جنة فؤادي الجزء الثامن

1094 Words

جنة فؤادي الجزء الثامن الكاتبة زينب النجار #zainab_alnajar - تَظُن أنَّك لا تَفعلُ شَيئاً و لا تُثير انتباهاً ، و لكنّك تُثير الفَوضى في قَلبِ أحدٍ ما.. زبيدة بالليل اتصلت ب نيڤين اختي سولفنه عن صحة بابا اتفقنا ان تسويلي دعوة واحضر جوازاتنا واسافر عليها لكندا هناك نعالج بابا احسن ومنها نغير جو ونشوفهم.. بس ماگلتله لبابا گلت توصل الدعوه بالأول حتى ما يعترض خليت راسي على المخدة وشريط حياتي ينعاد امام انظاري .. بعدت كل تفكير عني وصرت اتذكر داليا وهي ماسكه ايدي ونفتر ونضحك اني وياها .. واتذكر سوالفها .. ورجعت تذكرت حمودي اخوها اشتاقيت اشم ريحته .. بس للأسف هم مو أولادي .، وكل عاطفة امومه بداخلي هم لازم اكبتها حتى لا اكون ذيج الحسودة الي تأذي الاطفال بنظراتها مثل ما تسوي زوجة حسام وتبعد اطفالها عني .. مسحت دموعي الدخيله عن خدودي الي ما اعرف شوكت نزلت .. حمدت ربي وشكرته وطلبت يحفظلي بابا ما اعرف من بعده شنو مصيري .. گمت صليت ركعتين لوجه الله حسيت براحه بعدها وغفيت حارث كنت طالع يم نزار بالليل اول ما دخلت امي تنتظرني وبأيدها كيس .. وداليا بنتي خايفة وعبالك كانت تبكي شبيج دلو حبيبي تعالي بابا جرتها امي وشمرت الكيس الي بأيدها علية .. هذا ترجعه باجر للخاتون.. مو عبالها بهاي السوالف تقشمرك وتقشمر الطفلة _ شنو هذا يمه والمن تقصدين _ ست الحسن الي كل مرة تارك واحد من جهالك عدها .. اسمع حارث.. اذا تفكر تأخذها اعتبر ماعندك ام .. وخلي تبطل هالسوالف ترى افضحها والله _ كافي يمه لخاطر الله .. هو شنو هذا وشصاير داليا تبجي وبصوت متقطع _ بابا خالة زبيدة اشترتلي نفنوف شوفه حلو يفر وحذاء كعب عالي وقراصات حتى البسهم بالروضة بس بيبي أخذته مني _ هاج اخذيهن وروحي نامي حبيبتي يمه شنو هذا الحجي لخاطر النبي .. مو عيب هذا الأسلوب .. اتقي الله لبنية محترمة وهواية يتمنوها وهي مو يم احد والله ياريت تقبل بيه من باجر اخطبها بس هي مامعتبرتني اكثر من أخ.. تحب الاطفال مابيها شي اذا اشترت للطفلة شئ تصيرين انتِ والزمن عليها _ المن تخطب يمه .. والله دسويها وشوف شأسوي .. هم عاقر وهم مطلقة وهم اكبر منك .. وشناقصك انت .. تروح ترجع مرتك اذا بالك مره وتريد تتزوج _ مرتي شنووو يمه وارجعها والله لو تبقى بس هي بالدنيا .. هم خاينة وهم تركت جهالها هي بالكذب ما تسأل عليهم .. لو تجي تبوس رجلي ما اريدها يكفي عمري كله وياها متحملها لخاطرج لهنا وبس _ جهالها اخذهم الها وتشوفهم دائمًا _ ومنو سمحلج تاخذيهم الها .. الله اكبر ياااارب رحمتك بيه يمه ليش هيج تهينيني .. اياج تاخذيهم مره ثانية واذا عرفت اخذيتهم الها صدگيني ما ابقى بالبيت لا اني ولا جهالي عفت امي واصعد الدرج واسمعها تحجي تكول بعدها ماطبت البيت وهجمته وبسيطة وشوف شأسوي .. تعبت من امي وصدگ قهرتني .. هيج مايهمها كرامتي الي سوته بيه دينا مو قليل .. حاولت انام بس احس نار براسي وروحي موجوعة اكثر من جسمي .. جبت داليا وحسوني يمي بالفراش خليتهم .. بقيت حاضنهم ومقهور عليهم وألوم نفسي لأن اجوي للدنيا وهاي امهم جان لازم اختار ام بيها خير .. تركتهم ونزلت جبت حمودي من غرفة امي جانت نايمة واخذت الحليب حتى اخاف يگعد .. احس اريد افتح ص*ري واضمهم ثلاثتهم .. ما ادري مقهور عليهم اكثر لو على نفسي .. غفيت وحمودي بحضني .. حسيت تقريب ال الستة يناغي حبيبي ومطلع ايده بدلت ملابسة وسويت ممه.. اريد انا اعتني بي اتعود ليش بس على امي هذا ابني .. ساعة ورجع نام .. غسلت وغيرت ملابسي الي طبعاً اني اكويها واحضرها لان حضي مو مثل كل البشر .. جيت انزل وسمعت صوت اختي سجى وزوجها واطفالها سلمت عليهم وعرفت زوج سجى عادل ابن عمي منقول لبغداد ومقررين ينتقلون هنا وحاليا راح يبقون يمنه .. ارتاحيت نوعاً ما سجى طيبة .. وزوجها انسان راقي وهم شوية تهتم باطفالي .. سألتني امي على حمودي .. كلتلها نايم فوك ترخصت وطلعت للدوام حتى بدون ما اكل شئ احس جبل هموم جاثم على ص*ري شوكت ارتاح!! .. وصلت من وكت .. بعد قليل موضفين جايين .. اخذت باكيت الجگاير ادخن واگف قرب الشباك وراسي مرجعه على الحايط .. اباوع على الگراج الموضفين يدخلون .. يمكن كل وگفتي انتظرها تجي .. استمتع بشوفت وجهها ومشيتها وضحكتها وصوتها الحنون .. شوكت حبيت كل هاي تفاصيلج زبيدة .. شفت سيارتها وگفت بالگراج اي اجتي .. بس هاي منو مرأة لابسة عباية تقربت منها تحاجيها.. كأنها كانت تنتظرها .. وجه زبيدة مقابيلي بس المرأة ضهرها عليه .. زبيدة خلت ايدها على وجها والمرأة تأشر بأيدها وشايله كيس من حركاتها تبين عصبية .. شالت الكيس دفعته بوجهه زبيدة ودارت راسها تروح اكو ت**ي كان ينتظرها .. من اندارت شفتها .. لك هاي امي ?.. نزلت بسرعة لما وصلت للگراج امي ماكو بس زبيدة نفس وگفتها وايدها مخبيه وجهها والكيس واگع يم رجلها هو نفسة ثوب داليا .. تقربت منها .. سمعت شهگاتها .. لا يالله يكون بيه ولا بيج _ زبيدة اني .. رفعت ايدها بوجهي ماتريد تسمعني تركتني ومشت .. اباوعها دخلت للشركة .. دخلت وراها ماصعدت فوگ راحت للكافتيريا.. اريد اروح احاجيها بس شأگولها .. ااااخ يا يمه .. رجعت صعدت سيارتي ورحت للبيت خلي يغيبوني مم الدوام بس اريد اعرف ليش ... .. .. ارد اعاتب ناس احبهم كون المعاتب يفيد.. وارد اطفي النار البكلبي عليهم وارد اكلهم ليش عفتوني وحيد وارد اكلهم نار فركاكم جوتني ودرب الملاكه بعيد وارد اكلهم وني سكته ومن تجون ابالي كل حيلي يبيد ارد اعاتب امي .. يمه اخذيني يمج وخلي درب عمري گصير يمه تعبت ليش عفتيني وحدي.. اخذيني يمج بعد مابيه اتحمل هاي تالي ذله ومهانه وتجريح وتلفيق وكذب علمود نفنوف اشتريته افرح طفلة .. اني تالي تگولي ام الزلم وتضحكين على ابني بسوالفج .. اني تتهمني بشرفي وتگولي الله اعلم شناطيته وشنو مورطته .. اني الي اريد اقشمر ابنها ومسويتله سحر .. كل هذولي اااني يارب لو تأخذ امانتك لو تنصفني ويطلع حقي يارب سلمت امري بأيدك حسبي الله ونعم الوكيل غسلت وجهي وصعدت كنت ناويه احاجي حارث بصراحة واذا اكو افكار براسه خلي يشيلها بس للأسف مالگيته.. گعدت اشتغل بدون واهس وكل شوية دموعي تنزل نوب لازم اشتغل شغلي وشغله والضاهر المدير مايعرف بي ماموجود لان سأل عليه خلصت شغلي وقبل لا اطلع اجتني فكرة دخلت للمدير _ استاذ اذا تسمح .. والدي مريض وأريد اخذ اجازه طويلة واسافر اني وياه _ يعني شگد تريدين بنتي _ شهرين _ والله قدمي للوزارة طلب وياه تقارير والدج واني هم اساعدج بمعرفي .. بس احتمال تحصلين شهر واحد _ مايخالف شهر ثاني اقدم بدون راتب _ ادللي بابا ولو انتي شاطرة احتاجج بس مادام عندج مريض حقج _ تسلم استاذ... زين من رخصتك اخذ باجر وبعده اجازة اروح اقدم اوراقي _ مايخالف بنتي بس گولي لاستاذ حارث يلتزم بالدوام يعوض مكانج .. _ ان شاءالله استاذ من رخصتك اخذت جنطي وطلعت مريت على وفاء اخذتها ويايه بس ماحجيت اي كلمة .. من وصلت يم السيارة جان ثوب داليا وحذائها بعده بالگع اخذتهن ومشيت بالسيارة ساكته وفاء تحجي وما اعرف شنو تگول بالي مو يمها وكل شوية تنزل دموعي امسحها .. ازدحام وگفت واجتي طفلة تبيع مي .. اخذت منها گلتلها عندج ثوب للعيد .. گالت لا .. اخذت الكيس نطيته الها .. شفت ضحكتها وفرحتها وهي تركض بي .. ابتسمت لضحكتها ومشيت ومشيت خلف ستار الحياة مسرحية تختلف فصولها وشخصوها ابتسمت لابتسامه جمهورها وخلف الستارة تلاشت تلك الابتسامة المصطنعه ليعود ذلك المهرج لغرفته ويغسل الاصباغ الممتعه عن وجهه بأمطار العيون رأيكم يهمني

Free reading for new users

Scan code to download app

App Store Google Play

Facebookexpand_more