قلوب تائهة

الممرضة : مدام انتي بخير ،الحمدلله مصار شي انتي عندج سكر او ضغط زمن: اني وين شون وصلت هنا؟ الممرضة: الظاهر وگعتي بلا متحسين الحمدلله وگعة خفيفة هسة تطلع التحاليل بس ضغطج مفول انتي مماخذة علاج.. زمن: ضغطي ، الكلية ، اولادي بيش الساعة عفية لازم ارجع الممرضة : مدام ،رجاءا لاتتوترين انطيني تلفون اخابر ع اهلج يجوچ.. زمن: اهلي ، اخذت صفنة طويلة وإني اذكر شون بديت يومي مثل كل يوم.. علي ،حسن وردة يلا ماما كعدو بسرعة تأخرنا.. سرمد..سرمد يلا كوم يمعود اصحى يومية نفس الحجي اگلك نام من وقت شنو لازمة السهر .. سرمد: زمن بروح ابوج فتحيلي المي بالحمام وجيبيلي المنشفة اگوم اغسل .. زمن : بلا ..متكول الحمام جاهز ومنشفتك بصفك بس گوم دخيلك عندي محاضرات الصبح ولازم اوصل الجهال واذبك بالطريق لو توصلنا انت وترجع تأخذنا .. سرمد: لا ..عندي موعد ويا علاء صديقي اتاخر بالرجعة .. زمن: والله مااعرف شنو تاليتك ويا صديقك هذا دگوم عيني گوم .. سرمد: زمن تعالي غسليلي .. زمن: سرمد ..هسة يفوت واحد من الجهال عيب كوم يلا..جيب ايدك.. سرمد : حاااضر .. زمن: حرام مخلفة اربع جهال مو ثلاثة . اروح احضر الريوگ .. وردة ..تعالي ماما حطي الكلاصات جيبي جنطتج وجنط اخوانج ..خل احطلكم الاكل بيهم.. وردة: معلية گولي لولدج يجيبوهة معلية .. زمن: اووف ..اصلا ليش اتعب روحي مااجيبهم احسن مااسمع طولة لسانج .. يلا ..گعدو تريكو اشوف ابوكم وينة؟ سرمد: هياتني .. زمن: هاي شنو راسك مبلل غير تنشفة مصار يومين من طبت من الافلاونزا.. سرمد: جوعان ..خل اتريگ ..وانتي مو مستعجلة.. زمن : هاك الخاولي نشفة ..اجيب الشسوار انشفة الك.. سرمد: مو تتاخرين؟ زمن : اتأخر..ولا تتمرض واحير بالاجازة انوب تعدي الجهال.. سرمد: فديت الخايف علية.. كرصني من خاصرتي وضحك..والجهال ضحكو ع ضحكتة.. زمن: خزرتة ..انو عيب يسوي هاي الاشياء گدام الجهال.. سرمد: عيب لكم شهالتصرفات يلا اكلو اخرتونا.. زمن : اني الشرطي بالبيت هيج زوجي واولادي واخواتي وحمويني يلقبوني اني الجبيرة بهالبيت أو اني ماخذة دور المسؤولية عنهم.. بيتي مربوط عالساعة وخواتي مزوجات حمويني الصغار مرات بيتنا مابي محط رجل من الجهال وأصدقاء اولادي احنا البيت الكبير أي مناسبة ولادة زواجة بيتنا احب لمة خواتي وحمويني وتنفيذ مني لوصية عمتي الله يرحمها يبقى هذا البيت قائم ومفتوح واظل اللمهم عمود لاينسون اخوتهم.. وإني ظليت هيج مرات يندگ الباب من الصبح.. وإني اظل مثل المصراع.. سرمد: زمن ..فتحي الباب ..من يمج.. زمن : لازم اخلي الباب مفتوح احسن ..تلاكيها لو زينة لو سارة خواتي.. زمن: هلو عمر صباح الخير .. عمر حماية الوسط مزوج اختي الوسطانية زينة .. عمر: صباح العسل..مرة اخوية .. فدوة اشتميت ريحة الچاي وجيت ميت جوع ..واختج خطها يجي من الستة ونص بلا ريوگ اطلع ترضيها.. زمن: لا ماارضاها ..وحاسبة حسابك عالريوگ يلا فوت بسرعة فضوني وراي دوام .. عمر: لاسدين الباب علي كالي انتظر اجي وياك.. زمن: مو دا اكول ابقي الباب مفتوح ..ليش دا اسدة.. علي،سارة: صباح الخير... زمن: صباح النور..بوست أختي الصغيرة طالبة جامعية ازوجت من جانت صغيرة ورا مااتوفى أبوية وعمتي رادتة لاابنها الي جان يظل مركز بيها لمن تجي بيتنا وتساعدنا لهذا التم شملنا احنا الخوات الثلاث نزوج اخوان ثلاثة.. سارة ماعدها اولاد لسة، زينة عدهة ولد وبنية الولد حضانة وبنتة ويا اولادي بالمدرسة اني اوصلهم وزينة اختي ترجعهم وتحضرنا الغدا الطابختة اني وهي ترتب الصفرة .. هذا التقليد ظل باقي من أيام عمتي كل يوم الصبح اشوف الحب بوجوه عائلتي نظرة الرضا بعيون زوجي وهو شايف اخوانة وعائلتنا ملتمة .. بس بنص هاي الهوسة انسى روحي انثى وتغيب علية تفاصيل مجنت اعرف انو هي لازم تكون موجودة.. سرمد..سرمد.. سرمد: تعالي ..هنا .انتي دارين بالكل وناسيتني .. زمن: سرمد شهالتصرفات ترة انت جبير مو مراهق اتخيل حسين لو علي فاتو شون تقبل اولادك يشوفونك هيج.. سرمد: شبيج زمن ترة احنا متزوجين واذا عالجهال شكاعد نسوي خل يشوفون ابوهم حاضن امهم شكو بيهة .. زمن: بالليل..بالليل ..يلا سرمد بدل الله يخليك خ نروح .. سرمد: اووووف..حاضر دقائق ... عمر: زممممممن..اني طالع .. زمن: خل اوصي عمر ع الجهال الظهر يجيبهم لااتأخر عليهم بالرجعة.. سرمد : روحي ..روحي..لايفوتج حدث ماتذكري.. درت وجهي الة ورحت اوصي عمر .. عمر ..دقيقة الظهر جيب الجهال وجيب وياك خبز وطرشي مسوية دولمة خل اخابر مرتك عمود لاتخلينا ناكلها باردة.. عمر: الله دولمة ..من هسة اشتهيت.. زمن: ديلا ..يلا كلها كم ساعة ونتغدا بس فضوني تأخرت.. سرمد : يلا جهال ..بسرعة تأخرنا.... زمن: سرمد تلفونك يدگ ..يلا امشو زعاطيط..يلا حبيبتي لينا ابوج راح وامج متيهة امشي خ نروح .. مشواري الصباحي وسط خلافات الجهال ضربني.. اذاني ... زمن: گعدو ماما خ نوصل سلامات ..سرمد دخيلك أحجي ..اركز بالسياقة لو هوسات الجهال.. سرمد: كعدو ..بابا بلا وكاحة.. زمن: هاي الي الله كدرك عليه... علي اذا ماكعدت هسة اوكف السيارة واسحلك بالشارع كافي احترم نفسك ..وردة ..انتي كعدي عاقلة هم .. يلا..وصلنا نزلو.. ماما علي ..مو ترجعلي بلفتك ... حاضر ماما... مثل كل يوم يزين برود موقف سرمد اللي ملتهي بلعبة أو حاط سماعات بااذنة ..بالاخير هو مو ابوهم هو اخوهم وإني تعلمت على هالحال.. سرمد..سرمد..سرمد وصلنا لدائرتك يلا.. لاتنسى جنطتك ولابتوبك بالصندوق . زين ذكرتيني ..ببرود.. سرمد: يلة مع السلامة تاخرتي ع دوامج.. زمن: طلعت غراضك كلهم.. اي ..طلعتهم .. يلا باي ..متتغدا ويانا .. سرمد : اشوف..بس عالاغلب أن شاء الله ارجع يلا ..باي.. زمن : مشيت خطوات بالسيارة سمعت صوت تلفون .. هذا مو تلفوني.. يووو..هذا تلفون سرمد..نساه.. شوي واستداريت دا ارجع اودي تلفونة .. هذا صديقة علاء اهووو..من الصباحية .. دك ٣ مرات والاستدارة ازدحام .. يوو يا سرمد لو راكنة السيارة ورايحة مشي احسن ... اووف وهذا بس يدك خل اقفلة احسن .. يوو ..مسوي رمز ..شوي ..واجتي رسالة .. هااا..حبيبي مترد شو؟ زمن: من غبائي أو قلة انتباهي ..عبالي رسالة صديق لصديقة مو بالي ابد اني نايمة ورجلية بالشمس .. واخيرا استداريت ...شفت سرمد طلع من دائرتة وصعد بسيارة هاي منو..منو هاي البنية .. تقربت شوي ركزت هاي البنية كأني شايفتها راسا اجة بالي حجي دلال صديقتي.. زمن ..انتي صديقتي واحبج بس دير بالج ع زوجج وأبو بينج الدنيا مو خوش.. زمن: دلال ..شنو الة داعي هالحجي ترة اني مرتاحة وهو هم وماعدنا مشاكل.. دلال: زمن ..اصحي لازم تعرفين زوجج ويامن يطلع ويرجع.. زمن: دلال وضحي شسالفة..غير تحجين.. دلال: زمن مااعرف شااكلج بس لازم تعرفين .. زمن: شنو.. دلال: ذاك اليوم ودينا الجهال لمول زيونة وشفت رجلج كاعد ويا بنية بالبداية عبالي طالعين طلعة عائلية واختج سارة أو زينة بس شفت تصرفات البنية ابد مو راحة .. زمن: دلال..اكيد غلطانة ..متوهمة اكيد..سرمد ماعندة هالسوالف..احنا.. دلال: ستار گالي لاتحجين لان مرح صدك وصير مشكلة ..بس مو هاين علية أحد يستغفلنا وإني اعرف شون مدللتة .. حبيبتي زمن ..لاتزعلين بس حرصي ع بيتج.. ساعتها بس عرفت انو حجي دلال صح وإني نايمة ع اذاني ..بس ليش احنا ماكو بينا اي خلافات ..سرمد مينام اذا ماحاضنتة اذا تمرض مثل اي واحد من جهالي ميعرف اذا مو على راسة ..ليش حتة يدور وحدة غيري.. بس شكل البنية مألوف ياربي وين شفتهة وين شفتهة .. وإني دا افكر ضربت سيارة كدامي ..ومن الطبة صحيت .. ونزل صاحب السيارة يصيح ويعيط .. والتمو الناس ..باوعت ع السيارة مشت .. وإني مااعرف شون وكعت وصحيت بالمستشفى جماعة الخير نقلوني ..وصحيت ع المغذي باايدي مااعرف شصار بية ذكرت جهالي دوامي.. شنو الصار .. سيارتي ..بقت مركونة مدري ساحبيهة المرور.. فصلت المغذي ..وصحت عالممرضة سالتها ع جنطتي ..جايبيهة وياهم.. الممرضة حبيبتي بعدج دايخة ميصير طلعين .. زمن: لا زينة مالية شي .. عفية متعرفين وين ودو سيارتي .. الممرضة : اكيد ..بمرور اليرموك اقرب شي .. ومرح تكدرين تطلعيهة اليوم .. الوقت تأخر.. زمن: بيش الساعة ؟ الممرضة:ب٣ عزا هسة يظل بالهم علية .. مو گتلج خابريهم.. ماكو داعي ..رح اخذ ت**ي ..اشكركم ع جهودكم ويايا.. واجبنا ست..دير بالج ع روحج ..بالقليل خليني افحص ضغطج.. من اوصل اقيسة شكرا.. اول مامشيت برا المستشفى حسيت روحي مهزوزة وتعبانة .. والشارع حاستة غابة ..ردت ابجي بس عزة نفسي منعتني ..خفت لايشوف الناس ان**اري ..دورت بجنطتي ع الموبايل ماكو ..عزة اكيد بقى بالسيارة لو ضاع.. ركبت السيارة وأحس راسي طبل من تزاحم الافكار براسي واكو غصة داخلي شسويت عمود استحق هاي ال**رة .. شلون رح لواجهة لسرمد وشنو ردة الي.. اظل ساكتة.. مدام..مدام ..اختي.. هااا... وصلنا ..مو هذا العنوان الردتي.. اي هنا.. مبين عليج تعبانة اذا حابة ادخلج للفرع.. زمن: لا شكرا البيت قريب .. انزل هنا .. الله وياج.. شكرا.. تمشيت بخطوات ثقيلة ..ماودي ادخل البيت ولااريد أحد يشوفني .. اول ماوصلت فتحت الباب .. لكيت الكل منتظرني ومحضرين الغدا.. زينة: اجتي اخيرا ست الكل ..وينج يمعودة ..متنا جوع.. عمر: زمن ..بيج شي ..وجهج اصفر.. علي: زمن ..شبيج ..صاير شي .. سارة : زمن ..بيج شي.. زمن : كنت فعلا دايخة وتعبانة اكو كرسي كعدت علي والتم الكل حوالية شااگوللهم شااگول لعائلتي علي عرفتة وشنو رد الحوالية رح اخرب حياة خواتي ..الي كان والدي ميقبل بينه وحدة تزعل لاتاثر عالباقين جنا نسكت ونحل مشاكلنا بدون مناثر ع بعض.. هسة المسألة مو سوء تفاهم ولامشكلة تافهة هذي خيانة .. باوعت بالوجوه دورت ع سرمد مالگيتة هو هذا موعده ويا علاء صديقة ..صديقة لو صديقتة.. شوي واندك تلفون زينة اخر وحدة اتصلت عليها .. زينة : تلفوني يدك.. عمر ..هذا رقم زمن.. زمن ..وين تلفونج .. جنت تعبانة مااكدر ارد.. عمر: الووو..منو ويايا.. العفو ..انت زوج صاحبة التلفون السوت حادث الصبح.. حاااادث.. زمن مسوية حادث.. زينة : عزة .. سارة : زمن ..بيج شي أحد تأذة . زمن: ماكو شي شوي دخت وضربت سيارة واحد كدامي ونقلوني مستشفى.. وهاي جيتي.. علي : جان خابرتي شون جيتي ..سرمد يدري ... اشرتلهة براسي لا.. عمر: نشكرك اخي العصر اجي اخذة التلفون.. سد التلفون.. عمر: شون سوين حادث ومتبلغين أحد.. زمن: مصار شي ..بس ضغطي جان صاعد.. زينة : من يمتة ضغطج يصعد.. علي: ع كيفكم وياها..فوتي ارتاحي شوي..كومي يابنات ساعدوها خ تبدل وترتاح.. اجوي جهالي ثلاثتهم بحضني خايفين علية .. محسيت روحي ..الا نايمة ... وسمعت صوت سرمد هزني ..ماعرفت شون اختلطت المشاعر اريد اضربه اصيح علي ..ابچي.. دخل علية ..والخوف باين علي .. سرمد: زمن..زمن بيج شي متاذاية اوديج للطبيب.. مااعرفت خوفة علية حقيقة لو تمثيل .. بس اكيد جواية شي ان**ر ومرح ينجبر مرة ثانية.. للقصة بقية .. تحياتي.. نازك الملائكه