رشفة عشق

البارت الثاني

السـلامُ عـلـيـكم??

رَشفة عشق

بقلـمي الـعبـاديـه

البارت _2_

گام تقدم عليه وخزرني سحب إيدي وعصرها

- ناهيچ من كلمة تفو لو لا ؟

دفعته بدلع وعناد

- اوووووي شبيك عيني متعود ل**ني عليهه قابل انتَ اول مره تسمعهه مني ؟

خزرني ورفع حاجبه

- إيڤان آخر مره اسمعچ تگوليها وخصوصاً إليه فاهمه لو لا. ؟

- لك والله مااگدر ل**ني متعود عليهه حتى بالمواقع استخدمهه وبكثره هم

عصب حيل وعاط بصوت نززني

- إيڤڤڤاااان

سديت إذاني ورفعت متوني ببراءه

- إيييي شبيك

- لاتگولين تفوو تره والله اتفتفچ اتفتف

ضحكت بصوت عالي وحطيت ايدي على حلگي اكتم الضحكه لان فضيحه

- لك شنو هاي النوب. *العباديه*

- لتاخذين النصيحه وشوفي شيصير بيج

*******************************"

رشفة عشق

إسمي إيڤان عمري 19 سنه كليه مرحله أولىٰ بيتنه بمحافظة ذي قار (الناصريه) بشارع 20 سموني إيڤان لان جدو تزوج على بيبي بنيه كرديه إسمهه إيڤان حيل حلوه وبيبي طيبه حيل ف صادقت إيڤان وحسبتهه مثل بتهه لان چان عمرهه صغير كلشش يمكن 15 سنه ..

خمس أشهر وإيڤان صارت حامل الكل چان خايف عليهه لان بُنيّتهه ضعيفه ومتتحمل ف من ولدت توفت وبيبي سمتني إيڤان لان تريد تتذكرهه بيه . وآني أحب إسمي حييل وكلهه تگول حلو ودائماً ابوس بيبي لان سمتني بيه .

عندي إخت وحده (حوراء) تدرس صف ثاني متوسط واخ واحد (رائد) متخرج ويشتغل مهندس وزوجته سحر صارلهم سنتين متزوجين وللآن مصاير عدهم طفل وديراجعون لان اثنينهم يحبون الاطفال ومستعجلين حيل،، أُمي معاونة مديره بأعدادية النور وبعدين إنقلت،، وأبويه مدرس رياضيات حالتنه كلش زينه وداخله كليه أهليه طب أسنان بفضل أهلي بس قصادها حيل چبير يعني السنه الوحده قصادها 9 ملايين .. دائماً أگول شنو ذنب أهلي يدفعون هالمبلغ لو مطلعه معدل عالي ورايحه حكومي بجهدي بس شاسوي هـٰذا حلمي وداحققه .

آني بالعطل اقضيهه كله ببيت جدو يعني الوقت ببيت جدو اكثر من بيت أهلي وآني صغيره تربيت وترعرعت عدهم..

لما صرت بالمدرسه گمت أجيهم بس بالعطل خالتي أم عباس زوجهه متوفي وعدهه عباس وحسن ف عايشه ببيت جدو واني عايشه ببيت جدو ف اني وعباس وحسن إخوان وأكثر كلش أحبهم ويحبوني حاسبتهم إخواني الكبار .

حتى چنه نلعب سويه خصوصاً اني وعباس چنت قبل أحطه بحضني وعود اني امه وهو يبچي يصيح .. وا وا وا ..عود طفل و(ما ما) عود جوعان واني اجيبله بطل وازرفه اله واترسه عصير عود مميه هههههه حسن چان معقد ف مااحتك بيه بس أكثر شي عباس اني وياه ساعه عرك ساعه صحبان كلهه محتاره بينه بس علاقتنه أخويه كلش حلوه .. وهوَ اكبر مني

أما صفاء اووف ياصفاء هذا السجّان مالتي حسره عليه أطلع من وراه كل مااروح لبيت جدو يجي وراي عن لا أطلع وبس يخوزر بعيونه الخضر .. بس أكثر شي آني وياه سوالف وضحك ونحشش على اي شي وهوَ حنين كلشش بس آني اتقيد من عنده منه لان حابسني حبس

مو مثل عباس ميانه وسبورت .

بس سوالفنه ماتخلو من الغلط والتدخل

أسرار صفاء كلهه عندي والشخص الوحيد اليثق بيه آني .

امه مطلقه وابو متزوج وزوجة أبوه شابعته ظيم كل مايشتغل ويحصل يوميه يكضيهه حليب وحفاظات ومسواگ برغم انو خالو (أبوه) مامخلي عليهم شي ضابط بالاستخبارات قسم الاجرام ومن يض*ب شخص صدگ يجرم بيه بحكم عمله وماعايز فلوس عنده خير بس هيَ عناد بصفاء هيج تسوي عنده اخوان 3 واخوات 3 من مرت إبوه بس كلهم اخلاقهم زفت يكفرون ويشربون جكاير ومايصلون اكرههم حيل

لما هَج منهم وشاف شغل بكربلاء وإنتقل لهناك بس يجي كل شهر او كل اسبوع يشوفهم ويرجع ف من يجي لازم اني مااطلع واتقيد بسببه كلش خانگني ..

خالتي ام عباس گالت لصفاء

- صفاوي خاله ماتروح لاأبوك تسلم عليه وتاخذ من خاطره

- لا خاله مااروح اني شارد منهم تريديني ارجع الهم

- بس سلم وتعال

- حتى المناغيل تستلمني بالباب

هوَ گال (المناغيل) لو اني ان*ديت بالضحك اريد اسكت ماكو شبعت ضحك عيوني گامت تدمع من الضحك

هوَ مبتسم ومكتف إيديه وصافن عليه

- كافي اختنگتي

- يممممه حموت خرب يومك شنو هالمصطلح

- والله مللوني صدگ چنهم مناغيل (منغولي)

صدگ ضحكت من كل گلبي

.................

من رجعنا من الزياره لگينه مخلص إشتراك النت وهوَ مكنك يومي ع الماسنجر وهم خلص گاللي إشتركيلي اني مااعرف

أخذت موبايله وإتصلت بخدمة #250* فعلت انترنت يومي وبقينه منتظرين رسالة الاعداد مادزوها إتصلت على رقم الشركه 411 وانتظرت الرد من موظف الخدمات

هوَ شافني كامشه الموبايل ورافعه السماعه أخابر أشرلي براسه (ويامن؟)

أشرتله ع الموبايل

- موظف خدمات شركة كورك

هو راد يحچي وإجه صوت موظف الخدمات

- الووو ... تفضلوا وياكم موظف الخدمات من شركة كورك

اني رققت صوتي وگلت

- الووو ....

اريد أكمل وأنسحب الموبايل مني

إيدي بقت معلگه على إذني بمكان الموبايل واباوع عليه مصدومه

تقرب يمي عصر إيدي حيل وعيونه بگصته من العصبيه ..

- سمحتلچ تخابرين ؟؟

عگدت حاجبي مستغربه

- وشعليه بيك غير همَ المفروض يدزون رسالة الاعداد ومدزوهه إتصلت بيهم علمود يدزوهه حتى يجي النت

عاط بوجهي نزيت

- ليششش خابرتي مااسمحلج تحاچين أي ولد ..

رفع إصبعه تهديد ..آخر مره هاي فاهممه

سكتت / ودمعت عيني

عاط بنبره أعلى من علو صوته

- فاااااااااههممممممممممه

نزيت ورديت عليه بخوف وتلعثم

- اي اي فاهمه

مابيه حيل أجادله لان شكله معصب كلشش

همس بغضب ودماراته امتدن على طول رقبته .

- فوگاهه تنعم بصوتهه تسويله اغراءات

كلمته حزت بنفسي وگلت خل احرگ گلبه

- طبعاً ارقق بصوتي ماسمعت صوته شلون يذوّب عبالك بيه سحر أويلي مبين صاك

اني گلت هيچ هوَ تخبل گرصني من زندي حيلل وزجرني بعصبيه وينافس

- عجبج؟

يقوي على الگرصه ويلوي بيهه واني ارفع بجسمي على أطراف رجليه كل مايقوي الگرصه من الألم

- اخخ اخخ عوفني

أذتني حيل عضيت شفتي حيل بهدوء وعصرت عيوني أخفف من الألم

تقرب مني بخدر وهمس بأذني

- شنو هاي؟

- اخخخ شنو؟

بسرعه شمر إيدي وفرك وجهه بإثنين إيديه ويردد (أستغفرُ الله)

بقيت واگفه يمه اشوف حاله شلون مخربط فرك شعره قوي تبعثر على كل وجهه وعصر عيونه غمضهن حيل فتح عيونه لگاني واگفه گدامه إنصدم .صاح بيه بصوت

- شعندچ واگفه هنا روحي من گدامي بسرررعه

اني نزيت ورحت مرهوله للغرفه صاح وراي

- اليوم لاتراويني وجهچ ابدد

- اي اي

خليته ومشيت معصبه منه حيلل شبيه هـٰذا؟

رجعت لغرفتي تمددت ع السرير أفكر بمعنى لتصرفات صفاء !

قاطع صفنتي مداهمة عباس المفاجأه

عباس

- لچ إيڤان تعالي شوفي ششتريتلچ شغله بحياتچ ماتتوقعيهه

تحمست ووگفت

- شنو شنو ؟؟

طلع تراچي من وره ظهره يخبلن برم وطوال وجوه البرم سلسله بيهه ريشه زيتوني كلش حلوات وناعمات .. آني طبعي احب الا**سوارات الناعمه والمرتبه وهمَ يعرفون ذوقي .

ركضت عليهن

- يخبلن يخبلن عفيه السبع

(وطبطت على متونه)

رفع راسه بفخر وثقه

- شعبالچ شفتهن وتذكرت أخيتي الحقيره الخبيثه

- انتَ خبيث تفوو

لبستهن مايدخلن بزرف إذني . أذني حيل وماداخلات بإذني ..

- خب عباس ميدخلن بإذني جايبلي عاويات . من مجمع التنزيلات هـا ؟

- عمت عينچ هـٰذا ذهب برازيلي مو صوجچ صوچي آني الاتذكرچ امداچ

راد يروح كضيته من شعراته

- خب تعال لبسنياهن خاف لان مااشوف فتحة الاذن مادخلن

- والله إذا تعذبيني وتتحركين ماالبسچ

- لا مااتحرك بس خل اصورهن وهنَ بأذني

- يلا خوش

طبعاً اني ماالبس حجاب مقابيل عباس لان إخوي بس صفاء وواولاد خالاتي الباقيين ألبس عباس إخوي أصلاً ماكو داعي ألبس گدامه

وحتىَ هو فقير ويصوم ويصلي من دون ولد خالاتي كلهم بس هوَ زين بيهم .. حتى صفاء ميصلي ولا يصوم وعنده علاقات بالبنات ورافع شعره وكلادته الذهبيه وملابسه اليوميه شكل ويهتم بأناقته ..

اما عباس حتى شعره بعده ع الزيان الحفر هههه وميهتم بأناقته حتى بنطرون ميلبس واذا يلبسه يلبسه عريض يگول اتعجب ولد ويلبس بنطرون ضيگ ادري تريد تسوي اغراءات للبنات ويستحرم حيل بحياتي مشفته نظرلي غير نظرة الاخت واني كذلك ودائماً ينصحني ونصيحته ذهب ... كل همه الطوبه وبس ههههههه فقير بشكل حتى نصيحله الفاهي

حاول يلبسّني التراچي وعاصيات ميدخلن رگعني على راسي بإيده

- هذا راس مال ثور لو مال طلي احترمناچ وجبنالچ تراچي مايدخلن ليش ؟

جاوب نفسه : لان بصراحه راسچ مال ثور

لزگتهه بطگه على ظهره

- تفوو عليك ياثور دحاول حاول

لبسني الأولى متت من الوجع بقيت أكمز وابچي طلعن إذاني مطمومات

مسحت خشمي الي تحول لون احمر من التدميع بسبب الالم

بقيت اهفي على وجهي واگمز من الالم

مديت اذني وگتله

- يلا بعد الثانيه

- فلا تتوبين توچ چنتي تتنغوصين وتتبكبكين (تبچين)

- ديلا بعدك متعرف البنات اهم شي اناقتهن يتحملن كلشي لخاطر الستايل

سحب راسي وض*بني عليه ميفوت ض*به طبعا وانطيته الترچيه وبقى يدخل بيهه واني اكمز

....

ديلبسني بالترچيه الثانيه والغرفه هدوء ومركز مدنگ هوَ على إذني يمشي بإتجاه الزرف مال الاذن القديم لان اذا يحفر جديد تنزف دم

هوَ مركز وآني كل شويه انز والزم ايده اريد اطفر ويثبتني كل شويه لازمه إيده لان يوجع .

ومانحس الا الباب إنفتح ودخل صفاء !! ماعرف شلازم بأيده ومدنگ

- إيڤان تعالي شوفي آآآآ ...(راد يكمل كلامه بس رفع راسه إنصدم من شاف منظرنه !! )

هوَ تفاجأ ووجهه انسحبت ألوانه ركضت على شالي لبسته

رمش بعيونه مصدوم وبلع ريقه گال بصدمه .

- شجاي تسوون؟

آني رديت عليه بأستغراب وبنتر گتله

- شجاي نسوي يعني؟

وجهلي صيغة سؤال

- ديبوس برقبتچ .. ؟

آني فتحت عيوني مصدومه

- شنوو شنوو .. ؟ عيد شگلت

ركض على عباس شاله من خوانيگه

(لك خسيس دتبوسهه مو ؟)

هوَ انصدم گاله

- شبيك أنتَ ماتستحي تگول هيچ انتَ ماتعرف بينه إخوان ؟

عافه

وتقرب يمي وحط عيونه بعيوني ..عيونه انملت دموع وبلع ريقه وگال

- إيڤان چان ديبوسچ من رقبتچ موو. ؟

آني هزيت راسي نافيه وعگدت حواجبي بعصبيه .. خلى العالم كلهه يتهم عباس !! اخويه عباس .. اصلاً حاله حال رائد ..

- صفاء تخبلت شبيك آني وعباس إخوان والكل يعرف ! وإنت اول شخص يعرف بهالشي

نفش شعره بأيديه وبقى يهلس بيه ويدگ على راسه بعصبيه ويعيط بصوت عالي .

- لچ شفته بعيني مدنگ على رقبتچ اكذب عيووووووووني ؟

عطت بيه وخزرته بهدوء

- ماگتلك كذب عيونك بس هو چان ديلبسني التراچي لان إذاناتي مطمومات وآني گتله لبسنياهن شبيهه يعني ؟

ركز بعيوني ورفع حواجبه وحنى وجهه سحب نفس

ويشمر بإيديه ويحچي

- بنت وولد ووحدهم بالغرفه شيسوون؟ يلعبون دعابل ؟

خبلني بشكوكه وضوجني زجرته بصوت عالي

- العندي شي والماعندي انتَ شكو ؟ حياتي واني حره بيهه مفهوم ؟ وهسه تفضل بره إذا ممكن

صفن بوجهي

وأشر بأصبعه على ص*ره

- تطرديني ! ؟

رفعت راسي وجاوبت بهدوء

- إي اطردك !

فرك لحيته بإيده ولّم شفته بغضب ودفر ميز التواليت عفس الباب مال الميز وطلع رگع الباب يمكن إن**ر

عباس

- كله من وراچ أم راس لو لابسه التراچي ومنچبه ماچان صارت هاي المشكله

- خب عباس مالي خلگك كله من وره تراچيك العاويات

- صوچي بس إذا بعد إشتريلچ شي اطلع نعال

- هـه هوَ إنتَ نعال

ض*بني على راسي وطفر مالحگت بيه آخذ ثاري

صحت وراه من الدرج

- آنه الك چـا وين تشرد مني

رجعت للغرفه وآني أتذكر كلمات صفاء وعصبيته شلون شك بيه ؟ آني وعباس !!!

هوَ عباس الوحيد المايغار من عنده لان يدري بيه أخوي بس اليوم شغيره ؟

إجه عباس گتله دزني لبيت جدو

بلكي الگاه هناك

أخذني البيت جدو ودورت عليه مموجود !

سألت جدو گال (رجع لكربلاء راح لشغله !!)

- ياشغل جدو الناس كلهه بالزياره ومعزله تدري كربلاء مگلوبه گلاب ماالك محط رجل

- والله ماادري يابعد جدچ بس هوَ لم غراضه وراح !!

لاأول مره راح بدون مايودعني ولايجي يمر علينه !

حتى ماگال لأأحد رايح بس لجدو حتى عباس اقرب شخص إله مايدري بيه رجع !!

بقيت ألوب شلون ماگاللي ؟

ديلا شعليه بيه قابل أمه أبوه؟ خل يولي

مرت 3 أشهر وصفاء ماكو ولامبين خياله كلش ضجت خصوصاً اني متعوده عليه يوصلني للكليه واتفاخر بالسياره الجارجر اليسوقهه مقابيل صديقاتي ..

بس هو يگدر يضحكني بتحشيشاته ونكته يخلي الواحد يشبع ضحك

مشتاقه لصوته مااعرف شبيه هاي اول مره يصير بيه هيچ ! يمكن لأن زعلان مني ! مااعرف السبب !

طلعت جنطته الانطانياهه بطريق المشي وآني أتذكر شلون شايلهه وأقلد عليه من طلع العطر منهه ورش نفسه

- إيـــع شهالعطر لعبان نفس

- مو لشكلچ لهـٰذا العطر تدرين هـٰذا توصيل من أذربيجان لعلمج

- إيـــع بربع مااشتريه يخلس

آني أستنشق بالعطر وأقلد عليه طيب حيل مجرد ماشميته أدمنته وريحته الطيبه تخلخلت بأنفاسي . ويبقى ثابت بيه من الصبح لثاني يوم الصبح والريحه تشع بطريق المشي

هوَ مخليه بالجنطه والجنطه متروسه بيه وعود هوَ ساده مامفتوح

طلعت الجنطه وشميت بقايا ريحة عطره !

ذكرتني بيه وبسوالفه حيل اشتاقيتله

ض*بت نفسي آني شبيه ليش داسوي هيچ؟ آني شعليه بيه مااريده أصلاً لايمي ولايمه

ركضت للجنطه لفيتهه وضميتهه بمكانهه الچانت بيه

مااريد اواجه نفسي بالحقيقه !

..............................................................

صارن الـ3 أشهر 5 وصفاء ماكو

لما بيوم إجيت من الدوام لگيت عباس عدنه گال (خل آخذچ لبيتنه)

- ليش شصاير؟

- أريدچ تلعبين وياي بلاي ستيشن

- تريد أفوز عليك مو؟ تدلل الا أوكلك ميه

- هههه تحلمين

دائماً نلعب آني وياه بلاي ويفوز عليه بـ10 صفر لو اقل .

بس مره وحده بحياتي فزت عليه وبيومهه فرحت حيل هههههه

لو نلعب طوبه حقيقيه يشوت عليه واني أصد بس ولا گول يفوت عليه حارس أصلي حتى إنعرفت بالمنطقه وكاموا يصيحولي الحارس لان جانوا اصدقاء عباس يجون ويشوتون عليه كلهم .. ابرع واحد بيهم مايگول عليه وگاموا يصيحولي الحارس هههه والله ايام الطفوله تخبل ..

بس لحد الآن آني وعباس نلعب حارس ولاعب واراوغ بيه ونلعب بلاي

ذبيت جنطتي ورحت وياه أول مادخلنه للبيت شميت العطر مال أذربيجان !!

بقيت اشمشم عبالك چلب بوليسي هههههه

اوف ياربي گمت أتخيل معقوله لهالدرجه مشتاقتله؟

دخلنه للصاله أول ماركضت شغلت البلاي وحضرته علما عباس يجيب الجوستك الزوجي

إختاريت برشلونه وهوَ إختار ريال برغم هوَ هم برشلوني بس اني ماالعب اذا مو نادي برشلونه لان بأعتبار خيانه لبرشلونه إذا أختار ريال حتى لو لعبه

سويت خطتي وسويتله خطه فاتره

إجه شافهه وضحك مستهزأ بيه ماعبالي يجي يتفحص الخطه

خلى خطه فول وبلشنه نلعب ..

بعدني يم گولي واشوت الطوبه عليه اريد اگوّل وهوَ ميت ضحك عليه يگلي تخافين مني ماتوصلين لگولي تحديته ووصلت يم گوله علمني شلون أگول وآني اخذت كلامه وأول ماوصلت بقيت اصيح على اللاعب

(ولك گول عليك الله گول والله اطردك تره) يباااااااااااااا

وصلت للگول گاللي عباس- ضغطي مربع خفيف

بعدني أريد اشوتهه ودخل صفاء شكله معصب. عاگد حواجبه بأتقان !! گال بنتر

- شنو هـٰذا الصياح؟

آني التفتت عليه وضغطت زر دائره بكل قوتي راحت الطوبه وره الملعب

يمكن تدحرجت يم بيت اهلي من كد ماالض*به قويه

بقيت صافنه عليه واجتني الطگه من عباس

- أنه مو گتلچ مربع وضغطه خفيفه شگد غ*يه

فززني من صفنتي انتبهتله ورديت مزعوجه

- هوَ آني شعرفني غير نسيت هسه ا**ركم كلكم وأفوز

التفتت عليه بعده واگف ويباوع علينه بخزر بنظرات غاضبه ورافع تك حاجب حسيت حاجبه حينقلع من كد مارافعه ..

گتله ببراءه

- شلونك صفاء ؟!! شهالغيبه هاي

رد من ورى خشمه

- زين الحمد لله

حتى ماكلف نفسه وگالي شلونج !!

طلع بره وآني نظراتي تلاحقه

شويه جهز الغدا طفينا البلاي وإجتمعنه ع السفره بيت جدو مسوين دولمه وعازمين خالاتي كالعاده إستقبال لصفاء

بقيت أكل بشراهه ميته جوع تقريباً بـ3 العصر صبوا الغدا لان متعودين يگعدون متأخرين وآني چان دوامي صباحي وممتريگه ف إجيت ميته جوع عبالك إن*ديت ع الأكل ونسيت النظرات التراقبني

حتى ذبيت الخاشوگه وبقيت آخذ أصابيع دولمه واعض بيهه اتذوق بطعمهم إذا بخاشوگه مااحس بيهه دولمه الا بأيدي اكض الاصبع واكله

كلهه تاكل بإيديهه لان هيَ الدولمه بالايد تتاكل بس هوَ بخاشوگه ياكل !

إستمريت آكل وهوَ مركز بيه رفعت راسي شفته شلون صافن بيه

رفع حاجبه بحقاره وگال

- على كيفچ إيڤان الدولمه مطايره لاتغصين !!

هوَ گال جملته وآني صدگ غصيت بقيت أگح والكل انتبه عليه وصار هدوء بس يباوعون بيه واني شرگت بلاعيمي تجرحت استحيت كلشش يدري بيه استحي وخلاني بموقف محرج حقيرر حتى نفسي انسدت .

جدو گال

- إنطوهه مـي إنطوهه

شربت مي وراحت الغصه أباوع عليه يبتسملي بمكر عصرت عيوني وعگدت حواجبي وسويت وجهي مايگصه الطبر وگمت من السفره

هوَ أحرجني عمداً .

خليتهم وگمت رحت اغسل وهم شالو السفره وكلهه تغسل ..

من رجعت سمعت بيبي تسولف وياه تگله

- ولك صفاوي شعندك هناك بكربلاء خاف اخذتلك مريه واحنه ماندري

- لا بيبي شنو هذا الحچي اذا اخذ مريه غير إنتي اول الحاضرين

- يمه منك شاكه بأمرك

ضحك هوَ وآني إجتني فكره تتهلهل

ركضت جبت شال من مالاتي الببيت جدو لان ملابسي كلهه ببيتهم مااخذهن وياي ترست الشال عطر نسائي من عطري وركضت بيه لغرفته

رحت لملابسه الوسخه حتى من يغسلون ملابسه ينكشف دحسته وردت اطلع تفاجئت وبقيت متبسمره بدخوله المباشر !!

وجهي إنخ*ف ورجليه گامن يرجفن من الخوف !!

وجهي صار قوس قزح من الالوان إبتسم بمكر وتقربلي

- شتسوين بغرفتي (ويغمزلي ويحرك بحاجبه)

- آآآآآ

بقيت امتمت مااعرف شأحچي

- آآآآ مااسوي شي

بقى يتقرب عليه وآني أرجع لوره لما أنلزكت بالحايط رجليه گامن يرجفن ونفسي يصعد وينزل نظراته جريئه حيل شالي چان نازل بأهمال وطالعه رقبتي وهوَ نزل نظراته على رقبتي مباشرةً لفيت رقبتي بالشال ..

سحبه مني بكل قوته باوعتله مصدومه !!

وعيوني دمعت .. شيريد يسوي ؟!

يتبع ....

توقعاتكم حبايبي ؟

الـعـبـاديـه??