“MASYADONG nakakaloka ang mga nangyari ngayong araw,” sabi ni Lorice sa dalawang lalaki habang nasa dining area sila at umiinom ng beer in can.
“Hindi lang ‘yon, dumating din si Madam kanina kaya hindi ko alam kung ano ang gagawin,” saad naman ni Wilkins.
“Pero hindi iyon ang nakakatakot sa lahat. Mukhang alam na yata ni Madam na nasa Black Moon si Lucas,” tugon naman ni Layne.
“Kailan n’yo pa alam na nasa Black Moon si Lucas?” Agad silang napatayo sa kinauupuan nang makita si Bettina na nasa pinto ng unit nila. Galit na galit ang mukha nito at nanginginig sa inis.
“M-Madam…” Nagtinginan ang tatlo at walang maisagot sa ginang. Nagulat sila. Hindi nila alam na bigla na lamang sila nitong bibisitahin dahil hindi na nila alam kung kailan ito huling tumawag sa kanila sa sobrang tagal.
