AKRIM
“Anong plano mo ngayon? Pupuntahan na ba natin si Ricky?” ang tanong ni Alcon.
Bahagya akong nag-isip, hanggang sa mapagdesisyonan kong huwag na muna.
Naisip ko lang, kung nagawa akong iligtas ni Ricky noon, pati ang anak ko sa tiyak na kamatayan, alam ko, sisiguraduhin din niya na ligtas ang paglalagakan niya sa panganay ko.
“H-Hindi na muna, gusto ko munang puntahan at makita ang anak kong si Angel,” ang mahina kong sagot. Medyo naguguluhan pa nga ako noong una kung alin ang uunahin ko.
Ang pagpunta kay Ricky para alamin kung saan niya dinala ang anak kong panganay, or puntahan na muna ang bunso kong anak na ngayon ay nasa ospital pa at maselan ang kalagayan.
At the same time, medyo naaalangan din akong mapalayo kay Andrea, lalo na’t hindi pa rin mabuti ang lagay niya.
