جواز بدل

جواز بدل ١٨

“جواز بدل ١٨"

مهند: انا اسف يا احمد والله احنا اتفاجأنا بخبر ان عمرو رد مريم لع**ته من غير ما يعرفنا وجه واخدها انا اسف مره تانيه بعتذرلك

احمد: ماتعتذرش ربنا يوفقها انا مش زعلان انا مبسوط علشانها بس حقيقى انا خسرت واحده مش هتتعوض

ام عمرو: يعنى ايه الكلام ده رجعتها تانى ياعمرو هان عليك اختك بقى اخوها يرمى اختك وانتَ تعزز اخته وتروح لحد عندهم تستسمحهم وترجعها

عمرو: ماما لو سمحتى دى حياتى انا ومستقبل ابنى مش عاوز نقاش فيه كفايه تدخل فى حياتى ولو ضغطى عليا يا أمى اوعدك انى مش بس مش هاجى تانى لا انا هسافر بمراتى ومش هتعرفى مكانى وده اخر كلام عندى

ام عمرو: بتهددنى يا عمرو هى قوام قلبتك على اهلك ، على العموم براحتك اعمل اللى انتَ عاوزه انا داخله انام تصبح على خير

عمرو: مريومه تعالى يا حبيتى

مريم: حمدلله على السلامه ياحبيبى ايه الكيس ده... الله ده مليان شكولاته بابلز ميرسى يا حبيبى

عمرو: تتصورى يا حبيبتى لما سبتينى وكنت كل لما ادخل سوبر ماركت واشوف شكولاته بابلز بحس بوجع فى قلبى من بُعدك

مريم: سلامه قلبك، خلاص بقى احنا فتحنا مع بعض صفحه جديده ننسى بقا القديمه مش كده ولا ايه

عمرو: كده ونص طبعاً، بس فى سؤال عاوز اسألهولك وجوبينى بصراحه صدقينى مش هزعل

مريم: اسأل يا عمرو مش محتاج المقدمه دى كلها

عمرو: حسيتى بأيه مع احمد وكان تعاملكم ازاى وكنتوا بتتكلموا كتير فى التليفون

مريم : امممم مع ان فى وقتها كان خطيبى ومفيش اى رابط يربط مابينى وبينك، هجوابك وهعتبره فضول منك، بص يا سيدى احمد انسان محترم جداً وطيب وحنين اوى وده حسيته مع تعامله مع كريم، بس احساسي ناحيته كان اقرب للصداقه ،يعنى مش اكتر من كده اما بالنسبه للتليفونات فكان بيكلمنى علشان نقرب من بعض بس فى اطار المسموح بيه من غير مايتعدى حدوده، هاه اى اسأله تانى

عمرو بغيره: وهو قالك انه بيحبك مثلا

مريم: عمرو ممكن تقفل على الموضوع ده لانه شكله هيقلب نكد وبعدين انتَ مضايق على ايه هو انا كنت بعمل حاجه غلط او حرام

عمرو: مش حكايه غلط او حرام بس انا غيران مش مصدق انك كنتِ هتتجوزى غيرى بعد ٤ شهور بس من طلاقنا انا بحبك اوى يامريم لدرجه نفسي البسك نقاب علشان محدش يشوفك غيرى،الا قوليلى انا مش سامع صوت لكريم

مريم: كريم نايم ياحبيبى كنت عاوز تلعب معاه

عمرو: اللعب معاه ايه بس انا عاوز اللعب معاكِ انتِ يا بطل

"نسيب عمرو مع مريم ونروح نشوف اخبار مهند مع لوجين ايه"

مهند: الله اكلك تحفه يا لوجى تسلم ايدك

لوجين: بالهنا والشفا ياقلبى،مهند كنت عاوزه اقولك موضوع كده

مهند:قولى يا حبيبتى

لوجين: بصراحه كده عاوزه استقيل من الشغل او اقدم اجازه بدون مرتب

مهند: ليه يا حبيتى حصل حاجه فى الشغل فى حد ضايقك هناك

لوجين: لا بس انا تعبانه ومش هقدر اوفق ما بين البيت والشغل

مهند: انا عارف يا حبيبتى ان الحِمل زاد عليكِ طلبات البيت وبنتى وامى والشغل انا اسف شكلى حملتك فوق طاقتك

لوجين: انتَ بتقول ايه طبعاً مش قصدى كده ، وبعدين يا استاذ اسمها بنتنا مش بنتك لوحدك انت متتصورش بموووت فى كلمه ماما اللى بتقولهالى ،ومامتك هى زى مامتى بالظبط لو مشلتهاش الارض اشيلها فوق دماغى انا بس تعبانه تعب حلو تعب هيفرحك

مهند: error

لوجين: مش فاهم نفسى اعرف انتَ ازاى خريج هندسه بالذكاء ده.... انا حااامل.

مهند: ايوه برضوا مال التعب بانك حامل .... ايييه حاااامل انتِ بتتكلمى جد انتِ اتاكدتى بانك حامل

لوجين: طبعاً وعلى فكره بقى انا قولت لطنط اول واحده وفرحت اوى

مهند: بجد ماما عارفه ... ااااه يابنت اللذينه ولا يبان عليها المهم دلوقتى ترتاحى وهجبلك واحده تراعيكِ انتِ وماما ورودى

لوجين: ليييه ان شاء الله انا بقولك انى حامل مش اتشليت انا مش عاوزه اى حد غريب يدخل البيت انا هسيب الشغل وده كفايه اوى ثم اصحابى بيكونوا بطنهم قدامهم مترين ومراعين بيتهم وعيالهم وبيشتغلوا كمان مالكش دعوه انتَ بالامور دى انتَ بس عليك تدلعنى

مهند: بس كده ده انا هدلعك اخر دلع??

لوجين: لااا مش الدلع اللى فى دماغك.. انا عاوزه كريز وموز كتير جدا

مهند: كريز وموز ايه اللى لم الشامى على المغربى على العموم انتِ تؤمرى ياقمر

ام عمرو: يابت يا نورهان افرحى جالك عريس لقطه

نورهان: بجد ياماما هو مين وبيشتغل ايه

ام عمرو: اهدى عليا دى خالتك ام سامح اللى جيبااا العريس جايه فى السكه وهتقولنا كل حاجه عنه

ام سامح (الخاطبه): السلام عليكم ازيك يا عروسه عامله ايه يام عمرو وحشانى والله

ام عمرو: اتفضلى يام سامح منوره والله هاه بشرينى مين العريس

ام سامح: ده الاستاذ شريف بيشتغل فى المقاولات ابن عز ارمل وعنده ولدين فى ابتدائى وابوه متوفى وامه عايشه معه فى بيته بس بيت ايه اكنه فيلا واسع وشِرح وبِرح عنده ٣٧ سنه انما شكله يدى على العشرينات هااه يا ست البنات موافقه ودى صورته

نورهان: هو حلو ووسيم بس حكايه امه والولدين دووول قلقانى

ام سامح: تقلقى على ايه ده متريش ومعه فلوس تسد عين الشمس واكيد هيجبلك بدل الخدامه عشرة هااه نقول مب**ك ياست البنات

نورهان: ايه رايك يا ماما

ام عمرو: مش محتاج رايى طبعا موافقين

" بعد يومين"

عمرو: ازاى يا ماما توافقوا على العريس من غير مانسأل عنه وكمان عنده ولدين

ام عمرو: ام سامح سألت عنه وايه يعنى ولدين اكيد هيجبلهم داده ده غنى ومعه فلوس هيعيش اختك ملكه ،اخيراً هحرق دم مهند واهله واجوزها اللى احسن منه

ابو عمرو: هاه يا نورهان يا بنتى موافقه على العريس فكرى كويس قبل ماتردى عليا ده معه ولدين يعنى انتِ هتكونى امهم ومسئوله عنهم الجواز مش لعبه لانى مش هقبل تطلقى مره تانيه

نورهان: موافقه يا بابا اتصل بيهم وبلغهم موافقتى

ام عمرو: بصى يا بنتى الحمدلله احنا اخدنا من مهند مبلغ محترم طلع من عينه غير الدهب هعملك حساب فى البنك هحطلك فيه فلوسك وهجهزك من جديد انتِ مش اقل من اى حد

" بعد مرور ٣ شهور"

نورهان: يعنى ايه ينكتب كتابى ومشى معاه من غير فرح ،انا مالى بعمه اللى مات

ام عمرو: معلش يا بنتى الناس هتاكل وشه ازاى يعمل فرح وعمه ميت من شهرين بس اكيد هيعملك مفاجأه ويسفرك شرم الشيخ او برا مصر ده غنى يا بت

نورهان: انتِ شايفه كده يا ماما ماشى

شريف: ادخلى يا عروسه ،بصى يا بنت الناس انا لازم من الاول كده اعرفك على طبعى انا ليا قوانين محبش حد يخالفها لان عقابى مش هتستحمليه

امى رقم واحد فى البيت الكلمه كلمتها اللى تقوله تنفذيه من غير اعتراض

عيالى انتِ المسئوله عنهم من الالف للياء واياكى ايدك تتمد عليهم لو غلطوا قوليلى انا اعاقبهم

انا مش بحب ادخل حد غريب البيت يعنى مفيش خدم فى البيت انتِ هتعملى كل حاجه اااه انا بحب اكل من ايد مراتى والبيت يبقى زى الفل من النضافه انا بحب النظام

نورهان: !!!!!

------------يتبع

Elbanota gege.. …

تفتكروا نورهان هتستمر فى الجوازه التانيه؟ وايه تانى مستنيها ........تبعونى?