ANG natuklasang kakayanan at ang libro ng karunungan ay inilihim ni Virginia sa kanyang ina. Kabisado na niya ang ugali nito. Hindi nito magugustuhang malamang nagbabasa siya ng ganoong uri ng libro, at lalong hindi nito magugustuhang malaman na may taglay siyang kakayanan.
Natatandaan pa niya nang minsang linisan ang silid ng ina. Nakita niya ang librong madalas nitong basahin habang isa-isang inilalatag sa ibabaw ng mesa ang mga tarot cards. Ngiting-ngiti niya iyong kinuha sa lalagyan at excited na binasa. Nakita niya ang mga cards sa drawing na may mga nakasulat sa ilalim at binasa ang mga iyon. Nakita rin niya ang naka-drawing na hugis ng mga kamay nang ilipat pa ang mga pahina. Aliw na aliw niyang binasa ang ibig sabihin ng mga linya sa palad na 'yon. Nang mapasukan siya ng ina ay n
