أيقنت سعادتي

الفصل الثالث 3️⃣🌷

انا : " بجد انا خفت يا ماما . حسيت ان الدنيا مفيهاش أمان . "

ماما : " لا طبعاً فيها يا حبيبتي . و الدليل وجدوك انتي فيها و ناس كتير طيبين . بس الأكتر الشر فيها ، انا بحكيلك الحكايات ده بس علشان متزعليش أو تكتئبي ، و تحاولي انك تعدي كل الوحش اللي هاتمري به ، ياااااه الحياة فيها كتير و اكتر من غدر الصحاب كمان . "

انا : " اكتر من غدر الصحاب يا ماما ! ! . و مش عيزاني اخاف ! ! . "

فجأة لقيت ماما عيطت و حاولت تداري دموعها .

انا : " مالك يا ماما بـ تعيطي ليه ؟ ، هو انا قلبت عليكي المواجع حقك عليا متزعليش . "

ماما : " لا بنتي مش زعلانة منك ، انا بس افتكرت حاجات كدة في حياتي و مش قادرة انساها . افتكرت غدر اخواتي ليا . "

( غدر الاخوان ) ، الكلمة ده رعبتني ، هو انا قادرة استوعب غدر صحابي و غيرتهم لما هستوعب غدر اخواتي و ساعتها افتكرت اخواتي اللي مكناش بنبطل ضحك طول اليوم ، و اخويا الكبير دايما يقولنا من حبه لينا في مرة و احنا سهرانين

قال اخويا الكبير: " عايز اتفق معاكم اتفاق و توفقوني عليه و كمان نتفق كلنا عليه . "

قلناله : " خير اتكلم . "

أخويا : " اننا نتفق محدش فينا لما نكبر يتزوج ، مش عايز حاجة تفرقنا عن بعض ، حتى لو كان جواز ، انا مش قادر اتخيل ياخد اخواتي مني . "

ده طبعاً كان من شدة حبه لينا و خوفه اننا نتفرق . . مكنش عقلي بـ يستوعب ان الناس ممكن تتحول بالسرعة الجنونية ده و اللي قدامك حبيبك بكرة ممكن الطعنة تيجي منه . . لحد دلوقتي كنت لسه بدأت اتعرف على الوجه الآخر للحياة . . .

✿❀ ★✯☆ •°• ✾ •°• ☆✯★ ❀✿

الحياة فعلا تخوف . . حاولت اهدي من ماما و مسيبهاش و اقوم الا لما اخليها تضحك بعد ما كنت سبب انها تفتكر مواجعها . .

بعدها ماما دخلت تنام ، و انا بدأت اول ليلة في الكوابيس تلازمني لما انام و نفسيتي مش مظبوطة ، كنت بحلم بحلم غريب أوي لحد دلوقتي فكراة ، كنت بحلم بـ كائنات عمالقة شكلها وحش موجودة في اوضتي و انا مخنوقة مش قادرة اتنفس .

صحيت حكيت لماما الحلم ، و كالعادة تفسير امي لأي حاجة وحشة بتحصل لينا كانت دائماً تقول :

ماما : " انتي اكيد نمتي من غير ما تصلي العشا ، و طمان كن غير كا تقري آية الكرسي و القرآن قبل النوم و الاذكار . "

كانت دايما تقربنا من ربنا علشان تطمن علينا ، و ده كانت أفضل طريقة للتربية الصح . . .

✿❀ ★✯☆ •°• ✾ •°• ☆✯★ ❀✿

عشت انا و اسرتي ماما و بابا و تيتا و أخواتي في سعادة و هدوء و راحة بال و في بيتنا الكبير الجميل ، قبل ما نكبر و نتجوز و يدخل بيتنا زوجات اخواتي اللي بإعتراف الجميع أخطائنا في اختيارهم ، حقيقي ماما و بابا كانوا طيبين اوي لدرجة انهم ميعرفوش الناس و بينخدعوا فيهم . .

من هنا بدأت اخاف من الحياة و بدأت الكوابيس تلاحقني في نومي لدرجة اني بقيت اخاف انام علشان مشفهاش ، و ده كان بسبب ان شخصيتي حساسة جداً لدرجة متعبة بتأثر بأي نظرة بكلمة ، في يوم حلمت ب ( حد بيراقبني ، حد معرفوش ، و الاغرب اني معرفش إن كان إنس أو من عالم آخر ، وعايز يتقرب مني . .

هو مين معرفش ! ! . أصحى من النوم الاقي علامات زرقا في في جسمي على رجلي و في ايدي ، أطنش و اقول يمكن اتخبط من غير ما آخد بالي ، الوضع ده استمر سنين ، لحد ما خلصت الجامعة و اتخرجت و اتقدملي شخص محترم جدا و ببحبني هو و أهله ، تزوجنا ، لكن لسه الأحلام الغريبة اللي بتجيلي في منامي هو نفس الشيء اللي معرفش عنه حاجة غير انه نفس إيوة عبارة عن نفس في الحلم بـ يمشي ورايا و اوقات بيكون جنبي ، بس الأغرب انه مبقاش يجيلي انا بس في الحلم لأ ، بقى يجي لزوجي كمان بس بشكل مرعب و يخوفه ، وكان زوجي بـ يصحى من النوم يوصفه انه شخص عملاق بـ يجيله يخوفه و شافه اكتر من مرة ، و هو بـ يحكي عنه في الحلم ببقى عايزة أقوله انا السبب هو جايلك علشان لكن كنت بسكت مبتكلمش ، عايزة اقوله ده ملازمني من سنين بس بسكت و مبتكلمش ، بس ليه ؟

و عايز ايه مني و عايز ايه منك ؟ ! ، كل ده كانت أسئلة في دماغي معرفش اجابتها . ! !

و في يوم كنت نايمة و فاجأة دخل زوجي الغرفة علشان ينام و بعد ساعة لقيته صحي مفزوع و قام خرج يجري في السقة كأنه بيدور على حاجة ، قمت انا كمان بسأله و مستغربة .

انا : " مالك في ايه بتجري بتدور على ايه ! . "

كان بيتكلم و هو خايف متوتر صوته بينهج ،

قالي : " انا شفت راجل ضخم لابس أ**د و طويل جداً طوله واصل لسقف الأوضة ، بصلي خوفني بعيونه و كانت لون عيونه حمرا و فيها ضوء احمر ، هو نفس الراجل اللي بيجيلي في الحلم ، جه خوفني و مشي دخل الصالة ،

قلتله : " يمكن تكون بتحلم و ده مستحيل يكون حقيقة . "

قالي : " لأ مكنش حلم و انا متأكد ان فيه حد معانا هنا في الشقة و بـ يكرهني ، نظرته ليا بتقول كدة . "

استغربت اوي من كلامه و استوقفت عند كلمة بيكرهني ، هو مين بالظبط ؟ ، و بيكره زوجي ليه ؟ ! ! و خصوصاً ان زوجي شخص مسالم جداً و طيب و بيحبني ،

بعد فترة من التفكير في الموضوع ده عرفت انه ( جني ) أيوة جن ، ملقتش تفسير غير انه جاي يبعد زوجي عن البيت و يكرهه في الزواج مني ، علشان يبعده عني ، فعلاً من الليلة ده و زوجي بدأت الكوابيس تلازمه و يظهرله حد في الحلم يهدد و يخوفه و يحذره لو اتقرب مني هيقتله ، زوجي بدأ على جسمه التعب و الإجهاد من غير سبب و بقت تظهر في حياته مشاكل من غير سبب وفي شغله برضه مشاكل من غير سبب ، لحد ما انطرد من شغله ، رجع يومها البيت قالي : " انا سيبت الشغل و مش عارف اعمل ايه ؟ ، أصرف على البيت ازاي . "

قلتله : " ولا يهمك بكرة هـ تتحل . "

و بعد أيام لقيته بـ يفاجئني بقرار سفره ، و انه مش لاقي شغل ، و كمان مش قادر يعيش في البيت من بعد الكوابيس اللي كل يوم بـ يشوفها في البيت . .

قلتله : " لو البيت مش مرتاح فيه نعزل و ننقل لشقة تانية .

قاللي : " امكانياتي متسمحش و خصوصاً اني مش لاقي شغل هنا ، و اتعرض عليا أشتغل برة في دولة عربية . "

قلتله : " كويس طالما لقيت شغل برة تمام نسافر سوا . "

رفض و قالي : " للأسف مش هعرف اخدك معايا في السفر علشان هسكن مع ناس اصحابي في شقة واحدة . و لو استقريت هناك مش هفكر أرجع هنا و هستقر هناك . "

طبعاً الموضوع جه على كرامتي و خصوصاً اني كنت معاه زوجة الكل بيحسدوه عليا و مكنش ليا أي ذنب في اللي بيحصل . "