڤان شوفي هذا التمثيل تحبينه

رفعت راسي بملل شفت التماثيل وساحه چبيره ناحتين كل التماثيل كمشهد تصويري لواقعة الطف گلبي كام يرف اريد اصوره واريد ابچي على التماثيل لان اموت عليهن

سيطرت على مشاعري وعوجت حلگي وگتله

- وشأسويله ؟

صفن بوجهي

- هـاا ؟؟ غير تحبينه چـا شنو ؟

كلت بنتر

- اممم

رجعت راسي ماخلاني رفع راسي

- شبيج ؟

- مااريد احچي وياك

عگد حاجبه مستغرب

- ليش ؟

- مااحب احچي وي اليكفرون بالله

صفن .

فرك وجهه حييل بحيث صار احمرررر

- هاي مو كفره

رديت عليه مستهزأه

- هـه عذر اقبح من الفعل چـا شنو اذا مو كفره ؟

صفن بيه ورجع فرك وجهه بأيده

- آسف والله مااعيدها مو بقصدي طلعت ولاانتبهت اصلاً

- هسه السايق شيگول ؟

يگول جاي للزياره ويكفر ؟

- گتلچ زلة لـسان لان اخواني ذولاك بالبيت كلهم يكفرون بس هاي لاحتني طفار منهم

- خوش عذر قبييييييح

- والحُسين بعد مااكفر بس لاتسوين هيج

رديت بنتر وبجمود خليته ينجن .

- مامسويه شي

رجعت اريد انام رفع راسي بأيده

- لج والله مااعيدها شبيج

عطت بوجهه عصبني حيل

- يتبره منك الله التكفر بيه ..

كافي لاتلح گتلك مااحب احچي ويه اليكفروون

طگگ أصابيع ايديه وسحب نفس .. وكال بقهر

- براحتج

كلش ضاج وگام مايتحاچى بس ينافخ ماعاجبه

نزلنه من الرف وصلنه لسيارات الناصريه اخيراً چان سحر تض*ب على إيدي بخفه

- إيڤان إيڤان ذاك حلاّقچ الشفناه بكربلاء !

طبعاً هيَ تعمدت تسوي هيچ تعرف بعصبية صفاء وهوَ چان واگف يمنه وهيَ صوتهه فضيحه !!

هوَ خزرني عيونه رادت تطلع وركز بالكلمه الراح اگولهه

گتلهه

- وآني شعليه ؟

- ولچ خاف لحگنه علمودچ

تدخل صفاء وعيونه صارن بگصته

- ياحلاق ؟

سحر

- هذا واحد چان صافن على إيڤان !!

فتحّ عيونه حيل

بقى يتلفت وصاح (وينه ؟)

آني بسرعه گتله

- راح راح چذب مالاحگنه

تقرب يمي وجهه صار بوجهي

-شعنده وياج !! شيريد . ؟؟

اني جاوبته ببراءه

- ماعنده شي وياي

- چـا ليش لاحگنه

- ياب والله مالاحگنه دشوفه وصل ذني البنات ورجع ميت علينه يلحگنه

- وينه. ؟

عطت بنفاذ صبر

- داگول راح.رجع لااهله لاتكبر الموضوع ماكو شي

خزرني بتوعد وعصب .. مشى للسيارات

صعدنه بسياره طويله مااعرف اسمهه بس كل وسائل الراحه بيهه مكيف واضويه وحتى تدفئه بيهه

أُمي والبنات گعدن وره ووياهن نسوان من الغراف نسقن وياهن ودگ سوالف

صعد عباس يم الشباك اني گعدت يمه إجه هو ودحس نفسه يمي بالكرسي المتحرك التفتت عليه خزرته

- لاتخوزرين لااطفي عينج

اني ردت اخفف عصبيته اكره الشخص العصبي وخصوصاً هوَ من يتعصب يتنحس ومينطاق .

- اني اطفي عيونك ذني المتعجب بيهن والله ياخضر كلساع خازرني بيهن خالسني

ضحك اخيراً بس چانت ضحكته بصوت عالي رجولي

-ههههههههه تستاهلين

- ننننن

عباس بس يضحك علينه ض*بته على متنه

- خب شبيك فاتح حلگك اكو شي يضحك

- كون هسه صفاء يموتج موت اويلي وعلي يشفي غليلي

- دطير انته وصفاء

خزرني هوَ

حطيت إيديه على وجهي بحركه طفوليه

- لاتخزززررررر يررربي

عباس

- اي عود گالوله عيونك حلوات هسه شيخلصنه كلساع يخزر بيج هههههه

بقينا نحشش عليه ونضحك

.............................................................

مشت السياره وقت طويل غفيت وخليت راسي على الكشن وعباس هم. بس صفاء بقى گاعد لان اذا ينام ع الكشن نتلازگ كلشش ف بقى گاعد وهم الكرسي الوسط الگعد بيه ماگدامه كرسي يتكي راسه عليه ..

نمت وحسيت بيه يگعدني

رفعت راسي فتحت عين ونص

- شبيك صفاء توني غفيت

- برددت حيل انطيني نص من عباتج

طلعت رداناتي من العباه وأنطيته

- اخذ ..

طلعت نص من عباتي وشمرتهه عليه غطى راسه ومتونه واني نص عليه قسمناهه نصين لان الجو شتاء وبارد .

غفى هوَ وراسه بقى يتطوطح يروح بيه منا ومنا لان هو كرسي وسطي اني وعباس اخذنه الكشن الكرسيين والوسط اله ضحكت عليه ..

أخذت راسه وخليته ع الكشن مال كرسيي واني بقيت گاعده ميته نعاس بس مانمت خاف يگعد

صاح السايق ع الكروه وهوَ گعد ،، شافني كاعده وهوَ نايم بمكاني خزرني ماراضي ..

- ليش ماگعدتيني ونمتي ؟

- لا نام معليك بيه

تذمر بإنزعاج

- چؤؤ

طلعتله محفظته من جنطتي ودفع الكروه مال عباس وخالتي ومالته .. راد يدفع مالتنه وخالتي لعبت بيه لعب وگالتله ضم فلوسك وراك أيام صعبه وخالتك عدهه ماعايزتلك (قصدهه أُمي) وسحبت منه المحفظه بعدما چان ضامهه عندي !!

گاللهه

-جيبيهه المحفظه خل اضمهه عند إيڤان

- لا خليهه عندي بعد ضميتهه

همست بصوت خافت

- تره ماابوگ

همس بأذني

- لو ادري بيج تبوگين ماضميتهه عندچ من البدايه. ولعلمج ثقتي بكل البشر معدومه بس بيج عاليه

رديت بحزن

- ممممم

طلعت موبايله من جنطتي اريد اتصفح بالفيس لان عنده مجاني

ادگ الرمز يطلع خطأ !!

حطيته مقابيل عيونه وگتله

- هاي شنو ؟

استغرب

- شنو ؟

- مغير الرمز ؟

- اي

- ليش ؟ السبب ؟

- هههههه لان صادقت وحده جديده ومااريدج تشوفيهه

- هـاا رجعنا لسوالف قبل مو

- مو سوالف قبل هسه وبعد

كلش احترگت روحي مااعرف شصار بيه دائماً يراويني صاحباته وآخر مره وحده فتحت وياه كام وگتله ذني يصوروك وكلشي يسون وگال بعد مااصادق !! واعرف يسوي هيج كلما اتزاعل وياه لو كلما اطنشه يصادق وحده يحرگ گلبي بيهه ومن نتصالح يگول اعوفهه بس يحرگ گلبي بيهه ..

سحب الموبايل من إيدي وفتحه

طلع صورة بنيه لابسه سيت نوم أحمر ناري والسيت قماشه تول كل قطعه بجسمهه مبينه ومسويه حركه مو زينه وهيه مربربه وحلوه

قربهه لوجهي

- حلوه موو ؟

بعدت الموبايل من وجهي وقلدت

- ايعع تلعب النفس

- ع الاساس انتي احلى منهه

جاوبته بثقه عاليه

- خل البس هذا اللبس وشوف شأصير

فتح عيونه مصدوم وبسرعه خلى اصبعه على شفايفي وتخربطت احواله

- اشش اششش اسكتي لاتكملين

سحبت الموبايل من عنده ودخلت ع الضبط اريد أغير الرمز واخليه بكيفي لأن رمز موبايله دائماً آني مسؤله عنه .. گتله

(شگد الرمز القديم)

- ليش؟

- شكد بدون كلام

قرب راسه يمي وشافني اريد اغير الرمز

- مااگول عوفي الرمز لاتغيريه !

- ليش ؟

- موبايلي بيه خصوصياتي !

عبالك انض*بت راشدي على وجهي خصوصيات !!

آني كل مره احط الرمز هسه صارت خصوصيات !!

- هـاا ؟ هيج صارت خوش هاك

(شمرت عليه الموبايل وعفست وجهي )

رد متذمر

- اهووو اليوم شيخلصني منج. ضحك وكمل كلامه گال .. اللزگه

التفتتله مصدومه

- اني لزگه؟

- اي انتي

- خوش صفاء خوش بعد ضم عندي شي الا اذبهن بالزباله

- ميخالف اضم عند خالتي

- چـا ماضميت عدهه من البدايه ؟

- عجبني اضم عندچ ... هسه عندج مانع ؟

ويبتسملي إبتسامه صفراء

عصبت ورديت بنتر وعصبيه

- شگد تافه

- هههههههههههههـه

- عبالك منطيته نكته مو دارزل بيه والله يالله بدون إحساس

ضحك وغلس

وصلنا للناصريه بالـ4 الفجر نزلنه يم الحبوبي گال صفاء

- تحبون نروح على سوگ هرج لو من فروع الحبوبي

- لا من الحبوبي احسن .سوگ هرج هسه ضلمه ويخوف .وهم اقرب منا

- يلا امشوا

مشينه من طريق الحبوبي ووصلنه لشارع 20 دخلنه لبيتنه مترب وباااررد وصاير وحشه فتحنه الاضويه طلعت الصوبات والبطانين لان موت بررد .. وصلينه الفجر

اصلاً احنه من رحنه للزياره مالمّينه الفراشات خليناهن لان من نجي تعبانين مابينه حيل فرش ف كل واحد تمدد بفراشه ونام بس صفاء گال اريد بطانيه رحت جبت البطانين لليريد وبقيت اوزع عليهم وصلتله هوَ واگف يم الشاحنه ويلعب بموبايله گتله

- تريد ؟

التفتلي ورفع حواجبه بتساؤل گال (هـاا؟)

- وجعا . بطانيه تريد ؟

- اي اي اريد خليهه بفراشي

(وهمس) ولو انتي تجين وياهه بعد تسوين فضل چبير

اني سمعت جملته كلش زين بس سويت نفسي ماسمعت

- هـاا ؟

- ههههههه قبل شويه تگوليلي وجعا هسه اني اگلچ .. وجعااااا ..

روحي اخذيهه للفراش شبيج متصنمه

- اي اي اي

رحت أخذتهه وغطيت بيهه فراشه حتى مباشرةً يجي ينام مايغطي نفسه

رحت للغرفه ونمت نووووم عميييق تعب مال 3 أيام ومشي

گعدت على صوت الأذان مال الظهر محد گاعد بس آني رحت غسلت وجهي وتوضيت إجيت للاستقبال بيهه عباس وصفاء نايمين شغلت الأضويه ورحت على صفاء سحبت البطانيه وطلع وجهه يراسل بالموبايل !!

تفاجئت يعني حتى مانايم !!

تركته ورحت لعباس اصل المشاكل گعدت على رجليه وبقيت اض*ب بيه

- إگعد إگعد تتذكر من تگعدني بالمي هسه الا اجيب گلاص مي وارشك رش

بسرعه طفر مزعوج

- إيڤان والـحُـسين اذا سويتيهه اموتج موت

- ههههههههههههههيوو

صفاء عاف الموبايل ورد عليه

- ياب شبيج تطفرين فوگ روسنه چنچ شمر نريد ننام

رديت عليه اعوج بحلكي واخ** بعيني حتى يحس على نفسه

- ماشبعتوا نوم من الـ4 لهسه الساعه بـ12 لو ملتهين بغير شي .. ؟ وغمزتله

- اي والله ملتهين بغير شي !

غميته

- امداك خل يقطن بيك خليهن

- فلوسي واني حر

- تفووو

(هاي الكلمه دائماً على ل**ني ماتنزل منه حتى كمت من أگولهه محد يعتبرهه رزاله هي وكلمة (وسم) اكثر كلمتين لازگات ب ل**ني )

يتبع .....

الـعـبـاديـه??

تابعوا الحساب ليصلكم كل جديد