Kasabay nang malakas na pagsabog mula sa loob ng warehouse ay siya ring mabilis na pagsugod ng mga tauhan ni Xian. Kaniya-kaniya silang bitbit ng baril habang matamang nakikipagpalitan ng bala sa mga tauhan ni Brayden.
Sabay-sabay silang sumugod, halos hindi matigil ang ingay ng putukan. Sa bawat segundo pang nagdaraan ay ang pagtumba at pagkamatay ng ilang kalalakihan, sa kampo man ni Brayden o ni Xian.
Nang medyo humupa ang bantay papasok sa warehouse ay saka naman sumenyas si Xian na papasukin ang naglalakihang army truck. Sakay nito ay ilan pa sa mga armado at well-experienced niyang mga tauhan.
May isa pa ulit sumabog sa bandang dulo ng warehouse. Kitang-kita ko pa mula rito sa pwesto ko ang apoy na namuo sa kalangitan, pati ang maitim nitong usok na nakikisabay sa agos ng hangin.
