AS THE days passed, mas tumatagal ay mas bumibigat para kay Howard na sarilinin ang problema. Kung kaya't tadhana na mismo ang gumawa para masabi niya iyon sa malalapit na kaibigang sina Paul at Gelo nang magkaayayaan ang magkakaibigan na mag-inuman mismo sa kanilang bahay. Nagpaalam naman siya kay Zionne na mag-iinuman sila nina Gelo at Paul pagkauwi.
"Gelo, shot mo na," wika niya sa gitna ng inuman. Tinanggap kaagad iyon ni Gelo. Naroon sila sa may terrace at mahimbing na natutulog no'n ang mag-ina.
"Alam mo, Howard, masaya ako dahil sumama ka na ulit sa amin ni Paul," wika iyon ni Gelo. Sila kasi talagang tatlo ang magkakasabay na na-deploy ni SM at magkakasabay din na mag-training, ngunit nahiwalay nga lang ng department si Howard kung kaya't naging madalang silang magkita-kita no'n.
