Nakahalukipkip lang ako ng mga braso ko habang nakasakay kami ngayon dito sa loob ng elevator. Katabi ko ngayon si Caresse na para bang binili na lahat ng mga bagong dating na mamahaling brand ng mga damit doon sa boutique.
"Kiara, would you mind?" narinig kong sabi nito habang inaabot sa akin ang apat na paper bags at para bang sinasabi nitong tulungan ko siyang magbitbit ng mga pinamili niya. Hindi na lamang ako sumagot sa kanya at kaagad na lang kinuha ang mga paper bags na ipinapahawak nito sa akin, pagkatapos no'n ay isang matamis at malapad na ngiti naman ang iginawad nito sa akin bago magsabing, "Thanks."
Nabaling naman ang atensyon ko sa harapan namin no'ng magbukas na ang pinto ng elevator, kaagad nang nanguna sa paglabas si Caresse kaya naman sumunod na lang din ako sa kanya.
