HALOS wala nang mahihiling pa si Agatha mula kay Jaco. Lubos nang napatunayan ng binata na kaya nang maging ama hindi lang kay Xena, kundi pati na rin kay Yogo. Palaging hindi lang nakatuon ang atensiyon ni Jaco kay Xena, sinisiguro nito na palaging kasali si Yogo. Maiintindihan naman niya kung mas paglalaanan ni Jaco ng panahon si Xena, ngunit labis pa rin ang pasasalamat niya na hindi nakakalimutan ng binata si Yogo. Malaking bagay ang nagagawa niyon para sa kanya bilang isang ina.
Pinilit ng binata na makarating sa Nutrition Day celebration ng eskuwelahan kahit na ibig sabihin niyon ay mahuhuli ito sa pagpasok sa trabaho. Nagpaalam naman daw si Jaco nang maayos sa general manager. Hindi pa dapat lumiliban nang ganoon si Jaco dahil bago pa lang, ngunit nais nitong tuparin ang ipinangako
