الشيخ والعشق

2

اخذ الاوراق احمد كال اروح للمحامي اذا استلم. لدعوه اخابرك خمس ايام وكال استلم لدعوه اطاها لمحاميه

قيصر: خايب اخاف تورطنه انوب نمشي وره مره

احمد: ههه لالالتخاف بنت اخته وهوه يتابع وياهه كالت تتحدد جلسه واتصل بيكم

مرن اسبوعين وخابر احمد كال تعالو الاحد انت وصادق جلسه الصبح تعالو السبت باتو يمي حته حته لصبح نطلع

كملنه امررنه وطلعنه السبت رحنه لبيت احمد استقبلنه ووماقصرت زوجته

قيصر :خايب هاي لمحاميه تفتهم لو راح توكعنه

احمد: لالاتفتهم يمعود بسرعه حصلت تحديد جلسه وسوت طعن بالبلاغ وماعرف شنو

صادق: شلونهه هل محاميه

احمد :عجوز يمعود اكبر من امي

قيصر: خايب لاتموت علينه بجلسه

احمد: هههههه لالاالله لايكولهه

قيصر: ثاني يوم من الصبح طلعنه كالو الجلسه ب10ص ب9:30احنه كدام لمحكمه خابر احمد ع المحاميه كالتله انتضروني بره اني بطريق ناس رايحه جايه وهوسه 10دقايق واحمد كال جتي اشر ع بنيه لابسه مناضر شفتهه بعيده ممبينه جبيره تقربت سلمت ع احمد بنيه شابه ناعمه سلمت علينه وكالت تفضلو داخل لمحمكه نحجي جريت احمد كتله وين لمحاميه

احمد: ههههههه هاي كدامك

قيصر :خايب موكلت جبيره هذي شابه صغيره

احمد: هههه قيصر حنان كاعده وانتو تسئلون وهيه بليه شي اتصيح لمحاميه كتلهه جبيره حته اخلص

قيصر: خرب ضميرك بساحه المحكمه كراسي كعدنه كعدت هيه رادت ج*سيه صادق ومكاتبه البيع الاصليه ضعيفه جسمهه متناسق موضعف نشاز بشرتهه مائله للبياض حنطاويه لابسه مناضر عيونهه ممبينه شعرهه رافعته ذ*ل حصان عالي وواصل فوك نهايه ضهرها اخذت لااوراق رفعت نضارتهه ع راسهه قرتهن ورفعت عينهه تحجي ويانه سبحان الخالق لونهه شلون لون السمه لاهنه خضر ولاهنه زرك واسعات كبار وهيه مكحلتهن رموشه مبرومه

والله ماعرف شحجت ويه صادق وله شكالت صافن جنت بيهه كلشي محير لاتكدر تكول بيضه ولاتكدر اتشبه بسمره حنطيه ببشره فاتحه عيونهه خظر فاتح خشمهه جنه دعبله الله حط 10كيلوات لحم بخشمي محط بخشمج كامت ماعرف وين كامت

صادق: بوياي خايب هاي لتكول عجوز بويه تكتل شفتهه قيصر

قيصر: احم اي الله يستر عليهه

صادق: اله اعمه انت احمد وكلت ع هل كمر عجوز

احمد: ههههههههه لاتحجون كدام حنان والله تكلبهه مناحه ردت اخلص مكابلتني وتسئل شلون شكلهه شكبرهه حلوه لولا مزوجه لولا

قيصر: صدك هيه مزوجه لولا

احمد: ههههههههههههههاي لاوالله سمعت ممزوجه ها ناوي ع ثالثه ابوسميه

قيصر: هههه لايابه مجرد سؤال

جتي كالت راح تبدي الجلسه بس صادق يدخل دخلو تقريبا نص ساعه وطلعت لابسه روب اسود وبي شريط احمر

حجت ع ان سمعو اقوالهم بس الي بايعين لصادق مغيرين الحجي نصهم كايلين مبعنه ونصهم كايلين بعنه يعني شبه قضيه تزوير رايدين ايسوها ع صادق وهيه طالبه اثبات تو**يع حجي هواي وشرح اكثر

احمد: ست ناي اني كتلج ان ع اخويه هوه الي راح يكون وياج خطوه بخطوه وفهمتج

-عادي يكدر استاذ صادق يسوي وكاله للاستاذ يكدر من خلالها يحضر بمكانه لكن اذا احتاجينه شهود ونسمع ردودهم ممكن نطلب استاذ صادق

قيصر: اريد اعرف الاسم الي سمعته صح ناي اسم غريب كغرابه التركيبه الي كدامي

رحنه لكاتب عدل سوالي صادق وكاله

العفو ست معرفت اسمج

ناي

قيصر: ناي

نعم ناي وحضرتك

قيصر

اهلاوسهلا

اهلا بحضرتج ست ناي ممكن رقمج حته اتواصل ويه حضرتج علمودلقضيه

اي اوك هذا كرتي واي جديد ع قضيه ابلغكم بيه

شكرا تعبناج تحبين نوصلج لمكان

لالاشكرا عندي دعوه ثانيه

قيصر: رحنه لبيت احمد ماعرف ليش ابالي يمكن لان احمد كال جبيره وطلعت صغيره لاعادي شنويعني لالا لان مفرعه وين لكيتهه هاي قيصر موجنت كليه وشفت مفرعات ومحجابات يمكن

كاعدين اني ومحمد واحمد وصادق بالحديقه مال بيت احمد واجه ولد صديق محمد يمنه اني،صافن ليش هيه ابالي مادري سمعت سمير صديق محمداخوي يكول نرجع للعشك لوعيب صرنه كبار

الجمله رنت بااذني عيد سمير الي كلتهه

-هااااضاهر الشيخ عاشك عهههههه

-خايب عيد مسمعت زين

-كلت نرجع للعشك لوعيب صرنه كبار

احمد: هههههه ابوسميه مشتاقين لصوتك دندن فدوه لهل وجهه.

اكو اغنيه ع بالي من كال نرجع للعشك لوعيب صرنه كبار بس ماكو عشك يصير بساعه يمكن اعجاب

اغنيه كريم منصور تكول

جاي من تالي الوكت

هسه يله اذكرت

زحمه صارت واعتنيت

كلفت نفسك وجيت

بهاي جيتك قصرت

جنت اتصور تجيني اول الناس اليجون

تالي تقديري لحنانك غلط واوهام وضنون

زحمه صارت واعتنيت كلفت نفسك واجيت بهاي جيتك قصرت

ليش من ردتك بحزني

صرت عن عيني بعيد

وهسه جاي ووكتي يضحك

بعد جيتك ماتفيد

زحمه صارت واعتنيت كلفت نفسك واجيت

-عاش هل صوت ابوسميه شنو هل احساس عشت

قيصر :هههههه اخ يابالي مشغول بمنو ومنو وشلون كلهه كم ساعه شبيك شجابك زحمه صارت واعتنين كلفت نفسك واجيت اذا انت العشك فجيت متأخر لاوقتك ولازمانك

قيصر: اتصلت بيهه الصبح

الوو

السلام عليكم ست ناي

وعليكم السلام

اني قيصر اخو صادق

اهلاوسهلا استاذ قيصر هسه جنت اريد اتصل بااستاذ احمد هل يومين احتاجكم لازم واحد منكم موجود

بالخدمه ست

شكرا التو**يع 10ايام وتطلع نتيجتهه لكن اكو امور ثانيه لازم تصير كا تبليغ مركز بتحفظ ع جزءالارض لحين نطق الحكم

-العفو ست اذا ممكن اجيج للمكتب حته افتهم لان مو مال تليفون

-والله يكون افضل اليوم ب4اني متواجده بالمكتب

-شكرا جزيلا ست شكرا

سديته ماعرف ليش احس فرحه داخلي شنوقصتك ياقيصر راح تعيش مراهقه متأخره بدلت وطلعت طبعا ببغداد مالبس دشداشه وعكال

رحت ع وصف للمكتب بس بحياتي محسيت اني مرتبك ليش من وصلت صار عندي هل احساس

السلام عليكم

وعليكم السلام اهلااستاذ قيصر تفضل

يزيد فضلج

شتحب تشرب

شكرا ماريدشي

استاذ قيصر انت ضيفنه ميصير متريد جاي لو كهوه لو شي بارد

شي بارد

تحجي بثقه اي ارتباك ماكو عدها ليش اني احس روحي متوتر كالت لولد وجاب بطل عصير خلاه كدامي كاعده هيه وره مكتب طلعت اوراق تشرحلي شسوت اني عيني ماكانت صلغه بيوم ليش اليوم عيوني تتمعن بمعانيها انتبهت عدهه شامه فوك شفته شعرها مفتوح كاعده مشفت طوله بس دنجت ع ورقه وكعت ورفعت كم شعره وكعت ع شعرهه حركتهن بيده رجعتهن وره اذنهه ومستمره تشرحلي لابسه تراجي ثنين بااذنها وحده ناعمه مثل ورده صغيره ووحده طويله نازله بشكل ز**يل وبنهايته قلب انتبهت عليهه تكول وهذا لي لازم انتو تحلوه استاذ قيصر

احم احم العفو شحل يعني

-قصدي ع تغير اقوال الي باعو لااستاذ صادق احنه ممكن نمشيهه قانونيا فقط واصلا10ايام وتضهر نتائج التو**يع بس استاذ احمد كال انكم مستعجلين وتردوها بس رد برد قانوني حته يجون لحل ودي

قيصر: لالا ست خليهه ع قانون واني متابع وياج خطوه بخطوه

-اوكي خلص اتفقنه اي شي جديد اتصل بحضرتك

قيصر: استئذن اني

-مع الف سلامه تفضل

-انتي هم طالعه

-اي ماعندي شي

-تحبين اوصلج لمكان ست

-لالاشكر سيارتي بره

-صاحت ع ولد كلتله بلغ استاذ زياد اني طلعت ظل بالي منو زياد هذا نزلت وياها سولفنه مقتطفات عن الي حيصير بالقضيه سيارتي واكفه بكراج كدام لعماره الي بيه لمكتب وهيه تقدمت ع سياره دايو اسبرو بيضه من طلعنه هيه ورايه لان اتاشرلي تفضل فااطلع قبلهه صارت هل مره هيه كدامي شعرهه طويل نازل بكل سلاسه اندارت تسلم جذب نضري تحرك المداليه الي بركبتهه انتبهت اكو بالاتجاه الايمن لركبتهه شامه بارزه

صعدت سيارتها وحركت راحت اني جامد بمكاني وره شويه انتبهت شعندي بعدني هنا شبيك ياابو البنات ليش عيونك اكلت بنت العالم عندك بنات ياشيخ ياوريث ابوك شوكت عيونك كامت تنضر لعرض لوادم عبرت صعد سيارتي ورجعت لبيت احمد اخذت صادق وطلعت لديره ماريد ابقه بعد هناك نسواني وبناتي الله يخزيك يل شيطان ضليت الدرب كله اعاتب نفسي شلون ركزت باجر يصير بعرضي هيج كما تدين تدان

وصلت للبيت وصوت عياط طبيت اركض اني وصادق

شكو شكو

شفت نسواني ثنينهن ناس مالخه ناس وامي والشيخه واكفات ايفكن بينهن

بسسس تخبلتن انتن شسالفه

الشيخه نوال: الله رجعك يمه من رحت لليوم ناس معاديه ناس شوف حل يمه لنسوانك ماعدنه نسوان يعله صوتها اذا عله صوتها معناها خيالهل ماشد لجامهه زين

قيصر: صرت بنص هدومي كمت عليهن ثنينهن اني تعبان والف شغله براسي وكلت حرام اروح لنسواني الكاهن متمالخات وحدتهن يمكن حته تمشيط ممشطه نفس لفه الشعر الي من ثاني يوم العرس شادتها سحبت حزامي ووين يوجعجن اريد افهم السالفه هسه احجن

ثنينهن كبن

اششششش وحده وحده رقيه شصاير

رقيه: والله معليه اني هيه تتحارش بيه بتهه طالعه بدرسين وبناتي سميه طالعه بخمسه وسحر طالعه ب3وكامت تعيرني

قيصر: ع شنو تعيرج

امل: لالا كذب شيخ اني اكولك اني كتلهه يمكن حامل وهيه تخبلت

رقيه :كذابه /امل: انتي الكذابه

قيصر: ولجن رجل كرسي واكف كبالجن تردن تتمالخن بناتجن راسبات ولجن بعدهن ابتدائيه وينجن عنهن حته هيج مستواهن زفت ورجعنه لموضوع لخلفه ولجن ربن بناتجن وحط عينجن عليهن شو لامستوه دراسي بي خير مايوم شفت وحده منهن معدله اجيب واشتري بالهدوم وتالي ان كلت يله اطلعكم للبستان لو لااحد من العمام يلبس ملابسهم مطكعه ومن اصيح يابه ليش هيج لبسهن تكولن ماعدهن خبلتني عقل مخليتن براسي الف مره كلت يابه اني رجال اريد اشوف بيتي هادي ومرتي مرتبه موتنام يمي بدشداشه مطبخ ولجن ارتب روحي اكثر منجنن الله ياخذجن الله يخلصني منجن ساعه لسوده

اني ينكال عليه مورجال

-لاشيخ لاعاش الي يكول هل كلام محد حاجي هيج والله

-عجل من امي لشيخه تكولي لخيال يشدلجام خيله زين شنو معناها حسبي الله عليجن صار سنين كل سنه اكول ايعدلن وثنينجن عوج

عفتهن وطلعت صعدت سيارتي وهجيت ضليت افتر بسياره لين صار الليل رجعت لغرفه. اخويه محمد فارغه يجي بس بالعطل لفيت راسي ونمت يردن خلفه وهنه بناتهن معارفات يعلمنهن يعتنن بنفسهن شتخلفن بعد الصبح كعدت صحت بناتي لغرفه محمد ليش هل درجات

وحده. تكولي ماعرف احفظ الخ تكولي امي مدرستني الخ تكولي موامي وخالتي امل تعاركن بيوم امتحاني

ليش مرحتن لمرت عمجن سورير مومعلمه واني كتلهه اطيج ودرسيهن ليش. موحتن

بابا امي متقبل اروح لان خالتي عاليه عيبت عله امي

-شلون عيبت عليهه ع شنو

- كلتلهه خايبه شاربج اثخن من شارب الشيخ حفيه هههههه

-كامن يتمضحكن والله صادكه الله ينعله ايكذبهه بس عيب استحن فاتحات ادمغتجن لهل سوالف للدراسه متعرفن طلعن بله سميه بابا ضلي. اريدج

بابا عيوني انتي صرتي مره صف سادس عيب راسبه وثانيا يابابا ليش هيج حجابج اعوج دشداشته مطكعه دهن بابا خاولي مطبخ هاي دشداشه

سميه: ها بابا ماعندي غيرها

-ليش بويه مصار هواي من اشتريتلكم وديتن قطعجن الخياطه وينهن

سميه: اي بابا هيه هاي جديده

-حسبي الله طلعي بابا صيحيلي امج

رقيه: نعم عيني ابو داود

قيصر: بنتج لجبيره ليش هيج مبهذله

رقيه: هيه ثوله متعرف

قيصر: وانتي مو امها متعرفين تعلميهه

رقيه: اي اعلمهه بس هيه متفهم

قيصر: انتبهي ع بناتجن بدل ماحايره تتعاركين بناتج ليش ماعدهن لبس

رقيه: يااااا صخام ليش ماعدهن ذاك لدولاب متروس

قيصر: اذا عدهه ليش لابسه هل دشداشه مطكعه بنتج مره صارت انتبهيلها

رقيه: اووف هاي من تغسل صحون وله تغسل تنشف بثوبهه ميفيد تعلوم

قيصر: رقيه شجنتي تسوين قبل مااصيحج

رقيه: اغسل هدوم ليش عيني

قيصر: ثوبج مبلل من الصفاح ليش

رقيه: هاا موصحتني وع سريع غسلت ونشف ايدي بثوبي

قيصر: علمي نفسج وردي علمي بنتج طلعي رقيه طلعي

يمكن شغلات تافهه عد البعض بس كل رجل يحب اهتمام زوجته بنفسهه حطيت ايدي ع خدي شنو الحل حجي وحجيت ظرب وظربت زعلانات وطلعتهن تعلوم وكعدت وكتلهن يابه تره هيه مو اكل ولبس وخلفه انه اريد مرتي كذا كذا ومفاد وجبت سنين اعلم وتاليتها شلون سمعت لباب طبيت امل لازمه طرف شيلتها وتمسح دموعهه خير منو مات

امل: ليش ياابوداود هاي تاليتهه تراضي رقيه وتكولها انتي لمهمه اصلا انه ماطيق امل شمسويتلك انه

قيصر: منو راضه منو شنو هل حجي ناويات تخبلني انتن

امل: لاياشيخ بس لاتعصب فدوه لوجهك رقيه كالت انت داز عليهه وصالحتهه وحجيت علي

قيصر: ياصبر ياصبر امل عقلن بويه عقلن بنتج صف ثاني ابتدائي ليش راسبه انتبهي لبنتج وعوفن هل سوالف

امل :لعذر منك شيخ فدوه لاتزعل مني والله ماريد غير رضاك

قيصر: امل شوكت حفيتي اخر مره

امل: ها قبل متصير هل طلابه مال صادق

قيصر: يعني قبل امممم 42يوم43يوم تقريبا

امل: اي تقريبا

قيصر: وشوكت ناويه تشيلين شاربج بنت خالي

امل :ههههههه يحلو سوالفك ياشيخ والله انتضره يطلع زين شيوديني كل يوم داكه درب ام حميد الحفافه

قيصر: ميحتاج بنت خالي اليوم اجيبلج موس تحديدين زلفج وشاربج طلعي بنت خالي اريد انام

عفتهن تعبت نفس لحجي كل يوم وكل دقيقه بدلت وطلعت للبستان اشوف شغلي احسن ماضل قاضي بينهن عزلت نفسي بغرفه محمد ثنينهن ماحاجيهن واحله مابينه حته ع اكل منتلاكه الزلم وحد والنسوان وحد خلصان

عدن 8ايام واني عله حالي ويه نسواني وهنه يعرفن طبعي من اكول لاتوصلني ميوصلن ولايحجن يعرفني اهدء واني طبيعي احجي وياهن قبلها بيومين اطيت لشيخه فلوس حته من تشتريلهن الهن وللبنات من ام جعفر الي كدامنه تبيع ملابس ابيتهه

اليوم كاعد بالبستان ده اشوف لفلح شيحتاجون ميحتاحون للكاع رن تلفون ? طلعته من جيبي مكتوب ناي مثل الي جان ناسي شي ومن تذكره توتر وحار

الو

السلام عليكم استاذ قيصر

وعليكم السلام هلاست ناي

عيوني علمود الجلسه موتنسه بعديومين اذا تحب تكون متواجد ساعه 9جلسه

-اني عيونج يهنيالي اي اي ست ناي ان شاءالله موجود

-اوكي عيني باي

الله وياج الله وياج

جريت لتلفون من اذني صافن عليه شيصير لو كل الي يخابرون يحجون بهيج هدوءونعومه شبيهه لوادم الي تخابرني كلها تصيح ياااهووو منهوووو شنهووو

وهذي تحجي وياي عيني ويعني وباي بوياي ضيم

حطيت التلفون بجيبي ورديت للبيت اطيتهم علم يحضرولي جنطتي باجر نازل لبغدادويعرفون همه شلبس هناك

ثاني يوم العصر طلعت لبغداد رحت لبيت احمد بس متلهف ع شوفتها احساسي واكذبه واحجي ع نفسي بنفسي حته اخفي هل شي ثاني يوم ب9اكبال لمحكمه اتصلت بيهه كالت اني بداخل انتضرني بباب لخروج شفته طلعت لابسه تنوره قصيره سوده تحت الركبه وحذاءكعب عالي ورفيع شلون تمشي بي هذا ماعرف قميص سمائي وفوكاه مثل اليلك اسود قصير والقميص مدخلته جوه بالتنوره واحزام بي وجهه بزون بارز ع خصرها اتاملت كلشي بيهه لحد موصلت صارت كبالي شايله جنطه بيدهه بطريقه شلون اوصفهه يعني مثل الطابكه ايدهه ومعلكتهه بيهه وجنطه ثانيه سوده كبيره لازمتهه من اليده وشايلتهه بالايد الثانيه من وصلت حولت الجنطه الشايلتهه لاايده الثانيه ومدت ايدهه سلمت عليه قدمت ايدي صافحتهه

-استاذ قيصر المحكمه حولت اوراقنه لمحكمه البياع

-يعني شنو هسه

-لازم نتوجهه هسه نستلم تقرير فحص التو**يع بعده مجاي بالبريد احاول اطلع عليه بلكن تدبر

-ماشي تفضلي سيارتي بالكراج

-ههه شكرا استاذ سيارتي ايضا بالكراج وصدكني كتلك راح اتعب نفسك بس متستفاد شي

- ست ناي الوالد مكلفني بهل امر واحاول احله بالطريقه الي اختاروها همه ماريدها تكبر بينه وتصير عشاير علمود اخويه وكم واحد نخسر اهل ولايتنه

-كلامك صحيح تفضل استاذ

-لالاتفضلي كدامي

-شكرا

صارت كدامي شايله شعرها شلون نكول كبايه بس جبيره وملفوف داير مدايرها كصيبه بالكراج كل واحد صعد سيارته تحركت وتحركت وراها والله خوش تسوق وحركات لوعدنه بالولايه جان كالو ابوها واخوها ومخلو واحد مجابو طاريه وصلنه نص الطريق هيه كدامي شفتهه وكفت ع صفحه وكفت وراها نزلت شغتهه نزلت اكو دخان بسياره ركضت شنو هل دخان

-مادري شو فجئه هيج صار

-جريت دكمه البنيد فتحته كبت بوجي دخانه بيضه كتلهه لاطفيهه حاميه السياره رجعت شفت الحماوه صاعده عندج مي

'مي تشرب يعني

-خايبه مي شايله بسياره دبه جلكان

-لالا مشايله

ركضت عله سيارتي شايل اني طلعتهن وكمت اذب ع الراديتر ذبيت 3جلكانات يعني15لتر مي وشويه نزلت لحماوه فتحت قبغ لمي السياره ولاقطره مي بيها يمكن مال المي مزروف السياره موشله

-يعني شنو

-شوكت درتي مي للسياره

-مي لوبانزين قصدك

-مي مي شوكت درتي

-مدايره مي الهه ليش لازم احط مي

-هيه واكفه يمي باوعتلهه شحاجيهه اكو بطل بس هوه بقه بسيارتي رجعت انتبهت الصالنصه تبخر دخان ابيض ركضت جريت جوزه الدهن ماكو ولاقطره صدك كذب شنو هاي لسياره تمشي بالقدره

-عفيه ليش شبيهه

-مابيهه شي اتسلم عليج هاي السياره ماتحطيلها دهن مي صخام

-اوف شنو النوب طلع دهن عليه ليش احط دهن يعني

-ههههههه بس كوليلي هاي لسياره شتحطيلهه وتمشي

-بانزين غير

-وبس هذاهوه

-اي لعد شحطلهه بعد كل يوم اغسلهه وادير بانزين شسوي بعد

-هههههههههههه غطيه اخاف تستبرد خايبه لسياره كامت

-يعني شنو كامت

-يعني كعدت جانت نايمه وصحت هسه بويه لمكينه كامت احتركت

-لا عفيه صدك شنو هاي

-طفيهه طفيهه راحت اطفيهه وجتي بيدهه تلفون ده اسد لبنيد وعيني صارت عله قدمهه هيه كدامي واكفه حذائهه لعفو مفتوح مو مقبط صاير كله مثل السيور اصابعهه صغار وصابغتهن لون احمر ولابسه حجل خرب غيرته الي طلعج مشافج هيج طالعه بوياي مو نسوان مصايب سمعته تكوله وهسه شلون خالو

-عيني يبعد خوالي صعدي بسياره وخابري شوفي العالم

اندارت هزت راسهه اي ومشت كدامي صعدت بسياره اني واكف اسمع تشرحله تكوله لا نزلت الجسر بس مكملته كلهه للاخير فتت من النص استداريت وفتت شبيك خالو هاي موالجسر اني مكملته كله اكوستداره تذكر الي كتلي منا وطلعي اسهل هوه منا فتت اي شبيك لجسر الي عليه شط

ههههههههه خرب بضميرج اطينياه يبويه انه افهمه

السلام عليكم شلونك خويه

حبيبي الجسر مال الجادريه مكملناه واكفين بعد كم متر عن كليه دجله اي رحم الله والد*ك قبل الاستداره اني ماعندي حبل جان سحبتهه اي بالله لايخوي تأمر

اطيتهه التلفون شكلهه ايضحك الدنيه حاره

كومي بسيارتي ست انشغل تبريد بين ميجون

-اف يعني هسه ماكدر اشغلهه

-لامكدرين ناعله والديهه للسياره شتشتغل صعدت بسيارتي شغلت تبريد الها واني نزلت واكف يم سيارتها عيب العالم تشوفني واكف شتكول والله شويه واجه رجال متوسط العمر نزلت هيه كالتله خالو سلمت عليه

الخال: شبيهه السياره

قيصر: خويه كول شمابيهه لابيهه مي لابيهه دهن تشتغل ع قدره هل سياره

الخال: لابربك ولج غيرتحطيلهه

-وشمدريني خالو انتو مكلتولي شعليه اني

الخال :ههههههههه راحت فلوسك يصابر كومتيهه عاشت ايدج ولج مصارلها شهرين عدج لسياره هههههه

-اوف خالو لتضحك اصلا من وراكم انتو مكلتولي بس علمتوني اسوق

قيصر: خربان ضحك عليهه يمكن اني حسدتهه خابرو ع كرين جيرانهم اجه سحب لسياره وهيه صعدت بسياره خالهه معفتهم اله راحو يله صعدت بسيارتي والله يالله خايبه ماتعرفين حاشره خشمج ليش بويه هوه هل كدودته خشمج حته لحمه مابيه حاشرته ليش اوووف نزلت جسر الجادريه توجهت ع كراده واكف بالازدحام انداريت شفت جنطتهه جوه الكرسي ع دواسه طلعتهه حطيته ع كرسي وخابرتها

الو ست ناي جنطتج بسيارتي

اه جد اوووف نسيتهه والله

تحبين اجيبلجياهه لمكان معين

اذا ممكن استاذ لعصر بالمكتب لوسمحت

-تدللين عيوني

نزلت استريت كم شغله صارهواي ممشتري لبس صعدت سمعت صوت تلفون بس موصوت تلفوني جان من لجنطه انتبهت بجيب بضهر الجنطه محطوط مفتوح سحابه طلعته مكتوب ال لاحنونه صفنت شنو معنه الاسم رجعته وتذكرت شغله هيه كم تلفون عدهه بالكرت مكتوب رقم واحد وخابرتهه جاوبتني عليه هذا شنو لعد دك اكثر من مره اتصلت بيهه

اعتذر ست ازعجتج بس تلفون حضرتك حدود ال20مره دك كلت ابلغج اخاف شي ضروري

-العفو بس اذا ممكن تشوفلي الاسم هوه بجيب بضهر لجنطه صغير

-اي تدللين خايبه انتضرج انه اندله طلعته كتلهه احم ال ال لاحنونه

-اها اها اوك اذا ممكن تقفله

-تدللين صوتهه مثل الي توترت من كتلهه الاسم جان جهازها سني رو**ن فتحته ده اطفيه اجتي رساله جان هذا الجهاز يعرض نص الرساله ع شاشه مكتوب بيهه

جاوبي ناي ابتليت بيج وبااخوج اني ليش تخلون خالكم ايخابرني روحي لاابوج شكو ونقاط تعلن اكو

اكو للرساله بقيه دوخني لمسج بس مو من اخلاقي افتح تلفون وافتشه جانت لخلفيه صورتها ضاحكه ورافعه تك حاجب مبينه رصعه بخده مأشره عليهه بااصبعهه شكل كلش حلو اتعوذت من ابليس وطفيته ورجعته بمكانه طخ شي بين اضفري واللحم جكني شنو هاي حطيتهه بحضني ده اشوف شنو هيج جكني شو لادم طلع ولاشي حته اكول دنبوس ورقه بيضه صغيره طلعتهه جانت مربعه ملفوف بيهه صورهه تقريبا 8صور مال ج*سيه رجعتهن بمكانهن بس اتمنيت اخذ وحده ليش مادري بس شوفتهه تخليني ابتسم حاولت امنع نفسي ونزلت لبيت احمد عفت الجنطه بسياره

ساعه3طلعت للمكتب مالهه اكو شي قبل مااوصل دفعني غصب شي بداخلي اخذت صوره حطيتهه بجيب لستره وصعدت اطيهه لجنطه