Mula sa social media accounts ni Elaine Jimenez, humanap sila ng clues sa lugar kung saan ito lumaki noon. May mga lumang picture silang nakita kasama ang ina nito na si Leila Punzalan, maging ang dalawang babaeng nagngangalang Rowena at Ellen Punzalan.
Nang i-search nila ang pangalan ng ina nito, nalaman nilang namatay ito sa isang sunog, tatlong taon na ang nakararaan. May mga larawan ding nagpapahiwatig na pansamantala itong tumira sa poder ni Rowena Punzalan bago ito napunta sa poder ng ama nito.
Wala naman sila kahit na anong nahanap patungkol kay Ellen Punzalan, na matapos makatanggap ng scholarship sa Singapore ay 'di na nagpakita pa sa mga ito.
Nang marinig nilang bumukas ang pinto ng van, pare-parehong napalingon sina Mia, Angel at Nick.
"Anong nangyari?"
