رشفة عشق

البارت الرابع

هالمره بارت حقيقي ?✌?

الـسـلامُ عـلـيـكم??

رشفة عشق

الـعـبـاديـه

البارت_4_

صفاء

قررت الصبح قبل ماأطلع لكربلاء أروح أستفسر منهه شالهه شيسوي عندي ؟!

بقيت منتظر الصبح على أحر من الجمر صارت الساعه بـ8 ركضت لبيتهم لان دوامهه بالـ8 ونص أول ماوصلت لگيت السايق ببابهم وهيَ بعدهه تبدل مديت راسي من الجامه سلمت ع السايق وگتله إيڤان ماتروح اليوم . صديقتهه گالت:-

( لا عيوني هسه تجي )

السياره كيه چانت متروسه بنات بس كرسي إيڤان فارغ

خزرتهه ورفعت حاجبي وهيَ تطگ بعلچهه وتباوعلي بإبتسامه صفراء ضحكت مستهزأ وگلت للسايق (روح خويه روح)

هيَ طفرت (داگولك إيڤان تروح وتوني خابرتهه گالت إنتظروني)

مبين شكلهه مو راحه وتحب تستفزني گلتلهه بأصرار وعگدت حواجبي متفاجأ من جرأتهه

- وآني أگلچ ماتروح

عوجت حلگهه وگالت

- إنتَ إبن خالتهه ؟

رديت بنفاذ صبر وضاغط على سنوني

- أي

- زين عباس لو صفاء ؟

عصرت عيوني بنفاذ صبر وضغطت على مخرج الحروف

- صصففاااءء

رمقتني بنظرات مافهمتهن وهمست :-

(مادام السجّان يعني خل نروح)

خزرتهه وردت احاچيهه گالت للسايق (حرك)

حرك السايق وشخطت سيارتهم من يمي بقيت صافن !!

طلعت إيڤان من الباب شاف*ني واگف والسياره مموجوده !

صفنت بيه وگالت (السياره وين؟؟)

قوسّت حواجبي ورفعت متوني

- ماأدري

بقيت صافن عليهه وعلى لبسهه شنو الجمال هاي الخلقه الواحد يتصبح بيهه مو بوجه عباس اتصبح بيه يوميه .. لابسه فستان طويل ماروني وشال ماروني ومخليه حمره خفيفه حمره وشادو أ**د وماروني مازجتهن ببراعه ..

بقيت صافن عليهه وهيَ عصبت حيل وعيونهه نطن .

- صفااء السيارره وين ؟

سويت نفسي بريء وفقير

- زين آني شعرفني ! يمكن راحوا !

بهاللحظه إتصل موبايلهه ردت وصفنت عليه بنظرات كلهه غضب وحقد رمشت بعيونهه ساجنه الدمعه لاتنزل .. عصرت شفتهه حيل

وهمست

- محد غيرك دمر حياتي !!!!

خلتني واگف متفاجأ ودخلت وسدت الباب بكل قوتهه بوجهي ! . تخبلت ركضت ع الباب رگعته ترگع بقيت أدفر بيه برجليه بكل قوتي

(افتحي إفتحي ) ركضت فتحته . خايفه شكلهه مرعوب

عگدت حواجبهه بغضب وعصبيه گالت بعياط

- شبيك وسم .

تخبلت من كلمتهه وتجاوزهه رفعت ايدي وطگيتهه على حلگهه بكل قوتي ..

شهگت وضلت متفاجئه ودموعهه صبن

لزمت مكان الض*به مصدومه وعيونهه ألف علامة إستفهام !

زجرت بيهه بعصبيه

- تجاوزتي هواي وآني ساكت . وإذا اسمع هاي الكلمه بعد أشگ حلگچ !

شهگت بكل قوتهه ونفسهه إنگطع ..

شفتهه طگت دم ! وبقت تسحب أنفاسهه بهدوء مختنگه

گامت تسحب هوى بسرعه وفحطانه ودموعهه تصب وتشهگ تخبلت گلت ماتت !! غمضت عيونهه وداخت تريد توگع ..

ركضت عليهه تسرسحت بين إيديه !! وبس تشهگ وتسحب نفس ! أض*ب على خدها أريدهه تستعيد وعيها ماكو ..

إجت خالتي وخالي يركضون شافوهه بحضني وهـٰذا حالهه كلهه وجهتلي نظرات الإتهام وتخبلوا

إجه خالي يركض شالهه من بين إيديه

- شبيهه؟

بقيت امتمت وإرتبكت شأگلهم ؟

- مـاادري

عاطت بيه خالتي

- صفاء شنو ماتدري بس إنتَ هنا وتوه الباب سمعناه تفلش بس چنه نايمين ماندري

غلست بسرعه وكلتلهه

- خاله إختنگت خل ننقلهه للمستشفى وبعدين نتفاهم

خالي راد يشيلهه ماگدر لان ضعيف ورجال چبير ردت الگفهه منه ماقبل وگال ..حرام تلمسهه ..!!

من گال هيچ گلبي وگف زين لو يدرون اني البارحه شسويت بيهه يمكن يدفننوني ع الرعب العيشتهه بيه وهيَ مدللـة أبوهه !

صاح على خالتي

(روحي گعدي رائد بسرعه بنتي راح تروح مني)

ركضت خالتي تصيحه

طلع رائد نعسان وبس بالشورت شافه خالي تخبل عصب عليه (لك انتي غ*ي هيچ ترووووح للمستشفى ررررووووح بدل )

راح يبدل والغطه غطه بعد ماطلع بسرعه التفت عليه وگاللي ..

- صفاء شيلهه بنتي راح تموت وهـٰذا لسا ماطالع

ركضت شلتهه لسيارتهم وخالي ساقهه وهيَ بحضني حتى خالتي مالحگت تجي ويانه

هيَ فقدت الوعي بعدما چانت بس تشهگ آني تخبلت بقيت ابچي عليهه شلون سويت بيهه هيچ !!

دموعي بقن ينزلن على خدها بعدين إنتبهت خالي وياي نزلت جوه الكشن أمسح بدموعي وارمش بعيوني أصبر بنفسي .. آني السبب ولازم أتحمل نتيجة أخطائي !! من ض*بتهه ماتوقعت لهالدرجه متتحمل ض*به ماعبالي كيكه بس أض*بهه تنثلم !

رجال مايهزني شي بس من شفتهه شلون فاقده توقعتهه ماتت وآني السبب إنهاريت وتمنيت بلحظتهه أگدر ابچي بأي وقت مثلهه ..هنيالهه على هاي بس .

خالي گال شممهه عطر وذب على وجهه مي وإنطاني بطل مي رشيت على وجهه ماگعدت !

طلعت عطر من جيب سترتي وضغطت براحة إيدي وشممتهه بدت تستعيد وعيهه.

بشرت خالي گال هاي أول مره يصير بيهه هيچ وصلنه للمستشفى نزلناهه بالطوارئ وحطولهه إو**جين فرحتي ماتنوصف بهاي اللحظه الحمد لله والشكر ربي ..

گعدت وبلش خالي بالاستجواب وهيَ مركزه عيونهه بالسقف بدون هدف تتلاشى شوفتي .

خالي

- إيڤان بابا شبيچ ياعمري

ردت بصوت نعسان ومتعب

- بابا لتخاف عليه مابيه شي

- زين ليش هيچ صار بيچ؟ وشلون؟

دارت وجهه عليه وصفنت بيه بعدين درات وجهه لاأبوهه .. كلت أكيد راح تفضحني وتگله هوَ سوه بيه هيچ دنگت عيوني ووجهي صار احمرر من التوتر .. بس فاجئتني من گالت ...

- بابا آني البارحه سهرت ع اليوتيوب أطلع معلومات للبحث ومن خلال تركيزي بالموبايل وتركيزي ويه البحث دخت وضغطي إرتفع وهم وسهرت للـ4 گعدت الصبح دايخه وراسي يأذيني گلت مااروح بس بدلت ومن إجه السايق دخت كلش وگتلهم روحوا ماأجي ف بعد تخربطت محسيت بشي

هوَ أشر على شفتهه ويشوف طبع الض*به !

- بس شنو هاي؟

وجهه خفت وشحبت ألوانه

حطت إيدهه ع المكان مستغربه ورمقتني بنظرة إحتقار وسوت نفسهه متعرف

- شنوو؟

- بابا حلگچ مجروح

- هـا ؟ مااعرف يمكن من تخربطت إنض*بت

سكت خالي وهوَ مامصدگ

خلص الاو**جين وطلعنه من المستسفى توجهنه لبيتهم دخلت للبيت وأهله تلگوهه بالاحضان والبوسات أُمهه حطتلهه مخاديد على القنفه الي بالصاله وتكتهه عليهن .. هيَ تمددت وبقت بس تباوع وهمَ يضحكون بيهه وتبتسم الهم بعيونهه النعسانات ومبينه تعبانه آني شفت مكاني غير مناسب بينهم وگفت وگلت لخالي

- يلا خالي آني أترخص ..

راح اروح لكربلاء وبعد ماارجع

التفتت عليهه وكملت كلامي گلت

-للأبد !!

الكل أستغرب وملامحهم تفاجئت ! ركزت على إيڤان أول ماگلت هيچ التفتتلي رغم جانت ملتفته لجهتي المعا**ه خاف تشوف وجهي وتتذكر تصرفاتي النذله ..

- شعجب ياخالو ليش ماترجع؟

ركزت بنظراتي عليهه

- ماكو شي يستدعي ارجع علموده !

- بس أهلك وأبوك وجدك وإحنه هم .

دنگت أفرك باصابعي وعصرت عيوني . أصعب لحضه عشتهه بحياتي

- لا خالي محد محتاجني بحياته وآني هم إن شاء الله مااحتاج أحد

اباوع عليهه وهيَ مدنگه تلعب بالاطراف مال الچرچف

- مودع بالله خالي مااريد اعترض بطريقك الله يوفقك

حضنت خالي حيل وشميته حيل حسيت بيه ريحتهه ودعتهم كلهم بس هيَ !

إلتفتت أريد أطلع من الصاله وكلت لااروح مامودعهه واتندم التفتت عليهه تفاجئت عيونهه تلالي بالدموع وترمش بيهن لفوگ ماتريد ينزلن الدموع ! حركتهه هاي حافظهه كلش زين .

عصرت شفتي متحسف وعفست وجهي گتلهه:-

- مع السلامه إيڤان !!

هيَ صفنت عليه ورجعت دنگت وهمست بصوت ناصي (مع السلامه) وشفافهه ترجف وكل شويه تاخذ شفتهه السفلى تعصر بيهه عذبتني بحركاتهه .

طلعت من البيت ماطايق ابقى لحضه تمنيت لو گايلتلي إبقى جان بقيت بس بعد ماأرجع ابد حتى هم تنسى تصرفاتي وهم ترتاح مني لان آني سجّان !

..............................................................

إيڤان

تفاجئت الصبح بوجود صفاء يم باب بيتنه والسياره مال الخط ماموجوده سألته سوه نفسه بريء بس إتصلت بيه صديقتي وكالت(السجّان طردنا !!) كلش تعصبت ونرفزته بكلامي متقصده أجرحه وطبگت الباب بوجهه بس متوقعته يض*بني أبدد !!

شفتي أذتني حيل ألم يكتل وطگت دم ومن گد ماإنقهرت النفس إنقطع وإختنگت ضليت أسحب بالهوى بكل قوتي اريد هوى يدخل بريتي ماكو ! بعد ماادري شنو صار ..

گعدت على عطره بسيارة أبويه وآني بحضنه إرتاحيت للوضعيه ورجعت غمضت عيوني .

هاي الحاله ثاني مره تصير وياي إذا انقهر حيل يصير هيج وياي اتذكر مره بالكليه هم إنقهرت حيل على صديقتي تزوجت مجبوره وتبچي وبچيت وياهه وتخربطت لما اشم العطر يلا أصحى ..

تلاشيت النظر من عنده ماحبيت أشوفه واتذكر مواقفه وياي بس فاجئني من گال بعد مأأرجع أبد !! خزرته بسرعه وهو هم چان مركز بنظره عليه يمكن يريد يشوفني شأسوي .. ومن گال مامحتاج أحد گلت بگلبي

(بس آني محتاجتك)

ماتوقعت يعاقبني بهاي الطريقه ويروح !! حصرتني البچيه بس أهلي عيب أبچي مقابيلهم !! وخصوصاً من ودع الكل بس آني ماودعني ! ليش؟ الدمعه تريد تنزل وأرفع راسي لفوك وارمش أمنعهه تنزل والعبره خنكتني گمت مااگدر احچي ..

لما التفت عليه وودعني إرتاحيت وزفرت نفس بأخر لحضه ردت أگله لاتروح بس أهلي ! ماگدرت ماعندي جرأه أگله هيچ

كلش تأذيت من راح وإحنه متزاعلين وهاي أول مره تصير دائماً مايطلع ويسافر لشغله إذا ماآني وياه متصالحين لو خامطين شي من عباس وضاحكين عليه ..

ترخصت من اهلي وصعدت لغرفتي مهروله دفنت راسي بالمخده وأطلقت الصرخات المكتومه وآني أصرخ (لااااتتترروووح)

تخبلت وجنوني طق ماتحملت يعوفني !

شلون بيه واتحمل فراگه وهوَ مشاركني بكلشي حتى باللفه الاسويهه الصبح أضمله منهه وأتذكره ومن اروح لبيت جدو أنطيهه اله ويگلي عفيه ترباتي تفكرين برئيسج ونبقى نتعارك اگلّه لاآني الرئيس .. وهوَ يگول لا آني .

علاقتنه كلش حلوه ..

كل موقف اتذكره أزيد بواچي آه آه ليش عاقبني بهاي الطريقه والله مااتحمل أفارگه لحضه هوَ من يروح لكربلاء كل دقيقه اتصل بيه وأسبوع يشيب راسه مني وينزل بإجازه . مو هسه مايرجع !!! عقلي ماجاي يستوعب هالكلمه شنو مايرجع؟ يچذب عليه أكيد يريد يقهرني !

بس هوَ قهرني هواي ! ومن حقي أقهره إذا ازعل لو أجرحه بس هوَ مايتحمل وآني أتحمل؟؟

بقيت أدعي ربي إنشاء الله يطلع چذب ويرجع مثل كل مره ..

قنعت نفسي ..إي أكيد يرجع وين يگدر يفارگ ولايته ..

مرن 6 أيام وباليوم السابع حضرت نفسي ولبست أرقىٰ شي عندي وهالمره خليت حمره جوزي مات (جاف) لان هوَ يحب هـٰذا اللون ..

رحت طايره من الفرح لبيت جدو لان هوَ مايجي لبيتنه يستحي دخلت الهم أشوف البيت هدوء وسكته سألت جدو ع** كل مره بيوم جية صفاء

- شنو جدو شبيكم ماتحضرون لجية صفاء؟؟

رد عليه وهوَ يقرأ بالكتاب ومركز عيونه بيه

- صفاء مايرجع بعد !!

آني ضحكت عليه وإستهزأت بيه

- ههههـه هم يله مايجي أعرفه هـٰذا صفاوي إذا مايجي يترس بطنه دولمه وبرياني من إيد بيبي مايرتاح لايقشمركم جدو بس آني اعرفه ترباتي هـٰذا

احچي بكل فخر واضحك عليهم كل مايگولون مايجي !

جدو رفع نظارته وباوعلي بنظرات تقنيع وهز راسه

-إيڤان حبيبة جدچ لاتنتظرين صديقچ لأن مايجي خاف من مايجي تضوجين فلا تنتظرين أحسن وين**ر خاطرچ

- هاي شبيك جدو إخوتي وأعرفهم عباس وصفاء حافظتهم حفظ على گلبي

هز براسه وجاوبني بصوته المرتعش

- بكيفچ جدو بكيفچ

صارت الساعه تركض ركض وكل ماتتقدم ساعه يزيد التوتر والخوف خاف صدگ مايجي !

وارجع اقنع نفسي لا لا أكيد يجي ..

صار الوقت الي كل مره يجي بيه . تقريباً الساعه 5 العصر .. بقيت مگا**ه الباب وگاعده أنتظره ومرت الساعه وهوَ ماكو ..

ماأيست رحت بالغرفه وأنتظره ..

صار الليل تعشوا وآني مادخلت لگمه بحلگي من الصبح لهسه منتظرته ناكل آني وياه .

كلت اكيد يجي بالليل لان أزدحامات وهيچ ..

وبقيت ع الدرج منتظره لان غرفته فوگ ف من يصعد الأ يگعدني يلا يگدر يصعد حطيت إيدي على خدي ومنتظره ..

والساعه تمشي وآني عيوني تلزگ من النعاس بس مقاومه .

ماحسيت على نفسي من غفيت ..

الأ من جدو گعد للصلاه گعدني گال

- گومي ياجدو گومي

آني بس اصيح

- امممم

- آني شگتلچ؟

مامتبهه عليه شيحچي لان نعسانه حيل ومغمضه عيوني وماواعيه شأحچي وصلني لفراشي وغطاني وطلع ..

گعدت الصبح الساعه بـ9 ركضت لبره لگيتهم بالصاله يتريگون بدون ماأصبح عليهم ركضت بلهفه مديت راسي عليهم

- هـا إجه صفاء؟

عاط بيه عباس

- خب إنتي والله بطرانه گلنالچ مايجي ليش تلحين ساگمه روحچ وسهرانه علمود ابو دماغ هلبت آني وياي هيچ شو بس فالحه تخمطين بيه وتقطين بيه هم

ضجت حيل

وحتى مايشكون رجعت لطبيعتي مرحه واسولف وأضحك جذب

- ديلا خل يولي يخفف علينه أصلا حتى تبقى البقلاوه مال عباس بس إلي من أخمطهه بالليل

- شحدچ غير أ**ر إيدچ

- دشوف هههههيوو

رجعت للبيت بخطوات كلهه يأس وقهر ليش ماإجه؟

مو إنتظرته هواي وآني للآن نعسانه بسببه وحتى مارحت للجامعه اليوم عود منتظرته يوصلني بالجارجر وأتفاخر بيهه مقابيل صديقاتي ..

هوَ يشتغل بالتحويلات ف يوميه سياره شكل إذا راقيه يوصلني بيهه بس إذا عاويه نتعارك آني وياه أگله(جبت هاي العاويه حتى ماتوصلني وتتهرب)

بس هوَ يحلف يگول مو آني أختار السياره همَ ينطوني بس آني لازم أغثه شويه ..

أتصلت بيه نبأ صديقتي المقربه تعرف كلشي عني حتى عن صفاء بأدق التفاصيل اسولفلهه وتگلي يحبچ بس آني اكلهه لا مو هيچ ..

بس تفاجئت ثاني يوم من بعد ماراح صفاء تگلي .. مبين ميحبچ ويريد يضحك عليچ ..

إستغربت كلامهه سألتهه:-

- شلون عرفتي؟

- مادام تقرب يريد يبوسچ يعني يحب جسمج مايحبچ إلچ والولد كلهه هيج مو بس هوَ !

- لا أبدد صفاء مو هيچ !

- چـا ليش سوه هيچ وياچ؟

- لا بوقتهه راد يغثني وي**ر خشمي لان شاف عباس يلبسني تراچي

- لج بابا هـٰذا حچي قنعي بيه روحچ ا****ر ميصدگه

- لا اصلاً إحنه إخوان وآني ماأحبه حب حب

- چـا شتسميه؟

من سئلتني هذا السؤال إحتاريت شاجاوب سألته لنفسي هواي وملكيت جواب !!

لو آني مااحب اعترف بالجواب؟/!

- مااعرف

خليتهه ومشيت أفكر بكلامهه صدگ هوَ مواقفه هواي من يتلمس إيدي ومن يگلي ادخلي وياي بالبطانيه وآخر موقف صدمني بيه !

إووف ياربي شأسوي والله محتاره كلهه تلومني ..

بس آني اشوف لهفته اكثر من غريزته ..

وبعدين هوَ ولا مره إعترفلي يحبني أو فد شي منين جبت هـٰذا الكلام ؟

رحت لبيت جدو ردت أخابره وأگله إرجع دخلت محد موجود بالبيت بس عباس رحتله

- هـا أبو راس

- عابتلج مثل الجني وين مااروح تلحگيني

- دطير ميته عليك بس أريد رقم صفاء

إستغرب وإنرسمت ملامح حيره بوجهه

- شتسوين بيه؟

ض*بته على راسه

- يعني اليريد رقم شخص شيسوي بيه؟

جاوبني عبالك مسوي إنجاز

- يخابره

- هههههههه شگد فاهي يلا رد الرقم

طلعت موبايلي ودخلت ع السجل أريد اسجل رقمه بس عباس ساكت رفعت راسه باوعتله

- شبيك ماترده

صفن بالحايط الوره ظهري إلتفت على الحايط عبالي شخص وراي أشرت بإيدي على وجهه

- هيوو وين وليت؟

- إيڤان عوفي صفاء بحاله !!

يتبع ...

الـعـبـاديـه??

حبايب تابعوا حسابي وسووا منشن لااصدقائكم حتى يصعد التفاعل وكلما يصعد التفاعل يكون النشر يومي البارحه لان تفاعلتوا اليوم نزلتلكم بارت اضافي ?