جنة فؤادي الجزء السادس

1918 Words

جنة فؤادي الجزء السادس #zainab_alnajar موجع جداً احساس ان تكون خاوي الروح يشبه تهشيم عضامك بهدوء... رجع للبيت بوقت متأخر بقى يفتر بالسيارة .. من دخل وشاف هدوء تمنى من گلبه تكون ماموجودة .. الي يشوف دينا مايضن هذا طير الذهب الحلو بي كل هذا الغرور وهذا العذاب .. دخل للغرفه لگاها موجودة ونايمة وهم اطفاله ماكو بالغرفة اكيد يم امه استغفر ربه وراح توضه وصله ونام خلص يوم واستمرت ايام بدون تغيير بس صار تتفنن بجرحة وكل مايريد يطردها امه تمنعه ومتحمل لخاطر اطفاله مرت ايامهم بنفس الروتين على ابطالنا وبيوم .. الساعة 10 بالليل دخل حارث لغرفته .. دينا بقميص نوم احمر ومكياج و شعرها مفتوح والتلفون جان بأيدها ومبتسمة كأنما فاتحة كامرة وتحجي ويه احد بس دخل ارتبكت وخلته جوه المخده بسرعة.. _ هلو حارث .. اجيت _ لا بعدني .. هاي شبيج شو مو على بعضج.. ويا منو جنتي تحجين _ اني .. لا لا ما احجي ويه احد تريد عشا _ اي والله جوعان _ هسه اجيبلك عشا عمتي سوت وخلتلك لبست روب واخذت تلفونها وياها ونزلت .. استغرب تصرفاتها بس عمره ما شك بيها .. طبعاً غرفتهم لوحدهم والاطفال يم عمتها حتى حمودي الي ولدته قبل شهر عمتها تداريهم جابت العشا .. اكل وناموا .. الصبح حس عليها بالحمام دتسبح .. وصوت التلفون رجاج جوه المخده .. طلعه بي رمز بس رسائل تضهر على الشاشة .. وين رحتي بالليل اكيد البومه رجلج اجه ولج شلون جمال عليج ااااخ حارث _ انجنيت ساعتها ما اعرف شنو اسوي... طلعت من الحمام ركضت عليها لزمتها من شعرها .. افتحي التلفون _ اااخ حارث شبيك _ افتحي خلي افتهم .. منو هذا _ شدتحجي انت اووي وخر .. شو جيب التلفون اخذته من ايده عباله راح تفتحه بس هي ض*بته بالحايط حيل وفلشته _ ايا حقيره اني اعلمج اليوم .. فقد وهو يض*ب بيها لما نزلها من فوك. وامه تصيح وتريد تفكها من ايده .. طلعها بالكراج وشمر عليها عبايه .. _ روحي لأهلج الي ما عرفوا يربون وتحلمين تشوفين جهالج بعد _ اني اعلمك يا حارث بسيطة .. عاد انا راديتهم للجهال شوف شلون تحير بيهم _ بنتها داليا لازمه عباية امها وتبجي بعدت ايدها وطلعت وسدت الباب **ت بدماغه كان هو بدوامه الدنيا ادور بي ويسمع صوت امه واطفاله مثل طيف بعيد لما جتي عليه امه تجر بي .. _لك شسويت الله لا ينطيك _ اني الله لاينطيني .. وهي من تحجي بالتلفون وتفتح كاميرا شنو .. مرة وحدة صيري ويايه يمه لج يمه نار بگلبي _ جذب ماتسويها دينا _ اي اني كذاب واني كلب بس بت اخوج مو غلط عافها وصعد يشوف التلفون ويحاول يفتحه ويتمنى ان الي باله مو صحيح بس للأسف جان مت**ر وماينفتح اصلاً تقريب نص ساعة واتصل عليه خاله .. يصيح ويتوعد _ ليش ضارب بنتي لك تسوه راسك شلون تمد ايدك عليها .. _ بنتك ماحجتلك شنو السبب _ واذا حجت ويه ابن خالتها .. هو بغربه وديسأل على امها _ اها ابن خالتها .. وتفتح كاميرا وياه بملابس نوم ? عادي عندك... زين اذا هيج ليش ماگالت ابن خالتي وفتحت التلفون .. ليش **رته _ التلفون انت الكاسره مو هي .. طبعاً ماتگولك اذا انت حارمها تحجي ويه احد گرايب _ روح خالي وگلها اجيبلك الدليل وأجي اواجهك.. بنتك عندك اشبع بيها سد التلفون واخذ سويج السيارة وطلع على نزار .. _ نزار اريد تهكرلي صفحة بالفيس .. هاي اختصاصك بعد _ اني اعرف بس مامسويها الا للضرورة وشي يخص عائلتي _ اني هم شغلتي عائلية .. انت اخوية .. ساعدني بسرعة قبل لا تنغلق _ ماشي ماشي... بقى يحاول نزار شوية وانفتحت اخذ الباس وورد حارث وطلع حارث _ ياريتني مافتحتها .. صح هو ابن خالتها يشتغل خارج العراق صورها بملابس نوم ومكالمات فيديو .. والكلام يوگف العقل .. كله حجي عليه ويكولها تطلقي منه وشمري الجهال وتعالي يمي اعيشج اميرة .. يتغزل بيها .. وكل تفاصيل حياتهم بالمحادثات يمكن مو حب الها بداخله بس وجع كرامته واستغفاله.. هو يعرف بيها انانية بس ماتصور لهذا الحد .. دوم جانت تريده يترك شغله ويهاجرون وهو مايقبل لان يعرف هي مو حمل مسؤولية اطفال وامه الي مهتمه بيهم هنا اخذ سكرين شوت للمحادثات لان يخاف لا تقفلها من يمها وبعد ما يثبت شئ راح للبيت جان يوم جمعة والجوامع بيها قرايه قرآن گعد على كاشي الطرمة ودموعه تنزل ويه صوت القارئ طلعت بنته داليا حضنته وهي تبجي _ بابا .. ماما بعد ماتجي _ اسكتي بابا .. ماما راح تسافر طلعت امه وهي معصبه وتحجي عليه وليش ما رحت جبتها _ داليا روحي يم اخوانج حبيبتي .. راحت الطفلة وشوف التلفون الأمه .. گعدت بالگاع وهي مصدومة _ حارث خاف هاي احد يريد يورطها .. لا لا تصدگ _ يمه مره وحده اعترفي هذا الزواج خطأ . اعرف انتي اختاريتيها الي وهسه ماجاي الومج كلشي قسمة ونصيب.. وبعد مستحيل دينا تصيرلي مرأة تجين ويايه لبيت خالي لو اروح لوحدي نهاية مطاف للصبر موجعه جداً ممكن ان يكون لا يستحقها _ها خالي صدگت هسه... تعال احمد انت اخوها لو زوجتك مسويتها شنو تسوي خلي نفسك بمكاني خاله بدنگ راسه بعد ماعرف كذب بنته .. شوية وسمعوا صوت احمد يض*بها وهي تصرخ ول**نها يغلط اشكال وألوان .. اجتي امه وياها الاطفال كانت يم دينا تحجي وياها ورادت بس تلاگي عذر .. بس طلعت _يالله يمه حارث .. بت خالك متخبله.. حتى اطفالها تگولي اخذيهم مابيه حيل اربي ابوها خجلان من سوايتها _ ابني ما اعرف شأگولك بس ياريت يعني تعرف... محرج يكمل كلامة _ لا خالي لاتخاف ما اسوي الي بالك .. بس صيحها اريد احاجيها واطلع جابها اخوها احمد ومبين اثار الض*ب عليها _ شرايد بعد .. وبنفس ذلك تكبرها اجه يض*بها ابوها حارث گاله اتركها خالي خلي اسمع _ اي شتريد .. ترجعني .. لو تبوس رجلي ما ارجع .. انت مامقدرني .. وانا ما اريدك .. اخذ جهالك وياك مو تعوفهم عليه و... _ دينا انتي طالگ .. طالگ .. طالگ .. ضلت باهته ماحجت ولا كلمة ماصدگت راح يعوفها .. كل ضنها راح يرجعلها مثل كل مرة .. او عمتها راح توگف وياها .. بس حارث اخذ امه واطفاله وطلع وتركها تتلقى ض*بات من اخوها وأبوها وتسمع اهاناتهم .. .. أيام وأسابيع وهو وأمه مشغولين بالجهال هذا حمودي طفل رضيع وهسه يالله عمرة 3 اشهر .. امهم ابد ما كلفت نفسها تسأل عنهم .. گعد يروح للدوام .. امه گاعده بالمطبخ شايله الطفل وهو يبجي وهي مابيها حتى تسكته _ شبيج يمه _ يمه احس نفسي مريضة .. وهذا ابنك جسمه حار نار... وينهم داليا وحسوني _ بعدهم نايمين بغرفتي لا تخافين عليهم .. هسه شلون خلي اخذ الجهال اخليهم يم بيت كرار وأخذج للمستشفى _ لا مابيه شي يمكن انفلونزا وجسمي منحول بس اخذ حمودي ودي سوده عليه حتى بالليل مانام .. والجهال لو گعدو أكدر عليهم كبار وشايلين نفسهم _ انطينيا .. اخذه خلاه بجنطه خاصه بالاطفال واخذ الحليب والممه وطلع .. يفتر بالسيارة وين يروح .. وصل للشركة بس مانزل . اتصل وأخذ أجازة .. ورجع اتصل بزبيدة _ هلوو ابو داليا .. اليوم متأخر _ زبيدة تگدرين تاخذين اجازة زمنية وتعالي وياية .. حمودي مريض اريد اخذه للمستشفى وامي هم مريضة ماگدرت تجي وياية _ اي اي ماشي .. انت وين هسه _ يم باب الشركة _ اوك هسه اجي راحت اخذت اجازة ماقبلوا بس ساعة لان حارث هم ماموجود وطلعت .. جان واگف ينتضرها صعدت بالسيارة وياه واخذته لحمودي بحضنها... حاضنته بكل لهفه وخوف وتتلمس بوجهه .. _ يالله حارث بسرعة .. صدگ جسمة كلش حار وصلوا للمستشفى اخذه الدكتور طلع عنده حمى فايروسيه .. خلاه بالمستشفى گلهم نراقبة 4 ساعات... وبس امه تبقى وياه باوعت الحارث وهو صافن عليها .. _ اي دكتور صار... تعال حارث .. انطيني الحليب مالته وروح بمكاني للدوام _ بس شلون يعني _ هاي شبيك .. لاتصعبها خلي الطفل يصير زين يالله روح لاتخاف عليه .. هسه شوية ويصير زين وصدگ راح للشركة وهي بقت ويه الطفل .. كانونه وابره.. وعلاج .. تقريب ساعتين ونزلت حرارته وحارث كل شوية يتصل بيها ضامته بحضنها وتشم بريحته وتشوف شلون متمسك بأصبعها حيل وكف ايده كلش صغيرة .. معقولة اكو أم تترك اطفالها وهي كانت تتمنى تصير ام بيوم من الأيام .. مقهوره على هذا الطفل بعد شگد حتى يكبر.. حارث حجالها صارت مشكلة وانفصلوا هو ودينا شرعا وكان يمشي باجراءات المحكمة اجه الدكتور شافه وكتبله خروج ماحتاج يبقو اكثر بس وصاها هواية وعلمها العلاج شلون وشوكت تنطي العلاج .. اتصلت بحارث اجه عليها والطريق كله تتوسل بي يبقي حمودي عدها اليوم .. _ حارث عفية خلي عندي .. الوالدة مريضة ماتگدرله والدكتور علمني شلون انطي العلاج _ وانتِ هم والدج مريض وتعتنين بي .. وبعدين اخوج شيگول هذا ابن من _ بابا طلباته مو هواية واخوية رايحين سفرة لأربيل يالله حارث لاتصعبها _ وملابس شلون .. _ اني ادبرها والله معليك .. بس اليوم وان شاءالله يصير زين باجر _ هايهيه امري ل الله ولو راح اتعبج _ ازعل والله.. فدوه هو ينحط بالگلب _ لعد شبيها امه عافته هو واخوته _ لا تفكر بيها .. هسه اكيد تشتاقلهم _ والله ما اعتقد _ يالله هسه خلي اخذ سيارتي من الشركة واروح للبيت ،............ .. خلونا احنه نسولفلكم بعد بل**نه ونترك الكاتبه ? زبيدة _ اخذت حمودي ويايه نزلت بالطريق اخذتله كم قطعة ملابس وحفاضات وحليب ورحت للبيت _ السلام عليكم بابا _ هلو،بابا اليوم تأخرتي والله جوعان .. هاي شنو وياج _ سوده عليه بابا هسه اصب غده وناكل اني هم جوعانه .. هذا حمودي ابن حارث الولد ويايه بالدوام مو تعرفه .. واليوم والدته مريضة والطفل مريض وجبته ويايه .. شوفه بابا شگد حلو _ ماشاء الله. تبارك الرحمن مثل طيور الجنة _ اي والله بابا يشبه ابوه وكل هذا وامه تركتهم هو واخوانه.. اااه الك بيها اراده ربي وانا كنت اتحسر على الطفل راح اتركه هنا يمك على السرير اغير ملابسي واصلي واجيب الغده واجي ... .. بقيت مشغولة ويه حمودي نطيته علاجة واعتنيت بي تقريباً لليل صحته تحسنت وصار يلعب ويناغي حبيبي متمسك باصبعي بكل قوته .. الله ياعطرة شگد طيب بشرته ناعمه اتلمس بخده غفى وخليته يمي بالفراش وعيوني ماتريد تغفى اريد اشبع شوف منه اريد استنشق ريحته حتى اخزنها بداخلي .. الصبح ياخذه ابوه... يارب تمنيت لو طفل واحد اطلع بي من الدنيا بس اللهم لا اعتراض .. شئ بداخل ص*ري يأذيني من اتذكر بس اليوم عندي .. ياريت يبقى يمي .. حارث يتصل كل شوية يگولي تعبناج ومن الصبح اخذه هو مايدري اذا ياخذه يعذبني كعدت الصبح تعبانه من السهر .. وحبيبي حمودي صحاني بال 6 على صوته من يناغي .. غيرتله وسويتله ممه صارت بال 7 .. اتصلت على حارث _ صباح الخير ابو داليا _ صباح النور.. اكيد حمودي خبصج هسه شويه واجي اخذه حتى اروح للدوام _ لا لا حارث .. خلي العصر اخذه عفيه واني اخذلي اليوم اجازه .. اريد ابقى وياه _ ههههه هاي شنو وگعتي بغرام حمودي _ اي والله... فدوه الله يخلي الك _ هنيالك حمودي ... ماشي يابه خلي والعصر اجي عليه .. حارث سديت التلفون من زبيدة امي گاعده يمي .. وسمعت المكالمة _ روح جيب الطفل شنو تاركه يم هاي ماتعرف شنو تسويله _ يمه هاي اسمها زبيدة .. وراح تخاف عليه اكثر منج .. مستكثره عليها يبقى الطفل يمها كم ساعة مو البارحة شبعتي نوم ومرتاحة _ اي شنو هاي عيونها على حمودي اخاف من الحسد وهي محرومة مثل ماتگول... راح تجي اختك سجى من الكوت كم يوم وتساعدني _ ماشي يمه العصر نروح نجيبة انا وياج عود .. راح ابدل واروح للدوام .. زبيدة اخذ كل وقتي شايلته واشتغل .. حتى بابا صار واهسه وياه وشلون يضحكله نزلت غادة زوجة حسام گالت _ دا اسمع صوت طفل گلت انزل اشوف شنو تبنيتي واحنه ماندري ،، _ لا عيني هذا ابن صديقتي مريضة وخليته يمي هسه تجي العصر عليه ،، ماردت اگوللها ابن زميلي بالشغل اعرف بيها وبتفكيرها ،، _ اهاا اي عيني شكو بيها انتي هم محرومة من الاطفال .. وتركتها وصعدت .. بس غرزت سكين بگلبها ... صار العصر .. سمعت صوت جرس الباب.. اكيد هذا حارث .. فتحت الباب.. هو وأمه واطفاله الكبار هو نازل بس والدته گاعده بالسيارة مانزلت _ السلام عليكم عيني وين الوكيح مالتنا ههههه _ عليكم السلام ورحمة الله عيني ابو داليا .. شلونج خاله .. تعالو تفضلوا الوالد موجود _ هلو بيج .. لا عيني مستعجلين نريد نروح للسوگ بس انطينا ابننا عذبج واكيد ماتعرفين تعتنين بي لان مامجربه تربيه طفل حقج .. ان شاءالله هاي اخير مرة نخلي يمج اني ما اعرف بحارث جايبه عندج جان ماخليتة استغربت من اسلوب والدته ويايه _ اي صار ثواني واجيبه .. دخلت اخذته هو واغراضه .. حضنته حيل وشميت عطره وهو يضحكلي والله دموعي نزلت .. طلعت عليهم .. تفضل ابو داليا .. وهاي اغراضه هم .. بس خاله انا مو غشيمة عن تربية الطفل .. اطفال زوجي اني ربيتهم والامومه فطرة.. وعلى العموم الله يحفظه لحمودي ويحفظ اخوانه .. اهلا وسهلا بيكم حجيت هالكلمات ونصيت راسي بمعنى تفضلو مع السلامة لان بالگوه حابسة دموعي حارث بين على وجهه كلش انزعج .. صعد بالسيارة واني سديت الباب ودخلت بغرفتي فرغت كل همومي بدموعي .. بكيت بحرگه گلب ليش كل الناس تعايرني اني عقيم .. شگد احاول ابين قويه گدام الناس بس والله داخلي هشه .. شگد اتحمل بعد في تعريف موجز للحنين ،، هو مجموعة من الثوار يستوطنون وسط وأطراف القلب ضد سلطة القمع العاطفي للأنسان وعندما يُقَتَلون يتساقطون دمعاً من العيون ،، وحنيني انا لكائن صغير يملئ عليه حياتي

Free reading for new users

Scan code to download app

App Store Google Play

Facebookexpand_more