KABABANGON pa lang ni Agatha sa higaan nang makarinig siya ng katok sa pinto. Napatingin siya sa orasan, alas-singko pa lang ng umaga. Malamang na gising na si Manang Luisa ngunit hindi naman siya pinupuntahan ng landlady nang ganoon kaaga. Kunot ang noo na binuksan niya ang pinto, inaasahan na si Manang Luisa ang mapagbubuksan upang magulat nang bumungad ang nakangiting mukha ni Jaco.
“Good morning!” masigla nitong bati, pagkatapos ay basta na lang pumasok sa loob ng bahay.
Namilog na lang ang mga mata ni Agatha at napanganga. Pagkatapos ay sinundan ng tingin si Jaco na dumeretso sa kusina. Noon lang niya napansin na may bitbit itong mga supot. Pinuntahan nito ang lababo at inilagay roon ang mga supot. Ilang sandali pa ay narinig niya ang pagbukas ng gripo.
Noon biglang natauhan si Aga
