MAAGANG pumasok sa eskuwelahan si Agatha. Hindi siya sanay na walang mga anak na inaasikaso sa umaga kaya naman kabubukas pa lang ng gate ay naroon na siya at nag-aabang kina Paulino.
Hindi naman siya gaanong natagalan sa paghihintay. Pinigilan niya ang sarili na tumakbo nang makitang palapit ang sasakyan ni Paulino. Pagkaparada niyon ay kaagad bumaba ang mga anak. Nakabuka ang mga bisig na sinalubong niya sina Xena at Yogo.
Mahigpit niyang niyakap sina Xena at Yogo. Kahit na dalawang araw lang sila nagkahiwalay ay labis-labis ang kanyang pangungulila. Tila napakatagal nilang hindi nagkita.
“Na-miss ko kayo,” aniya, bago pinupog ng halik ang buong mukha ng mga anak. “Nagpakabait ba kayo?”
“Inaway ako ni Yogo!”
“Bad si Ate, Mama!”
Kumunot ang noo ni Agatha sa sabay na pagsasalita ng d
