Katatapos ko lang maligo at magpalit ng damit na siyang ipinahiram na muna sa akin ni Aling Edna. Suot ko ngayon ang isang malambot na pajamas at blouse dahil matutulog na rin naman kami. Kasalukuyan na kami ngayong umaakyat ni Aling Edna rito sa hagdan para pumunta sa kwartong inihanda niyang tutulugan ko. Tanging ang bag ko lang ang bitbit ko dahil kinuha ni Aling Edna ang mga damit ko para mailaba ito, pinigilan ko na siyang gawin 'yun pero sadyang mapilit talaga ang ginang.
Ilang sandali lang ay nakaakyat na rin kami ng tuluyan sa itaas nitong bahay at kaagad na bumungad sa amin ang makintab na sahig nitong gawa sa tabla. Dalawang masikip na hallway naman ang makikita sa magkabilang direksyon, isa sa kanan at isa naman sa kaliwa. Sa gilid ng kanang hallway ay mayroong dalawang pinto,
