Maya-maya ay dumating si Janine sa gusali na hingal na hingal at basang-basa. Kaagad niyang inalalayan si Lisa sa pag-aasikaso sa sugatang si Alden. Hindi naman na nagtanong si Lisa at hinayaan na lang niya si Janine na tumulong sa kanya.
Nagpapakiramdaman naman ang mga taong-palaka habang magkakadikit na nakatali. Nararamdaman ni Four ang takot ng mga taong-palaka. Pero alam din niya na hindi para sa kanya ang takot na nararamdaman ng mga ito.
“Ngayon magsalita na kayo!” sabi ni Four.
Deretsong tumingin kay Four ang kulay lila na halimaw. “Mayroon kaming isang salita. Isang bagay na wala ang marami sa mga taong kagaya mo. Pero gusto kong malaman mo na may mga nakatanim na mga bomba sa katawan namin. At sa oras na magsabi kami ng impormasyon tungkol sa Conquerors, sasabog kami. Lahat
