رشفة عشق

البارت الثالث

الـسـلامُ عـلـيـكـم??

رشفة عشق

الـعـبـاديـه

البارت _3_

إسمي صفاء عمري 24 سنه أمي مطلقه وأبوي متزوج . من أمي تطلقت ماقبلت تاخذنه آني واخوي بقينه عند أبوي شهرين وأخوي هجّ من مرت أبوي والتوزوز والض*ب والاهاين بقيت بس آني مجبور أتحمل أي شي يصير بيه .

كربتني كراب وولدهه يشربون جكاير يجي ابوي يشوف الگـطوف يگلوله صفاء يدخن وينزع الحزام ويراويني النبي عربي حتى گمت مااتأثر من گد الض*ب الاكلته بحياتي .

مليت وقررت أطلع منهم رحت لكربلاء أشتغل بدون علمهم خليتهم ينامون وطلعت بسريه . بس تفاجات بعد شهر اجه أبوي جرجرني وگطعني بالض*ب وآني رجال !

كلبچني بكلبچات خاف أشرد !! بيومهه چان عدنه بيت خالتي أم إيڤان كلش حزت بنفسي شلون من يض*بني خالتي تدافعلي وتصير مقابيلي وإيڤان تبچي خاتله بظهر امهه خايفه ..ماعدهم شخص يض*ب شخص .

عائلتهه مثقفين ومبنيه ع التفاهم والتحشيش وشخصياتهم مرحه وحلوه بسرعه ينحبون چانت علاقتي مو هلگد بيهم بس من عشت ببيت جدو عرفتهم ..

المهم بذيچ الليله كلبچ إيديه بكلبچات ونومني بره بالممر اليم الحمام !! والدنيا بنهاية شهر الـ1 تگص گص من البرد الليل كله ارجف قررت افتح الكلبچات بقيت ادور على شي ينجيني لما رحت قربت يم البوري المأسس للتواليت گعدت يمه وبقيت افل بالبرغي المثبت التأسيس تقريباً من المغرب لليل اني افتح بيه لان ضابينه قوي

دخلت إيڤان للممر وآني سويت نفسي نايم تقربت يمي شاف*ني شكلهه مرعوب مني وخايفه بوقتهه چان عمرهه 13 سنه فتحت عيوني وهيَ شهگت ونزت .. إيديهه رجفت ورجعت لوره .. أشرتلهه تسكت وگتلهه جيبيلي ذاك البرغي

ابتعدت خايفه ومبرطمه من الخوف

- أخاف منك

ضحكت على تفكيرهه

- بابا ماآكلچ بس جيبيلي هذا البرغي حطي بإيدي من وره

بقت تتقرب شويه شويه وعاگده حواجبها تريد تبچي

- شتسوي بيه؟؟

بنفاذ صبر

- چؤ چؤ أستغفر الله

أريد احُك ظهري بيه يحكني

- آني احكه الك خف يتلوث من البرغي

خبلتني بفهاوتهه عصبت عليهه وخزرتهه

- جيييبببي اگلججج

إيديهه رجفن وفزت مرعوبه

ركضت جابته وهيَ ترجف تفاجئت بطفولتهه وحركاتهه البريئه رغم هيَ بالغه وعمرهه بوقتهه 13 سنه !!.. الي بعمرهه تلگاهه شوكحاتهه وتعرف كلشي وصلفه ماتخاف بس هاي شنو !؟

حطت البرغي بإيدي وگتلهه

- مو تگولين حچيتي وياي تره آني شبح وإذا حچيتي لاأحد اطب براسچ

بقت تبچي وشردت مفزوعه تصيح ماما ماما

متت ضحك بوقتهه اريد اسكت ماكو

راحت تريد تدخل جوه لاامها

صحت بيهه

- ولچ چذب چذب ههههههه اقشمر بيچ شكبرچ وعبالك طفله هههههههه خرب يومج منين طلعتيلي هههه

خلتني وراحت

سوتلي فضل چبير من انطتني البرغي مباشرةً دخلته بفتحة المفتاح مال الكلبچه وفريته انفتح گبل ذبيت الكلبچه وتسلقت الحايط ومن سطح لسطح گدرت أشرد

بعد اسبوع

وهم جابني أبوي لان معارفه هواي وموصي السيطرات عليه وهمَ أصدقائه وبقيت على هـٰذا الحال أشرد ويجيبني ..

الا ان قررت استقر بكربلاء واسد حلگه بكم ورقه وفعلاً اشتغلت بكربلاء بالتحويلات والسيارات كرف فلوس كل شهر راتبي 400 ألف واكثر شهر يزيد وشهر ينقص مرات يوصل 900 وحتى مليون لا آني شغلي مشهود عليه نادر كلش والسياره افصخهه تفصيخ ف دائماً يكافئوني ولحد الآن ماكو شغله مااشتغلتهه خبير بجميع المجالات

وآني بس نفر كلش زايد عليه المكافئه انطي لاابوي كل شهر ورقه حتى يفك مني ويعوفني بحالي ومرتاح كلش بالشغل كاضيهه ونسه

بس من أرجع لااهلي مااحب أبقى عدهم گمت انزل بالسنه شهر .

ألا أن نزلت شهر ببيت جدو ولگيت بنيه عدهم شنو الجمال والنزاكه والبياض اويلي كلش عجبتني سألت جدو گال هاي إيڤان !!!

تفاجئت معقوله !!

عفتهه طفله شسواهه هيچ ؟!

بعدين تذكرت البنيه بسرعه تطگ وتكبر مو مثل الولد

شكلهه يخبل وبوجهه براءة طفله

حواجبهه ثخان وبُنيّات وعيونهه جوزي فاتح ناعسات وبالنهايه مجرورات .. رموشها كثيفات وجمالهن طاغي على وجهه الابيض .. وشعرهه كلش طويل بلون عيونهه رغم ماتطلعه گدامي تلبس شال بس دائماً المح گصيبتهه نازله لأاعلى أفخاذهه خشمهه مسطره منحوت نحت .وسيقانهه بيض والجسم گطن . وبرقبتهه شامه غير عذبتني شلت حالي هالشامه وهيَ رقبتهه بيضه والشامه سوده طالعه تلالي ويه جمال رقبتهه .. والمصيبه دائماً تلبس گلاده ناعمه تنزل ع الشامه گوه اسيطر على روحي ومااگرطها ..

چـا والخصر يكتل .. أكبر عملية نحت ماتسوي مثله خبلتني وتفرفر گدامي مثل الحمامه وهيَ بيضه كلشش إسمٌ على مُسمى صدگ چنهه كرديه بس هاي مو فاهي جمالهه هـٰذا الجمال جنوبي أصيل .

عشگتهه حيل .. وعشگت روحهه المرحـه وسوالفهه وضحكاتهه يرنن بإذني والنونه البأسفل حنچهه (فكها) تخبل محفوره بتفُنن خُلقي ..

أشوف ميانتهه وي عباس اتمنى اصير بمكانه وهيج تحچي وياي بعدين قررت آني ا**بهه إلي وأتدخل بيهه وفعلاً نجحت بَهـٰذا الشي لدرجة گامت تسميني السجّان صح اضوج من تصيحلي بيه بس أفرح بنفس الوقت جمالهه مايستحق أحد يشوفه غيري ...

حبستهه حبس للباب ماتطلع وآني موجود هـٰذا غير شقانه وضحكنه حفظت كل تفصيل بشخصيتهه وشنو تحب وشنو تكره ..

هيَ الشخص الوحيد الثقيت بيه طول حياتي دائماً أأمن عدهه موبايلي ومحفظتي وملابسي كل تفصيل بحياتي عدهه وتعرفه واحاسبها وتحاسبني عادي أعاملهه مثل مرتي بس هيَ ماتحس أبدد !.. ماخذتهه من باب الاخوه واني اتخبل من تگلي مثل اخوي ..

مقرر بس استقر اخطبها واخليها صدگ تصير مرتي ..

...............................................................

إيڤان ..

بقى يتقرب عليه وآني أرجع لوره لما أنلزكت بالحايط رجليه گامن يرجفن ونفسي يصعد وينزل نظراته جريئه حيل شالي چان نازل بأهمال على رقبتي وهوَ نزّل نظراته على رقبتي مباشرةً لفيت رقبتي بالشال ..

بسرعه سحبه مني بكل قوته باوعتله مصدومه !!

زجرت بيه بتلعثم ورجفه بصوتي

- شبيك صفاء؟

المسافه إنعدمت بيناتنه لزگ بيه لزگ وشفته دنگ على رقبتي يريد يبوسها !!

تخبلت دفعته ماگدرت عليه كلش قوي وأضخم مني قيّد إيديه بحركه من إيده حسيته تخدر ومتنوم مغناطيسي وعيونه مسبله وبس يشتنشق بعطري همس بذوبان

- بس خليني أبوس الشامه !

ضليت ارجف مثل السعفه ودموعي صبت وآني أشوف هـٰذا منظره أبد متوقعته هيچ !!

ض*بت على ص*ره بكل قوتي

- لك صفاء اني عرضك وخر عني لااصرخ

رد مستهزأ

- هـه إحنه حرام وعباس حلال لازم مايعجبچ بوسنّه .

عاد جربي وشوفي إذا ماطلبتي يوميه بوسه فلا اتسمى صفاء (ويغمزلي)

- لك وخر عني حقيرر ماتستحي

دفعته قوي اندفع ويضحك

ابتعد عني وگال بخبث

- تره بإرادتي ابتعدت مااريدج تاخذين عني نظره مو حلوه ومااريد ألوث براءتچ وعبالج مااحكم نفسي لا يحلوه

خليته يضحك بمكر

دفعته عن طريقي وركضت لجوه خايفه ورجليه ترجف نفسي يصعد وينزل وألهث شعري مخربط ودشداشتي نازله وص*ري كله مكشوف وحتى شالي بقى يمه ركضت للحمام دخلت قفلت الباب وتكرفصت بالگاع ابچي على تصرفه كلش قهرني ماتوقعته هيچ ابدد !

خفت لاواحد يشوفني بهاي الحاله آني إلمن صعدت يربي صدگ لو گال المثل :-

(من حَفر حفرة لاأخيهِ وقعَ فيها )

غسلت وجهي وعيوني أخفي الآثار

وطلعت من الحمام صار بوجهي رمقته بنظرة إستحقار وكره هوَ ضحك بصوته الجهوري مستهزأ بيه وبإيده شالي !

تقدم عليه ووجه ايده إلي.

- هاچ هـٰذا شالچ غطي بيه رقبتج خاف يطلع أثر ولو آني مابستج وشفيت غليلي بالشامه بس ميخالف الستر حلو ..

ويخزر بيهه ويعض بشفته !! ويسبّل بعيونه

خزرته بنظرة حقد وكره ..

خليته واگف ورحت مهروله للغرفه البيهه غراضي رحت طلعت شال ولبسته بسرعه رحت لعباس نايم گعدته

- گوم وصلني لاأهلي

رد بصوت منعس

- أريد انام شعندچ موليه لاأهلچ بهالظهريه

- لك گوم باچر عندي امتحان صعب حيل گووم

- مـاا ... روحي لصفاء ياخذچ

سمعت إسمه فزيت بصوت باكي

- خب عباس والله راح ارجع وحدي گوم لاانعل إبو صفاء

حس بيه وگعد هوَ وخزرني بعين ونص

- شمسويلچ صفاء ؟

تلبكت وتلعثمت بالحچي وجهي شحب وگام ينطي ألوان

- شمسويلي يعني ؟

شحده يسويلي غير يحسب إمه ماجابته !

- الديچ والدجاجه مبينين متناگرين وإذا يطلع صفاء كاتلج أقبله بجبينه ههههه

- شحده غير

- هههه ديلا يلا گومي لاتتفلسفين براسي طارت النومه

طلعنه آني وعباس وصلنه لباب البيت لگيناه گاعد بالباب ويدخن !! شافني ضحك بصوت عالي متقصد يسمعني !!

همست (وسم) بس هوَ سمعني إجه يركض

- شگلتي؟

- گلت وسم عندك مانع؟

- مانع مال حمل !!

(ويغمزلي !!!!!)

تخبلت واتنرفزت حيل ردت الزگه راشدي اوگع سنونه بحلگه حقير شگد نذل وماعنده خجل

- وسم حتى سم حتى سم

رجع كمل كلامي عباس ضاحك

- حتى سم حتى سم حتى سم هههههه

بقوا يضحكون عليه وصفاء يمشي ويصيح (حتى سم) آني من حرگة گلبي كررت الكلمه وهمَ لزموهه عليه

خبلني بتصرفاته المفاجأه

وصلت للبيت أهلي كلهم نايمين لان الدنيا حاارره تفوورر

ركضت مهروله لغرفتي أول مادخلت إنهاريت بالبچي ليش هيچ ؟

وگفت ع المرايه تلمست الشامه الي برقبتي !

چانت الشامه بين العضمتين.. (تتوسطهن) وشكلهه كلش مغري حتى مرات اني اشتهي أبوسهه ..

بس اليوم خربت كلشي

بسببهه بعد مااحچي ويه صفاء بحياتي

بقيت افرك بيهه ومنهاره

- روحي روحي روحي مااريدج وليييييي

گعدت بالگاع وابچي وأض*ب على الشامه مواقفنه كلهه مرت على بالي مثل الشريط وآني أتذكر من يگلي (بحياتي ماا**ر خاطرج)

أتذكر ...

مره من المرات شفته يكنك بموبايله ورموشه كثيفات طاغيات على عيونه الخضر وطاخات بحواجبه اني شفتهن إشتهيت أحطلهن مسكارا

جبت المسكارا وتقربت منه وآني أبتسم بمكر

- صفاوي أبو البلاوي شوفف

رفع راسه من الموبايل مستغرب وعگد حاجبه

- شكو شنو هاي؟

- مسكارا

- چـا شأسويلهه ؟

تدلعت بصوتي ورققته وحوّلت ملامحي إلى طفوليه وبريئه

- خل أحطلك !!

هوَ فتح عيونه لما طخن رموشه بحواجبه خزرني وصاح بيه بصوت عالي

- ماتستحين مو رجال بگد التيل شنو مسكارا اني بنت ؟ شكالولج عني مخنثثثثثثث

برطمت بشفتي لان عيط بوجهي ودمعتي صبت هوَ تخبل بقى حلگي يرجف واحچي بصعوبه ودموعي تتساقط

- وشبيك تصيح احچي حچي ديلا ع الاساس ميته على رموشك . هـاا وع الاساس مات**ر بخاطري بحياتك بس خوش هسه **رت بخاطري !

تقرب يمي مسح دمعتي براحة اصبعه طفرت من يمه

- انتي ماتفهمين عيب عيب تعرفين شنو عيب الرجال يحط مسكارا ؟!

حولت نظراتي توسل وبراءه

- والله أعرف قابل راح تطلع بيهه للشارع هوَ بس آني أشوفك بيهه وبس اگصلك صوره انزلهه ستوري بالانستا مالتي عود عيوني واني امسحهه الك بأيدي وأصلا هيَ الم**ارا فارغه بس امشطلكياهن حباب صفاء اول مره اطلب منك شي وتردني

خزرني وعگد حواجبه

- لا

برطمت بشفتي وزعلت ع الاساس گتله .. خوش كلشي أريده تسوي ومات**ر خاطري ! هالمره **رت خاطري ووعد الحر دين وانت رجال والمفروض وعدك بالمكان ولازم مت**ر خاطري

نفخ واستغفر بنفاذ صبر

- صحيح كتلج ماا**ر خاطرج بس مو تستغليني إيڤان اني رجال تره والمسكارا مال بنات

- اي اعرف والله بس اشوف رموشك وين يوصلن وامسحهه بأيدي

رمشت بعيوني بتوسل وببراءه

بس لات**ر خاطري حبااب صفاوي

بقى يفكر ويعصر بإيديه ويفرك بأصابعه لما تعصب وبقى يرمش بعيونه وصاحني

- حطي بسرعه وگصي الصوره وانتي تمسحيهه وإذا طلعت بيهه كحل وچذبتي عليه اموتج بس تمشيط

گمت أكمز من الفرح

- لا مابيهه مابيهه

چذب اصلاً هيَ المسكارا جديده ! هههههيو خل اقشمره

تقربت بميل المسكارا وهوَ ملتهي يراسل وآني حطيتله بس عين وحده مقبل للثانيه. . من تقربت يمه حطيت المسكارا أنفاسه لفحت بوجهي خلت كياني يتخربط . وهدوء بس إحنه بالصاله وهوَ من تقربت أحطله عاف الموبايل وضل صافن بعيوني لبكني وبسرعه وخرت حتى ماطوختهه مثل ماچنت مخططه

رموشه تعدن حواجبه طلع شكلهن يخبل ركضت صورتهن وخليتهن ستوري ع الانستا

هوَ زجر بيه وعصب حيل بس چان مجبور عن لا ي**ر بخاطري !

- يلا مسحيهه

رحت جبت مي وقطن امسح متوگع يبوو خليتله ضد الماء هههه شلون بيه گتله

گتله بخوف ورافعه متوني ببراءه

- صفصف متنمسح

طفر من مكانه وفك عيونه بحيلهن

- شلوووون؟؟

حولت ملامح وجهي لبراءه

- طلعت ضد المي

- اعدمج هسه اذا صدگ

- والله

ركض وراي واني اركض ..

ألهث وصاعده فوگ التخم هاربه .. وهوَ يريدني أنزل ينتقم مني .

- عندي طريقه والله هسه ابحث ع النت واشوف شلون تنمسح

- إيڤان إذا ماانمسحت ويلج وسواد ليلج والله اخليج تتندمين بس مو صوچچ صوچي آني اگول مااردلهه طلب وخليهه براحتهه

رديت بنبرة خوف

- ان شاء الله تنمسح

رد بعصبيه وصوت عالي ويشنر بإيديه تخبل

گال بأصرار ونبرة تهديد

- ماكو انشاء الله تنمسح وانتي تمسحيهه بأيدچ

بقيت ارجف شلون بيه اذا ماانمسحت يموتني والله حتى المنظف مالتي مخلص ..

رحت طلعت ع النت طريقة إزالة المكياج وطلعلي بالزيوت جبت زيت الزيتون وفركت رموشه بيه ووگعت المسكارا اخيراً هوَ صفن عليه وآني امسح برموشه

- حمدي ربچ انمسح

- والله خوف*ني الله لاينطيك

خزرني ورفع حاجبه

- هاي زادهه فوگ ماخليتچ تحطين اگول ماا**ر بخاطرهه يارجال يقبل تسوين السويتيه اليوم ؟

سكتت صدگ محد يقبل واليسويهه يگولون مخنث بس تفاجئت من قبل عن لاي**ر بخاطري گلت هسه يطيرني براشدي يخلي راسي معوج شهرين بس الحمد لله طلباتي اوامر احممم احممم

...............................................................

بقيت أتذكر بمواقفه وحنيته ولهفته وابچي ماكو مثله ابدد بحياته مرفضلي طلب اصعب الطلبات يلبيها وكلساع ازيد بالبچي إلا أن غفيت ماحسيت بنفسي بعد

ً...........................................................

صفاء

أغار عليهه كلش حتى من الهوى اليلاعب زلوفهه أغار منه

بس عباس چانت علاقتهم إخويه والكل ملاحظ هالشي وحتى آني ماچنت أغار منه لان هيَ معتبرته أخوهه إلى أن شفته مدنگ على رقبتهه آني شفت بس ظهرهم مااعرف شچانوا يسوون !

جناني كاد يطق والعصبيه صعدت براسي فول الشياطين گامت تتراگص فوگ راسي تخيلته شلون يبوسهه بوسط الشامه الحاط عيني عليهه تموت كل مااشوفهه أتوسل بروحي مااروح ابوسهه من الشامه حييل حلووه

من شفتهم بهـٰذا المنظر مافارق بالي ظل طابع ببالي ليش بس لـعباس ؟ وآني صارلي شگد احاول أبين حُبي ماتحس ؟

كلساع أتعوذ من الشيطان بس ترجع الافكار السوده تدور براسي وأگول لا مستحيل إيڤان تسويهه وأفكاري تخربطت قررت أغيب عنهم غبت 5 أشهر ماشفت الراحه أبدد..

لما قررت أرجع نزلت وصعدت لغرفتي گعدت الظهر ولگيتهه تلعب بلاي هيَ وعباس الشيطان گام يطفر فوگ راسي شكوكي يوم بعد يوم تزيد ..

شفتهه صعدت لفوگ ركضت وراهه دخلت لغرفتي .. اني مباشرةً دخلت عليهه ..

وجهه گام ينطي ألوان وإرتبكت بقت ترجع لوره وآني أتقدم عليهه انلزگت بالحايط ولامهرب مني ..

الشال نازل والشامه طالعه تنومت مغناطيسي أريد اشيل عيوني منهه مااگدر هلال بوسط سما .. رقبتهه بيضه گطن تلالي من الصفاء والنقاوه حتى بيهه نضاره والشامه اخخ يالشامه خبلتني گاعده بين العظمتين والاغراء المسويته يكتل ..

ردت أبوسهه بيهه ودفعتني قررت اليوم لو آني لو الشامه !

بعدين من بچت تذكرت نفسي اني شسويت ؟ اني أحبهه الهه مااحب غريزتي !! شگد نذل اني ؟ بآخر لحضه من كالت عرضك تذكرت لان فعلاً فقدت بجمالهه واني مااريدهه تخاف مني ولااريدهه تفكر بيه غير تفكير بس اليوم الشيطان چان اقوى مني !!

ماگدرت اتنازل واعتذر وتگول ماسيطر على نفسه ضليت احرگ بيهه حسيتهه تريد تنفجر ..

شالهه بقى يمي شميته حيل خليت كل ذرة عطر تتخلخل بريتي ونزلت الهه طلعت من الحمام حالهه حال شصار بيه گلبي انمرد مرد شسويت آني كل البنيته سنين ضاع بمجرد حالة ضعف بسيطه اخخخ ياصفاء اخخخخ شلون بيه ويه الشامه كله بسببهه لو مغطيتهه لو ماصاعده لغرفتي !

ولـ(لو) زرعوها وماخضرت .

إستفزيتهه بضحكي ماتت من القهر ..

راحت والدمعه بطرف عينهه وعيونهه النعسانات الباكيات مايفارقن عيوني اريد انتشل صورتهن ماكو ..

لليل وهاجت عليه المواجع وآني اتذكرهه شلون تفرح من نسوي مهمه سريه من عمليات النصب والاغتيال على عباس ونبوگ منه البقلاوه بنص الليل ننزل جوعانين اني ابوگهه وهيَ تتولى عباس تراقبه خاف يگعد

وهوَ يگعد الصبح يلگى غرفته مكنوسه من الأكل وآني وياهه نسوي رواحنه فقره ومساكين بس من يطلع نشبع ضحك الى أن نكشفنه وبعد عباس گام يقفل الثلاجه هههه

نبقى نطگ راس براس من جوع تالي الليل اخر شي تنكرب هيَ لو تسوي سبكتي لو تسوي محروگ إصبعه ومرات تمن أحمر ناكل وكل واحد يروح يلف راسه وينام وهاي صارت عاده گمنه ماننام اذا ماناكل ...

بقيت أكل بروحي الليل كله واني اتذكرهه شلون تتمايل گدامي وأخذت عقلي

اوف ياربي أخابرهه ؟

شي اكيد كارهتني ع الرعب العيشتهه بيه اليوم خل أكعد واسكت احسللي ..

بقيت الليل كله سهران اتذكر بمواقفنه واتذكر شكلهه من طلعت من الحمام شلون مهبوطه وخايفه تتراجف مثل السعفه !

بقيت للصبح جكاره تجر جكاره لما خلصت 7 بواكيت يلا طلع الصبح ..

قررت أرجع لكربلاء وبعد مااخليهه تشوف وجهي بلكي تنسى الشافته مني ..

لفيت ملابسي كلهه وسفطتهن تفاجئت بوجود شال نسائي !!

شميته بيه عطر إيڤان !!

رجعت أشم بيه .. أي والله هذا عطر إيڤان أعرفه لو مية عطر أميزه منهم

زين شيسوي بملابسي الوسخه ؟

إستغربت حيل معقوله من صعدت ذاك اليوم هيَ حطته ؟

زين شنو مصلحتهه إذا حطته ؟!

بقت فكره تجيبني وفكره تاخذني واني لليوم ماعرفت بذاك اليوم المشؤؤم شتسوي دخلت لغرفتي !؟

ضل هـٰذا السؤال ببالي أسال نفسي بيه وماالگه جواب

يتبع .....

الــعـبـاديـه??

الله يساعدك صفاوي ع الشامه اني شفتهه الصراحه تخبلت كلش حلوه ???